Kisalu ya Kusadisa Bantu Yina Me Bwila Mpasi na 2021—Beto Yambulaka Ve Bampangi na Beto

Na mvula ya kisalu 2021,a ntoto ya mvimba landaka kuniokwama sambu na maladi ya COVID-19. Mutindu disolo “Kusadisa Bantu Yina Me Bwila Mpasi na Ntoto ya Mvimba na Ntangu Maladi Me Panzana na Ntoto” monisaka yo, beto basisaka bamilio ya badolareb sambu na kusadisa bampangi mpi beto salaka Bimvuka kuluta 950 ya Ke Sadisaka Bantu Yina Me Bwila Mpasi.

Ya kieleka, ya maladi yai landaka kunatila bantu bampasi ya mingi, bisumbula ya nkaka ya lugangu mpi bisumbula yina bantu vandaka na kisina na yo bwilaka bampangi na beto ya babakala mpi ya bankento na ntoto ya mvimba. Sambu na kusadisa bampangi na bisumbula kuluta 200 ya mutindu yina ya salamaka, Komite ya Mitambusi ya Nto-Kimvuka pesaka nswa na kusadila 8 milio ya badolare sambu na bisumbula yai katula mbongo yina bo pesaka nswa ya kusadila sambu na maladi ya COVID-19. Beto tala inki mutindu bo sadilaka makabu na beno sambu na kusadisa bampangi yina bwilaka bisumbula zole ya lugangu yina me katuka kusalama.

Tiya Yina Basikaka na Ngumba ya Nyiragongo

Na kilumbu ya Mposo 22 Mai 2021, Ngumba ya Nyiragongo, na République démocratique du congo yantikaka kubasisa poto-poto ya tiya. Poto-poto yina ya tiya vandaka kutambula mpi yo bebisaka banzo, banzo-nkanda, mpi kisika mosi ya bo ke bumbaka masa. Kansi kigonsa vandaka ve kaka poto-poto yina ya tiya. Mwa bilumbu na ntwala, mupepe mosi ya mbi sambu na sante kotaka na mbanza Goma mpi ntoto kumaka kunikana mwa fioti na mbanza yango. Bamfumu lombaka bantu mingi ya mbanza yango na kukatuka pana. Bamingi tinaka mpi bankaka sabukaka na Rwanda.

Na kati ya bantu yina katukaka na Goma, Bambangi ya Yehowa vandaka kiteso ya 5 000. Bankaka banzo na bo bebaka sambu na mambu ya salamaka na ngumba yina. Kansi bantu kotaka na banzo ya bankaka mpi yibaka bima na bo ntangu bo tinaka. Bakomite ya ke sadisaka bantu yina me bwila mpasi ya kele na Rwanda mpi na République démocratique du congo twadisaka kisalu ya kusadisa bampangi yina bwilaka mpasi. Na yina me tala komite mosi ya ke sadisaka bantu yina me bwila mpasi, Betele ya Congo Kinshasa ke tuba nde: “Ata mambu yina bwaka na mbanza yina bebisaka mambu mpi nkutu na ntwala nde bamfumu kulomba bantu na kukatuka, komite yina yantikaka kukabula madia, masa, bima ya kuladila mpi bilele.” Na mbanza mosi buna, bo vukisaka bampangi ya babakala kuluta 2 000, mpi komite ya kusadisa bantu yina me bwila mpasi tulaka batenta, pesaka bampangi bamaske mpi songaka bo mambu ya bo fwete sala sambu bo baka ve maladi ya COVID-19 mpi ya cholera.

Na bangonda tatu yina kisumbula yango salamaka, bampangi na beto kabulaka batone kuluta sambanu ya loso, batone sambanu ya fufu ya masangu, batone tatu ya mafuta (huile), mpi balitre 3 000 ya masa. Sambu na kusadila mbongo mbote, Betele yidikaka mambu sambu na kusumba madia ya mingi kaka na kisika yango yina na kisika ya kusumba bima na babwala ya nzenza mpi kubasisa mbongo mingi.

Mpangi-nkento mosi yina nzo na yandi bebaka ke tuba nde: “Beto lembaka nitu mingi mpi beto vandaka na mawa.” Kansi na nima, ntangu dibuta na yandi bakaka bima ya kinsuni mpi lusadisu sambu bo landa kubikala ya kukangama na Yehowa, yandi tubaka nde: “Yehowa me sadisa beto na kuzwa bima yina beto vandaka ti yo mfunu. Beto me mona nde Yehowa me nata kizitu na beto mpi yandi me sadisa beto na kukanga ntima.”

Mpasi ya Mbongo na Vénézuéla

Na insi Vénézuéla mpasi ya mbongo me kumaka mingi yai bamvula mingi dezia me luta. Mambu kele mpi mpasi sambu na bampangi na beto ya babakala mpi ya bankento. Bo ke niokwama na nzala mpi mubulu ke landa kukuma mingi na insi yai. Ata mpidina organizasio ya Yehowa me yambula bo ve.

Na mvula ya kisalu ya me katuka kuluta, organizasio basisaka mbongo kuluta 1.5 milio ya badolare sambu na kusumbila bampangi yina vandaka na mfunu ya lusadisu bima ya kudia mpi savon. Betele ya Vénézuéla ke tuba nde: “Kunata konso ngonda batone 130 ya bima na babwala yonso ya insi na beto mpi kuzikisa nde bampangi yina kele ti mfunu ya lusadisu me baka yo, ke vandaka ve pete.” Bampangi ke zolaka kusumba bima yina ke bebaka ve nswalu sambu bo lenda bumba yo sambu na ntangu ya nda. Betele ya Vénézuéla ke tuba diaka nde: “Beto ke sumbaka bima ya mingi na mbala mosi. Beto ke sumbaka yo na nsungi yina bo ke katulaka yo na bilanga sambu bo ke tekaka yo na ntalu ya nsi. Na nima, beto ke nataka yo na mutindu yina ke salaka nde beto basisa ve mbongo mingi.”

Leonel kele na Komite mosi ya Ke Sadisaka Bantu Yina Me Bwila Mpasi na Vénézuéla. Yandi ke zolaka kisalu na yandi yai mingi. Yandi ke tuba nde: “Kisalu ya kusadisa bantu yina me bwila mpasi kele kisalu mosi ya sipesiali. Kisalu na mono yai me pesaka mono kikesa mingi banda nkento na mono me fwaka na maladi ya COVID-19. Yo ke sadisaka mono na kuvanda ti mambu mingi ya kusala mpi na kumona nde mono kele mfunu sambu na bampangi na mono ya kele na mfunu ya lusadisu. Mono me monaka mono mosi mutindu Yehowa ke lungisaka mambu yina yandi songaka bansadi na yandi nde, yandi ta yambula ve.”

Mpangi mosi ya bakaka lusadisu yai me salaka dezia na komite mosi ya ke sadisaka bantu yina me bwila mpasi. Yandi ke tuba nde: “Ture ya kusadisa mono mpi me lunga. Bampangi sadisaka beto kaka ve na kinsuni. Bo sadisaka mono ti nkento na mono na kudiyangisa ve. Bo lungisaka bampusa na beto mpi bo pesaka beto kikesa.”

Bisumbula ya nkaka ya lugangu ke salamaka kukonda nde bantu kuzaba nde yo ta salama. Kansi mbala mingi, organizasio ya Yehowa ke kukaka kuzwa bima ya mfunu ya luzingu mpi ke kabudilaka yo bampangi nswalu. Mambu yai ke salamaka na nsadisa ya makabu yina beno ke pesaka sambu na kisalu yina ke salama na ntoto ya mvimba. Bo me tubilaka bametode ya nkaka ya kupesa makabu na donate.jw.org. Beto ke pesa beno mersi sambu na kikalulu na beno ya kukaba.