Kuyantika 1:26—“Beto Sala Muntu na Kifwani na Beto”

“Ebuna Nzambi tubaka nde: ‘Beto sala muntu na kifwani na beto, yandi vanda bonso beto, mpi bo yala bambisi ya masa ya nzadi-mungwa, bigangwa ya ke pumbukaka, bambisi ya bwala, ntoto ya mvimba, mpi konso mbisi ya ke tambulaka divumu na ntoto.’”—Kuyantika 1:26, Mbalula ya Nsi-Ntoto ya Mpa.

“Ebuna Nzambi tubaka nde: ‘Ntangu yai beto ke sala bantu, bo ta vanda bonso beto, bo ta fwanana na beto. Bo ta yalaka bambisi ya masa, bandeke, ti bambisi yonso ya bwala ti ya mfinda, ya nene ti ya fioti.’”—Kuyantika 1:26, Bible en Kituba.

Ntendula ya Kuyantika 1:26

Nzambi salaka bantu na kifwani na yandi; yandi salaka bo ti makuki ya kuyedisa mpi kumonisa bikalulu yina yandi kele ti yo, mu mbandu zola, kuditula na kisika ya bantu ya nkaka, mpi lunungu. Yo yina bantu ke vandaka ti makuki ya kuvanda ti bikalulu yina Nzambi kele ti yo.

“Nzambi tubaka nde: ‘Beto sala muntu na kifwani na beto.’” Na ntwala nde Yehowa Nzambia kusala konso muntu to konso kima, yandi salaka kigangwa mosi ya kimpeve ya ngolo mingi; na nima yandi zabanaka na zina ya Yezu. Na nzila ya Yezu, “bo gangaka bima yonso ya nkaka na zulu mpi na ntoto.” (Bakolosai 1:16) Yezu ke monisaka kimuntu ya Yehowa, disongidila “yandi kele kifwani ya Nzambi yina ke monanaka ve.” (Bakolosai 1:15) Yo yina, yo me fwana mutindu Nzambi songaka Yezu nde: “Beto sala muntu na kifwani na beto.”

“Bo yala . . . bambisi ya bwala, [mpi] ntoto ya mvimba.” Nzambi salaka ve bambisi na kifwani na yandi. Yandi salaka yo ve sambu yo vanda ti bikalulu yina bantu kele na yo, mu mbandu zola to nde yo vanda ti kansasa (conscience). Ata mpidina, Nzambi ke kudiyangisaka sambu na mambote ya bambisi yina yandi me salaka. Yo yina yandi tubaka nde bantu fwete “yala” bambisi; ngogo yina, bo lenda balula yo mpi nde “kutwadisa” (New International Version) to “kukeba” bambisi (Common English Bible). Na kutuba yina, Yehowa pesaka muntu mukumba ya kukeba bambisi. (Nkunga 8:6-8; Bingana 12:10) Yehowa ke vingilaka nde bantu kukeba mbote ntoto mpi bima yonso ya ke zingaka na kati na yo.

Mambu ya Bo Ke Tubila na Baverse ya Kele na Nima ya Kuyantika 1:26

Bakapu zole ya luyantiku ya mukanda ya Kuyantika ke tubila na bunkufi mutindu Nzambi gangaka zulu ti ntoto, planete na beto, mpi luzingu na ntoto. Bima yonso ya Yehowa salaka kele kitoko, kansi muntu kele kima ya kuluta kitoko yina Nzambi salaka na ntoto. Ntangu Nzambi manisaka bisalu na yandi ya kuganga, yandi “monaka nde mambu yonso ya yandi salaka yo kele mbote mpenza.”—Kuyantika 1:31.

Tala video yai ya nkufi sambu na kuzaba mambu mingi ya me tala disolo ya lugangu yina mukanda ya Kuyantika ke tubila.

Bangindu ya luvunu sambu na Kuyantika 1:26

Ngindu ya luvunu: Kuyantika 1:26 ke ndimisa nde Yezu kele Nzambi.

Diambu ya kieleka: Kinduku ya kele na kati ya Nzambi ti Yezu kele bonso kinduku yina ke vandaka na kati ya papa ti mwana, kansi bo kele ve muntu kaka mosi. Yezu longaka nde Nzambi me luta yandi. (Yoane 14:28) Sambu na kuzaba mambu mingi, tala video Keti Yezu Kristu Kele Nzambi? To tanga disolo “Sambu na Nki Biblia Ke Bingaka Yezu Mwana ya Nzambi?”

Tala video yai ya nkufi sambu na kumona na bunkufi mambu yina ke na mukanda ya Kuyantika.