Keti Bambisi Ke Kwendaka na Zulu?

Mvutu ya Biblia

Biblia ke longaka nde na bigangwa yonso ya kele na ntoto, bantu fioti mpamba ta kwenda na zulu. (Kusonga 14:1, 3) Bo ta kwenda kuzinga kuna sambu na kuvanda bantotila mpi banganga-nzambi ti Yezu. (Luka 22:28-30; Kusonga 5:9, 10) Kansi bantu mingi ya me bikala ta futumuka sambu na kuzinga na paladisu na ntoto.—Nkunga 37:11, 29.

Ata kisika mosi ve Biblia ke tubaka nde bambwa to bambisi yina bantu ke tambulaka ti yo ta kwenda kuzinga na paladisu na zulu. Yo kele sambu na bikuma ya mbote. Bambisi lenda sala ve mambu yina yo ke lombaka kusala sambu na kufwana nde ‘bo binga bo na kukwenda na zulu.’ (Baebreo 3:1) Na kati ya mambu yango beto lenda tanga kumonisa lukwikilu, kuzaba Nzambi mpi kuzitisa bansiku na yandi. (Matayo 19:17; Yoane 3:16; 17:3) Bigangwa yina Nzambi salaka ti kivuvu ya kuzinga mvula na mvula kele kaka bantu.—Kuyantika 2:16, 17; 3:22, 23.

Sambu na kukwenda na zulu, bigangwa ya kele na ntoto fwete futumuka. (1 Bakorinto 15:42) Biblia ke tubilaka bigangwa yina me futumukaka. (1 Bantotila 17:17-24; 2 Bantotila 4:32-37; 13:20, 21; Luka 7:11-15; 8:41, 42, 49-56; Yoane 11:38-44; Bisalu 9:36-42; 20:7-12) Kansi bigangwa yango yonso kele bantu, bambisi ve.

Keti bambisi ke vandaka ti moyo?

Ve. Biblia ke tuba nde bambisi ti bantu kele mioyo. (Kutanga 31:28) Ntangu Nzambi salaka bakala ya ntete, Adami, Nzambi pesaka yandi ve moyo kansi yandi “kumaka moyo ya ke zinga.” (Kuyantika 2:7, noti ya nsi ya lutiti) Moyo ke vandaka ti bima zole: “mfututu ya ntoto” mpi “mpema ya luzingu.”

Keti moyo ke fwaka?

Ee, Biblia ke tubaka nde moyo lenda fwa. (Levi 21:11, noti na nsi ya lutiti; Ezekiele 18:20) Kana muntu ti mbisi kufwa, bo ke vutukaka na mfututu ya ntoto. (Longi 3:19, 20) Na kutuba ya nkaka, bo ke zingaka diaka ve.a

Keti bambisi ke salaka masumu?

Ve. Kusala disumu ke tendula kuyindula, kuwa to kusala kima mosi ya ke fwa bansiku ya Nzambi. Sambu na kusala disumu, kigangwa fwete vanda ti makuki ya kubaka balukanu, kansi beto me zaba nde bambisi kele ve ti makuki yina. Bo ke salaka mambu ti mayele yina bo ke vandaka ti yo (instinct) na bilumbu fioti yina bo ke zingaka. (2 Piere 2:12) Na nsuka ya luzingu na bo, bo ke fwaka ata bo ke salaka ve masumu.

Keti kuniokula bambisi kele mbote?

Ve. Nzambi pesaka bantu kiyeka ya kuyala bambisi kansi yandi pesaka bo ve nswa ya kuniokula bambisi. (Kuyantika 1:28; Nkunga 8:6-8) Nzambi ke kudibanzaka sambu na mambote ya konso mbisi, yo vanda ya bandeke ya fioti-fioti. (Yonasi 4:11; Matayo 10:29) Yandi pesaka bansadi na yandi nsiku ya kusadila bambisi mambu na mutindu ya mbote.—Kubasika 23:12; Kulonga 25:4; Bingana 12:10.

Baverse yina ke tubila bambisi

Kuyantika 1:28: “Nzambi sakumunaka [bantu ya ntete], mpi yandi tubilaka bo nde: ‘Beno buta mingi mpi beno kuma mingi, beno fulusa ntoto mpi beno yala yo, mpi beno yala bambisi ya masa ya nzadi-mungwa mpi bigangwa ya ke pumbukaka mpi konso kigangwa ya ke zingaka yina ke tambulaka na ntoto.’”

Mambu yina yo ke tendula: Nzambi me pesaka bantu kiyeka ya kuyala bambisi.

Kutanga 31:28: “Nge ta baka moyo mosi na kati ya mioyo 500, ya bantu, ya bangombe, ya bampunda, mpi ya mameme, na maboko ya basoda yina kwendaka na bitumba, bonso mpaku.”

Mambu yina yo ke tendula: Bantu ti bambisi kele mioyo.

Bingana 12:10: “Muntu ya lunungu ke kebaka bambisi na yandi ya bwala.”

Mambu yina yo ke tendula: Bantu ya mbote ke kebaka mbote bambisi na bo, yo vanda bambisi yina bo ke tambulaka ti yo.

Matayo 10:29: “Keti bo ke tekaka ve tu-bandeke zole na mbongo mosi ya kibende ya mfunu mingi ve? Kansi ata mosi ve na kati na yo ta bwa na ntoto kukonda nde Tata na beno kuzaba yo.”

Mambu yina yo ke tendula: Nzambi ke monaka mpi ke kebaka bambisi—yo vanda bandeke ya fioti-fioti.

a Sambu na kuzaba mambu mingi, tala kapu 6 ya mukanda Inki Biblia Ke Longa Beto?