Yezaya 41:10—“Kuwa Boma Ve Sambu Mono Kele ti Nge”

“Kuwa boma ve, sambu mono kele ti nge. Kudiyangisa ve, sambu mono kele Nzambi na nge. Mono ta pesa nge kikesa, ee, mono ta sadisa nge, mono ta simba nge mpenza ngolo na diboko na mono ya kitata ya lunungu.”—Yezaya 41:10, Mbalula ya Nsi-Ntoto ya Mpa.

“Kuwa boma ve sambu mono kele ti nge; mono kele Nzambi na nge, kima mosi kupesa nge boma ve! Mono ke pesa nge kikesa, mono ke sadisa nge; mono ke taninaka nge na diboko na mono ya kibakala, diboko yina ke nungisaka bantu.”—Yezaya 41:10, Biblia en Kituba.

Ntendula ya Yezaya 41:10

Yehowaa Nzambi ke bwisa bansadi na yandi ntima nde yandi ta sadisa bo, ata bo kutana ti konso diambu yina.

“Mono kele ti nge.” Yehowa ke songa bansadi na yandi sambu na nki bo fwete wa ve boma—bo kele ve bo mosi. Sambu yandi ke monaka mambu yina bo ke kutanaka ti yo mpi yandi ke waka bisambu na bo, yo kele bonso nde yandi kele kisika mosi ti bo.—Nkunga 34:15; 1 Piere 3:12.

“Mono kele Nzambi na nge.” Sambu na kubwisa bansadi na yandi ntima, Yehowa ke yibusa bo nde yandi kele kaka Nzambi na bo mpi nde yandi ke ndimaka nde bo kele bansadi na yandi. Bo lenda ndima mpenza nde ata kima mosi ve lenda kanga Nzambi nzila sambu yandi sadisa bo.—Nkunga 118:6; Baroma 8:32; Baebreo 13:6.

“Mono ta pesa nge kikesa, ee, mono ta sadisa nge, mono ta simba nge mpenza ngolo na diboko na mono ya kitata ya lunungu.” Mutindu Yehowa sadilaka bansa (phrases) tatu sambu na kutubila ngindu mosi, yandi ke ndimisa bo nde yandi ta sadisa bo kibeni. Yandi ke sadila kutuba ya kifwani sambu na kumonisa mutindu yandi ke salaka mambu kana bansadi na yandi kele ti mfunu ya lusadisu. Kana muntu mosi kubwa, Nzambi lenda tandula diboko na yandi ya kitata sambu na kutedimisa yandi.—Yezaya 41:13.

Mutindu ya mfunu mingi yina Nzambi ke pesaka bansadi na yandi kikesa mpi ke sadisaka bo kele na nzila ya Ndinga na yandi, Biblia. (Yozue 1:8; Baebreo 4:12) Mu mbandu, Ndinga ya Nzambi ke pesa bandongisila ya mbote na bantu yina ke kutana ti bampasi, mu mbandu kinsukami, kimbefo, to lufwa ya muntu yina bo vandaka kuzola. (Bingana 2:6, 7) Nzambi lenda sadila mpi mpeve santu, to ngolo na yandi, sambu na kupesa bansadi na yandi ngolo yina bo kele ti yo mfunu sambu na kukanga ntima na bampasi.—Yezaya 40:29; Luke 11:13.

Mambu ya Bo Ke Tubila na Baverse Yina Kele na Ntwala mpi na Nima ya Yezaya 41:10

Mambu yai pesaka kikesa na Bayuda ya kwikama yina bo nataka na nima na kimpika na Babilone. Yehowa tubaka na ntwala nde pene-pene ya nsuka ya kimpika ya Bayuda, bo ta wa bansangu ya mfumu mosi yina ta fwa makanda ya pene-pene mpi ta bangisa Babilone. (Yezaya 41:2-4; 44:1-4) Ntangu Babilone mpi makanda ya pene-pene ta tekita na boma sambu na bansangu yina, Bayuda zolaka ve kudiyangisa, sambu Yehowa zolaka kutanina bo. Mbala tatu yandi bwisaka bo ntima ti bangogo yai “kuwa boma ve.”—Yezaya 41:5, 6, 10, 13, 14.

Ata Yehowa Nzambi tubaka mambu yina kele Yezaya 41:10 ntete-ntete sambu na Bayuda ya kwikama yina vandaka na kimpika na Babilone, yandi me taninaka yo sambu na kupesa bansadi na yandi yonso kikesa. (Yezaya 40:8; Baroma 15:4) Yandi ke sadisaka bo bubu yai, kaka mutindu yandi sadisaka bansadi na yandi na ntangu ya ntama.