Kulonguka Biblia ke nataka mambote mingi. Ata mpidina, yo ke vandaka ve ntangu yonso pete. Bantangu ya nkaka nge lenda kudiyula kana nge ta kuka kulonguka Biblia tii na nsuka. Sambu na nki yo kele mfunu nde nge sala bikesa ya kulanda kulonguka? Inki lenda sadisa nge na kulanda kulonguka ata nge ke kutana ti bampasi?

1. Sambu na nki kulonguka Biblia kele mfunu?

Biblia, “Ndinga ya Nzambi kele ya moyo mpi ngolo.” (Baebreo 4:12) Biblia kele mfunu mingi sambu yo ke songaka beto mambu yina Nzambi ke yindulaka mpi mutindu yandi ke tadilaka nge. Yo ta sadisa nge na kuzaba mambu mingi, na kukuma ti mayele ya kieleka mpi kivuvu. Kima ya kuluta mfunu, Biblia ta sadisa nge na kukuma nduku ya Yehowa. Kulonguka Biblia ke tomisaka mpenza luzingu na beto.

2. Sambu na nki nge fwete ndima nde malongi ya Biblia kele mfunu mingi?

Malongi ya Biblia kele bonso bimvwama ya mfunu. Yo yina Biblia ke lombaka beto na ‘kusumba kieleka mpi na kuteka yo ve ata fioti.’ (Bingana 23:23) Kana beto ke ndima nde malongi ya Biblia kele mfunu, beto ta landa kulonguka yo ata ntangu beto ke kutana ti bampasi.​—Tanga Bingana 2:4, 5.

3. Inki mutindu Yehowa lenda sadisa nge na kulanda kulonguka?

Yehowa, Ngangi Nkwa-Ngolo Yonso mpi Nduku na nge, ke zola kusadisa nge na kuzaba yandi. Yandi ta pesa nge “nzala ti ngolo ya kusala mambu.” (Tanga Bafilipi 2:13.) Yo yina bantangu ya nkaka, kana nge kele na mfunu ya kukuma diaka ti nzala ya ngolo ya kulonguka to ya kusadila mambu yina nge ke longuka, yandi ta sadisa nge. Yandi ta pesa nge ngolo yina nge kele na yo mfunu sambu nge kanga ntima na bampasi to ntangu bantu ke telemina nge. Nge fwete samba Yehowa mbala na mbala sambu yandi sadisa nge na kulanda kulonguka Biblia.​—1 Batesalonika 5:17.

LONGUKA MAMBU MINGI

4. Tula kulonguka na nge ya Biblia na kisika ya ntete

Bantangu ya nkaka, beto ke vandaka ti mambu mingi ya kusala na luzingu. Yo yina beto lenda mona nde beto kele ve ti ntangu ya kulonguka Biblia. Inki ta sadisa nge? Beno tanga Bafilipi 1:10 mpi na nima beno pesa mvutu na bangiufula yai:

• Inki kele “mambu ya kuluta mfunu” na luzingu?

• Inki mutindu nge lenda tula kulonguka na nge ya Biblia na kisika ya ntete?

1. Kana nge fulusa ekolo mosi ti zelo mpi na nima nge meka kutula matadi, kisika ya kutula matadi ta vanda ve

2. Kana nge tula ntete matadi, kisika ta vanda mpi sambu na kutula zelo. Mutindu mosi mpi, kana nge ke tula “mambu ya kuluta mfunu” na kisika ya ntete na luzingu na nge, nge ta zwa ntangu ya kusala mambu yango mpi mambu ya nkaka

Kulonguka Biblia ke sadisaka beto na kulungisa nzala na beto ya mambu ya kimpeve, disongidila nzala ya kuzaba mpi ya kusambila Nzambi. Beno tanga Matayo 5:3 mpi na nima beno pesa mvutu na ngiufula yai:

• Inki mambote nge ta baka kana nge ke tula kulonguka ya Biblia na kisika ya ntete?

5. Landa kulonguka ata bantu ke telemina nge

VIDEO: Mambote Yina Yandi Bakaka Sambu Yandi Landaka Kulonguka Biblia (5:22)

• Mutindu video ke monisa yo, nki mambu banduku ya Francesco mpi bantu ya dibuta na bo salaka ntangu yandi songaka bo nde yandi ke longuka Biblia?

• Inki mambote yandi bakaka sambu yandi landaka kulonguka Biblia?

Beno tanga 2 Timoteo 2:24, 25 mpi na nima beno pesa mvutu na bangiufula yai:

• Inki mutindu bantu ya dibuta na beno mpi banduku na nge ke tadilaka kulonguka na nge ya Biblia?

• Mutindu baverse yai ke monisa yo, nki nge fwete sala kana muntu mosi ke sepela ve sambu nge ke longuka Biblia? Sambu na nki?

6. Tula ntima nde Yehowa ta sadisa nge

VIDEO: Yehowa Ke Sadisaka Beto na Kusoba (3:56)

• Mutindu video ke monisa yo, nki bikalulu ya mbi Jim yambulaka sambu na kusepedisa Yehowa?

• Inki ke yitukisa nge na mbandu na yandi?

Beno tanga Baebreo 11:6 mpi na nima beno pesa mvutu na bangiufula yai:

• Inki Yehowa ta sala sambu na bantu yina “ke sosaka yandi na masonga yonso,” disongidila bantu yina ke salaka bikesa sambu na kuzaba yandi mpi kusepedisa yandi?

• Mambu yai ke monisa nde Yehowa ke waka nki mutindu ntangu yandi ke monaka bikesa yina nge ke salaka sambu na kulonguka Biblia?

NA BUNKUFI

Ata kulonguka Biblia ke vandaka ve ntangu yonso pete, yo ta sadisa nge na kuzinga mvula na mvula. Landa kutudila Yehowa ntima mpi yandi ta sakumuna nge.

Inki Nge Me Simba?

• Sambu na nki malongi ya Biblia kele mfunu?

• Inki mutindu nge lenda tula “mambu ya kuluta mfunu“ na kisika ya ntete?

• Sambu na nki nge fwete lomba Yehowa na kusadisa nge na kulanda kulonguka Biblia?

TALA MPI

Tala mambu iya yina me sadisaka bantu mingi na kusadila ntangu na bo na mayele yonso.

“Mutindu Nge Lenda Sadila Ntangu na Mayele Yonso” (Disolo ya kele na Telama!)

Tala mutindu Yehowa sadisaka nkento mosi yina bakala na yandi vandaka kumona ve bikesa yina yandi vandaka kusala sambu na kusepedisa Nzambi.

Yehowa Ke Pesaka Beto Ngolo ya Kunata Kizitu na Beto (5:05)

Tala mambote yina bakala mosi bakaka sambu nkento na yandi landaka kulonguka Biblia.

Yo Vandaka Mpasi Sambu Mono Ndima Kieleka (6:30)

Bantangu ya nkaka, bantu ke fundaka Bambangi ya Yehowa nde bo ke kabisaka mabuta. Keti yo ke vandaka ya kieleka?

“Keti Bambangi ya Yehowa Ke Kabisaka Mabuta to Bo Ke Sadisaka Yo na Kuvanda Ngolo?” (Disolo ya kele na jw.org)

Beto yonso ke bakaka balukanu. Balukanu mingi ya beto ke bakaka lenda vanda mpenza mbote to mbi sambu na beto mosi mpi sambu na kinduku na beto ti Yehowa. Mu mbandu, yo lenda lomba nde beto baka lukanu sambu na kisika yina beto ta zinga, mutindu beto ta zwa mbongo ya kuzingila mpi kana beto ta bala to ve. Kana beto ke baka balukanu ya mbote, beto ta zinga na kiese mpi beto ta sepedisa Yehowa.

1. Inki nge fwete sala sambu Biblia kusadisa nge na kubaka balukanu ya mbote?

Na ntwala ya kubaka lukanu, samba Yehowa sambu yandi sadisa nge mpi tanga Biblia sambu nge bakisa mutindu yandi ke tadilaka lukanu yango. (Tanga Bingana 2:3-6.) Yehowa ke pesaka bansiku ya pwelele na mambu ya nkaka. Kana bansiku kele dezia pwelele, lukanu ya kuluta mbote ya nge fwete baka kele ya kulemfuka na bansiku yango.

Ebuna nki nge ta sala kana kele ve ti nsiku mosi ya Biblia ya ke tubila pwelele lukanu mosi ya nge ke zola kubaka? Kuvila ve nde Yehowa ta twadisa nge kaka “na nzila yina nge fwete tambula.” (Yezaya 48:17) Inki mutindu yandi ta sala yo? Biblia kele ti minsiku yina lenda twadisa nge. Minsiku ya Biblia kele malongi ya mfunu yina ke sadisaka beto na kubakisa bangindu ya Yehowa mpi mutindu yandi ke tadilaka mambu. Mbala mingi, beto ke zabaka mutindu Nzambi ke tadilaka kima mosi buna ntangu beto ke tanga disolo mosi na Biblia. Kana beto me bakisa mutindu yandi ke tadilaka kima yango, beto ta baka lukanu yina ta sepedisa yandi.

2. Inki nge fwete sala na ntwala ya kubaka lukanu?

Biblia ke tuba nde: “Muntu ya mayele ke tadilaka konso kitambi na yandi.” (Bingana 14:15) Yo ke tendula nde na ntwala ya kubaka lukanu, beto fwete baka ntangu ya kuyindula. Na ntwala ya kubaka konso lukanu yina, kudiyula nde: ‘Inki minsiku ya Biblia mono fwete sadila? Keti lukanu ya mono ta baka ta natila mono ngemba ya mabanza? Keti lukanu yango ta yangisa kansansa ya bantu ya nkaka? Kima ya kuluta mfunu, nge fwete kudiyula nde: Keti lukanu yango ta sepedisa Yehowa?’​—Kulonga 32:29.

Yehowa kele ti nswa ya kusonga beto nki mambu kele mbote mpi nki mambu kele mbi. Beto ke kumaka ti kansansa ya mbote ntangu beto ke zabaka mbote bansiku mpi minsiku ya Nzambi mpi ntangu beto ke salaka yonso sambu na kuzitisa yo. Kansansa kele kima mosi yina ke vandaka na kati na beto mpi ya ke sadisaka beto na kuzaba mambu ya mbote mpi ya mbi. (Baroma 2:14, 15) Kana beto ke longa kansansa na beto, yo ta sadisaka beto na kubaka balukanu ya mbote.

LONGUKA MAMBU MINGI

3. Bika Biblia kutwadisa nge

VIDEO: Bika Minsiku ya Biblia Kutwadisa Nge (5:54)

• Yehowa me pesaka beto nzila ya kusala nki?

• Sambu na nki Yehowa me pesaka beto nzila ya kubaka balukanu beto mosi?

• Inki Yehowa me pesaka beto sambu na kusadisa beto na kubaka balukanu ya mbote?

Sambu na kumona mbandu mosi ya munsiku ya Biblia, beno tanga Baefezo 5:15, 16. Na nima beno tubila mutindu nge lenda “sadila ntangu na [nge] mbote kibeni” sambu na . . .

• kutanga Biblia mbala na mbala.

• kukuma bakala, nkento, kibuti to mwana ya mbote.

• kukwenda na balukutakanu ya dibundu.

4. Longa kansansa na nge sambu na kubaka balukanu ya mbote

VIDEO: “Beno Vanda ti Kansansa ya Mbote” (5:13)

• Mutindu video me monisa yo, nki mpangi-nkento yai salaka sambu na kulonga kansansa na yandi mpi kubaka lukanu yina sepedisaka Yehowa?

Sambu na nki beto fwete lomba ve bantu ya nkaka na kubakila beto balukanu? Beno tanga Baebreo 5:14 mpi na nima beno pesa mvutu na bangiufula yai:

• Beto lenda mona nde yo kele ve mbi na kulomba bantu ya nkaka na kubakila beto balukanu, ata mpidina beto mosi fwete vanda ti mayele ya kuswaswanisa nki mambu?

• Inki bisadilu ya kulongukila lenda sadisa nge na kulonga kansansa na nge mpi na kubaka balukanu ya mbote?

5. Zitisa kansansa ya bantu ya nkaka

Kana bantu kele mingi, balukanu ya kubaka ke vandaka mpi mingi. Inki beto fwete sala sambu na kumonisa nde beto ke zitisa kansansa ya bantu ya nkaka? Beto tadila bambandu yai zole:

Mbandu 1: Mpangi-nkento mosi ya ke zolaka mingi kulwata bapantalo kana yandi ke kwenda na bafeti to ke sala mambu ya nkaka me kwenda na dibundu mosi yina bampangi-bankento mingi ke zolaka ve buna.

Beno tanga Baroma 15:1 mpi 1 Bakorinto 10:23, 24. Na nima, beno pesa mvutu na bangiufula yai:

• Mutindu baverse yai ke monisa yo, nki mpangi-nkento yai lenda sala? Inki nge ta sala kana nge kele ti muntu yina kansansa na yandi ke buyisa yandi na kusala kima mosi yina kansansa na nge ke pesa nge nzila ya kusala yo?

Mbandu 2: Mpangi-bakala mosi ke zaba nde Biblia ke buyisaka ve kunwa malafu na kiteso ya me fwana kansi yandi me buyaka kunwa yo. Bo me bingisa yandi na mwa feti mosi mpi kuna yandi me mona bampangi-babakala ke nwa malafu.

Beno tanga Longi 7:16 mpi Baroma 14:1, 10. Na nima, beno pesa mvutu na bangiufula yai:

• Mutindu baverse yai ke monisa yo, nki mpangi-bakala yai lenda sala? Inki nge ta sala kana nge me mona muntu ya nkaka ke sala kima mosi yina kansansa na nge ke pesa nge ve nzila ya kusala yo?

Mambu ya nge fwete sala sambu na kubaka balukanu ya mbote

1. Samba Yehowa sambu yandi sadisa nge na kuzaba mambu ya nge fwete sala.​—Yakobo 1:5.

2. Sosa minsiku yina ke tubila mambu yango na Biblia mpi na mikanda ya ke tendulaka Biblia. Nge lenda yula mpi Bakristu ya kuyela na kimpeve.

3. Yindula mutindu lukanu ya nge ke zola kubaka ta sala kansansa na nge mpi kansansa ya bantu ya nkaka.

NA BUNKUFI

Sambu na kubaka balukanu ya mbote, beto fwete sosa ntete kuzaba kana balukanu yango ta sepedisa Yehowa mpi kana yo ta pesa bantu ya nkaka kiese to mpasi.

Inki Nge Me Simba?

• Inki nge fwete sala sambu na kubaka balukanu yina ke sepedisaka Yehowa?

• Inki lenda sadisa nge na kulonga kansansa na nge?

• Inki nge lenda sala sambu na kumonisa nde nge ke zitisa kansansa ya bantu ya nkaka?

TALA MPI

Tala mambu ya nge fwete sala sambu na kubaka balukanu yina ta kumisa kinduku na nge ti Nzambi ngolo.

“Baka Balukanu Yina Kepesaka Nzambi Lukumu” (Nzozulu ya Nkengi, Aprili 1, 2011)

Tala mitindu ya nkaka yina Yehowa ke pesaka beto bandongisila.

Yehowa Ke Twadisaka Bansadi na Yandi (9:50)

Tala mambu yina sadisaka bakala mosi na kubaka lukanu mosi ya mpasi.

Yehowa Ke Silaka Kaka Mambu ya Mbote (5:51)

Tala mambu ya nkaka ya lenda sadisa nge na kubaka lukanu yina ta sepedisa Yehowa kana kele ve ti nsiku mosi ya Biblia ya ke tubila pwelele mambu ya nge fwete sala.

“Keti Nge Ke Vandaka ti Mfunu ya Nsiku Mosi ya Biblia na Konso Kima?” (Disolo ya kele na Nzozulu ya Nkengi)