Mwinda Sambu na Kutwadisa Nge na Nzila ya Luzingu
“MFUMU NZAMBI, mono zaba nde ke na muntu ve lenda sola nzila na yandi mosi, ke na muntu ve lenda songa nzila na makulu na yandi ntangu yandi [ke] tambula.” (Yeremia 10:23) Na bangogo yai, mbikudi Yeremia monisaka nde bantu lenda nunga ve na kuyidika nzila ya luzingu nkatu lusadisu. Lusadisu yai takatuka na wapi? Muyimbi-bankunga pesaka mvutu na kisambu na yandi na Yehowa Nzambi: “Mambu na nge kele mwinda ke pelaka na nzila na mono, yo ke tambusaka makulu na mono.”—Nkunga 119:105.
Bayina kelongukaka Ndinga ya Nzambi, Biblia ya Santu, mpi kesadilaka mambu ya yau ketubaka, tavanda bonso muntu yina ya metelama na sukasuka sambu na kukwenda na nzyetolo. Ntete, yandi tabanda kumona ve mbote sambu mpimpa kele. Kansi, ya ntangu kebanda kutana, yandi kebanda kumona mbote. Na nsuka, ntangu tabanda kungenga na zulu ya ntu. Bima yonso yandi kemona yau mbotembote. Mbandu yai keyibusa beto kingana mosi ya Biblia: “Nzila ya bantu ya mbote ke tambulaka kele bonso ntangu ntongo ke tana, yo ke kuma mwini na mwini tii kuna ntangu yonso me basika.”—Bingana 4:18.
Ebuna bayina kelosaka lutwadisu ya Nzambi? Biblia ketuba nde: “Kansi nzila ya bantu ya mbi kele kaka mpimpa na mpimpa; bo ke bwaka kansi bo lenda zaba ve nki me bwisa bo.” (Bingana 4:19) Ee, muntu ya mbi kele bonso muntu yina kebwaka na mpimpa. Ata kununga na bau kevanda kaka ya ntangu fyoti, sambu “kele ti mayele ve, luswasukusu ata mosi ve, ndongisila ata mosi ve ya kewakanaka ve ti Yehowa.”—Bingana 21:30, NW.
Yau yina, landa lutwadisu ya Ndinga ya Nzambi, Biblia. Kana nge landa yau, nge tamona nde Bingana 3:5, 6 ketuba masonga: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.”
[Lupangu ya kele na lutiti 32]
Keti Nge Tazola Mvutukilu Mosi?
Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, Congo, Rép. Dém., to na mosi na adresi mebonga na nge yina kele na lutiti 2.