Viziti na Espagne

ESPAGNE kele ti banseke mpi bantu ya mutindu na mutindu. Espagne me fuluka ti bilanga ya ble, banti ya vinu, mpi banti ya olive. Na ndambu ya sudi, masa yina kele nda kiteso ya bakilometre kiteso ya 14 ke kabulaka yo ti Afrika.

Bantu mingi—tanga mpi bantu ya Fenisia, Bagreki, mpi bantu ya Carthage—kwendaka kuzinga na kitini yai ya kele na sudi-westi ya Eropa. Ntangu Baroma kumaka kuna na mvu-nkama ya tatu na ntwala ya ntangu na beto, bo pesaka teritware yina ya mpa ya bo botulaka zina ya Hispania. Na nima ba Wisigoth mpi ba Maure kumaka kuzinga kuna, mpi bo yonso me bikaka binkulu na bo kuna.

Na mvula mosi ya me katuka kuluta, bantu kuluta bamilio 68 kwendaka kutala Espagne. Bantu mingi ke kwendaka kuna sambu na mwini, mabungu na yo ya kitoko mingi, mpi sambu na bima na yo ya bo me salaka na maboko, sambu na disolo na yo, mpi sambu na banzo ya kitoko yina bo me tungaka. Madia ya kele na Espagne ke bendaka mpi banzenza mingi. Bima ya bantu ke diaka mingi yo yai: madia ya ke katukaka na nzadi-mungwa, misuni ya ngulu ya kuyoka to ya kulamba, basupu ya kitoko, bandunda, mpi bandunda ya kulamba to ya bo me tula mafuta ya olive. Madia ya bo ke bingaka omelete, paella, mpi tapas ya Espagne me kwendaka nsangu na ntoto ya mvimba.

Bantu ya Espagne ke yambaka banzenza mpi ke zolaka bantu. Bantu mingi kele bantu ya dibundu ya Katolika ya Roma, kansi bantu fioti mpamba ke kwenda na ba misa. Na bamvula ya me katuka kuluta, bantu ya Afrika, Azia, mpi ya Amerika ya Sudi me kwendaka kuzinga na Espagne. Mingi na kati na bo ke sepelaka kutubila balukwikilu mpi bansiku ya ba-nkaka na bo. Bambangi ya Yehowa me solula ti bo mpi me sadisaka bo na kuzaba mambu mingi yina Biblia ke longaka.

Na mvu 2015, Bambangi ya Yehowa kuluta 10 500 ndimaka na luzolo na bo mosi na kutunga to kuyidika bisika 70 ya bo ke sambilaka, yina bo ke bingaka Banzo ya Kimfumu. Bamfumu ya babwala ya nkaka me pesaka bo bisika sambu na kutunga banzo yai. Sambu na kusadisa bantu ya me katukaka na bansi ya nkaka, Bambangi ya Yehowa ke salaka balukutakanu na bo na bandinga kuluta 30, katula kiespaniole. Na mvu 2016, bantu kuluta 186 000 kwisaka na lukutakanu mosi ya sipesiali yina Bambangi ya Yehowa salaka sambu na kuyibuka lufwa ya Yezu Kristu.