Mwana-Mpangi ya Polo Vandaka Kikesa

Bika beto longuka disolo ya leke mosi ya bakala yina gulusaka luzingu ya ngwasi na yandi. Ngwasi na yandi vandaka ntumwa Polo. Beto me zaba ve zina ya leke yina ya bakala, kansi beto me zaba nde yandi salaka diambu mosi ya kikesa kibeni. Keti Nge ta zola kuzaba diambu yina yandi salaka?—

Polo vandaka na boloko na Yeruzalemi. Bo kangaka yandi sambu yandi vandaka kulonga mambu ya Yezu. Bantu ya mbi mengaka Polo, yo yina bo salaka pula mosi ya mbi. Bo tubaka nde: ‘Bika beto lomba komanda ya basoda na kunata Polo na tribinale. Beto ta bumbana na nzila, mpi ntangu Polo ta luta beto ta fwa yandi!’

Mwana-mpangi ya Polo waka pula yina ya mbi. Yandi salaka inki? Yandi kwendaka na boloko mpi zabisaka Polo diambu yina. Na mbala mosi, Polo zabisaka yandi na kukwenda kusonga diambu yina na komanda ya basoda. Nge ke yindula nde yo vandaka pete sambu nde leke yai kusolula ti komanda ya basoda?— Ve, sambu komanda ya basoda vandaka muntu mosi ya nene. Kansi, mwana-mpangi ya Polo vandaka kikesa mpi yandi solulaka ti komanda ya basoda.

Komanda ya basoda zabaka diambu yina yandi fwete sala. Yandi ponaka basoda kiteso ya 500 sambu na kutanina Polo! Yandi zabisaka bo na kunata Polo na Sezarea kaka na mpimpa yina. Keti Polo gulukaka?— Ee, bantu yina ya mbi fwaka yandi ve! Pula na bo ya mbi nungaka ve.

Inki dilongi nge lenda baka na disolo yai?— Nge mpi lenda vanda kikesa bonso mwana-mpangi ya Polo. Beto fwete vanda ti kikesa ntangu beto ke zabisa bankaka mambu ya Yehowa. Keti nge ta vanda kikesa mpi ta landa kutuba mambu ya Yehowa?— Kana nge sala mpidina, nge lenda gulusa muntu mosi na lufwa.