“Nda Bonso Sedre ya Libani”

BANTI mosi kemenaka na zulu ya bangumba ya kitoko ya Libani, zina na yo Arz Ar-rab, disongidila “Basedre ya Mfumu.” Banti yai kevandaka nene kibeni mpi nda, matiti na yo keyumaka ve ntangu yonso mpi yo vandaka ya kufuluka na bangumba yai. Zina ya sedre kele mbala 70 na kati ya Biblia, ke ti nti yankaka ve ya Biblia ketanga mbala mingi mutindu yina.

Biblia ketuba nde basedre ya Libani kele banti mosi ya “kitoko mpenza.” (Kitoko 5:15; Ezekiele 17:23) Nda ya dibaya ya sedre ti ngolo na yo mekumisaka yo dibaya ya kuluta kitoko na meso ya bantu yina kesalaka banzo, bamaswa, ti bima ya nzo. Nsudi ya mabaya na yo ti nitu na yo ya mbwaki kesepelisaka muntu yonso. Budimbu na yo mepesaka yo ngolo mingi, bambumbu kedyaka yo ve. Basedre kele banti mosi ya nda mpi nene mingi. Nda na yo lenda kuma bametre 37, mpi nene na yo bametre 12. Bansimbulu na yo ke ngolo mingi mpi kekwenda ntama na nsi ya ntoto. Yo yina, beto fwete yituka ve kana bantu ya kelongukaka banti mekumaka kubinga yo nde “nti ya melwataka mpu ya lukumu na kati ya banti yonso na inza”!

Na mbikudulu na yandi ya kele na Biblia, Ezekiele fwanisaka Mesia ti lutangu ya sedre mosi ya Nzambi kukunaka. (Ezekiele 17:22) Yo mpi, ngogo ya bo kebingilaka “sedre” na Kiebreo kele ti ngindu ya “kuvanda ngolo.” Mutindu mosi bubu yai, balandi ya Mesia, Yezu Kristu, fwete “bikala ngolo na lukwikilu, . . . bo fwete yela bo kuma ngolo,” bonso sedre mosi ya nda mpi ya ngolo. (1 Korinto 16:​13, NW) Nki bo fwete sala na kukuma mutindu yina? Bo fwete nwana ti mupepe ya kewakana ve ti Bukristu, bo landa ntangu yonso kukangama na Nzambi. Bayina kesalaka mutindu yina, Biblia kebinga bo nde “bantu ya mbote . . . [yina] keyela mpi kekuma nda bonso sedre ya Libani.”​—⁠Nkunga 92:​12, The New English Bible.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, République démocratique du Congo, to na mosi na adresi mebonga na nge yina kele na lutiti 2.