Keti Bambangi ya Yehowa Ke Vukanaka ti Mabundu ya Nkaka?

Beto kele Bambangi ya Yehowa, beto ke sepelaka kusolula mambu ya lukwikilu ti bantu ya mabundu yonso, kansi beto ke vukanaka ve ti mabundu ya nkaka sambu na kusambila ti bantu yina balukwikilu na bo me swaswana ti ya beto. Biblia ke monisa nde Bakristu ya kieleka kele ya “kuvukana kumosi mbote-mbote,” mpi kima mosi ya mfunu yina ke vukisa bo kele kukwikila na mambu ya mutindu mosi. (Baefezo 4:16; 1 Bakorinto 1:10; Bafilipi 2:2) Diambu yina ke lombaka mambu mingi kuluta kundima kaka nde bikalulu bonso zola, mawa, mpi ndolula kele bikalulu ya mfunu. Balukwikilu na beto me simbama na nzayilu ya sikisiki ya Biblia; kana nzayilu yina vandaka ve, lukwikilu na beto zolaka kuvanda mpamba.​—Baroma 10:2, 3.

Biblia ke fwanisa kuvukana sambu na kusambila ti bantu yina ke kwikilaka mambu ya nkaka bonso kuditudila na nsi ya vangu yina kele ve kiteso mosi, mpi diambu yai ta bebisa lukwikilu ya Mukristu. (2 Bakorinto 6:14-17, noti na nsi ya lutiti) Yo yina, Yezu pesaka ve balongoki na yandi nzila ya kuvukana ti mabundu ya nkaka. (Matayo 12:30; Yoane 14:6) Mutindu mosi, Nsiku yina Nzambi pesaka na nzila ya Moize songaka bantu ya Izraele ya ntama nde bo fwete vukana ve ti bantu yina kele pene-pene na bo sambu na kusambila. (Kubasika 34:11-14) Na nima, bantu ya Izraele ya kwikama buyaka lusadisu yina zolaka kusala nde bo sala bangwisana ya lusambu ti bantu yina bo vandaka ve kukwikila mambu ya mutindu mosi ti bo.​—Esdrasi 4:1-3.

Keti Bambangi ya Yehowa ke solulaka ti bantu yina balukwikilu na bo me swaswana ti ya bo?

Ee. Bonso ntumwa Polo, beto ke zolaka kubakisa bangindu mpi balukwikilu ya “bantu mingi” na kisalu ya kusamuna. (1 Bakorinto 9:19-22) Ntangu beto ke solulaka ti bo, beto ke sadilaka na masonga yonso ndongisila ya Biblia yina ke songaka beto na kumonisa “luzitu ya mingi” na bantu ya nkaka.—1 Piere 3:15.