Baka Mambote ya Kulemfuka na Lutwadisu ya Nzambi

KULEMFUKILA Yehowa, Mfumu ya Bima Yonso, kele mfunu kana beto ke zola kuvanda ya kuvukana sambu na kusala luzolo na yandi. Beto ke ndimaka nde Mwana na yandi kele mfumu ya dibundu ya Bukristu mpi beto ke zitisaka munsiku ya kimfumu na mambu ya nkaka ya luzingu na beto. Beto ta baka mambote kana beto ke lemfuka na lutwadisu ya Nzambi.

² Nzambi tubilaka na mbala ya ntete mambu ya me tala kulemfuka na kimfumu na kilanga ya Edeni. Yo kele na kati ya bansiku ya Nzambi yina kele na Kuyantika 1:28 mpi 2:16, 17. Yo lombaka nde bigangwa yonso ya nkaka na ntoto kulemfuka na bantu mpi yo lombaka nde Adami ti Eva kulemfuka na luzolo ya Nzambi mpi na kiyeka na yandi. Kulemfuka na kiyeka ya Nzambi zolaka kunata ngemba mpi yo zolaka kusala nde mambu kutambula na ndonga. Na nima bo tubilaka diaka munsiku ya kimfumu na 1 Bakorinto 11:3. Ntumwa Polo sonikaka nde: “Mono ke zola beno zaba nde mfumu ya konso bakala kele Kristu; mpi mfumu ya nkento kele bakala; ebuna mfumu ya Kristu kele Nzambi.” Yo ke tendula nde na kutadila mutindu Yehowa me yidikaka mambu, konso muntu kele ti mfumu, katula Yehowa.

³ Bubu yai, bantu mingi ke ndimaka ve mpi ke lemfukaka ve na munsiku yai ya kimfumu. Sambu na inki? Mavwanga yantikaka na Edeni ntangu bibuti na beto ya ntete bakaka lukanu ya kulemfuka diaka ve na kimfumu ya kuluta nene ya Nzambi. (Kuy. 3:4, 5) Kansi, bo bakaka ve kimpwanza ya kuluta mingi. Nkutu, bo kumaka kulemfuka na kiyeka ya kigangwa mosi ya mbi ya kimpeve, Satana Diabulu. Kukolama yina ya ntete kumisaka bantu ntama ti Nzambi. (Bakol. 1:21) Yo yina bubu yai bantu mingi kele kaka na nsi ya kiyeka ya muntu yina ya mbi.—1 Yoa. 5:19.

⁴ Mutindu beto me longukaka kieleka yina kele na Ndinga ya Nzambi mpi ke sadilaka yo, beto me katukaka na nsi ya bupusi ya Satana. Sambu beto me kudipesaka na Yehowa mpi me bakaka mbotika, beto ke ndimaka nde yandi kele Mfumu ya luzingu na beto. Beto ke ndimaka mambu yina ntotila Davidi tubaka; yandi ndimaka nde Yehowa kele “mfumu na zulu ya yonso.” (1 Bans. 29:11) Ee, beto ke tubaka na kudikulumusa yonso nde: “Beno zaba nde Yehowa kele Nzambi. Yandi muntu salaka beto, mpi beto kele bantu na yandi. Beto kele bantu na yandi mpi mameme ya nseke na yandi.” (Nk. 100:3) Beto ke ndimaka nde Yehowa kele nene mpi yo me fwana nde beto lemfukila yandi na mambu yonso, sambu yandi muntu salaka bima yonso. (Kus. 4:11) Mutindu beto kele bansadi ya Nzambi ya kieleka, beto ke landaka Yezu Kristu, yandi bikaka mbandu ya kukuka na yina me tala kulemfukila Nzambi.

⁵ Inki Yezu longukaka na bampasi yonso yina yandi monaka awa na ntoto? Baebreo 5:8 ke tuba nde: “Ata yandi vandaka mwana, yandi longukaka bulemfu na bampasi yina yandi kutanaka na yo.” Ya kieleka, Yezu landaka kulemfukila Tata na yandi ya zulu na kwikama yonso, ata na ntangu ya mpasi. Diaka, Yezu salaka ve ata kima mosi na luzolo na yandi mosi. Yandi tubaka ve ata kima mosi yina katukaka na yandi mosi; yandi sosaka mpi ve lukumu na yandi mosi. (Yoa. 5:19, 30; 6:38; 7:16-18) Ntangu yandi vandaka kusala kisalu ya kusamuna, yandi vandaka kusepela kusala luzolo ya Tata na yandi, ata kusala mpidina natilaka yandi kimbeni mpi bampasi. (Yoa. 15:20) Ata mpidina, Yezu lemfukilaka Nzambi. Yandi “kudikulumusaka” nkutu tii na “lufwa na zulu ya nti ya mpasi.” Mutindu yandi lemfukilaka Yehowa na mambu yonso, yo me pesaka bantu dibaku ya kuguluka sambu na kuzinga mvula na mvula, yo me pesaka Tata na yandi lukumu mpi yo me pusaka Tata na yandi na kutombula yandi.—Bafil. 2:5-11; Baeb. 5:9.

NA NKI MAMBU BETO FWETE LEMFUKA NA LUTWADISU YA NZAMBI?

⁶ Kana beto ke lemfukila Nzambi mpi ke sala luzolo na yandi, basusi mpi bampasi mingi yina ke kuminaka bantu yina ke buyaka kulemfuka na kimfumu ya Yehowa ta kumina beto ve. Mbeni na beto, Diabulu, ke sosaka ntangu yonso kudia beto. Nzambi ta gulusa beto na muntu yina ya mbi kana beto ke telemina yandi mpi ke kudikulumusa na ntwala ya Yehowa mpi ke lemfukila yandi na luzolo yonso.—Mat. 6:10, 13; 1 Pie. 5:6-9.

⁷ Na dibundu ya Bukristu, beto ke ndimaka kimfumu ya Kristu mpi kiyeka yina yandi me pesaka na “mpika ya kwikama mpi ya mayele.” Yo ke vandaka ti bupusi na mabanza na beto mpi na mambu yina beto ke sadilaka bampangi. Kana beto ke lemfuka na mutindu Nzambi me yidikaka mambu na dibundu, beto ta lemfuka na Ndinga na yandi na mambu yonso ya lusambu na beto. Bulemfu yina ke tadila kisalu na beto ya kusamuna, kukwenda na balukutakanu mpi kupesa bakomantere, mutindu beto ke wakanaka ti bankuluntu mpi ke pesaka maboko na balukanu yina bo ke bakaka na organizasio ya Nzambi.—Mat. 24:45-47; 28:19, 20; Baeb. 10:24, 25; 13:7, 17.

⁸ Bulemfu na beto na Nzambi ke salaka nde dibundu ya Bukristu kuvanda na ngemba, na lutaninu mpi mambu kuvanda na ndonga. Bikalulu ya Yehowa ke monanaka na bansadi na yandi. (1 Bak. 14:33, 40) Mambu ya beto me kutanaka ti yo na organizasio ya Yehowa me pusaka beto na kutuba mambu yina ntotila Davidi tubaka. Na nima ya kumona nde bansadi ya Yehowa kele ve kiteso mosi ti bantu ya mbi, Davidi tubaka na kiese yonso nde: “Kiese na bantu yina Yehowa kele Nzambi na bo!”—Nk. 144:15.

⁹ Na kati ya makwela mpi ya dibuta, “mfumu ya nkento kele bakala.” Kiteso mosi, babakala fwete lemfukila Kristu, kansi mfumu ya Kristu kele Nzambi. (1 Bak. 11:3) Bankento fwete lemfukila babakala na bo mpi bana fwete lemfukila bibuti na bo. (Baef. 5:22-24; 6:1) Dibuta ke vandaka na ngemba kana konso muntu ke lemfuka na munsiku yina ya kimfumu.

¹⁰ Bakala fwete sadila kimfumu na yandi na zola bonso Kristu. (Baef. 5:25-29) Kana yandi ke sadila ve kimfumu na yandi na mutindu ya mbi to kana yandi ke baka yo ve na nsaka, nkento ti bana na yandi ta lemfukilaka yandi na kiese. Mukumba ya nkento kele ya kuvanda nsadisi ya mbote. (Kuy. 2:18) Kana yandi ke kanga ntima ntangu yandi ke sadisa bakala na yandi mpi ke zitisa yandi, bakala ta sepelaka ti yandi mpi Nzambi ta baka lukumu. (1 Pie. 3:1-4) Kana babakala ti bankento ke landa bandongisila ya Biblia na yina me tala kimfumu, bo ta pesa bana na bo mbandu ya mbote mpi bana ta lemfukilaka Nzambi.

¹¹ Bulemfu na beto na Nzambi ke vandaka mpi ti bupusi na mutindu beto ke tadilaka “bamfumu ya nene,” yina “kele ti ndambu ya kiyeka na kisika yina bo ke yalaka na nswa ya Nzambi.” (Bar. 13:1-7) Bakristu ke zitisaka bansiku, yo yina bo ke futaka mpaku mpi bo ke pesaka “bima ya Kaisali na Kaisali, kansi bima ya Nzambi na Nzambi.” (Mat. 22:21) Diaka, mutindu Bakristu me yidikaka mambu sambu na kulonga bantu mingi na teritware ke fwaka ve bansiku ya me tala kubumba kinsweki ya bansangu ya bantu. Kana beto ke lemfuka na bamfumu yina bo me tulaka na kuwakana ti bansiku na mambu yonso yina ke fwa ve bansiku ya lunungu ya Yehowa, yo ta sadisa beto na kusadila kikesa mpi ngolo na beto na kisalu ya kusamuna.—Mar. 13:10; Bis. 5:29.

¹² Na mambu yonso ya luzingu na beto, beto fwete lemfuka na lutwadisu ya Nzambi. Meso ya lukwikilu ke sadisaka beto na kumona kilumbu yina bantu yonso ta lemfukilaka Yehowa Nzambi. (1 Bak. 15:27, 28) Bantu yina ke ndimaka kimfumu ya Yehowa na kiese yonso ta baka balusakumunu mingi kibeni mpi bo ta landa kulemfukila yandi mvula na mvula!