• “Mono Ta Basisila Bo Ngungudi Mosi”
    Yehowa Me Vutula Lusambu ya Bunkete!
    • Ngo-zulu ya nene ya ntete ya mbikudulu ya Ezekiele me simba ka-lutangu ya nti ya sedre

      Ngo-zulu ya nene ya ntete vandaka kumonisa ntotila Nebukadenezare ya Babilone (Tala paragrafe 6)

      6. Pesa ntendula ya kingana yai.

      6 Kingana yai vandaka kutendula nki? (Tanga Ezekiele 17:11-15.) Na mvu 617 N.T.B., ntotila Nebukadenezare ya Babilone, “ngo-zulu ya nene” ya ntete, ziungaka Yeruzalemi. Yandi katulaka ntotila ya Yuda, Yehoyakini (‘ka-lutangu ya zulu’) na kimfumu na yandi mpi nataka yandi na Babilone (“mbanza ya bantu ya mumbongo”). Nebukadenezare tulaka Sidikiya (mosi na kati ya ‘bankeni ya kimfumu ya insi yina’) na kiti ya kimfumu na Yeruzalemi. Nebukadenezare lombaka Sidikiya, ntotila ya mpa ya Yuda, na kudia ndefi na zina ya Nzambi mpi pusaka yandi na ngolo na kuvanda na nsi ya kiyeka na yandi. (2 Bans. 36:13) Kansi yandi lungisaka ve ndefi na yandi; yandi kolamaka na Babilone mpi sosaka lusadisu na ntotila ya Ezipte, Farao (“ngo-zulu ya nene” ya zole), kansi yo vandaka mpamba. Yehowa buyaka mambu ya kukonda kwikama ya Sidikiya yina lungisaka ve ndefi na yandi. (Ezek. 17:16-21) Nsuka-nsuka, bo katulaka Sidikiya na kimfumu mpi yandi fwaka na boloko na Babilone.—Yer. 52:6-11.