DILONGI 47
Keti Nge Kele ya Kuyilama na Kubaka Mbotika?
Kulonguka na nge ya Biblia me sadisa nge na kuzaba mambu mingi sambu na Yehowa. Mbala ya nkaka, yo me pusa nge na kuyambula mambu ya mbi mpi na kukuma kusadila mambu ya nge me longukaka dezia. Ata mpidina, yo lenda vanda ti kima mosi ya ke kanga nge nzila ya kudipesa na Yehowa mpi kubaka mbotika. Dilongi yai ta tubila mwa mambu yina ke kangaka bantu mingi nzila na kubaka mbotika mpi mambu ya nge lenda sala sambu yo kanga nge diaka ve nzila.
1. Nge fwete zaba mambu ya Biblia nki kiteso na ntwala ya kubaka mbotika?
Sambu na kubaka mbotika, nge fwete vanda ti “nzayilu ya . . . kieleka.” (1 Timoteo 2:4) Yo ke tendula ve nde na ntwala ya kubaka mbotika nge fwete zaba bamvutu na bangiufula yonso ya Biblia. Nkutu ata Bakristu ya me bakaka mbotika ntama, ke landaka kaka kulonguka Biblia. (Bakolosai 1:9, 10) Kansi yo ke tendula nde nge fwete zaba malongi ya Biblia yina yo ke lombaka ntete nde muntu kuzaba. Kana nge kele ti badute mpi ke kudiyula kana nge me zaba mpenza mambu ya Biblia na kiteso ya me fwana, nge lenda solula ti bankuluntu.
2. Inki mambu nge fwete sala na ntwala ya kubaka mbotika?
Na ntwala ya kubaka mbotika, nge fwete ‘balula ntima . . . mpi kubaluka.’ (Tanga Bisalu 3:19.) Yo ke tendula nde nge fwete wa mawa mingi sambu na masumu yonso yina nge me salaka mpi kulomba Yehowa na kulolula nge. Nge fwete yambula mambu ya mbi mpi kuzinga na mutindu yina ke sepedisaka Nzambi. Diaka, nge fwete banda kukwenda na balukutakanu mpi kukuma nsamuni ya me bakaka ntete ve mbotika sambu nge banda kulonga nsangu ya mbote ti bampangi ya dibundu.
3. Sambu na nki nge fwete bika ve nde boma kukanga nge nzila?
Bantu ya nkaka ke waka boma nde bo ta kuka ve kusala mambu yina bo silaka Yehowa. Ya kieleka, babakala mpi bankento ya Biblia ke tubilaka yina sadilaka Nzambi na ntima ya mvimba vandaka mpi kusala bifu. Bantangu ya nkaka, nge mpi ta salaka bifu kaka bonso bo. Kuvila ve nde, Yehowa ke lombaka ve bansadi na yandi na kusala mambu bonso bantu ya me konda masumu. (Tanga Nkunga 103:13, 14.) Yandi ke waka kiese ntangu nge ke salaka ngolo sambu na kusepedisa yandi! Ya kieleka, Yehowa ta sadisa nge. Nkutu, yandi ke songaka beto nde ata kima mosi ve “ta kuka kukabula beto na zola [na yandi].”—Tanga Baroma 8:38, 39.
LONGUKA MAMBU MINGI
Beto tala mutindu kuzaba Yehowa mbote mpi kundima lusadisu na yandi lenda sadisa nge na kubika ve nde ata kima mosi kukanga nge nzila ya kubaka mbotika.
4. Longuka sambu nge zaba Yehowa mbote
Nge fwete zaba Yehowa nki kiteso na ntwala ya kubaka mbotika? Nge fwete zaba yandi mbote na kiteso yina ta sadisaka nge na kuzola yandi mpi na kusepedisa yandi. Beno tala VIDEO sambu na kumona mutindu balongoki ya Biblia ya ntoto ya mvimba me salaka yo. Na nima beno pesa mvutu na ngiufula ya ke landa.
Mutindu video me monisa yo, nki me sadisaka bantu ya nkaka na kuyilama sambu na kubaka mbotika?
Beno tanga Baroma 12:2 mpi na nima beno pesa mvutu na bangiufula yai:
Keti nge ke vandaka kaka ti mwa badute sambu na mambu yina Biblia ke longaka mpi ke kudiyulaka kana Bambangi ya Yehowa ke longaka mpenza kieleka?
Kana yo kele mutindu yina, nki nge lenda sala sambu na kukatula badute yango?
5. Kubika ve nde ata kima mosi kukanga nge nzila ya kubaka mbotika
Beto yonso ke kutanaka ti bampasi ntangu beto ke bakaka lukanu ya kudipesa na Yehowa mpi ya kubaka mbotika. Sambu na kumona mbandu mosi, beno tala VIDEO mpi na nima beno pesa mvutu na bangiufula ya ke landa.
Mutindu video me monisa yo, mpangi Narangerel kangaka ntima na nki bampasi sambu na kusadila Yehowa?
Inki mutindu zola na yandi sambu na Yehowa sadisaka yandi na kubika ve nde bampasi yango kukanga yandi nzila ya kusadila Yehowa?
Beno tanga Bingana 29:25 mpi 2 Timoteo 1:7. Na nima beno pesa mvutu na ngiufula yai:
Inki ke pesaka beto kikesa ya kubika ve nde ata kima mosi kukanga beto nzila ya kusadila Yehowa?
6. Tula ntima nde Yehowa ta sadisa nge
Yehowa ta sadisa nge na kusala mambu ya ke sepedisaka yandi. Beno tala VIDEO mpi na nima beno pesa mvutu na bangiufula ya ke landa.
Mutindu video me monisa yo, nki vandaka kukanga longoki yai ya Biblia nzila ya kubaka mbotika?
Inki sadisaka yandi na kukuma kutudila mpenza Yehowa ntima?
Beno tanga Yezaya 41:10, 13 mpi na nima beno pesa mvutu na ngiufula yai:
Inki ke ndimisa nge nde nge ta lungisa mambu ya nge silaka Nzambi ntangu nge kudipesaka na yandi na kisambu?
7. Pesa Yehowa mersi mingi sambu na zola yina yandi ke monisilaka nge
Kana nge ke yindula ntangu yonso zola ya mingi yina Yehowa ke vandaka ti yo sambu na nge, yo ta pusa nge na kupesa yandi mersi mpi yo ta pesa nge nzala ya ngolo ya kusadila yandi mvula na mvula. Beno tanga Nkunga 40:5 mpi na nima beno pesa mvutu na ngiufula yai:
Tanga bima ya Yehowa me salaka ya nge ke sepelaka ti yo mingi.
Profete Yeremia vandaka kuzola Yehowa mpi ndinga na yandi. Nkutu yandi vandaka kusepela mingi ti dibaku yina yandi vandaka ti yo ya kuvanda nsadi ya Yehowa. Yandi tubaka nde: “Ndinga na nge kumaka kiese na mono mpi kuyangalala ya ntima na mono sambu bo ke binga mono na zina na nge, O Yehowa Nzambi.” (Yeremia 15:16) Beno pesa mvutu na bangiufula yai:
Sambu na nki kuvanda Mbangi ya Yehowa kele mpenza lukumu ya nene?
Keti nge ke zola kubaka mbotika sambu nge kuma Mbangi ya Yehowa?
Keti kele ti kima mosi ya ke kanga nge nzila ya kubaka mbotika?
Nge ke yindula nde nki nge fwete sala sambu na kubaka mbotika?
BANTU YA NKAKA KE TUBAKA NDE: “Mono ke ndima ve nde mono ta kuka kulungisa mambu yonso yina yo ke lombaka kusala kana muntu me baka mbotika.”
Keti nge ke yindulaka mpi mutindu yai?
NA BUNKUFI
Yehowa ta sadisa nge sambu ata kima mosi ve kukanga nge nzila ya kubaka mbotika.
Inki Nge Me Simba?
Nge fwete zaba mambu ya Biblia nki kiteso na ntwala ya kubaka mbotika?
Inki mambu nge fwete sala na ntwala ya kubaka mbotika?
Sambu na nki nge fwete bika ve nde boma kukanga nge nzila ya kubaka mbotika?
TALA MPI
Inki fwete pusa nge na kubaka mbotika?
“Keti Nge Kele ya Kuyilama na Kubaka Mbotika?” (Nzozulu ya Nkengi, Marsi 2020)
Tala mambu ya nge lenda sala sambu ata kima mosi ve kukanga nge nzila ya kubaka mbotika.
“Inki Ke Kanga Mono Nzila na Kubaka Mbotika?” (Nzozulu ya Nkengi, Marsi 2019)
Tala mutindu bakala mosi yambulaka mpenza bikalulu ya mbi yina vandaka kukanga yandi nzila ya kubaka mbotika.
Inki pusaka mpangi Ataa na kubaka mbotika ata yandi vandaka ntete kuzola ve kubaka mbotika?