NTENDULA YA BAVERSE YA BIBLIA
Marko 1:15—“Kimfumu ya Nzambi Me Kuma Penepene”
“Ntangu ya bo me tulaka me lunga, mpi Kimfumu ya Nzambi me kuma pene-pene. Beno balula ntima, mpi beno kwikila na nsangu ya mbote.”—Marko 1:15, Mbalula ya Nsi-Ntoto ya Mpa.
“Ntangu me lunga. Kimfumu ya Nzambi me kuma penepene. Beno balula ntima. Beno ndima Nsangu ya Mbote.”—Marko 1:15, Bible en Kituba.
Ntendula ya Marko 1:15
Yezu Kristu tubaka nde Kimfumu ya Nzambia vandaka “penepene,” sambu yandi mosi, yina ta vanda Ntotila na Kimfumu yina na bilumbu ke kwisa, vandaka na ntwala na bo.
Yezu tubaka ve nde Kimfumu ya Nzambi yantikaka dezia kuyala. Na kutuba ya masonga, na nima ya kutuba mambu yina yandi songaka balongoki na yandi nde Kimfumu ta kwisa na bilumbu ke kwisa. (Bisalu 1:6, 7) Kansi, yandi kumaka na ntangu ya mbote, na mvula yina Biblia tubaka na ntwala nde yandi ta kwisa bonso Ntotila yina ta yala na bilumbu ke kwisa.b Yo yina, Yezu tubaka nde: “Ntangu ya bo me tulaka me lunga”—ntangu sambu yandi yantika kisalu na yandi ya kuzabisa evanzile to nsangu ya mbote ya Kimfumu na bantu yonso.—Luka 4:16-21, 43.
Sambu bantu kubaka mambote ya nsangu ya mbote ya me tala Kimfumu, yo vandaka kulomba nde bo balula ntima, disongidila, bo wa mawa sambu na masumu na bo ya ntama mpi bo zinga na kuwakana ti bansiku ya Nzambi. Bantu yina balulaka ntima monisaka nde bo kwikilaka na nsangu ya mbote ya me tala Kimfumu yai ya ta yala na bilumbu ke kwisa.
Mambu Yina Bo Ke Tubila na Marko 1:15
Yezu tubaka mambu yai na luyantiku ya kisalu na yandi ya kusamuna na Galilea. Disolo ya mutindu mosi yina kele na Matayo 4:17 ke tuba nde, “banda na ntangu yina,” Yezu vandaka kulonga mambu ya me tala Kimfumu ya Nzambi. Kimfumu vandaka ntu-diambu ya kisalu ya kulonga ya Yezu. Na kutuba ya kieleka, Baevanzile iyac ke tubila Kimfumu mbala kuluta 100; mpi mbala mingi yo kele na mambu yina Yezu tubaka. Na Biblia, Yezu tubilaka Kimfumu ya Nzambi mbala mingi kuluta mutindu yandi tubilaka mambu yonso ya nkaka.
Tanga Marko kapu 1 ti banoti na nsi ya lutiti yina ke tendula mambu, bareferanse yina kele na kati-kati, bifwanisu, mpi karti mosi.
a Kimfumu ya Nzambi kele luyalu yina Nzambi me tulaka na zulu sambu na kulungisa luzolo na yandi sambu na ntoto. (Daniele 2:44; Matayo 6:10) Sambu na kuzaba mambu mingi, tala disolo “Kimfumu ya Nzambi Kele Inki?”
b Yo lombaka nde Yezu kukuma ntotila sambu yandi lungisa mosi ya mikumba na yandi bonso Mesia, to mumonisi ya mfunu mingi ya Nzambi, yina Biblia tubilaka na ntwala. Sambu na kuzaba mambu mingi ya me tala bambikudulu ya Biblia ya ke monisa nde Yezu kele Mesia, tala disolo “Keti Bambikudulu ya Ke Tadila Mesia Ke Ndimisa nde Yezu Vandaka Mesia?”
c Baevanzile kele mikanda iya ya ntete ya Masonuku ya Kigreki ya Bukristu, yina bo ke bingaka mbala mingi Kuwakana ya Mpa, mpi yo ke tubilaka disolo ya luzingu mpi ya kisalu ya kulonga ya Yezu.