Sambu na Inki Beto Kefwaka?
“Nsongi ya bangumba yonso mekuma pima ntangu yai, na zulu ya banti yonso mupepe kewakana ve, bandeke melala na banti: bau kevingila; kubika fyoti nge mpi kekwenda kupema bonso bau.”—JOHANN WOLFGANG VON GOETHE, POWETE YA ALLEMAGNE.
1, 2. (a) Bantu gangamaka ti inki mpusa? (b) Bakala ti nkento ya ntete vandaka ti luzingu ya inki mutindu?
NZAMBI gangaka bantu ti mpusa ya kuzinga mvula na mvula. Yau yina Biblia ketuba nde yandi tulaka “ngindu ya mvula na mvula na bantima na bau.” (Longi 3:11, Beck) Kansi Nzambi sukaka ve kaka na kupesa bantu mpusa ya kuzinga mvula na mvula. Yandi pesaka bau mpi dibaku ya kuzinga mutindu yina.
2 Bibuti na beto ya ntete, Adami ti Eva, gangamaka ya kukuka, ya kukonda ata kifu mosi na mabanza to na nitu. (Kulonga 32:4) Yindula ntete—ya kukonda maladi ti mpasi ya kemanaka ve, ya kukonda kubangabanga mpamba to basusi! Dyaka, Nzambi tulaka bau na kati ya paladisu mosi ya kitoko kibeni. Lukanu ya Nzambi vandaka nde muntu kuzinga kimakulu mpi nde na bilumbu takwisa ntoto kufuluka ti bana na yandi ya kukuka. (Kuyantika 1:31; 2:15) Ebuna, sambu na inki beto kefwaka?
Kukonda Bulemfu Kenataka Lufwa
3. Inki lombamaka sambu Adami ti Eva kuzinga mvula na mvula?
3 Nzambi tumaka na Adami nde: “Nge lunga kudia bambuma ya konso nti yina kele na kilanga yai, kansi nge lunga kudia ve bambuma ya nti yai ke pesaka mayele sambu na kuzaba mambu ya mbote ti mambu ya mbi. Kilumbu ya nge ta dia yo, kilumbu yo yina nge ta fwa.” (Kuyantika 2:16, 17) Na yau, sambu Adami ti Eva kuzinga mvula na mvula, yau lombaka nde bau lemfuka na Nzambi.
4. Ntangu Adami ti Eva sumukaka, sambu na inki bau vidisaka kivuvu ya kuzinga mvula na mvula na kati ya Paladisu?
4 Kansi mawa mingi, Adami ti Eva lemfukaka ve na nsiku ya Nzambi. (Kuyantika 3:1-6) Sambu bau salaka buna, bau kumaka bansumuki, sambu “kana muntu me sala masumu yo ke songa nde yandi me fwa Bansiku.” (1 Yoane 3:4) Mbutu yau butaka kele yai: Adami ti Eva vandaka dyaka ve ti kivuvu ya luzingu ya mvula na mvula. Sambu na inki? Sambu “nsuka [“salere,” NW] ya masumu kele lufwa.” (Roma 6:23) Yau yina, na ntangu Nzambi zengilaka Adami ti Eva nkanu, Yandi tubaka nde: “Nge kele ntoto, nge ta vutuka mpi na ntoto.” Na nima Nzambi basisaka bibuti na beto ya ntete na Paladisu. Na kilumbu yina ya bau salaka disumu, Adami ti Eva yantikaka kufwa malembemalembe.—Kuyantika 3:19, 23, 24.
“Bantu Yonso Ke Fwaka”
5. Inki mutindu lufwa yalumukaka na bantu yonso?
5 Ntangu yai, disumu kotilaka kibeni Adami ti Eva na kati ya nitu na bau. Yau yina, bau lendaka ve kubuta bana ya kukuka, sambu yau lenda salama ve ata fyoti nde kinzanza ya kusadila dimpa ya kutengama kubasisa dimpa mosi ya mbote. (Yobi 14:4) Ya kyeleka, kubutuka ya muntu yonso kendimisaka nde bibuti na beto ya ntete vidisaka mavimpi ya kukuka ti luzingu ya mvula na mvula sambu na bau mosi mpi sambu na bana na bau. Polo, yina vandaka ntumwa mpi Mukristu sonikaka nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso [m]e salaka masumu.”—Roma 5:12; fwanisa ti Nkunga 51:5.
6. Sambu na inki beto kefwaka?
6 Bubu yai, bantu ya siansi kezabaka kibeni ve sambu na inki bantu kenunaka mpi kefwaka. Kansi, Biblia ketendula nde beto kefwaka sambu beto kebutukaka bantu ya masumu, masumu ya beto mebakaka na bibuti na beto ya ntete. Kansi inki kekuminaka beto kana beto mefwa?