Bo Me Tina Mfumu Mosi ya Nku

Yozefi me tedimisa Maria na mpongi sambu na kuzabisa yandi nsangu mosi ya mfunu kibeni. Wanzio ya Yehowa me katuka kubasikila yandi na ndosi mpi me zabisa yandi nde: “Telama, baka mwana ti mama na yandi mpi tina na Ezipte, ebuna bikala kuna tii ntangu mono ta zabisa nge, sambu kubika fioti Erode ta sosa mwana sambu na kufwa yandi.”—Matayo 2:13.

Na mbala mosi, Yozefi, Maria ti mwana na bo me tina na mpimpa yina. Bo me tina kibeni na ntangu ya mbote sambu Erode me bakisa nde bantu yina ke zabisaka mambu yina ta salama na bilumbu ke kwisa na nzila ya bambwetete kusaka yandi. Yandi zabisaka bo nde bo fwete vutuka sambu na kunatila yandi nsangu. Kansi bo me kwenda kukonda kuvutukila yandi. Erode me wa makasi ya mingi. Sambu yandi ke zola kaka kufwa Yezu, yandi me pesa nsiku nde bo fwa bana yonso ya babakala ya kele ti bamvula zole kita, na Betelemi mpi na babwala ya pene-pene. Sambu na kuzaba bamvula yina, yandi tadilaka mambu yina bo songaka yandi na bantu yina ke zabisaka mambu yina ta salama na bilumbu ke kwisa na nzila ya bambwetete, bayina katukaka na Esti.

Kufwa bana yonso ya babakala vandaka kima mosi ya nku kibeni! Beto me zaba ve bana ikwa bo fwaka, kansi bidilu ya ngolo mpi milolo ya mawa ya bamama yina bo fwaka bana na bo lungisaka mbikudulu ya Biblia yina Nzambi tubaka na nzila ya mbikudi Yeremia.—Yeremia 31:15.

Na ntangu yina, Yozefi ti dibuta na yandi tinaka na Ezipte, mpi bo landaka kuzinga kuna. Kansi kilumbu mosi na mpimpa, wanzio ya Yehowa kwisaka diaka kubasikila Yozefi na ndosi mpi songaka yandi nde: “Telama, baka mwana ti mama na yandi mpi kwenda na insi ya Izraele, sambu bantu yina vandaka kusosa luzingu ya mwana me fwa.” (Matayo 2:20) Ntangu yai, Yozefi bakisaka nde yandi ti dibuta na yandi bo lenda vutuka na bwala na bo. Mpidina yo lungisaka mbikudulu ya nkaka ya Biblia ya ke tuba nde, Nzambi bingaka mwana na yandi sambu yandi basika na Ezipte.—Ozea 11:1.

Yo ke monana nde, Yozefi zolaka nde dibuta na yandi kuyantika kuzinga na Yudea, ziku pene-pene ya mbanza Betelemi, kisika yina bo vandaka kuzinga na ntwala ya kutina na Ezipte. Kansi yandi waka nde Arkelausi, muntu ya nku mpi mwana ya Erode me kuma ntotila na Yudea. Na ndosi ya nkaka, Nzambi kebisaka yandi sambu na kigonsa yina. Yo yina, Yozefi ti dibuta na yandi kwendaka ntama na nordi mpi yantikaka kuzinga na mbanza Nazareti na ntoto ya Galilea, ntama ti kisika yina Bayuda vandaka kusambila. Yezu yelaka na mbanza yina, mpi yo lungisaka mbikudulu ya nkaka yina tubaka nde: “Bo ta binga yandi muntu ya Nazareti.”—Matayo 2:23.