Kubasisa “Masa na Dibulu ya Nda”

KINGANA mosi ya Biblia ketuba nde: “Ngindu [“ndogisila,” NW] ya muntu kele bonso masa na dibulu ya nda, kansi muntu ya mayele [“ya luswasukusu,” NW] lenda basisa yo.” (Bingana 20:⁠5) Na ntangu ya Biblia, kubaka masa vandaka mpasi mingi kuluta mutindu yau kele bubu yai na bansi mingi. Ntangu Yezu solulaka ti nkento ya Musamaria, yandi vandaka kubenda masa na dibulu ya masa ya Yakobo, dibulu mosi ya nda kiteso ya bametre 23!​—Yoane 4:​5-15.

Mutindu Bingana 20:5 kemonisa, luswasukusu ya muntu fwete vanda na yau sambu na kubenda mabanza mpi mawi ya mudindu ya kele na ntima ya muntu yankaka, kele kibeni bonso ngolo ya muntu fwete vanda na yau sambu na kubenda masa na dibulu. Yau kele mutindu yina na mambu mingi ya luzingu. Mu mbandu, ziku nge zaba bantu mingi yina mesalaka bamvula mingi mpi mekumaka ya kufuluka ti nzayilu mpi ngikana. Kana bantu ya mutindu yina kele ve ti ngindu ya kupesa bantu bandongisila na luzolo na bau mosi, nge lenda sosa mpila ya kubenda yau. Na kumonisaka dikebi, kuyula bangyufula, ti na kusosaka kuzaba na mayele yonso, nge tavanda bonso muntu yina kekulumusa kantini na yandi na dibulu ya nda ya mayele.

Beto lenda sadila mpi ndongisila ya Bingana 20:5 na dibuta. Bankento kelutaka kutuba nde: “Bakala na mono kesongaka mono ve mutindu yandi kewaka!” Bakala lenda tuba nde: “Nkento na mono kekangilaka mono munoko!” Na mambu ya mutindu yina, luswasukusu kele mfunu sambu na kubenda mabanza yina kele na ntima ya nkwelani na nge. Bangyufula ya mayele, (Keti bubu nge kutanaka ti dyambu mosi ya mpasi? Inki kubwaka? Inki mutindu mono lenda sadisa nge?) lenda kangula mbala mingi masolo ya kebasika na ntima. Kumonisa luswasukusu ya mutindu yina takumisa bumosi ya makwela ngolo, sambu na mambote ya nkento ti bakala.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, Congo, Rép. Dém., to na mosi na adresi mebonga na nge yina kele na lutiti 2.