“Bima ya Mbote” Kefuluka na Nzo ya Yehowa

“Mono [Yehowa] ke nikisa bantu yonso ya nsi-ntoto, ebuna [bima ya mbote ya makanda yonso takwisa kukota; ebuna mono tafulusa nzo yai na lukumu, NW].”​—AGAI 2:7.

1. Na ntangu mambu ya nswalunswalu kebwaka, sambu na nki beto keyindulaka ntete bantu ya beto kezolaka?

INKI bima ya mbote kele ya kufuluka na nzo na nge? Keti nge kele na bima ya ntalu na nzo, bonso ordinatere ya mpa ya bo mebasisa, mpi kaminio ya mpa na garage na nge? Ata nge kele na bima yai yonso, keti nge tandima ve nde bima ya kuluta mfunu na kati ya nzo na nge kele bantu, disongidila bantu ya dibuta na nge? Yindula fyoti nde kilumbu mosi na mpimpa, nge metelama sambu na nsudi ya midinga. Nzo na nge kepya tiya, ebuna nge kele kaka na minuta fyoti sambu na kubasika! Inki kima nge tafwila ntete? Bima na nge? Ordinatere na nge? Kaminio na nge? Na kisika yina, keti nge tayindula ve ntete bantu na nge ya nge kezolaka? Ntembe kele ve nde nge tasala yo, sambu bantu meluta bima na mfunu.

2. Inki bima Yehowa mesalaka, mpi na kati na yo nki yo vandaka kuyangidika Yezu mingi?

² Yindula ntangu yai na Yehowa Nzambi ti Mwana na yandi, Yezu Kristu. Yehowa “muntu salaka zulu, ntoto, nzadi-mungwa, ti bima yonso yina kele na yo.” (Bisalu 4:24) Mwana na yandi, “kapita ya kisalu,” vandaka muntu ya ntete yina, na nzila na yandi, Yehowa kusalaka bima yonso. (Bingana 8:30, 31; Yoane 1:3; Kolosai 1:15-17) Ntembe kele ve nde, Yehowa ti Yezu kemonaka bima yonso ya bo salaka mfunu. (Fwanisa ti Kuyantika 1:31.) Kansi nge keyindula nde nki bigangwa meluta mfunu mingi sambu na bo, bima to bantu? Na ntangu yandi vandaka kusala bonso mayele yina vandaka kutuba bonso muntu, Yezu tubaka nde: “Mambu yina vandaka kuyangidika mono vandaka ti bana ya bantu,” (NW) mutindu mbalula ya William F. Beck ketubaka yo nde, Yezu “vandaka kuyangalala na bantu.”

3. Inki mbikudulu Yehowa kuzabisaka na nsadisa ya profete Agai?

³ Ntembe kele ve nde Yehowa kemonaka bantu mfunu mingi. Kima mosi ya kemonisa yo kele ndinga ya baprofete yina yandi tubaka na mvu 520 ya N.T.B. na nsadisa ya profete Agai. Yehowa tubaka nde: “Mono ke nikisa bantu yonso ya nsi-ntoto, ebuna [bima ya mbote ya makanda yonso takwisa kukota; ebuna mono tafulusa nzo yai na lukumu, NW]. . . . Nzo [yai] ya mpa ta luta yina ya ntete na lukumu.”​—Agai 2:7, 9.

4, 5. (a) Sambu na nki yo kele mayele ve na kutuba nde “bima ya mbote” ketendula bima ya kinsuni ya kengenga? (b) “Bima ya mbote” kele nki, mpi sambu na nki nge metuba mpidina?

⁴ Inki “bima ya mbote” zolaka kufulusa nzo ya Yehowa mpi kupesa yo lukumu yina yo mebakaka ntete ve? Keti yo kele bima ya nzo yina bo mesalaka kitoko kibeni ti bima ya kungenga? Keti yo kele wolo, arza, to matadi ya ntalu? Yo lenda vanda bima yai ve ata fyoti. Yibuka nde tempelo ya ntete yina bo kangulaka kiteso ya bamvu-nkama tanu na ntwala, vandaka nzo mosi ya kudyaka badolare bamiliare mingi kibeni!a Ya kyeleka, Yehowa vandaka kuvingila ve nde tempelo yina bo tungaka na ntalu fyoti ya Bayuda yina kuvutukaka, yo luta tempelo yina Salomo kutungaka na bima ya lukumu!

⁵ Ebuna, nki kele “bima ya mbote” yina zolaka kufulusa nzo ya Yehowa? Yo kele pwelele nde yo fwete vanda bantu. Na kutuba mbote, kima keyangidikaka ntima ya Yehowa kele arza na wolo ve, kansi bantu yina kesadilaka yandi na zola yonso. (Bingana 27:11; 1 Korinto 10:26) Ee, Yehowa keyangalalaka na babakala, bankento mpi bana yonso yina kesambilaka yandi na mutindu yina yandi kezolaka. (Yoane 4:23, 24) Bantu ya mutindu yai kele “bima ya mbote,” mpi bo kele mfunu mingi na meso ya Yehowa kuluta bima yonso ya kitoko yina vandaka kungenga na tempelo ya Salomo.

6. Inki lukanu tempelo ya ntama ya Nzambi vandaka kulungisa?

⁶ Ata kimbeni vandaka ngolo, bo manisaka na kutunga tempelo na mvu 515 ya N.T.B. Tii na ntangu Yezu pesaka kimenga, tempelo ya Yeruzalemi vandaka kaka kisina ya lusambu ya kukonda mvindu sambu na “bima ya mbote,” disongidila Bayuda ya kubutuka ti Bantu ya Makanda yina kubalulaka ntima. Kansi, tempelo vandaka kifwani ya kima mosi ya kuluta nene, mutindu beto tamona yo.

Kulungana ya Mvu-Nkama ya Ntete

7. (a) Tempelo ya Nzambi yina kuvandaka na Yeruzalemi vandaka kifwani ya nki? (b) Tendula kisalu yina nganga-nzambi ya nene vandaka kusala na Kilumbu ya Ndolula.

⁷ Tempelo ya Yeruzalemi vandaka kifwani ya ngidika mosi ya nene sambu na lusambu. Yo kele tempelo ya kimpeve ya Nzambi, yina Yehowa kutulaka na mvu 29 ya T.B. ti Yezu bonso Nganga-Nzambi ya Nene. (Baebreo 5:4-10; 9:11, 12) Beto tala kufwanana yina kele na bisalu yina nganga-nzambi ya nene ya Izraele vandaka kusala ti bisalu ya Yezu. Konso mvula na Kilumbu ya Ndolula, nganga-nzambi vandaka kukwenda na mesa ya kimenga na kibansala ya tempelo mpi vandaka kupesa ngombe na kimenga sambu na kulolula masumu ya banganga-nzambi. Na nima, yandi vandaka kukota na tempelo ti menga ya ngombe yango, yandi vandaka kuluta na rido yina vandaka kukabisa kibansala ti Kisika ya Santu mpi na nima kuluta bakyelo yina vandaka kukabisa Kisika ya Santu ti ya Kuluta Santu. Kana yandi mekuma na Kisika ya Kuluta Santu, nganga-nzambi ya nene vandaka kutyamuna menga yango na ntwala ya sanduku ya kuwakana. Na nima, yandi vandaka kusala mpi mutindu mosi, na ntangu ya kupesa kimenga ya nkombo sambu na kulolula masumu ya bikanda 12 ya Izraele yina kuvandaka ve banganga-nzambi. (Levi 16:5-15) Inki kuwakana kele na kati ya mambu yina bo vandaka kusala kilumbu yina ti tempelo ya kimpeve ya Nzambi?

8. (a) Inki mutindu Yezu kudipesaka bonso kimenga banda na mvu 29 ya T.B.? (b) Inki kuwakana ya ngolo Yezu vandaka na yo na Yehowa ntangu yandi vandaka kusala kisalu na yandi awa na ntoto?

⁸ Na kutuba ya mbote, Yezu kudipesaka na mesa-kimenga ya luzolo ya Nzambi ntangu yandi bakaka mbotika mpi ntangu mpeve santu ya Nzambi kupakulaka yandi na mvu 29 ya T.B. (Luka 3:21, 22) Ya kyeleka, dyambu yai vandaka luyantiku ya luzingu ya kuditambika sambu na Yezu yina kusalaka bamvula tatu na ndambu. (Baebreo 10:5-10) Na ntangu yina, Yezu vandaka kuwakana ti Nzambi na nsadisa ya bangwisana yina kubutukaka na nzila ya mpeve. Bantu yankaka vandaka kubakisa ve mbotembote kuwakana ya ngolo yina Yezu vandaka na yo ti Tata na yandi ya zulu. Yo vandaka bonso nde rido mosi vandaka kufika meso na bo sambu na kubakisa, mutindu rido vandaka kufika Kisika ya Santu na mpila nde bantu kumona ve kisika sanduku ya Nsiku kuvandaka.​—Kubasika 40:28.

9. Sambu na nki ntangu yandi vandaka muntu Yezu lendaka ve kukota na zulu, mpi nki mutindu bo yidikaka dyambu yai?

⁹ Ata yandi vandaka Mwana ya Nzambi ya kupakulama na mpeve, Yezu lendaka ve kukwenda na zulu bonso muntu. Sambu na nki? Sambu nitu ti menga lenda kota ve na Kimfumu ya Nzambi na zulu. (1 Korinto 15:44, 50) Mutindu nitu ya kimuntu ya Yezu vandaka kima ya vandaka kukanga yandi nzila, yo vandaka kibeni kifwani ya mbote ya rido yina vandaka kukabisa Kisika ya Santu na Kisika ya Kuluta Santu na tempelo ya ntama ya Nzambi. (Baebreo 10:20) Kansi, bilumbu tatu na nima ya lufwa na yandi, Nzambi futumunaka Yezu bonso mpeve. (1 Piere 3:18) Na ntangu yina, yandi lendaka kukota na suku ya Kisika ya Kuluta Santu ya tempelo ya Nzambi, disongidila na zulu kibeni. Ebuna, dyambu yango kusalamaka kibeni mutindu yina. Polo kesonika nde: “Kristo kotaka ve na kisika yina ya kuluta nsiku [ntembe kele ve nde yandi vandaka kutubila Kisika ya Kuluta Santu] ya bantu tungaka, yina kele kaka mbandu ya kisika ya kieleka ya kuluta nsiku. Yandi kotaka na zulu kibeni; kuna yandi ke telamaka na meso ya Nzambi sambu na beto.”​—Baebreo 9:24.

10. Inki kima Yezu salaka na nima ya kuvutuka na zulu?

¹⁰ Na zulu, Yezu ‘kutyamunaka menga’ ya kimenga na yandi na ntangu yandi pesaka Yehowa ntalu ya nkudulu ya menga na yandi. Kansi, Yezu salaka mambu mingi dyaka. Ntangu fyoti na nima ya lufwa na yandi, yandi zabisaka balongoki na yandi nde: “Mono ke kwenda kuyidikila beno kisika. . . . Ebuna na nima, kana mono me yidikila beno kisika imene, mono ta kwisa diaka kubaka beno sambu beno mpi kuvanda ti mono kuna ya mono ta vanda.” (Yoane 14:2, 3) Yo yina, ntangu yandi kotaka na Kisika ya Kuluta Santu, disongidila na zulu, Yezu kangulaka nzila sambu bantu yankaka mpi kulanda. (Baebreo 6:19, 20) Bantu yai, fwete vanda na ntalu ya 144 000, bo tasalaka bonso bilandi ya banganga-nzambi na tempelo ya kimpeve ya Nzambi. (Kusonga 7:4; 14:1; 20:6) Kaka mutindu nganga-nzambi ya nene ya Izraele vandaka kunata ntete menga ya ngombe na Kisika ya Kuluta Santu sambu na kulolula masumu ya banganga-nzambi, mutindu mosi mpi bo sadilaka ntete ntalu ya menga yina Yezu kutyamunaka na bilandi ya banganga-nzambi 144 000 yai.b

“Bima ya mbote” ya ntangu yai

11. Nganga-nzambi ya nene vandaka kupesa kimenga ya nkombo sambu na banani, mpi yo vandaka kifwani ya nki?

¹¹ Yo kemonana nde banda na mvu 1935, kisalu ya kuvukisa bapakulami yonso mesukaka.c Kansi Yehowa kumanisaka ve na kupesa lukumu na nzo na yandi. Ve, “bima ya mbote” zolaka kwisa kukota mpi. Yibuka nde nganga-nzambi ya nene vandaka kupesa kimenga ya bambisi zole: ngombe sambu na masumu ya banganga-nzambi mpi nkombo sambu na masumu ya bikanda yina kuvandaka ve banganga-nzambi. Banganga-nzambi vandaka kifwani ya bapakulami yina zolaka kuvanda ti Yezu na Kimfumu ya zulu, ebuna banani vandaka kifwani ya bikanda yina kele ve banganga-nzambi? Mvutu kele na bangogo ya Yezu yina kele na Yoane 10:16: “Mono ke na mameme ya nkaka, bo kele na kati ya lupangu yai ve. Mono fweti kotisa bo mpi na lupangu; bo ta wa ndinga na mono, ebuna bo yonso ta vanda kisika mosi kaka, bo ta vanda mpi na ngungudi mosi kaka na kukeba bo.” Na yo, menga ya Yezu yina kutyamukaka kepesa mambote na bimvuka zole ya bantu: ya ntete, Bakristu yina kele na kivuvu ya kuyala ti Yezu na zulu mpi ya zole, bayina kekinga na kubaka luzingu ya mvula na mvula na paladisu na ntoto. Ntembe kele ve nde kele kimvuka yai ya zole yina kele kifwani ya “bima ya mbote” ya mbikudulu ya Agai ketubila.​—Mishe 4:1, 2; 1 Yoane 2:1, 2.

12. Inki mutindu “bima ya mbote” mingi kezwa dibaku ya kukota na nzo ya Nzambi bubu yai?

¹² “Bima ya mbote” yai kefulusa kaka nzo ya Yehowa. Na bamvula ya meluta, bo katulaka nsiku yina vandaka kusimba kisalu na beto na Eropa ya Esti, na bisika mingi na Afrika, mpi na bansi yankaka, sambu na kubika nzila nde nsangu ya mbote ya Kimfumu yina Nzambi metulaka kumwangana na bisika yina yo mekotaka ntete ve tii bubu. Kana bantu yina kele bima ya mbote kekota na ngidika ya tempelo ya Nzambi, bo mpi kesala ngolo sambu na kukumisa bantu yankaka balongoki, sambu na kulemfuka na ntuma ya Yezu. (Matayo 28:19, 20) Na ntangu bo kesalaka kisalu yai, bo kekutanaka na bantu mingi, baleke ti bambuta, yina lenda kukuma “bima ya mbote” yina tapesa lukumu na nzo ya Yehowa. Tala bambandu fyoti ya kemonisa mutindu kisalu yai ke na kusalama.

13. Inki mutindu mwana ya nkento mosi na Bolivie kumonisaka kikesa na yandi sambu na kumwanga nsangu ya Kimfumu?

¹³ Na Bolivie, mwana mosi ya nkento ya bamvula tanu yina kele na bibuti ya kele Bambangi kulombaka nzila na longi na bo nde yandi pesa yandi nswa ya kukwisa ve na nzo-nkanda na mposo yina nkengi ya nzyunga zolaka kukwenda kutala bo. Sambu na nki? Sambu yandi zolaka kusamuna na mposo yina ya kisalu ya sipesiali ya mvimba. Yo yitukisaka bibuti na yandi ngolo, kansi bo waka kyese mingi sambu yandi vandaka na ngindu ya mbote ya mutindu yina. Mwana ya nkento yango kelongukaka Biblia bubu ti bantu tanu, mingi na kati ya bantu yai kekwendaka na balukutakanu ya Bukristu. Yandi nataka nkutu longi na bo na Nzo ya Kimfumu. Ziku na bilumbu kekwisa, bantu mingi yina yandi kelonguka na bo Biblia takuma “bima ya mbote” yina tapesaka lukumu na nzo ya Yehowa.

14. Na Korée, nki mutindu kikesa ya mpangi ya nkento na muntu mosi yina vandaka kumonana nde yandi kesepela ve kubutaka mbuma ya mbote?

¹⁴ Ntangu yandi vandaka kukinga tre, nkento mosi ya Mukristu na Korée kupusanaka penepene ya mwana ya nzo-nkanda mosi yina vandaka kuwidikila miziki na ba ekutere na yandi. Nkento yango yulaka yandi nde, “Na nki dibundu nge kesambilaka?” Mwana ya nzo-nkanda yina vutulaka nde, “mu kesepelaka ve ata ti dibundu mosi.” Mpangi ya nkento kulembaka nitu ve. Yandi yikaka dyaka nde, “na nima ya bilumbu, muntu lenda mona mfunu ya kupona dibundu mosi. Kansi, kana yandi kele ve ti nzayilu na mambu metala mabundu, yandi lenda pona dibundu ya mbi.” Kutuba ya mwana ya nzo-nkanda yina yantikaka kusoba, ebuna yandi yantikaka na kuwidikila mpangi na beto ya nkento na dikebi yonso. Yandi pesaka mwana ya bakala yina mukanda Y a-t-il un Créateur qui se soucie de vous? mpi yandi songaka yandi nde mukanda yina tasadisa yandi mingi kana ntangu ya kupona dibundu mosi melunga. Yandi ndimaka mukanda yango nswalu. Na mposo yina kulandaka, yandi yantikaka kulonguka Biblia ti Bambangi ya Yehowa, bubu yai yandi kekondaka ve na balukutakanu yonso ya dibundu.

15. Inki mutindu mwana ya nkento mosi keyantikaka kulonguka Biblia na Japon, mpi nki mutindu bikesa na yandi kubutaka mbuma ya mbote?

¹⁵ Na Japon, Megumi ya kuvandaka na bamvula 12, kemonaka nzo-nkanda na bo bonso kilanga ya mbote kibeni sambu na kusamuna mpi kulonga. Nkutu yandi meyantikaka kulonguka Biblia na bantu mingi. Inki mutindu Megumi kesalaka yo? Sambu yandi ketangaka Biblia to kubongisa balukutakanu na ntangu ya kupema, mbala mingi banduku na yandi ya nzo-nkanda keyulaka yandi nki yandi kesala. Bankaka keyulaka Megumi sambu na nki yandi kekotaka ve na mambu mingi ya bo kesalaka na nzo-nkanda. Megumi kepesaka bamvutu ya mbote na bangyufula na bo mpi yandi kezabisaka bo zina ya Nzambi. Mbala mingi, dyambu yai kebendaka dikebi ya bawi na yandi. Na nima, yandi kelombaka bo nde bo yantika kulonguka Biblia. Ntangu yai Megumi kelongukaka ti bantu 20, na kati na bo 18 kele bana ya kalasi na bo.

16. Inki mutindu mpangi mosi ya bakala na Cameroun kuyantikaka kulonguka Biblia ti ndambu ya bantu yina vandaka na kimvuka ya bayina vandaka kuseka yandi?

¹⁶ Na Cameroun, kibuka mosi ya bantu nana yina vandaka na kisika na bo ya kisalu, kubingaka mpangi mosi ya bakala yina vandaka kukabula mikanda ya ketendulaka Biblia na bantu yina vandaka kuluta. Sambu na kuseka mpangi yina, bo yulaka yandi sambu na nki yandi kekwikilaka ve na Butatu Busantu, bilungi ya tiya, to nde moyo kefwaka ve. Kansi, mpangi na beto kusadilaka Biblia sambu na kupesa bamvutu na bangyufula na bo. Na nsuka, bantu tatu na kati ya bantu yina kundimaka kulonguka Biblia. Mosi na kati na bo zina na yandi Daniel, yandi yantikaka kukwenda na balukutakanu mpi yandi fwaka bima na yandi yonso ya kewakanaka na bampeve ya mbi. (Kusonga 21:8) Ata nkutu mvula mosi kulungaka ve yandi bakaka mbotika.

17. Inki mutindu bampangi yankaka kusadilaka mayele na bo sambu na kusamuna na muntu yina vandaka kuzola ve ntete kuwa nsangu ya Kimfumu na El Salvador?

¹⁷ Na El Salvador, muntu mosi vandaka kusala kana yandi memona Bambangi ya Yehowa mekuma penepene na nzo na yandi, yandi kwisa kukanga mbwa na yandi ya nganzi mpenza na kyelo. Bakala yango vandaka kukinga pana tii kana Bambangi meluta, pana yandi zaba kuvutula mbwa na nzo. Bampangi vandaka kukuka ve na kusolula ti muntu yango. Ebuna, kilumbu mosi bo tubaka nde bo kemeka mutindu yankaka ya kusadila. Sambu bo zabaka nde muntu yina lendaka kuwa mambu ya bo vandaka kutuba, bo bakaka desizio ya kuzabisa mbwa nsangu. Bo kumaka na nzo yina, bo pesaka mbwa mbote, ebuna bo songaka mbwa nde bo vandaka na kyese sambu na dibaku yina bo zwaka ya kusolula ti yandi. Bo tubilaka ntangu ntoto takituka paladisu, ntangu ata muntu mosi ve tavanda dyaka na makasi, ee, ata bambisi nkutu tazingaka na ngemba. Na nsuka, bo pesaka mbwa mbote na luzitu yonso na ntwala bo kabwana, ebuna bo simbaka nzila bo mekwenda kwabo. Kima ya kuyituka, bo monaka muntu yango mebasika na nzo mpi yandi lombaka bo pardo sambu yandi vandaka kupesa ve Bambangi dibaku ya kusolula ti yandi. Yandi ndimaka kubaka baperiodike, na nima bo yantikaka kulonguka Biblia. Bubu yai muntu yango kele mpangi na beto, disongidila mosi na kati ya “bima ya mbote”!

“Beno wa boma ve”

18. Inki mambu Bakristu mingi kenwanaka na yo, kansi nki mutindu Yehowa kemonaka bantu yina kesambilaka yandi?

¹⁸ Keti nge mpi kesalaka kisalu ya mfunu ya kusamuna Kimfumu mpi kukumisa bantu balongoki? Kana mpidina, nge kele mpenza na menga ya mbote. Ya kyeleka, “bima ya mbote” kekwisa na Yehowa na nsadisa ya kisalu yai. (Yoane 6:44) Ntembe kele ve nde, ntangu yankaka nge lenda wa kulemba to kulemba nitu. Bantangu yankaka, bantu mingi, ata nkutu bansadi ya kwikama ya Yehowa, kenwanaka na mawi ya kukonda kudimona mfunu. Kansi, kuyambula ve! Yehowa kemonaka konso muntu na kati ya bantu yonso yina kesambilaka yandi nde yandi kele mfunu, mpi yandi kezolaka mpenza nde nge guluka.​—2 Piere 3:9.

19. Inki mambu ya kepesa kikesa Yehowa kutubaka na nsadisa ya Agai, mpi nki mutindu bangogo yai lenda vanda nto ya kepesa beto kikesa?

¹⁹ Kana beto kelemba nitu, yo vanda sambu na kimbeni ya bantu to sambu na mambu yankaka ya luzingu ya kepesaka ve kyese, mambu yina Yehowa zabisaka Bayuda yina kuvutukaka na insi na bo lenda vanda nto ya kikesa sambu na beto. Na Agai 2:4-6, beto ketanga mutindu yai: “Kansi ntangu yai beno Zorobabele ti Yozue, beno lemba ve. Konso muntu mpi kuvanda kikesa! Beno sala kaka sambu mono Mfumu Nzambi, [Yehowa], mono kele na beno! Ntangu beno basikaka na nsi ya Ezipte, mono wakanaka na beno nde mono ta vandaka na beno konso ntangu. Beno mona boma ve, mono kele kaka na beno. Kubika fioti mono Mfumu Nzambi, [Yehowa] ke nikisa zulu, ntoto ti nzadi-mungwa.” Zaba nde Yehowa kesyamisa beto ve kaka na kuvanda ngolo, kansi yandi kemonisa beto mpi nki mutindu kubaka kikesa. Inki mutindu? Beno simba bangogo yai ya kundimisa kibeni: “Mono kele kaka na beno.” Yo kepesa lukwikilu kikesa kibeni na kuzaba nde ata beto mona mpasi ya nki mutindu, Yehowa kele na beto!​—Roma 8:31.

20. Inki mutindu lukumu ya kuluta mingi ke na kufuluka na nzo ya Yehowa ntangu yai?

²⁰ Yehowa memonisa mpenza nde yandi kele na bantu na yandi. Ya kyeleka, yo kele kaka mutindu yandi tubaka yo na nsadisa ya profete Agai: “Nzo-Nzambi ya mpa ta luta yina ya ntete na lukumu. Mono tasala bantu na mono mambote, mono ta pesa bo ngemba.” (Agai 2:9) Ntembe kele ve nde, lukumu ya kuluta mingi bubu yai kele na tempelo ya kimpeve ya Yehowa. Yo yina, bantu mingi kekwisa kukota na lusambu ya mpa konso mvula. Bantu yai kedya mbote na kimpeve, mpi ata bo kezinga na inza yai ya mefuluka na mambu ya mubulu, bo kele na ngemba. Kele kaka ngemba yina bo tavanda na yo na inza ya mpa ya Nzambi, meluta ngemba ya bo kemona bubu yai.​—Yezaya 9:6, 7; Luka 12:42.

21. Inki fwete vanda lukanu na beto?

²¹ Kunikisa yina Yehowa tanikisa makanda na Armagedoni mekuma penepene. (Kusonga 16:14, 16) Yo yina, bika beto sadila ntangu yai mebikala sambu na kugulusa luzingu ya bantu mingi. Bika beto vanda kikesa mpi beto tula ntima yonso na Yehowa. Bika beto baka lukanu ya kulanda kusamba na tempelo ya kimpeve, mpi kufulusa yo na “bima ya mbote” tii kuna Yehowa yandi mosi tatuba nde kisalu na beto memana.

[Banoti na nsi ya lutiti]

Keti Nge Keyibuka?

• Inki kele mfunu mingi na meso ya Yehowa kuluta bima ya kinsuni?

• Inki bimvuka zole ya kebaka mambote ya menga ya Yezu yina kutyamukaka?

• “Bima ya mbote” yina zolaka kufulusa nzo ya Yehowa na lukumu kele banani?

• Inki nzikisa beto kele na yo ya kemonisa nde mbikudulu ya Agai ke na kulungana bubu yai?

[Tablo ya kele na lutiti 10]

(Sambu na kumona mambu yonso, tala mukanda)

Keti nge zaba ntendula ya kifwani ya tempelo ya ntama ya Yehowa?

Kisika ya Kuluta Santu

Rido

Kisika ya Santu

Kibansala

Mesa-kimenga

Suku

[Kifwanisu ya kele na lutiti 9]

Nganga-nzambi ya nene vandaka kupesa kimenga ya ngombe sambu na masumu ya banganga-nzambi mpi nkombo sambu na masumu ya bikanda ya Izraele yina vandaka ve banganga-nzambi

[Kifwanisu ya kele na lutiti 12]

Kisalu ya kuzabisa Kimfumu yina kesalama na inza ya mvimba kenata bibuka ya bantu mingi na nzo ya Yehowa