Elizabeti vandaka ti mpangi mosi ya nkento Maria, yina vandaka kuzinga na mbanza Nazareti na Galilea. Maria vandaka fianse ya Yozefi; Yozefi vandaka sharpantie. Ntangu divumu ya Elizabeti kumaka ti bangonda sambanu, wanzio Gabriele basikilaka Maria. Yandi tubaka nde: ‘Kilumbu ya mbote, Maria. Yehowa me pesa nge lukumu mingi.’ Yandi bakisaka ve mambu yina Gabriele tubaka. Ebuna Gabriele songaka yandi nde: ‘Nge ta baka divumu mpi nge ta buta mwana-bakala, mpi nge ta pesa yandi zina Yezu. Yandi ta vanda Ntotila. Kimfumu na yandi ta zinga kimakulu.’

Maria tubaka nde: ‘Kansi mu ke mwense. Inki mutindu mu lenda buta?’ Gabriele tubaka nde: ‘Yehowa lenda sala mambu yonso. Mpeve santu ta kwisa na zulu na nge, mpi nge ta buta mwana. Mpangi na nge Elizabeti mpi me baka divumu.’ Ebuna Maria tubaka nde: ‘Mono kele mpika ya Yehowa. Bika yo salama mutindu nge me tuba.’

Maria kwendaka na mbanza mosi ya kele na ngumba sambu na kutala Elizabeti. Ntangu Maria pesaka yandi mbote, Elizabeti waka nde mwana yina ke na divumu na yandi me pumbuka. Yandi fulukaka ti mpeve santu, mpi yandi tubaka nde: ‘Maria, Yehowa me sakumuna nge. Yo kele lukumu mutindu mama ya Mfumu na mono me kwisa na nzo na mono.’ Maria tubaka nde: ‘Mu ke kumisa Yehowa na ntima ya mvimba.’ Maria bikalaka ti Elizabeti bangonda tatu, na nima yandi vutukaka na Nazareti.

Ntangu Yozefi waka nde Maria ke ti divumu, yandi sosaka kufwa makwela. Kansi wanzio basikilaka yandi na ndosi mpi songaka yandi nde: ‘Kuwa ve boma ya kukwela yandi. Yandi me sala ve diambu ya mbi.’ Yo yina Yozefi kwelaka Maria mpi tulaka yandi na nzo na yandi.

Mfumu ya Kintinu ya Roma, Auguste Kaisali, songaka Bayuda yonso na kuvutuka na babwala na bo sambu na kusonikisa bazina. Yo yina, Yozefi ti Maria kwendaka na Betelemi, bwala yina dibuta ya Yozefi katukaka. Maria kumaka pene-pene ya kubuta.

Ntangu bo kumaka na Betelemi, kisika mosi kaka yina bo zwaka vandaka na nzo ya bambisi. Yo yina kisika Maria butaka Yezu. Maria ziungaka yandi bilele ya pete mpi ladisaka yandi na mawete na kidikilu.

Pene-pene ya Betelemi, bangungudi vandaka na nganda na mpimpa, bo ke keba bitwisi na bo. Na mbala mosi, wanzio mosi telamaka na ntwala na bo mpi nsemo ya nkembo ya Yehowa vandaka na nziunga na bo. Bangungudi waka boma, kansi wanzio tubaka nde: ‘Beno wa boma ve. Mono kele ti nsangu ya mbote. Mesia me butuka bubu na Betelemi.’ Na ntangu yina, bawanzio monanaka na zulu, bo ke tuba nde: ‘Nkembo na Nzambi na zulu, mpi ngemba na ntoto.’ Ebuna bawanzio vilaka. Bangungudi salaka nki?

Bo tubaka bo na bo nde: ‘Beto kwenda na Betelemi kaka sesepi yai.’ Bo kwendaka ntinu mpi bo monaka Yozefi ti Maria na nzo ya bambisi ti bebe na bo.

Bantu yonso yina waka mambu yina bawanzio songaka bangungudi yitukaka. Maria yindulaka mingi mambu yina wanzio tubaka mpi yandi vilaka yo ve ata fioti. Bangungudi vutukaka na kukeba bitwisi na bo, bo ke pesa Yehowa mersi sambu na mambu yonso yina bo monaka mpi waka.

Na insi mosi na esti ya Izraele kuvandaka ti bantu yina vandaka kukwikila nde bambwetete lenda twadisa bo. Kilumbu mosi na mpimpa, bantu ya nkaka yina katukaka na ndambu ya Esti monaka kima mosi yina vandaka kumonana bonso mbwetete ya ke sema ngolo ke tambula, mpi bo landaka yo. “Mbwetete” yango nataka bo na Yeruzalemi. Bantu yango yantikaka kuyula bantu nde: ‘Mwana yina ta vanda ntotila ya Bayuda ke na wapi? Beto me kwisa kufukimina yandi.’

Ntangu Erode, ntotila ya Yeruzalemi, waka mambu ya ntotila ya mpa, yandi kudiyangisaka mingi. Yandi yulaka mfumu ya banganga-nzambi nde: ‘Ntotila yai fwete butuka na wapi?’ Bo songaka yandi nde: ‘Baprofete tubaka nde yandi ta butuka na Betelemi.’ Yo yina, Erode bingaka bantu yina katukaka na Esti mpi songaka bo nde: ‘Beno kwenda na Betelemi mpi beno sosa mwana yina. Beno kwisa kuvutuka mpi beno songa mono kisika yandi kele. Mono ke zola kufukimina yandi mpi.’ Kansi yandi vandaka kukusa.

“Mbwetete” yantikaka diaka kutambula. Bantu yina landaka yo tii na Betelemi. “Mbwetete” telamaka na zulu ya nzo mosi mpi bantu vandaka na kati ya nzo yango. Bo monaka Yezu ti mama na yandi Maria. Bo fukamaka na ntwala ya mwana mpi bo pesaka yandi makabu ya wolo, olibani, mpi mire. Keti Yehowa muntu tindaka bantu yai na kusosa Yezu? Ve.

Na mpimpa yina, Yehowa songaka Yozefi na ndosi nde: ‘Erode ke sosa kufwa Yezu. Baka nkento na nge ti mwana mpi beno tina na Ezipte. Beno bikala kuna tii kuna mono ta songa beno na kuvutuka.’ Na mbala mosi, Yozefi ti dibuta na yandi kwendaka na Ezipte.

Yehowa songaka bantu yina katukaka na Esti nde bo fwete vutuka ve na kisika ya Erode. Ntangu Erode bakisaka nde bantu yina vutukaka ve na kisika na yandi, yandi waka makasi mingi. Sambu yandi lendaka ve kuzwa Yezu, yandi pesaka nsiku nde bo fwa na Betelemi bana yonso ya fioti yina kele mvula mosi ti Yezu. Kansi Yezu vandaka na lutaninu, ntama na Ezipte.

Na nima, Erode fwaka. Yehowa songaka Yozefi nde: ‘Sesepi nge lenda vutuka.’ Yozefi, Maria, ti Yezu vutukaka na Izraele, mpi bo kumaka kuzinga na mbanza ya Nazareti.

Yozefi ti Maria vandaka kuzinga na Nazareti ti Yezu mpi bana na bo ya nkaka ya babakala ti ya bankento. Yozefi vandaka sharpantie, mpi yandi longaka dibuta na yandi mambu ya Yehowa mpi ya nsiku na yandi. Dibuta na bo vandaka kukwenda na sinagoga mbala na mbala sambu na kusamba mpi bo vandaka kukwenda na Yeruzalemi sambu na Paki konso mvula.

Ntangu Yezu vandaka ti bamvula 12, dibuta na bo salaka nzietelo ya nda na Yeruzalemi mutindu bo vandaka ti kikalulu ya kusala. Yeruzalemi vandaka ya kufuluka ti bantu mingi yina kwisaka sambu na nkinsi ya Paki. Na nima, Yozefi ti Maria yantikaka kuvutuka na bwala na bo; bo vandaka kuyindula nde Yezu ke sala nzietelo ti bo. Kansi ntangu bo sosaka yandi na kati ya bampangi na bo, bo monaka yandi ve.

Bo vutukaka na Yeruzalemi, mpi bo sosaka mwana na bo bilumbu tatu. Nsuka-nsuka, bo kwendaka na tempelo. Yezu vandaka kuna; yandi me vanda na kati-kati ya balongoki, ke widikila na dikebi mpi ke yula bangiufula ya mbote. Balongi yitukaka Yezu mingi yo yina bo yantikaka kuyula yandi bangiufula. Mpi bo vandaka kuyituka bamvutu na yandi. Bo monaka nde yandi zabaka Nsiku ya Yehowa.

Yozefi ti Maria vandaka kudiyangisa mingi. Maria tubaka nde: ‘Mwana, beto me sosa nge bisika yonso! Nge vandaka na wapi?’ Yezu tubaka nde: ‘Keti beno zabaka ve nde mono fwete vanda awa na nzo ya Tata na mono?’

Yezu vutukaka ti bibuti na yandi na Nazareti. Yozefi longaka Yezu kisalu ya sharpantie. Nge ke yindula nde ntangu Yezu vandaka leke, yandi vandaka muntu ya nki mutindu? Ntangu Yezu vandaka kuyela, mayele na yandi vandaka kukuma mingi mpi Nzambi ti bantu vandaka kundima yandi.

Yoane, mwana ya Zekaria mpi Elizabeti, kumaka profete ntangu yandi yelaka. Yehowa sadilaka yandi sambu na kulonga bantu nde Mesia ke kwisa. Kansi, na kisika ya kulonga na basinagoga to na bambanza, Yoane vandaka kusamuna na ntoto ya zelo na zelo. Bantu vandaka kukatuka na Yeruzalemi mpi na Yudea ya mvimba sambu na kwisa kuwa malongi ya Yoane. Yandi longaka bo nde sambu na kupesa Nzambi kiese, yo lombaka nde bo yambula kusala mambu ya mbi. Na nima ya kuwidikila Yoane, bantu mingi balulaka ntima na masumu na bo, ebuna yandi botikaka bo na Nzadi ya Yordani.

Yoane vandaka ti luzingu ya kukonda mindondo. Yandi vandaka kulwata bilele ya mika ya shamo mpi vandaka kudia bampasu ti bwiki ya mfinda. Bantu vandaka kuyituka Yoane. Ata Bafarize ti Basaduse yina vandaka lulendo kwisaka kutala yandi. Yoane songaka bo nde: ‘Beno fwete soba banzila na beno mpi kubalula ntima. Beno yindula ve nde beno ke mfunu kaka sambu beno ke tuba nde beno kele bana ya Abrahami. Yo ke tendula ve nde beno kele bana ya Nzambi.’

Bantu mingi kwisaka kuyula Yoane nde: ‘Beto fwete sala nki sambu na kupesa Nzambi kiese?’ Yoane songaka Bayuda nde: ‘Kana beno kele ti bakazaka zole, beno pesa mosi na muntu yina me konda yo.’ Nge ke zaba sambu na nki yandi tubaka mpidina? Yandi vandaka kuzola nde balongoki na yandi kuzaba nde sambu na kupesa Nzambi kiese, bo fwete zola bantu.

Yoane songaka bakalaki ya mpaku nde: ‘Beno vanda masonga mpi beno yiba ve ata muntu mosi.’ Yandi songaka basoda nde: ‘Beno baka ve avoka mpi beno kusa ve.’

Banganga-nzambi ti Balevi mpi kwisaka kuyula Yoane nde: ‘Nge ke nani? Bantu yonso ke zola kuzaba yo.’ Yoane tubaka nde: ‘Mono kele ndinga na ntoto ya zelo na zelo, mono ke nata bantu na Yehowa, mutindu Yezaya tubaka na ntwala.’

Bantu vandaka kuzola mambu yina Yoane vandaka kulonga bo. Bantu mingi vandaka kudiyula kana Yoane vandaka Mesia. Kansi yandi songaka bo nde: ‘Muntu mosi ya me luta mono ke kwisa. Mono me kuka ve kukangula bansinga ya sandale na yandi. Mono ke botika na masa, kansi yandi ta botika ti mpeve santu.’

Yoane vandaka kulonga nde: ‘Muntu mosi ya me luta mono ke kwisa.’ Ntangu Yezu vandaka ti bamvula kiteso ya 30, yandi katukaka na Galilea mpi kwendaka na Nzadi ya Yordani, kisika Yoane vandaka kubotika bantu. Yezu vandaka kuzola nde Yoane kubotika yandi, kansi Yoane tubaka nde: ‘Mono fwete botika nge ve. Nge muntu fwete botika mono.’ Yezu songaka Yoane nde: ‘Yehowa ke zola nde nge botika mono.’ Yo yina, bo kwendaka na Nzadi ya Yordani mpi Yoane dindisaka yandi ya mvimba na masa.

Ntangu Yezu basikaka na masa, yandi sambaka. Na ntangu yina, zulu kangukaka, mpi mpeve ya Nzambi kwisaka kukulumuka na zulu na yandi bonso pizio. Ebuna Yehowa tubaka katuka na zulu nde: “Nge kele Mwana na mono, ya mono ke zolaka mingi; mono me ndima nge.”

Ntangu mpeve ya Yehowa kwisaka na zulu ya Yezu, yandi kumaka Kristu, to Mesia. Ntangu yai, yandi yantikaka kisalu yina Yehowa tindaka yandi na kusala na ntoto.

Mbala mosi na nima ya mbotika na yandi, Yezu kwendaka na ntoto ya zelo na zelo mpi lutisaka bilumbu 40 kuna. Ntangu yandi vutukaka, yandi kwendaka kukutana ti Yoane. Ntangu Yezu vandaka kukwisa kisika Yoane vandaka, Yoane tubaka nde: ‘Yai Mwana-Dimeme ya Nzambi yina ta katula disumu ya nsi-ntoto.’ Na bangogo yina, Yoane sadisaka bantu na kuzaba nde Yezu vandaka Mesia. Keti nge ke zaba mambu yina kuminaka Yezu ntangu yandi vandaka na ntoto ya zelo na zelo? Beto tubila yo sesepi yai.

Ntangu Yezu bakaka mbotika, mpeve santu nataka yandi na ntoto ya zelo na zelo. Yandi diaka ve ata kima bilumbu 40, ebuna yandi waka nzala. Diabulu kwisaka kumeka Yezu mpi songaka yandi nde: ‘Kana nge kele kibeni Mwana ya Nzambi, songa matadi yai yo kuma mampa.’ Kansi sambu na kupesa mvutu, yandi sadilaka Masonuku: ‘Bo me sonikaka nde nge fwete zinga ve kaka na madia. Nge fwete wa mambu yonso yina Yehowa ke tuba.’

Na nima, Diabulu tudilaka Yezu ntembe nde: ‘Kana nge kele kibeni Mwana ya Nzambi, katuka na kisika ya kuluta zulu ya tempelo mpi bwa na ntoto. Bo me sonikaka nde Nzambi ta tinda bawanzio na yandi sambu bo yamba nge.’ Kansi Yezu vutukilaka diaka mambu yina kele na Masonuku: ‘Bo me sonikaka nde nge fwete meka ve Yehowa.’

Ebuna Satana songaka Yezu bimfumu yonso ya nsi-ntoto ti bimvwama mpi nkembo na yo mpi tubaka nde: ‘Mono ta pesa nge bimfumu yai yonso ti nkembo na yo kana nge sambila mu ata mbala mosi.’ Kansi Yezu vutulaka nde: ‘Katuka awa, Satana! Bo me sonikaka nde nge fwete sambila Yehowa mpamba.’

Na nima Diabulu kwendaka, mpi bawanzio kwisaka mpi bo pesaka Yezu madia. Katuka ntangu yina, Yezu vandaka kulonga nsangu ya mbote ya Kimfumu. Yina kisalu ya Nzambi tindaka yandi na kusala na ntoto. Bantu vandaka kuzola mambu yina Yezu vandaka kulonga bo, mpi bo vandaka kulanda yandi bisika yonso ya yandi vandaka kukwenda.

Na nsungi ya mvula ya mvu 30 T.B., Yezu kwendaka na Yeruzalemi. Bantu mingi kwisaka na bwala yina sambu na Paki. Kupesa bimenga ya bambisi vandaka na kati ya mambu ya bo vandaka kusala na feti yina. Bantu ya nkaka kwisaka ti bambisi, kansi bankaka sumbaka yo na Yeruzalemi.

Ntangu Yezu kwendaka na tempelo, yandi monaka bantu ke teka bambisi kuna. Bo vandaka kusala mumbongo na nzo ya lusambu ya Yehowa! Yezu salaka nki? Yandi salaka fimbu mpi basisaka mameme ti bangombe na tempelo. Yandi balusaka bamesa ya bantu yina vandaka kushanze mbongo mpi losaka mbongo na bo na ntoto. Yezu songaka bantu yina vandaka kuteka bapizio nde: ‘Beno katula bima yai awa! Beno kumisa ve nzo ya Tata na mono kisika ya kusala mumbongo!’

Bantu yina vandaka na tempelo yitukaka mambu yina Yezu salaka. Balongoki na yandi yibukaka mbikudulu mosi ya ke tubila Mesia: ‘Mono ta vanda ti kikesa mingi sambu na nzo ya Yehowa.’

Na nima, na mvu 33 T.B., Yezu tulaka bunkete na tempelo na mbala ya zole. Yandi pesaka ve ata muntu mosi nzila ya kukonda luzitu na nzo ya Tata na yandi.

Na nima ya Paki, Yezu ti balongoki na yandi salaka nzietelo na Samaria ntangu bo vandaka kuvutuka na Galilea. Pene-pene ya mbanza Sikare, Yezu telamaka na lweka ya kisika mosi ya bo ke bingaka dibulu ya masa ya Yakobi. Ntangu yandi vandaka kupema pana, balongoki na yandi kwendaka kusumba madia na mbanza.

Nkento mosi kwisaka kubaka masa. Yezu songaka yandi nde: “Pesa mono masa.” Nkento yina tubaka nde: ‘Sambu na nki nge ke solula ti mono? Mono kele muntu ya Samaria. Bayuda ke solulaka ve ti bantu ya Samaria.’ Yezu songaka yandi nde: ‘Kana nge zabaka mono, nge muntu zolaka kulomba mono masa mpi mono zolaka kupesa nge masa ya luzingu.’ Nkento yina yulaka yandi nde: ‘Nge ke tuba nki? Nge kele ve ata ti kantini ya kubakila masa.’ Yezu tubaka nde: ‘Muntu yina ke nwa masa yina mono ke pesa yandi ta waka diaka ve nzala ya masa.’ Nkento yina tubaka nde: “Mfumu, pesa mono masa yina.”

Yezu songaka yandi nde: ‘Nata bakala na nge awa na dibulu ya masa.’ Yandi tubaka nde: ‘Mono kele ve ti bakala.’ Yezu tubaka nde: ‘Nge me tuba masonga. Nge me kwelaka mbala tanu, mpi ntangu yai nge ke zinga ti bakala yina nge me kwelanaka ve ti yandi.’ Yandi tubaka nde: ‘Mu ke mona nde nge ke profete. Bantu mingi ke kwikilaka nde beto lenda sambila Nzambi na ngumba yai, kansi Bayuda ke tubaka nde beto lenda sambila yandi kaka na Yeruzalemi. Mu ke kwikilaka nde ntangu Mesia ta kwisa, yandi ta longa beto mutindu ya kusamba.’ Ebuna Yezu tubaka kima mosi yina yandi songaka ntete ve ata muntu mosi: ‘Mono kele Mesia.’

Nkento yina kwendaka ntinu na mbanza mpi songaka bantu ya Samaria nde: ‘Mu ke yindula mu me mona Mesia. Yandi me zaba mambu na mu yonso. Beno kwisa kutala!’ Bo landaka yandi tii na dibulu ya masa mpi bo waka malongi ya Yezu.

Bantu ya Samaria lombaka Yezu na kubikala na mbanza na bo. Na nsungi ya bilumbu zole, yandi longaka kuna, mpi bantu mingi kwikilaka na yandi. Bo songaka nkento yina ya Samaria nde: ‘Na nima ya kuwidikila muntu yai, beto me zaba nde yandi kele kibeni ngulusi ya nsi-ntoto.’

Ntangu fioti na nima ya mbotika na yandi, Yezu yantikaka kulonga nde: ‘Kimfumu ya Nzambi me kuma pene-pene.’ Balongoki landaka yandi ntangu yandi vandaka kusala nzietelo na Galilea mpi na Yudea. Ntangu Yezu vutukaka na bwala na yandi Nazareti, yandi kwendaka na sinagoga, kangulaka rulo ya Yezaya, mpi tangaka na ndinga ya ngolo nde: ‘Yehowa me pesa mono mpeve santu sambu mono longa nsangu ya mbote.’ Yo ke tendula nki? Yo ke tendula nde ata bantu vandaka na mfunu ya kumona Yezu ke sala bimangu, kikuma ya ntete yina Nzambi pesaka yandi mpeve santu kele sambu yandi longa nsangu ya mbote. Ebuna yandi songaka bantu yina vandaka kuwa yandi nde: ‘Bubu mbikudulu yai me lungana.’

Na nima, Yezu kwendaka na Nzadi-Mungwa ya Galilea, kuna yandi kutanaka ti balongoki na yandi iya; bo vandaka balobi-mbisi. Yandi songaka bo nde: ‘Beno kwisa na mono, ebuna mono ta kumisa beno balobi-bantu.’ Balongoki yango kele: Piere, Andre, Yakobo, mpi Yoane. Na mbala mosi bo yambulaka kisalu na bo ya kuloba mbisi mpi bo landaka yandi. Bo kwendaka na Galilea ya mvimba, mpi bo vandaka kulonga Kimfumu ya Yehowa. Bo longaka na basinagoga, na bazandu, mpi na babala-bala. Bantu mingi kibeni vandaka kulanda bo bisika yonso yina bo vandaka kukwenda. Nsangu ya Yezu yalumukaka bisika yonso, nkutu tii na Siria.

Na nima, Yezu pesaka balongoki na yandi ya nkaka ngolo ya kubelula bantu mpi ya kubasisa bademo. Bantumwa kumi na zole kwendaka ti yandi ntangu yandi vandaka kulonga mbanza na mbanza mpi bwala na bwala. Bankento mingi ya kwikama, Maria Magdala, Yoana, Suzana mpi bankaka vandaka kulungisa bampusa ya Yezu mpi ya balongoki na yandi.

Na nima ya kupesa balongoki na yandi formasio, Yezu tindaka bo na kusamuna. Ntangu bo vandaka kusala nzietelo na Galilea, bantu mingi kumaka balongoki mpi bakaka mbotika. Bantu mingi vandaka kuzola kukuma balongoki yo yina Yezu fwanisaka bo ti bilanga yina bambuma na yo vandaka ya kuyela mpi bo fwete katula yo. Yandi tubaka nde: ‘Beno samba Yehowa sambu yandi tinda bantu ya kisalu mingi sambu na kukatula bima.’ Na nima yandi ponaka balongoki na yandi 70 mpi tindaka bo zole-zole na Yudea ya mvimba sambu na kusamuna. Bo longaka bantu ya mutindu na mutindu mambu ya me tala Kimfumu. Ntangu balongoki vutukaka, bo vandaka na nzala ya ngolo ya kusonga Yezu mambu yina salamaka. Diabulu vandaka ve ata ti kima mosi ya kusala sambu na kusukisa kisalu ya kusamuna.

Yezu salaka yonso sambu balongoki na yandi kulanda kusala kisalu yai ya mfunu mingi ntangu yandi ta vutuka na zulu. Yandi songaka bo nde: ‘Beno longa nsangu ya mbote na ntoto ya mvimba. Beno longa bantu Ndinga ya Nzambi mpi beno botika bo.’

Yezu kwisaka na ntoto sambu na kuzabisa nsangu ya mbote ya Kimfumu ya Nzambi. Sambu na kusonga mambu yina Yezu ta sala bonso Ntotila, Yehowa pesaka yandi mpeve santu sambu yandi sala bimangu. Yandi vandaka ti ngolo ya kubelula bimbefo yonso. Kisika yonso ya yandi kwendaka, bambefo kwisaka na yandi sambu yandi sadisa bo, mpi yandi belulaka bo yonso. Bifwa-meso monaka, bifwa-makutu waka, bantu ya makulu-kifu tambulaka, mpi yandi basisaka bademo na bantu yina bademo vandaka kuyala. Ata bo simba kaka nsongi ya lele na yandi, bo vandaka kubeluka. Bantu vandaka kulanda Yezu bisika yonso ya yandi vandaka kukwenda. Ata ntangu yandi vandaka kuzola kuvanda yandi mosi, Yezu vandaka kukula ve ata muntu mosi.

Kilumbu mosi, bantu nataka kikata mosi na nzo yina Yezu vandaka. Kansi, sambu bantu vandaka mingi kibeni, mpila ya kukota vandaka ve. Yo yina bo salaka ditobo na ludi ya nzo mpi bo kulumusaka muntu yina na makulu ya Yezu. Ebuna Yezu songaka muntu yina: ‘Telama mpi tambula.’ Ntangu yandi tambulaka, bantu yitukaka.

Kilumbu ya nkaka, ntangu Yezu kotaka na bwala mosi, bantu ya lepre kumi telamaka na ntama mpi vandaka kutuba na ndinga ya ngolo nde: ‘Yezu, sadisa beto!’ Na bilumbu yina, bantu ya lepre vandaka ve ti nswa ya kupusana pene-pene ya bantu ya nkaka. Yezu songaka bo na kukwenda na tempelo, mutindu Nsiku ya Yehowa vandaka kutuba nde bantu ya lepre fwete kwenda kuna kana bo me beluka. Na nzila, ntangu bo vandaka kukwenda, bo belukaka. Ntangu mosi na kati na bo monaka nde yandi me beluka, yandi vutukaka sambu na kupesa Yezu mersi mpi kupesa Nzambi lukumu. Na kati na bo kumi, mosi mpamba pesaka yandi mersi.

Nkento mosi yina vandaka kubela bamvula 12 vandaka na nzala ya ngolo ya kubeluka. Yandi kotaka na kati ya bantu mpi kwisaka na nima ya Yezu, yandi simbaka nsongi ya lele ya Yezu. Na mbala mosi, yandi belukaka. Ntangu diambu yina salamaka, Yezu yulaka nde: “Nani me simba mono?” Nkento yina vandaka kutekita na boma, kansi yandi basikaka mpi songaka Yezu kieleka. Yezu pesaka yandi kikesa nde: ‘Mwana na mono, kwenda na ngemba.’

Yairusi, mfumu mosi ya basoda bondilaka Yezu nde: ‘Kwisa na nzo na mono! Mwana na mono ya fioti ke bela ngolo.’ Kansi na ntwala nde Yezu kuma na nzo ya Yairusi, mwana yina fwaka. Ntangu Yezu kumaka kuna, yandi monaka bantu mingi yina kwisaka kukatula dibuta yina mawa. Yezu songaka bo nde: ‘Beno dila ve; yandi ke lala.’ Yandi simbaka diboko ya mwana yina mpi tubaka nde: “Mwana, telama!” Mwana yina telamaka mbala mosi, mpi Yezu songaka bibuti na yandi na kupesa yandi mwa madia. Yindula mutindu bibuti na yandi kudiwaka!

Na nima ya kulonga kiteso ya mvula mosi ti ndambu, yo lombaka nde Yezu kubaka desizio mosi ya mfunu. Banani yandi ta pona sambu bo salaka mingi ti yandi? Banani yandi ta pesa formasio sambu bo twadisa dibundu ya Bukristu? Sambu na kubaka badesizio yina, Yezu vandaka na mfunu ya lusadisu ya Yehowa. Yo yina, yandi kwendaka na ngumba mosi kisika yandi lenda vanda yandi mosi, mpi yandi sambaka mpimpa ya mvimba. Na suka, Yezu bingaka balongoki na yandi yonso mpi yandi ponaka bantumwa 12. Bazina ya banani nge ke yibuka? Bazina na bo yo yai: Piere, Andre, Yakobo, Yoane, Filipo, Bartelemi, Toma, Matayo, Yakobo mwana ya Alfeo, Tadeo, Simoni, mpi Yudasi Iskariote.

Bantumwa 12 yai kumaka kutambula mpi kulonga kumosi ti Yezu. Na nima ya kupesa bo formasio, yandi tindaka bo na kwenda kulonga bo mosi. Yehowa pesaka bo ngolo ya kubasisa bademo mpi ya kubelula bambefo.

Yezu vandaka kubinga bantumwa 12 banduku na yandi, mpi yandi vandaka kutudila bo ntima. Bafarize vandaka kuyindula nde bantumwa vandaka bantu ya me longukaka ve mpi ya mpamba. Kansi Yezu pesaka bo formasio sambu na kisalu yina. Bo zolaka kuvanda ti Yezu na bantangu ya kuluta mfunu ya luzingu na yandi, mu mbandu na ntwala ya lufwa na yandi mpi na nima ya lufutumuku na yandi. Bonso Yezu, bantu mingi na kati ya bantumwa 12 katukaka na Galilea. Bankaka vandaka ti bankento.

Bantumwa vandaka bantu ya kukonda kukuka yina vandaka kusala bifu. Bantangu ya nkaka bo vandaka kutuba na ntwala ya kuyindula mpi bo bakaka badesizio ya mbi. Bantangu ya nkaka bo vandaka ntima zulu-zulu. Bantangu ya nkaka diaka bo swanaka sambu na kuzaba nani me luta bankaka. Kansi bo vandaka bantu ya mbote yina vandaka kuzola Yehowa. Bo zolaka kuvanda bantu ya ntete ya dibundu ya Bukristu kana Yezu me kwenda.

Na nima ya kupona bantumwa 12, Yezu kulumukaka na ngumba mpi kwisaka kisika kimvuka mosi ya nene ya bantu vukanaka. Bantu yango katukaka na Galilea, na Yudea, na Tire, na Sidoni, na Siria, mpi na simu ya nkaka ya Yordani. Bo nataka bantu yina vandaka ti bimbefo mpi bantu ya nkaka yina bademo vandaka kuniokula. Yezu belulaka bo yonso. Na nima, yandi vandaka na lweka ya ngumba mpi yantikaka kutuba. Yandi tendulaka mambu yina beto fwete sala kana beto ke zola kuvanda banduku ya Nzambi. Beto fwete bakisa nde beto kele na mfunu ya Yehowa mpi beto fwete longuka na kuzola yandi. Kansi beto lenda zola ve Nzambi kana beto ke zola ve bantu ya nkaka. Beto fwete sadila bantu yonso mambu na ntima-mbote mpi na mawete, ata bambeni na beto.

Yezu tubaka nde: ‘Yo me fwana ve na kuzola kaka banduku na nge. Nge fwete zola mpi bambeni na nge mpi kulolula bantu na ntima ya mvimba. Kana muntu mosi me wila nge makasi, kwenda kukutana ti yandi nswalu mpi lomba pardo. Sadila bantu mambu mutindu nge ke zolaka nde bo sadila nge mambu.’

Yezu pesaka mpi bantu bandongisila ya mbote sambu na mambu ya kinsuni. Yandi tubaka nde: ‘Kuvanda nduku ya Yehowa kele mbote kuluta kuvanda ti mbongo mingi. Muyibi lenda yiba mbongo na nge, kansi muntu mosi ve lenda yiba kinduku na nge ti Yehowa. Yambula kudiyangisa sambu na bima yina nge ta dia, ta nwa, to ta lwata. Tala bandeke. Nzambi ke zikisaka ntangu yonso nde bo kele ti madia ya kufwana. Kudiyangisa ta yika ve kilumbu mosi na luzingu na nge. Kuvila ve nde Yehowa me zaba mambu yina nge ke na yo mfunu.’

Bimvuka yina ya bantu me waka ntete ve muntu ke tuba bonso Yezu. Bamfumu na bo ya mabundu vandaka kulonga bo ve mambu yai. Sambu na nki Yezu vandaka longi ya nene ya mutindu yai? Sambu mambu yonso yina yandi longaka katukaka na Yehowa.

Bafarize vandaka kusala mambu yonso sambu na kuyitukisa bantu. Kana bo sala diambu mosi ya mbote, yo vandaka sambu bantu kumona yo. Bo vandaka kusamba na bisika ya bantu mingi sambu bantu yonso kumona bo. Bafarize kangaka na ntu bisambu ya nda-nda mpi bo vandaka kuvutukila yo na basinagoga na bo mpi na mampambu ya banzila kisika bantu lendaka kuwa bo. Yo yina, bantu yitukaka ntangu Yezu songaka bo nde: ‘Beno samba ve bonso Bafarize. Bo ke yindulaka nde bo ta yitukisa Nzambi na mambu mingi-mingi ya bo ke tubaka, kansi yo ke mpidina ve. Kisambu ke disolo na nge ti Yehowa. Kuvutukila ve kaka mambu ya mutindu mosi. Yehowa ke zolaka nde nge songa yandi mambu yina kele na ntima na nge.

‘Yai mutindu beno fwete samba: “Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu.”’ Yezu songaka bo mpi nde bo fwete samba sambu na madia na bo ya kilumbu yina, sambu Nzambi kulolula masumu na bo, mpi sambu na mambu na bo mosi.

Yezu tubaka nde: ‘Beno sambaka ntangu yonso. Beno landa kulomba Tata na beno, Yehowa, bima ya mbote. Konso kibuti ke zolaka kupesa mwana na yandi bima ya mbote. Kana mwana na nge kulomba nge dimpa, keti nge ta pesa yandi ditadi? Kana yandi lomba nge mbisi ya masa, nge ta pesa yandi nioka?’

Na nima, Yezu tendulaka dilongi ya yandi vandaka kupesa bo: ‘Kana beno me zaba mutindu ya kupesa bana na beno bima ya mbote, Tata na beno, Yehowa, ta pesa beno kibeni mpeve santu mingi. Kima ya nge fwete sala kele kulomba.’ Nge ke landaka ndongisila ya Yezu? Nge ke sambaka sambu na mambu ya nki mutindu?

Ntangu fioti na ntwala ya Paki ya mvu 32 T.B., bantumwa katukaka na kampanie ya kulonga mpi kwisaka kuvutuka. Bo lembaka, yo yina Yezu nataka bo na maswa na Betsaida sambu bo pema. Kansi ntangu maswa kumaka pene-pene ya dibungu, Yezu monaka bantu mingi me landa bo kuna. Ata Yezu vandaka ti nzala ya kuvanda kaka ti balongoki na yandi, yandi yambaka bantu na ntima ya mbote. Yandi belulaka bambefo mpi yantikaka kulonga bo. Kilumbu ya mvimba, Yezu longaka bo mambu ya Kimfumu ya Nzambi. Ntangu nkokila bwaka, bantumwa kwisaka kusonga Yezu nde: ‘Bantu ke na nzala. Songa bo na kuvutuka sambu bo sosa kima ya kudia.’

Yezu tubaka nde: ‘Bo fwete kwenda ve. Beno pesa bo kima ya kudia awa.’ Bantumwa yulaka yandi nde: ‘Nge ke zola beto kwenda kusumbila bo mampa?’ Filipo, yina vandaka mpi ntumwa, tubaka nde: ‘Ata beto vandaka ti mbongo mingi, beto zolaka kukuka ve kusumba mampa sambu na kimvuka yai ya bantu.’

Kansi Yezu yulaka bo nde: ‘Beno kele ti nki?’ Andre tubaka nde: ‘Beto kele ti mampa tanu mpi bambisi ya masa ya fioti zole. Yo ta fwana ve.’ Yezu tubaka nde: ‘Beno natila mono mampa ti mbisi yina.’ Yandi songaka bantu na kuvanda na matiti na bimvuka ya bantu 50 mpi ya bantu 100. Yezu bakaka mampa ti mbisi, yandi talaka na zulu, mpi sambaka. Na nima yandi pesaka bantumwa madia, ebuna bantumwa pesaka yo na bantu. Babakala 5 000 ti bankento mpi bana, bo yonso diaka tii kuna bo fulukaka. Na nima, bantumwa lokutaka bima yina bikalaka, sambu bo bebisa ve ata kima mosi. Bo lokutaka bitunga 12 ya kufuluka! Yo vandaka kibeni kimangu ya nene!

Bantu yitukaka mingi yo yina bo sosaka kutula Yezu ntotila na bo. Kansi Yezu zabaka nde yo vandaka ve ntangu yina Yehowa me tulaka sambu yandi vanda ntotila. Yo yina yandi songaka bantu na kukwenda mpi songaka bantumwa na kukwenda na simu ya nkaka ya Nzadi-Mungwa ya Galilea. Bo kotaka na maswa na bo, mpi Yezu tombukaka yandi mosi na ngumba. Sambu na nki? Sambu yandi vandaka ti mfunu ya ntangu sambu yandi samba Tata na yandi. Ata Yezu vandaka ti mambu mingi ya kusala, yandi vandaka kudibumbila ntangu yonso ntangu ya kusamba.

Yezu vandaka ve ti ngolo kaka ya kubelula bambefo mpi ya kufutumuna bafwa, kansi mpi ya kuyala mupepe ti mvula. Na nima ya kusamba na ngumba, Yezu talaka na Nzadi-Mungwa ya Galilea mpi monaka mupepe ya ngolo. Bantumwa na yandi vandaka na maswa, bo ke nwana ti mupepe. Yezu kulumukaka mpi yantikaka kutambula na zulu ya masa sambu na kukwenda kisika maswa vandaka. Ntangu bantumwa monaka muntu ke tambula na zulu ya masa, bo waka boma. Kansi Yezu songaka bo nde: ‘Yo ke mono. Beno wa boma ve.’

Piere tubaka nde: ‘Mfumu, kana yo ke mpenza nge, songa mono na kukwisa kisika nge kele.’ Yezu songaka Piere nde: ‘Kwisa.’ Na kati-kati ya mupepe yina ya ngolo, Piere basikaka na maswa mpi yantikaka kutambula na zulu ya masa, yandi ke kwenda kisika Yezu vandaka. Kansi ntangu yandi kumaka pene-pene ya Yezu, Piere talaka mupepe ya ngolo mpi yandi waka boma. Yandi yantikaka kudinda. Piere tubaka na ndinga ya ngolo: ‘Mfumu, gulusa mu!’ Yezu simbaka yandi na diboko, mpi tubaka nde: ‘Sambu na nki nge kumaka ti keti-keti? Lukwikilu na nge kele na wapi?’

Yezu ti Piere mataka na maswa, mpi na mbala mosi, mupepe manaka. Keti nge lenda yindula mutindu bantumwa kudiwaka? Bo tubaka nde: “Nge kele kibeni Mwana ya Nzambi.”

Yai kele ve mbala ya ntete yina Yezu yalaka mupepe. Kilumbu ya nkaka, ntangu Yezu ti bantumwa kangaka maswa na simu ya nzadi-mungwa, Yezu kwendaka kulala na nima ya maswa. Ntangu yandi vandaka kulala, mupepe ya ngolo yantikaka kubula. Bitembo vandaka kukota na maswa, ebuna yo fulukaka ti masa. Bantumwa tedimisaka Yezu na ndinga ya ngolo nde: ‘Longi, beto ke zo fwa! Sadisa beto!’ Yezu telamaka mpi tubaka na nzadi-mungwa nde: “Vanda pima!” Na mbala mosi, mupepe manaka mpi nzadi-mungwa kumaka pima. Yezu yulaka bantumwa nde: ‘Wapi lukwikilu na beno?’ Bo tubaka bo na bo nde: “Ata mupepe ti nzadi-mungwa ke lemfukila yandi.” Bantumwa longukaka nde kana bo tudila Yezu ntima ya mvimba, bo fwete wa ve ata kima mosi boma.

Bafarize vandaka kumenga Yezu mpi kusosa kikuma ya kukanga yandi. Bo tubaka nde yandi fwete belula ve bantu na Kisabatu. Na Kisabatu mosi, Yezu monaka kifwa-meso mosi ke lomba mbongo na bala-bala. Yandi songaka balongoki nde: ‘Beno tala mutindu ngolo ya Nzambi ta sadisa muntu yai.’ Yezu vukisaka mate na yandi ti ntoto mpi salaka pate, na nima yandi tulaka yo na meso ya muntu yina. Yezu songaka yandi nde: ‘Kwenda kuyobisa meso na nge na kiziba ya Siloami.’ Muntu yango salaka mpidina, mpi sambu na mbala ya ntete na luzingu na yandi, yandi kumaka kumona.

Bantu waka makasi. Bo tubaka nde: ‘Keti yai muntu yina vandaka kufonga mpi kulomba bima, to keti yo ke kaka muntu mosi ya me fwanana ti yandi?’ Muntu yango tubaka nde: ‘Mono kele muntu yina butukaka kifwa-meso!’ Bantu yulaka yandi nde: ‘Sambu na nki nge ke diaka ve kifwa-meso?’ Ntangu yandi songaka bo mambu yina salamaka, bo nataka yandi na Bafarize.

Yandi songaka Bafarize nde: ‘Yezu tulaka pate na meso na mono mpi songaka mono na kwenda kuyobisa yo. Mu salaka yo, mpi mu ke mona.’ Bafarize tubaka nde: ‘Kana Yezu ke belula bantu na Kisabatu, disongidila ngolo na yandi me katuka ve na Nzambi.’ Kansi bankaka tubaka nde: ‘Kana ngolo na yandi me katuka ve na Nzambi, yandi zolaka kukuka ve kubelula bantu ata fioti.’

Bafarize bingaka bibuti ya muntu yina mpi bo yulaka bo nde: ‘Inki mutindu mwana na beno ke mona ntangu yai?’ Bibuti na yandi waka boma sambu Bafarize tubaka nde konso muntu yina ta kwikila na Yezu, bo ta kula yandi na sinagoga. Yo yina bo tubaka nde: ‘Beto me zaba ve. Beno yula yandi mosi.’ Bafarize yulaka muntu yina bangiufula mingi tii kuna yandi tubaka nde: ‘Me songa beno mambu yonso ya mu me zaba. Sambu na nki beno ke landa kuyula mono bangiufula?’ Bafarize waka makasi, mpi bo kulaka yandi.

Yezu kwendaka kukutana ti muntu yina, mpi yulaka yandi nde: ‘Keti nge ke kwikila na Mesia?’ Yandi tubaka nde: ‘Mono zolaka kukwikila kana mono zabaka yandi.’ Yezu tubaka nde: ‘Mono kele Mesia.’ Keti Yezu monisilaka yandi ve ntima-mbote? Yezu belulaka kaka ve muntu yina kansi yandi sadisaka yandi mpi na kuvanda ti lukwikilu.

Yezu vandaka ti banduku tatu ya ngolo na Betania. Banduku yango kele, Lazare ti bampangi na yandi zole ya bankento, Maria ti Marta. Kilumbu mosi, ntangu Yezu vandaka na simu ya nkaka ya Yordani, Maria ti Marta tindilaka yandi nsangu mosi ya mpasi: ‘Lazare ke bela ngolo. Pardo kwisa nswalu!’ Kansi Yezu kwendaka ve mbala mosi. Yandi vingilaka bilumbu zole, ebuna yandi songaka balongoki nde: ‘Beto kwenda na Betania. Lazare ke lala, mpi mono ke kwenda kutedimisa yandi.’ Bantumwa tubaka nde: ‘Kana Lazare ke lala, yo ta sadisa yandi na kudiwa mbote.’ Yo yina, Yezu songaka bo na pwelele nde: ‘Lazare me fwa.’

Ntangu Yezu kumaka na Betania, bo vandaka me zika dezia Lazare bilumbu iya me luta. Bantu mingi kwisaka sambu na kukatula Marta ti Maria mawa. Ntangu Marta waka nde Yezu me kwisa, yandi kwendaka ntinu kukutana ti yandi. Yandi tubaka nde: “Mfumu, kana nge vandaka awa, mpangi na mono zolaka kufwa ve.” Yezu songaka yandi nde: ‘Mpangi na nge ta zinga diaka. Marta, nge ke kwikila?’ Yandi tubaka nde: ‘Mu ke kwikila nde yandi ta telama na lufutumuku.’ Yezu tubilaka yandi nde: “Mono kele lufutumuku mpi luzingu.”

Ebuna Marta kwendaka kusonga Maria nde: ‘Yezu me kwisa.’ Maria kwendaka ntinu kukutana ti Yezu, ebuna bantu mingi landaka yandi. Yandi bwaka na makulu ya Yezu, mpi yandi vandaka kudila kukonda kupema. Yandi tubaka nde: ‘Mfumu, kana nge vandaka awa, mpangi na beto zolaka kuvanda na luzingu!’ Yandi monaka mutindu Maria vandaka kuniokwama, ebuna yandi mpi yantikaka kudila. Ntangu bantu monaka Yezu ke dila, bo tubaka nde: ‘Tala mutindu Yezu vandaka kuzola Lazare.’ Kansi bankaka vandaka kudiyula nde: ‘Sambu na nki yandi gulusaka ve nduku na yandi?’ Yezu ta sala nki?

Yezu kwendaka na maziamu, kisika bo tulaka ditadi ya nene na munoko na yo. Yandi tubaka nde: ‘Beno katula ditadi.’ Marta tubaka nde: ‘Kansi bilumbu iya me luta! Yandi ta basisa nsudi.’ Ata mpidina, bo katulaka ditadi, mpi Yezu sambaka nde: ‘Tata, mersi sambu nge ke waka mono. Mono me zaba nde nge ke waka mono ntangu yonso, kansi mono ke tuba na ndinga ya ngolo sambu bantu yai kuzaba nde nge muntu tindaka mono.’ Ebuna yandi tubaka na ndinga ya ngolo nde: “Lazare, kwisa kubasika!” Diambu mosi ya kuyituka salamaka: Lazare basikaka na maziamu, ti bilele ya lino ya bo ziungaka yandi. Yezu tubaka nde: “Beno kangula yandi mpi beno bika yandi, yandi kwenda.”

Bantu mingi yina monaka diambu yai kwikilaka na Yezu. Kansi bankaka kwendaka kusonga Bafarize diambu yango. Banda kilumbu yina, Bafarize vandaka kusosa kufwa Lazare ti Yezu. Ntumwa mosi, Yudasi Iskariote, kwendaka na kinsweki na Bafarize mpi yulaka bo nde: ‘Beno ta pesa mono ikwa kana mono sadisa beno na kumona Yezu?’ Bo wakanaka na kupesa yandi mbongo ya bibende 30, ebuna Yudasi yantikaka kusosa dibaku ya mbote sambu na kupesa Yezu na maboko ya Bafarize.

Bayuda vandaka kuta nkinsi ya Paki konso mvula na kilumbu ya 14 ya ngonda ya Nisani. Yo vandaka kuyibusa bo mutindu Yehowa katulaka bo na kimpika na Ezipte mpi kotisaka bo na Ntoto ya Lusilu. Na mvu 33 T.B., Yezu ti bantumwa na yandi salaka Paki na suku mosi ya zulu na Yeruzalemi. Na nsuka ya madia yina, Yezu tubaka nde: ‘Muntu mosi na kati na beno ta teka mono.’ Bantumwa waka mpasi, mpi bo yulaka Yezu nde: ‘Nani yango yina?’ Yezu tubaka nde: ‘Yo ke muntu yina mu ke pesa dimpa yai.’ Ebuna yandi pesaka Yudasi Iskariote kitini ya dimpa. Na mbala mosi, Yudasi telamaka mpi basikaka.

Na nima, Yezu salaka kisambu, zengaka dimpa bitini-bitini, mpi pesaka yo na bantumwa yina bikalaka. Yandi tubaka nde: ‘Beno dia dimpa yai. Yo ke monisa nitu na mono, yina mono ta pesa sambu na beno.’ Na nima yandi sambaka sambu na vinu, mpi pesaka yo na bantumwa. Yandi tubaka nde: ‘Beno nwa vinu yai. Yo ke monisa menga na mono, yina mono ta pesa sambu masumu na beno kulolulama. Mono ke sila nde beno ta vanda bantotila ti mono na zulu. Beno salaka mutindu yai konso mvula sambu na kuyibuka mono.’ Balongoki ya Yezu ke vukanaka na nkokila yina konso mvula. Bubu yai, bo ke bingaka lukutakanu yina Madia ya Nkokila ya Mfumu.

Na nima ya madia, bantumwa swanaka sambu na kuzaba nani ke mfunu mingi na kati na bo. Kansi Yezu songaka bo nde: ‘Muntu yina me luta nene na kati na beno kele muntu yina ke kudimona bonso leke, muntu ya kukonda mfunu.

‘Beno kele banduku na mono. Mono ke songa beno mambu yonso yina Tata na mono ke zola nde mu zabisa beno. Ntama ve mono ta kwenda na zulu na kisika ya Tata na mono. Beno ta bikala, mpi bantu ta zaba nde beno kele balongoki na mono na zola yina beno ta monisana. Beno fwete zolana mutindu mono ke zolaka beno.’

Nsuka-nsuka, Yezu sambaka, mpi lombaka Yehowa na kutanina balongoki yonso. Yandi lombaka Yehowa na kusadisa bo na kusala kumosi na ngemba. Yandi sambaka sambu zina ya Yehowa kuvanda santu. Ebuna Yezu ti bantumwa yimbaka bankunga ya kukumisa Yehowa mpi bo basikaka. Ntangu finamaka sambu bo kanga Yezu.

Yezu ti bantumwa katukaka na Muwanda ya Kidroni mpi kwendaka na Ngumba ya Banti ya Olive. Midi ya mpimpa lutaka dezia, mpi ngonda vandaka ya mvimba. Ntangu bo kumaka na kilanga ya Getsemane, Yezu songaka bo nde: “Beno bikala awa mpi beno kengila.” Ebuna Yezu kwendaka mwa ntama na kilanga yina mpi fukamaka. Na mawa ya mingi, yandi sambaka Yehowa nde: “Bika luzolo na nge kusalama.” Ebuna Yehowa tindaka wanzio sambu na kupesa Yezu kikesa. Ntangu Yezu vutukaka kisika bantumwa vandaka, yandi kutaka tatu ke lala. Yandi tubaka nde: ‘Beno telama! Yai kele ve ntangu ya kulala! Ngunga me lunga sambu bo pesa mono na maboko ya bambeni.’

Ntama ve, Yudasi kwisaka, ti kimvuka ya nene ya bantu ya mubulu yina vandaka ti banti mpi matraki. Yandi zabaka kisika ya kuzwa Yezu sambu mbala mingi bo vandaka kukwisa na kilanga yai. Yudasi songaka basoda nde yandi ta sadisa bo na kuzaba Yezu. Yandi kwendaka na Yezu mpi tubaka nde: ‘Mbote Longi,’ mpi yandi pesaka Yezu beze. Yezu tubaka nde: ‘Yudasi, keti nge ke teka mono na beze?’

Yezu pusanaka na ntwala mpi yulaka bantu yina nde: “Beno ke sosa nani?” Bo tubaka nde: “Yezu ya Nazareti.” Ebuna yandi vutulaka nde: “Yo kele mono,” ebuna bantu yina vutukaka nima mpi bo bwaka na ntoto. Yezu yulaka bo diaka nde: “Beno ke sosa nani?” Bo tubaka diaka nde: “Yezu ya Nazareti.” Yezu vutulaka nde: ‘Mono songaka beno nde yo kele mono. Beno bika bantu yai bo kwenda.’

Ntangu Piere bakisaka mambu yina vandaka kusalama, yandi basisaka mbele ya kunwanina mpi zengaka dikutu ya Malkusi, mpika mosi ya nganga-nzambi ya nene. Kansi Yezu simbaka dikutu ya muntu yina mpi belulaka yandi. Ebuna yandi tubilaka Piere nde: ‘Katula mbele na nge ya kunwanina. Kana nge ke nwana ti mbele ya kunwanina, nge ta fwa mpi na mbele ya kunwanina.’ Basoda kangaka Yezu maboko, ebuna bantumwa tinaka. Na nima bantu yina nataka yandi na Ana, mfumu ya banganga-nzambi. Ana yulaka Yezu bangiufula mpi tindaka yandi na nzo ya Kaifa, Nganga-Nzambi ya Nene. Kansi nki mambu kuminaka bantumwa?

Ntangu Yezu vandaka ti bantumwa na yandi na suku ya zulu, yandi tubilaka bo nde: ‘Beno yonso ta yambula mono bubu na mpimpa.’ Piere tubaka nde: ‘Mono ve! Ata bantu yonso kuyambula nge, mono ta yambula nge ve ata fioti.’ Kansi Yezu songaka Piere nde: ‘Na ntwala nde nsusu kukokula, nge ta tuba mbala tatu nde nge me zaba mono ve.’

Ntangu basoda nataka Yezu na nzo ya Kaifa, bantumwa mingi tinaka. Kansi bantumwa zole landaka yandi ti kimvuka ya bantu. Piere vandaka na kati na bo. Yandi kotaka na kibansala ya nzo ya Kaifa mpi vandaka kuyotila tiya. Na nsemo yina, nsadi mosi ya nkento monaka luse ya Piere mpi tubaka nde: ‘Me zaba nge! Nge vandaka ti Yezu!’

Piere tubaka nde: ‘Ve, munu ve! Mu ke zaba ve mambu yina nge ke tuba!’ Yandi kwendaka na ndambu ya kielo. Kansi ntangu fioti na nima nsadi ya nkaka ya nkento monaka yandi mpi songaka bantu nde: ‘Muntu yai vandaka ti Yezu!’ Piere tubaka nde: ‘Me zaba nkutu ve Yezu!’ Muntu mosi tubaka nde: ‘Nge kele na kati na bo! Kutuba na nge ke songa nde nge ke muntu ya Galilea, bonso Yezu.’ Kansi Piere diaka ndefi nde: ‘Me zaba yandi ve!’

Na ntangu yina, nsusu kokulaka. Piere monaka Yezu me baluka mpi me tala yandi. Yandi yibukaka mambu yina Yezu tubaka, ebuna yandi basikaka mpi dilaka ngolo.

Na nima, Sanedreni vukanaka sambu na kusambisa Yezu na kati ya nzo ya Kaifa. Bo bakaka ntete lukanu ya kufwa Yezu, mpi ntangu yai bo ke sosa kikuma. Kansi bo vandaka kukuka ve kuzwa kikuma ya kufwila yandi. Nsuka-nsuka, Kaifa yulaka Yezu nde: ‘Keti nge kele Mwana ya Nzambi?’ Yezu tubaka nde: ‘Ee.’ Kaifa tubaka nde: ‘Beto ke diaka ve ti mfunu ya banzikisa. Yandi me vweza Nzambi!’ Tribinale ndimaka nde: ‘Muntu yai fwete fwa.’ Bo bulaka Yezu bambata, losilaka yandi mate, fikaka luse na yandi, bulaka yandi, mpi tubaka nde: ‘Kana nge kele profete, songa beto nani me bula nge!’

Ntangu ntongo tanaka, bo nataka Yezu na nzo ya Sanedreni mpi bo yulaka yandi diaka nde: ‘Keti nge kele Mwana ya Nzambi?’ Yezu vutulaka nde: ‘Beno bantu me tuba yo.’ Ebuna bo tubaka nde yandi me vweza Nzambi mpi bo nataka yandi na nzo ya Ponti Pilate, guvernere ya Roma. Inki salamaka na nima? Bika beto tala.

Bamfumu ya banganga-nzambi nataka Yezu na nzo ya guvernere. Pilate yulaka bo nde: ‘Na nki diambu beno ke funda muntu yai?’ Bo tubaka nde: ‘Yandi ke tuba nde yandi kele ntotila!’ Pilate yulaka Yezu nde: “Keti nge kele Ntotila ya Bayuda?” Yezu vutulaka nde: “Kimfumu na mono kele ve ya nsi-ntoto yai.”

Na nima Pilate tindaka Yezu na Erode, mfumu ya Galilea, sambu yandi tala kana yandi lendaka kumona diambu ya mbi na yandi. Erode monaka ve ata diambu mosi ya mbi na Yezu mpi yandi vutulaka Yezu na Pilate. Ebuna Pilate songaka bantu nde: ‘Yo vanda Erode, yo vanda mono, ata muntu mosi ve me mona diambu ya mbi na muntu yai. Mono ta yambula yandi.’ Kimvuka ya bantu tubaka na ndinga ya ngolo nde: ‘Fwa yandi! Fwa yandi!’ Basoda bulaka Yezu fimbu, bo losilaka yandi mate, mpi bo bulaka yandi. Bo lwatisaka yandi mpu ya kimfumu ya bansende mpi bo vandaka kuseka yandi nde: ‘Mbote, Ntotila ya Bayuda.’ Pilate songaka diaka kimvuka ya bantu nde: ‘Mono me mona ve diambu ya mbi na muntu yai.’ Kansi bo tubaka na ndinga ya ngolo nde: “Na zulu ya nti!” Yo yina, Pilate pesaka Yezu na maboko na bo sambu bo fwa yandi.

Bo nataka Yezu na Golgota, bo tulaka yandi na zulu ya nti, mpi bo telemisaka yo. Yezu sambaka nde: “Tata, lolula bo, sambu bo ke zaba ve mambu yina bo ke sala.” Bantu vandaka kuseka Yezu nde: ‘Kana nge kele Mwana ya Nzambi, tuluka na zulu ya nti yina! Kudigulusa.’

Muntu mosi ya mbi yina bo tulaka na zulu ya nti na lweka na yandi tubaka nde: “Yibuka mono ntangu nge ta kwisa na Kimfumu na nge.” Yezu silaka yandi nde: “Nge ta vanda ti mono na Paladisu.” Na nima ya midi, mudidi kotaka na insi na bo mpi yo salaka bangunga tatu. Balongoki ya nkaka telemaka na lweka ya nti yina; Maria, mama ya Yezu mpi vandaka pana. Yezu zabisaka Yoane na kukeba Maria bonso mama na yandi.

Nsuka-nsuka, Yezu tubaka nde: “Yo me lungana!” Yandi niekisaka ntu na nsi mpi yandi fwaka. Na ntangu yina, ntoto nikanaka ngolo kibeni. Na tempelo, rido ya kilo yina vandaka na kati-kati ya Kisika ya Santu mpi Kisika ya Kuluta Santu pasukaka na kati-kati. Mfumu mosi ya basoda tubaka nde: ‘Muntu yai vandaka kibeni Mwana ya Nzambi.’

Na nima ya lufwa ya Yezu, mvwama mosi, zina na yandi Yozefi, lombaka Pilate nswa ya kukatula mvumbi ya Yezu na nti. Yozefi ziungaka mvumbi yina na lino ya kitoko, yandi tulaka yo bima ya nsudi ya kitoko mpi tulaka yo na maziamu ya mpa. Yandi tulaka ditadi mosi ya nene na munoko ya maziamu. Bamfumu ya banganga-nzambi zabisaka Pilate nde: ‘Beto ke wa boma nde balongoki ya nkaka ya Yezu ta baka mvumbi na yandi mpi bo ta tuba nde yandi me futumuka.’ Yo yina Pilate tubilaka bo nde: ‘Beno kanga maziamu mpi beno kengila yo.’

Bilumbu tatu na nima, na suka-suka, bankento ya nkaka kwendaka na maziamu mpi bo kutaka ditadi ya kukatula na maziamu. Na kati ya maziamu, wanzio mosi songaka bankento yina nde: ‘Beno wa boma ve. Yezu me futumuka. Beno kwenda mpi beno songa balongoki na yandi nde bo kwenda kukutana ti yandi na Galilea.’

Maria Magdala kwendaka nswalu kusosa Piere ti Yoane. Yandi tubilaka bo nde: ‘Muntu mosi me baka mvumbi ya Yezu!’ Bo kwendaka ntinu na maziamu. Ntangu bo monaka nde yo vandaka ya mpamba, bo vutukaka na banzo na bo.

Ntangu Maria vutukaka na maziamu, yandi monaka bawanzio zole na kati ya maziamu mpi yandi tubilaka bo nde: ‘Mu ke zaba ve kisika bo me nata Mfumu na mono.’ Na nima, yandi monaka muntu mosi mpi yandi yindulaka nde yo vandaka muntu ya ke salaka bilanga. Yandi tubaka nde: ‘Mfumu, pardo songa mono kisika nge me tula yandi.’ Kansi ntangu muntu yango tubaka nde, “Maria!” yandi bakisaka nde yo vandaka Yezu. Maria tubaka nde: “Longi!” mpi yandi yambaka Yezu. Yezu tubilaka yandi nde: ‘Kwenda mpi songa bampangi na mono nde nge me mona mono.’ Kaka na ntangu yina, Maria kwendaka ntinu na balongoki ya Yezu mpi songaka bo nde yandi me mona Yezu.

Na nima, kaka kilumbu yina, balongoki zole katukaka na Yeruzalemi mpi vandaka kukwenda na Emausi. Muntu mosi kutanaka ti bo na nzila mpi yulaka bo nki mambu bo ke tubila. Bo tubaka nde: ‘Nge me wa ntete ve? Bilumbu tatu me luta, bamfumu ya banganga-nzambi fwaka Yezu. Ntangu yai bankento ya nkaka ke tuba nde yandi ke na luzingu!’ Muntu yina yulaka bo nde: ‘Keti beno ke kwikilaka ve na baprofete?’ Yandi landaka kutendudila bo Masonuku. Ntangu bo kumaka na Emausi, balongoki songaka muntu yina na kukwenda ti bo. Na ntwala ya kudia, ntangu yandi sambaka sambu na dimpa, bo bakisaka nde muntu yina vandaka Yezu. Na nima yandi vilaka.

Balongoki zole yina kwendaka nswalu na Yeruzalemi na nzo yina bantumwa vukanaka mpi zabisaka bo mambu yina salamaka. Ntangu bo vandaka kuna, na kati ya nzo, Yezu basikilaka bo yonso. Ntete, bantumwa ndimaka ve nde yo vandaka Yezu. Ebuna yandi songaka bo nde: ‘Beno tala maboko na mono; beno simba mono. Bo me sonikaka nde Kristu ta futumuka na bafwa.’

Ntangu fioti na nima ya ntangu yina Yezu monanaka na bantumwa, Piere kwendaka kuloba na Nzadi-Mungwa ya Galilea. Toma, Yakobo, Yoane, mpi balongoki ya nkaka kwendaka ti yandi. Bo lobaka mpimpa ya mvimba, kansi bo kangaka ve ata kima mosi.

Na suka-suka ya kilumbu yina landaka, bo monaka muntu mosi me telama na dibungu. Yandi tubilaka bo nde: ‘Keti beno me kanga ata mbisi mosi?’ Bo songaka yandi nde: “Ve!” Yandi tubaka nde: “Beno losa bukondi na diboko ya kitata ya maswa.” Ntangu bo salaka mutindu yina, bukondi fulukaka ti bambisi mingi kibeni yo yina mpila ya kukotisa yo na maswa vandaka ve. Na mbala mosi, Yoane bakisaka nde muntu yina vandaka Yezu mpi yandi tubaka nde: “Yo kele Mfumu!” Kukonda kusukinina, Piere bwaka na masa mpi kasaka tii na dibungu. Balongoki ya nkaka landaka yandi na maswa.

Ntangu bo kumaka na dibungu, bo monaka dimpa mpi mbisi ya bo ke yoka na tiya. Yezu zabisaka bo na kunata ndambu ya bambisi sambu bo yika na madia yina. Na nima yandi tubaka nde: “Beno kwisa kudia.”

Ntangu bo manisaka kudia, Yezu yulaka Piere nde: ‘Keti nge ke zolaka mono kuluta kuloba?’ Piere tubaka nde: ‘Ee, Mfumu, nge me zaba nde mu ke zolaka nge.’ Yezu tubaka nde: ‘Kana mpidina, disa bana-mameme na mono.’ Yezu yulaka yandi diaka nde: ‘Piere, keti nge ke zolaka mono?’ Piere tubaka nde: ‘Mfumu, nge me zaba nde mu ke zolaka nge.’ Yezu tubaka nde: “Gungula mameme na mono ya fioti.” Yezu yulaka yandi mbala ya tatu. Piere waka mawa mingi. Yandi tubaka nde: ‘Mfumu, nge me zaba mambu yonso. Nge me zaba nde mu ke zolaka nge.’ Yezu tubaka nde: “Disa mameme na mono ya fioti.” Ebuna yandi songaka Piere nde: “Fula kulanda mono.”

Na Galilea, Yezu kutanaka ti balongoki na yandi. Yandi pesaka bo kisalu mosi ya mfunu mingi: ‘Beno kwenda mpi beno kumisa bantu ya bansi yonso balongoki. Beno longa bo mambu yina mono longaka beno, mpi beno botika bo.’ Na nima yandi silaka bo nde: ‘Beno vila ve, mono ta vanda ntangu yonso ti beno.’

Na nsungi ya bilumbu 40 na nima ya lufutumuku na yandi, Yezu monanaka na balongoki na yandi mingi na Galilea mpi na Yeruzalemi. Yandi longaka bo malongi ya mfunu mpi salaka bimangu mingi. Na nima, Yezu kutanaka ti bantumwa na yandi sambu na mbala ya nsuka na Ngumba ya Banti ya Olive. Yandi tubaka nde: ‘Beno katuka ve na Yeruzalemi. Beno landa kuvingila kima yina Tata silaka.’

Bantumwa bakisaka ve mambu yina yandi zolaka kutuba. Bo yulaka yandi nde: ‘Keti nge ke kuma Ntotila ya Izraele ntangu yai?’ Yezu tubaka nde: ‘Ntangu yina Yehowa me tulaka me lunga ntete ve sambu mono kuma Ntotila. Ntama mingi ve, beno ta baka ngolo ntangu mpeve santu ta kwisila beno, mpi beno ta vanda bambangi na mono. Beno kwenda kusamuna na Yeruzalemi, na Yudea, na Samaria, mpi na bisika ya kuluta ntama ya ntoto.’

Na nima, Yezu mataka na zulu mpi matuti fikaka yandi. Balongoki na yandi landaka kutala na zulu, kansi yandi vandaka me kwenda.

Balongoki katukaka na Ngumba ya Banti ya Olive mpi bo kwendaka na Yeruzalemi. Bo vandaka kukutana ntangu yonso na suku ya zulu mpi bo vandaka kusamba. Bo vandaka kuvingila Yezu sambu yandi pesa bo bantuma ya nkaka.