Bantu mingi ke monaka mpasi na kuzola Nzambi. Sambu na bo, bo lenda bakisa yandi ve, yandi kele ntama to nku. Beto tadila mambu yai ya ke landa:

• “Mono sambaka Nzambi sambu yandi sadisa mono, kansi kaka na ntangu yina, mu kudiwaka bonso nde yandi kele ntama kibeni, mpi bo lenda solula ve ti yandi. Sambu na mono, Nzambi vandaka kima mosi yina ke monanaka ve mpi ya me konda mawi.”​—Marco, Italie.

• “Ata mono zolaka kusadila Nzambi na masonga yonso, yandi vandaka ntama kibeni. Mono yindulaka nde Nzambi kele makambu ngolo, yandi ke pesaka beto kaka ndola. Mono ndimaka ve nde yandi kele na mawi ya zola.”​—Rosa, Guatémala.

• “Ntangu mono vandaka mwana, mono vandaka kukwikila nde Nzambi ke sosaka bifu na beto, yandi ke vandaka ya kuyilama sambu na kupesa beto ndola kana yo me fwana nde beto baka yo. Na nima, mono kumaka kumona yandi ntama kibeni. Nzambi vandaka bonso mfumu ya nene yina ke yidikaka mambu ya bantu ya yandi ke twadisaka—kansi yandi ke tudilaka bo ve dikebi.”​—Raymonde, Canada.

Inki nge ke yindula? Keti Nzambi me konda zola? Bakristu me yulaka ngiufula yai bamvula mingi me luta. Ya kieleka, na Moyen Âge, bantu mingi ya Kikristu vandaka nkutu ve kusambila Nzambi Nkwa-Ngolo Yonso. Sambu na nki? Bantu vandaka kuwa yandi boma ya mbi. Will Durant muntu mosi ya istware tubaka yo mutindu yai: “Inki mutindu nsumuki lenda baka kikesa ya kusamba muntu yina kele na kiti ya kimfumu ya ke pesa boma mpi ya kele ntama kibeni?”

Inki mutindu bantu me kumaka kumona Nzambi bonso muntu “ya ke pesa boma mpi ya kele ntama kibeni?” Inki Biblia ke longaka mpenza na yina me tala Nzambi? Keti kulonguka kieleka na yina me tala Nzambi lenda sadisa nge na kuzola yandi?

MAMBU YINA BANTU MINGI KE KWIKILAKA

“Beto ke zabaka ve kana beto lenda tanga nkutu zina ya Nzambi, kana yo kele mutindu yina, nki lenda vanda zina yango.”​—Profesere David Cunningham, Theological Studies.

KIELEKA YA ME KATUKA NA BIBLIA

Nzambi tubaka nde: “Mono kele Yehowa. Yina zina na mono.” (Yezaya 42:8, NW) Yehowa kele zina ya Kiebreo yina ke tendula “Yandi Ke Kumisaka.”—Kuyantika 2:4, NW, noti na nsi ya lutiti.

Yehowa ke zolaka nde beto sadila zina na yandi. Biblia ke tuba nde: “Beno binga zina na yandi. Beno songa bantu yonso mambu ya yandi me salaka. Beno songa bantu nde zina na yandi kele nene.”​—Yezaya 12:4, NW.

Yezu sadilaka zina ya Nzambi. Yezu songaka Yehowa na kisambu nde: “Mono me zabisaka bo [balongoki ya Yezu] zina na nge mpi mono ta zabisa yo.” Sambu na nki Yezu zabisaka balongoki na yandi zina ya Nzambi? Yandi yikaka nde: “Na mpila nde zola yina nge [Nzambi] me zolaka mono kuvanda na kati na bo mpi mono vanda na bumosi ti bo.”​—Yoane 17:26.

SAMBU NA NKI YO KELE MFUNU

Walter Lowrie, muntu mosi ya ke longukaka teolozi sonikaka nde: “Muntu yina ke zaba ve zina ya Nzambi ke zabaka yandi mpenza ve bonso muntu ya kieleka, mpi yandi lenda zola yandi ve kana yandi ke zaba yandi kaka bonso ngolo mosi ya me konda mawi.”

Muntu mosi na zina ya Victor vandaka kukwenda na nzo-nzambi konso mposo, kansi yandi kudiwaka nde yandi zabaka mpenza ve Nzambi. Yandi ke tuba nde: “Ntangu mono longukaka nde zina ya Nzambi kele Yehowa, yo vandaka bonso nde mono me yantika kuzaba yandi. Nsuka-nsuka mono kudiwaka bonso nde mono me kutana ti Muntu yina mono me waka mambu mingi sambu na yandi. Mono kumaka kumona yandi bonso Muntu ya kieleka mpi mono yedisaka bangwisana ti yandi.”

Yo yina, Yehowa ke kwendaka pene-pene ya bantu yina ke sadilaka zina na yandi. Sambu na bantu yina ‘ke yindulaka zina na yandi,’ Nzambi ke sila nde: “Mono ta wila bo mawa mutindu tata ke wilaka mawa mwana yina ke sadilaka yandi.” (Malashi 3:16, 17) Nzambi ke sakumunaka bantu yina ke bingaka zina na yandi. Biblia ke tuba nde: “Konso muntu yina ta binga zina ya Yehowa ta guluka.”​—Baroma 10:13.

MAMBU YINA BANTU MINGI KE KWIKILAKA

Dibundu ya Kikristu “na bitini na yo tatu ya nene disongidila, Dibundu ya Katolika ya Roma, Dibundu ya Ortodoksi mpi Misioni ke kwikilaka na Nzambi mosi na Bapersona tatu: Nzambi Tata, Nzambi Mwana mpi Nzambi Mpeve Santu. Na kutadila malongi yai ya Kikristu, dibanza yai ke ndimaka ve banzambi tatu kansi bapersona yai tatu kele kaka Nzambi mosi.”​—The New Encyclopædia Britannica.

KIELEKA YA ME KATUKA NA BIBLIA

Yezu, Mwana ya Nzambi, tubaka ve ata fioti nde yandi kele kiteso mosi ti Tata na yandi. Kansi, yandi tubaka nde: “Mono ke kwenda na Tata, sambu Tata kele nene kuluta mono.” (Yoane 14:28) Yandi zabisaka mpi mosi na kati ya balongoki na yandi nde: “Mono ke tombuka na Tata na mono mpi Tata na beno mpi na Nzambi na mono mpi Nzambi na beno.”​—Yoane 20:17.

Mpeve santu kele muntu ve. Bakristu ya ntete “fulukaka ti mpeve santu,” mpi Yehowa tubaka nde: “Mono ta tiamuna ndambu ya mpeve na mono na zulu ya konso mutindu ya nsuni.” (Bisalu 2:1-4, 17) Mpeve santu kele ve kitini ya Butatu. Yo kele ngolo ya kisalu ya Nzambi.

SAMBU NA NKI YO KELE MFUNU

Karl Rahner mpi Herbert Vorgrimler bantu ya mayele ya Katolika ke tendula nde, “beto lenda bakisa ve Butatu kukonda mbona-meso, mpi ata na nima ya mbona-meso yina, beto lenda bakisa yo mbote ve.” Keti nge lenda zola kibeni muntu yina nge lenda zaba ve to nge lenda bakisa ve? Yo yina, dilongi ya Butatu ke kangaka nzila sambu na kuzaba mpi kuzola Nzambi.

Marco, yina beto tubilaka na disolo ya luyantiku, monaka nde Butatu ke kangaka nzila. Yandi ke tuba nde: “Mono yindulaka nde Nzambi vandaka kubumbila mono kimuntu na yandi mpi yo salaka nde yandi kuma ntama kibeni, yandi vanda diswekamu mpi muntu yina bo lenda solula ve ti yandi.” Kansi, “Nzambi kele ve Nzambi ya kisakasaka.” (1 Bakorinto 14:33, American Standard Version) Yandi ke bumbilaka beto ve kimuntu na yandi. Yandi ke zolaka nde beto zaba yandi. Yezu tubaka nde: “Beto ke sambilaka yina beto me zaba.”​—Yoane 4:22.

Marco ke tuba diaka nde: “Ntangu mu longukaka nde Nzambi kele ve kitini ya Butatu, na nima mu salaka bangwisana ti yandi.” Kana beto ke mona Yehowa bonso Muntu ya kieleka na kisika ya kumona yandi bonso diswekamu, yo ta vanda mpasi ve na kuzola yandi. Biblia ke tuba nde: “Muntu yina ke zolaka ve me zaba Nzambi ve, sambu Nzambi kele zola.”​—1 Yoane 4:8.

MAMBU YINA BANTU MINGI KE KWIKILAKA

Mukanda mosi (Catechism of the Catholic Church) ke tuba nde: “Bantu yina ke fwaka ti masumu, mioyo na bo ke kulumukaka na bilungi mbala mosi na nima ya lufwa, kisika bo ke monaka mpasi na ndola ya bilungi, ‘tiya ya mvula na mvula.’” Bantwadisi ya nkaka ya mabundu ke tubaka nde bilungi kele kisika mosi ya kingenga mpi ya kukabwana ti Nzambi.

KIELEKA YA ME KATUKA NA BIBLIA

Biblia ke tubaka nde: “Moyo yina ke salaka masumu yo yina ta fwa.” (Ezekiele 18:4, NW) Bafwa ‘ke zabaka ata kima mosi ve.’ (Longi 9:5) Kana muntu me fwa mpi ke zaba ata kima mosi ve, nki mutindu yandi lenda niokwama na “tiya ya mvula na mvula” to nkutu kuwa mpasi ya kukabwana kimakulu ti Nzambi?

Na Biblia, bangogo ya Kiebreo mpi ya Kigreki ya bo ke balulaka mbala mingi na “bilungi” ke tendulaka maziamu ya bantu yonso. Mu mbandu, ntangu Yobi vandaka ti maladi ya ngolo, yandi sambaka nde: “Kana nge bumbaka mono na maziamu [“na bilungi,” La Sainte Bible, par l’Abbé Crampon].” (Yobi 14:13, Bible en français courant) Yobi zolaka ve kupema na kisika ya mpasi mingi to na kisika ya kukabwana ti Nzambi, kansi na maziamu.

SAMBU NA NKI YO KELE MFUNU

Kuyindula nde Nzambi kele nku ke sadisaka beto ve na kukwenda pene-pene na yandi kansi yo ke kabulaka beto ti yandi. Rocío, yina ke zingaka na Mexico ke tuba nde: “Yantika bumwana na mono, bo longaka mono dilongi ya bilungi ya tiya, yo pesaka mono boma mingi na mpila nde mono yindulaka nde Nzambi kele ve ata ti kikalulu mosi ya mbote. Mono yindulaka nde yandi vandaka makasi mpi ke lolulaka ve.”

Mambu ya pwelele yina Biblia ke tubaka sambu na bandola ya Nzambi mpi nkadilu ya bafwa sobaka mutindu Rocío vandaka kutadila Nzambi. Yandi tubaka nde: “Mu kudiwaka mbote​—kizitu ya mawi na mono katukaka. Mono yantikaka kukwikila nde Nzambi ke zolaka mambote na beto, yandi ke zolaka beto mpi nde mono lenda zola yandi. Yandi kele bonso tata yina ke simbaka bana na yandi na diboko mpi ke zolaka mambote na bo.”​—Yezaya 41:13.

Bantu mingi me salaka ngolo na kuwa diaka ve boma ya bilungi ya tiya, sambu Nzambi ke zolaka ve nde nge sambila yandi sambu nge ke waka yandi boma. Yezu tubaka nde: “Nge fwete zola Yehowa Nzambi.” (Marko 12:29, 30) Diaka, kana beto ke bakisa nde Nzambi ke salaka ve mambu ya kukonda lunungu bubu yai, beto lenda tula mpi ntima na balusambisu na yandi yina ke kwisa. Bonso Elihu, nduku ya Yobi, beto lenda tuba ti kundima yonso nde: “Nzambi ya kieleka lenda sala ve mambi ata fioti, mpi Nkwa-Ngolo Yonso lenda sala ve mambu ya kukonda lunungu.”​—Yobi 34:10, NW.

Kilumbu mosi na Yeruzalemi, Yezu vandaka kutubila Tata na yandi, Yehowa, mpi kumonisa pwelele luvunu ya bantwadisi ya mabundu ya bilumbu na yandi. (Yoane 8:12-30) Mambu yina yandi tubaka kilumbu yina, ke longa beto mutindu ya kutadila malongi yina bantu mingi ke kwikilaka bubu yai na yina me tala Nzambi. Yezu tubaka nde: “Kana beno bikala na ndinga na mono, beno kele kibeni balongoki na mono, mpi beno ta zaba kieleka, ebuna kieleka ta pesa beno kimpwanza.”—Yoane 8:31, 32.

“Beno bikala na ndinga na mono.” Awa Yezu ke tula munsiku sambu na kutadila kana malongi ya mabundu kele ya “kieleka.” Ntangu nge ke waka mambu yina me tala Nzambi, kudiyula nde: ‘Keti mambu yina ke wakana ti mambu ya Yezu tubaka mpi Masonuku ya Santu yonso?’ Landa mbandu ya bantu yina waka ntumwa Polo ke tuba mpi bayina ‘vandaka kufimpa Masonuku mbote-mbote konso kilumbu sambu na kuzaba kana mambu yango [mambu ya bo vandaka kulonguka] vandaka mutindu yina.’—Bisalu 17:11.

Marco, Rosa, mpi Raymonde, bayina beto tubilaka na disolo ya ntete na masolo yai ya me landana, fimpaka mbote-mbote balukwikilu na bo ntangu bo longukaka Biblia ti Bambangi ya Yehowa. Nki mambu bo longukaka?

Marco: “Muntu yina longaka beto Biblia vandaka kusadila Masonuku sambu na kupesa mvutu na bangiufula yonso yina nkento na mono ti mono vandaka kuyula. Zola na beto sambu na Yehowa yantikaka kuyela, mpi beto kumaka ti bangwisana ya ngolo ti nkento na mono!”

Rosa: “Na luyantiku, mono vandaka kuyindula nde Biblia kele kaka bangindu ya bantu yina ke tendulaka mutindu Nzambi lenda vanda. Kansi, malembe-malembe Biblia pesaka bamvutu na bangiufula na mono. Ntangu yai, Yehowa kele muntu ya kieleka sambu na mono. Yandi kele Muntu yina mono lenda tudila ntima.”

Raymonde: “Mono sambaka Nzambi sambu yandi sadisa mono na kulonguka mambu ya me tala yandi. Ntangu fioti na nima, mono ti bakala na mono yantikaka kulonguka Biblia. Nsuka-nsuka, beto longukaka kieleka na yina me tala Yehowa! Beto vandaka na kiese mingi na kusengumuna mutindu ya Nzambi yina yandi kele.”

Biblia ke tubaka mambu mingi kuluta kumonisa pwelele baluvunu na yina me tala Nzambi; yo ke monisaka kieleka na yina me tala bikalulu na yandi ya kitoko. Ndinga na yandi ya kupemama ke sadisaka beto na ‘kuzaba mambu yina Nzambi me pesaka beto na luzolo yonso.’ (1 Bakorinto 2:12) Sambu na nki ve kufimpa nge mosi mutindu Biblia lenda pesa mvutu na bangiufula ya kuluta mfunu yina bantu ke kudiyulaka na yina me tala Nzambi, balukanu na yandi mpi makwisa na beto? Tanga bamvutu na bangiufula yai ya nkaka na Kifalansa na nsi ya “La bible et vous / Questions bibliques” na www.pr418.com. Nge lenda lomba mpi mpangi mosi na kulonguka Biblia ti nge na site Internet na beto to Mbangi ya Yehowa mosi kulonguka Biblia ti nge. Beto ke tula ntima nde kana nge sala mpidina, nge ta zola Nzambi mingi kuluta kiteso yina nge me yindulaka ntete ve.