Bau Melongama na Kusala Luzolo ya Yehowa
“Longa mono na kusala luzolo na nge, sambu nge kele Nzambi na mono.”—NKUNGA 143:10, NW.
1, 2. (a) Inki ntangu beto fwete longama, ye ti inki kivuvu ya kyeleka? (b) Sambu na inki kulongama na Yehowa kele mfunu mingi kibeni?
KONSO kilumbu ya muntu kezinga mpi kesala, yandi lenda longama kima mosi ya kelombaka ntangu mpi ngolo. Yau kele kyeleka sambu na nge, ye yau kele kyeleka sambu na bankaka. Kansi inki kesalamaka na lufwa? Mpila kele ve ya kulongama ata kima mosi to kulonguka na mvwandilu yina. Biblia ketuba pwelele nde bafwa “kuzaba kima ve.” Na Sheole, mazyamu ya bantu yonso, nzayilu kele ve. (Longi 9:5, 10) Keti yau kemonisa nde kulongama na beto, kufulusa nzayilu, kele ya mpamba? Yau ketadila mambu ya beto melongama ti mutindu beto kesadila nzayilu yango.
2 Kana beto kelongama kaka na mambu ya inza, beto kele na makwisa ya kimakulu ve. Kansi, kyese mingi sambu mafuku ya bantu na bansi yonso kele na kulongama luzolo ya Nzambi ti kivuvu ya luzingu ya mvula na mvula. Lufulu ya kivuvu yai kele na kuvanda ya kulongama na Yehowa, Nto ya nzayilu ya kepesaka luzingu.—Nkunga 94:9-12.
3. (a) Sambu na inki yau lenda tubama nde Yezu vandaka mwana ya nzo-nkanda ya ntete ya Nzambi? (b) Inki kendimisa beto nde yau lombaka nde bantu kulongama na Yehowa, mpi ti inki mbutu?
3 Mwana ya ntete ya Nzambi, bonso mwana ya nzo-nkanda na Yandi ya ntete, longamaka na kusala luzolo ya Tata na yandi. (Bingana 8:22-30; Yoane 8:28) Na nima, Yezu monisaka nde mafuku na mafuku ya bantu talongama na Tata na yandi. Inki kele bivuvu sambu na bayina na kati na beto ya kelonguka na Nzambi? Yezu tubaka nde: “Baprofete sonikaka mambu yai nde: ‘Nzambi ta longa bantu yonso.’ Konso muntu yina ke wa Tata ti kundima malongi na yandi, yandi ta kwisa na mono. . . . Mono ke tubila beno mambu ya kieleka: Muntu yina ke tulaka ntima na mono, yandi ke na moyo ya mvula na mvula.”—Yoane 6:45-47.
4. Inki mutindu ndongolo ya Nzambi mesimbaka mafuku ya bantu, mpi inki kivuvu bau kele na yau?
4 Yezu vandaka kutubila mambu yina kele na Yezaya 54:13, yina bau songaka nkento ya kifwani ya Nzambi, Sioni ya zulu. Mbikudulu yina ketadila ntetentete bana na yandi, balongoki ya Yezu 144000 ya butukaka na mpeve. Nsâdila ya bana yina ya kimpeve kele na kusala ngolo bubu yai, na kunataka na ntwala manaka ya ndongolo ya ntoto ya mvimba. Bonso mbutu, mafuku ya bantu yankaka yina ketunga “kibuka ya nene” kebaka mpi luta ya kulongama na Yehowa. Bau kele na kivuvu ya lenda tesama ve ya kulonguka nkatu kufwa. Na inki mutindu? Ee, bau kele na nzila ya kuguluka na “mpasi ya nene” yina kefinama nswalunswalu, mpi kusepela na luzingu ya mvula na mvula na paladisu ya ntoto.—Kusonga 7:9, 10, 13-17.
Kutubila Mingi Kusala Luzolo ya Nzambi
5. (a) Inki kele mukapu ya mvu 1997? (b) Inki mutindu beto fwete wa na yina metala kukwenda na balukutakanu?
5 Na mvu 1997, na mabundu kiteso ya kuluta 80000 na ntoto ya mvimba, Bambangi ya Yehowa tabumba mbotembote na mabanza na bau bangogo ya luyantiku ya Nkunga 143:10 (NW): “Longa mono na kusala luzolo na nge.” Yina tavanda mukapu ya mvu na 1997. Bangogo yina, ya kusonama pwelele na Banzo ya Kimfumu, tasadisaka bonso ngibusa nde kisika ya nene ya kubakila ndongolo ya Nzambi kele balukutakanu ya mabundu, kisika beto lenda baka kabu na manaka ya kefula ya ndongolo. Ntangu beto kevukana na bampangi na beto na balukutakanu sambu na kulongama na Longi na beto ya Nene, beto lenda kudiwa bonso muyimbi-bankunga, yina sonikaka nde: “Mono vandaka na kiese ntangu bo songaka mono nde: ‘Beto kwendeno na nzo ya Mfumu Nzambi.’ ”—Nkunga 122:1; Yezaya 30:20.
6. Na bangogo ya Davidi, inki beto kendima?
6 Ee, beto kezola kulongama na kusala luzolo ya Nzambi kansi luzolo ya mbeni na beto Dyabulu ve to luzolo ya bantu ya konda kukuka. Yau yina, bonso Davidi, beto kendima Nzambi yina ya beto kesambaka mpi kesadilaka: “Nge kele Nzambi na mono, . . . Mpeve na nge kuvandila mono mbote ti kunata mono na nzila ya mbote.” (Nkunga 143:10) Na kisika ya kusosa kuvukana ti bantu ya kukonda kyeleka, Davidi zodilaka kuvanda kisika lusambu ya Yehowa vandaka kusalama. (Nkunga 26:4-6) Ti mpeve ya Nzambi sambu na kutwadisa bitambi na yandi, Davidi lendaka kudyata na banzila ya lunungu.—Nkunga 17:5; 23:3.
7. Inki mutindu mpeve ya Nzambi mesalaka na zulu ya dibundu ya Bukristu?
7 Davidi ya Nene, Yezu Kristu, kundimisaka bantumwa nde mpeve santu talonga bau bima yonso mpi kuyibusa bau mambu yonso yina yandi songaka bau. (Yoane 14:26) Kubanda na Pantekoti mata, Yehowa kesongaka malembemalembe “mambu ya mudindu ya Nzambi” yina kele na Ndinga na yandi ya kusonama. (1 Korinto 2:10-13, NW) Yandi kesalaka yau na nzila mosi ya kemonana yina Yezu bingaka nde “mpika ya kwikama mpi ya mayele.” Yau kepesaka madya ya kimpeve yina ketadilamaka na manaka ya ndongolo sambu na mabundu ya bantu ya Nzambi na inza ya mvimba.—Matayo 24:45-47, NW.
Beto Kelongamaka Luzolo ya Yehowa na Balukutakanu
8. Sambu na inki kuvukana na Kulonguka ya Nzozulu ya Nkengi kele mfunu mingi?
8 Malongi ya konso mposo na Kulonguka ya Nzozulu ya Nkengi ketubilaka mbala mingi mutindu ya kusadila minsiku ya Biblia. Nkatu ntembe, yau kesadisaka beto na kununga mayindu ya luzingu. Na kulonguka yankaka bakyeleka ya mudindu ya kimpeve to bambikudulu ya Biblia ketadilamaka. Beto kelongamaka mingi mpenza na kulonguka ya mutindu yai! Na bansi mingi Banzo ya Kimfumu kefulukaka meke sambu na balukutakanu yai. Kansi na bansi yankaka, ntalu ya bantu na balukutakanu mekitaka. Beno keyindula nde sambu na inki? Keti yau lenda vanda nde bankaka kepesaka nzila nde kisalu na bau ya kinsuni kudyata kuvukana na bau konso ntangu “sambu na kupusana na zola mpi na bisalu ya mbote”? To keti yau lenda vanda bantangu mingi kepesamaka na kusepela ti banduku to na kutala televizio, na kufulusaka manaka na beto ti bisalu mingi, ye mpila kuvanda ve ya kukwenda na balukutakanu yonso? Yibuka ntuma ya kupemama yina kele na Baebreo 10:23-25. Keti kuvukana kumosi sambu na ndongolo ya Nzambi meluta mfunu ve ntangu yai mutindu beto “kemona kilumbu kefinama”?
9. (a) Inki mutindu Lukutakanu ya Kisalu lenda sadisa beto sambu na kisalu? (b) Inki fwete kuvanda mboninu na beto na yina metala kuta kimbangi?
9 Mosi na kati ya mikumba na beto ya ntetentete kele yina ya kusala bonso baministre ya Nzambi. Lukutakanu ya Kisalu kusalamaka sambu na kulonga beto mutindu beto lenda lungisa yau mbotembote. Beto kelonguka inki mutindu kutuba ti bantu, kima ya beto fwete tuba, mutindu ya kusala kana bau mendima, nkutu mpi mutindu ya kusala kana bantu mebuya nsangu na beto. (Luka 10:1-11) Mutindu bansadilu ya mbote kelongama mpi kemonisama na bansonga na lukutakanu yai ya konso mposo, beto kebongisama mbotembote na kukumina bantu kaka ve na ntangu ya kukwenda nzo na nzo, kansi mpi ntangu beto kesamuna na babalabala, na baparking, na ba bus, na ba plene ya avio, na bisika ya mumbungu, to na banzo-nkanda. Na kuwakana ti kulomba na beto, “Longa mono na kusala luzolo na nge,” beto tazola kusadila konso dibaku sambu na kusala bonso mutindu Mfumu na beto tumaka beto: “Mwinda na beno fweti pela na meso ya bantu. . . . Ebuna bo ta pesa lukumu na Tata na beno kele na zulu.”—Matayo 5:16.
10. Inki mutindu beto lenda sadisa mpenza ‘bantu yina [mefwana]’?
10 Na balukutakanu ya dibundu ya mutindu yina, beto kelongama mpi na kukumisa bankaka balongoki. Kana beto memona dikebi to mepesa mukanda, lukanu na beto ntangu beto kesala bamvutukilu kele ya kubanda kulonguka ya Biblia na nzo. Na sansa mosi, yau mefwanana na ‘kulala’ ya balongoki ‘na nzo ya bantu yina [mefwana]’ sambu na kulonga bau mambu yina Yezu tumaka. (Matayo 10:11; 28:19, 20) Mutindu beto kele ti balusadisu ya mbote kibeni, bonso mukanda Nzayilu ya Kenataka na Luzingu ya Mvula na Mvula, beto kele mpenza ya kubongama sambu na kulungisa kisalu na beto mbotembote. (2 Timoteo 4:5) Konso mposo, kana nge vukana na Lukutakanu ya Kisalu ti na Nzo-nkanda ya Kisalu ya Teokrasi, sala ngolo na kubakisa mpi na nima sadila mambu ya mfunu yina tamonisa nge bonso mosi na kati ya bansadi ya Nzambi ya kufwana mbotembote, ya kelungisaka luzolo na yandi.—2 Korinto 3:3, 5; 4:1, 2.
11. Inki mutindu bankaka memonisaka lukwikilu na bangogo ya kele na Matayo 6:33?
11 Luzolo ya Nzambi kele nde beto “landa kaka na kusosa Kimfumu na yandi ti mambu yina ya yandi ke zolaka.” (Matayo 6:33) Kudiyula nde, ‘Inki mutindu mono lenda sadila munsiku yai kana bandomba ya kisalu na mono ya kinsuni [to ya nkwelani na mono] kekakila kukwenda na balukutakanu?’ Bantu mingi ya kutela na kimpeve takudibongisa sambu na kutuba dyambu yango ti bamfumu ya kisalu. Ministre mosi ya ntangu yonso songaka mfumu na yandi ya kisalu nde yandi vandaka na mfunu ya bantangu konso mposo sambu na kukwenda na balukutakanu ya dibundu. Yandi ndimaka ndomba yango. Kansi na kusosaka kuzaba inki kesalamaka na balukutakanu yango, yandi lombaka na kukwenda mpi. Kuna yandi waka luzayisu ya lukutakanu ya distrike ya vandaka mefinama. Bonso mbutu, mfumu ya kisalu kudiyidikaka sambu na kuvanda na lukutakanu kilumbu ya mvimba. Inki dilongi nge mebaka na mbandu yai?
Bau Kelongama Luzolo ya Yehowa na Bibuti ya Vumi
12. Sambu bana kulongama luzolo ya Yehowa, inki bibuti Bakristu fwete sala ti kubwisa ntima mpi ntima-ngolo?
12 Kansi ngidika ya balukutakanu ya dibundu ti ya nene kele yau yina mpamba ve sambu na kulongama na kusala luzolo ya Nzambi. Bibuti ya vumi metumama na kulonga, kupesa ndongi, mpi kusansa bana na bau na kukembila Yehowa mpi kusala luzolo na yandi. (Nkunga 148:12, 13; Bingana 22:6, 15) Kusala mutindu yina kelombaka nde beto nata “bana” na beto na balukutakanu kisika bau lenda ‘widikila mpi kulonguka,’ kansi beto lenda tuba inki na dyambu ya kulonga bau bansonama ya santu na nzo? (Kulonga 31:12; 2 Timoteo 3:15) Mabuta mingi mebandaka ti kansansa yonso ya mbote manaka ya kulonguka ya Biblia ntangu yonso na dibuta, kaka sambu na kubebisa yau to kufwa yau ntangu fyoti na nima. Keti yau mekuminaka nge mpila yina? Keti pana nge tatuba nde ntuma ya kuvanda ti kulonguka ya ntangu yonso mefwana ve, to nde dibuta na nge kele mutindu yankaka kibeni na mpila nde nge tanunga ve? Mvwandilu kuvanda inki mutindu, bibuti, kana beno mezola, beno tadila dyaka masolo yai ya kitoko: “Un riche héritage spirituel” ti “La persévérance est récompensée” na Nzozulu ya Nkengi (ya Kifalansa) ya Augusti 1, 1995.
13. Inki mutindu mabuta lenda baka mambote ya kutadila mukapu ya lumbu?
13 Mabuta mesyamisama na kubaka kikalulu ya kutadilaka mukapu ya lumbu na Examinons les Écritures chaque jour. Kutanga kaka mukapu ti komantere kele mbote, kansi kulonguka mukapu mpi kusadila yau kenataka mambote ya kuluta mingi. Mu mbandu, kana beno ketadila Efezo 5:15-17, bantu ya dibuta lenda yindula na yina metala ‘kusumba ntangu ya mbote’ sambu na kulonguka ya muntu na muntu, sambu na kuvukana na mitindu yankaka ya kisalu ya ntangu yonso, mpi kulungisa mikumba yankaka ya teokrasi. Ee, kulonguka ya dibuta ya mukapu ya lumbu lenda nata muntu mosi to mingi na kulanda “kuzaba [mbotembote] mambu yina ya [Yehowa] ke zolaka.”
14. Inki mutindu ya balongi Kulonga 6:6, 7 kemonisa nde bibuti fwete vanda, yau kelomba inki?
14 Bibuti fwete vanda balongi ya nkwamina ya bana na bau. (Kulonga 6:6, 7) Kansi yau kele kaka ve dyambu ya kunganina to kutuma bana na bau. Tata ti mama fwete widikila mpi, na mutindu yina bau tazaba mbotembote kima yina kelomba kutendula, kumonisa pwelele, kupesa mbandu, to kuvutukila. Na dibuta mosi ya Bukristu, bibuti syamisaka masolo ya masonga na kupesaka bana na bau kikesa na kuyula bangyufula na mambu yina ya bau kebakisaka ve to yina kelombaka kutudila dikebi. Na yau bau zabaka nde mwana mosi ya toko vandaka na mpasi na kubakisa nde Yehowa kele na luyantiku ve. Bibuti kukaka na kusadila malongi ya kele na mikanda ya la Société Watch Tower na kumonisa nde bantu kendimaka ntangu ti luyalanganu bonso bima ya kele na nsuka ve. Yau sadisaka na kutendula dyambu yango, mpi yau yangidikaka mwana na bau. Mutindu mosi, beno baka ntangu na kupesa mvutu ya pwelele mpi ya kekatuka na Masonuku na bangyufula ya bana na beno, na kusadisaka bau na kumona nde kulonguka luzolo ya Nzambi lenda vanda kyese mingi. Inki yankaka bantu ya Nzambi—baleke ti bambuta—kelongama bubu yai?
Bau Kelongama na Kuzola mpi na Kunwana
15. Inki ntangu bukyeleka ya zola na beto ya bumpangi lenda kumekama?
15 Na kuwakana ti nsiku ya mpa ya Yezu, “Nzambi me [longa] beto nki mutindu be[t]o fweti zolana be[t]o na be[t]o.” (1 Tesalonika 4:9) Ntangu mambu kele pima mpi ketambula mbote, beto lenda yindula nde beto kezolaka bampangi na beto yonso. Kansi inki kesalamaka kana mavwanga mebasika to kana beto mewa makasi sambu na kima yina Mukristu yankaka metuba to mesala? Na kisika yai, bukyeleka ya zola na beto lenda kumekama. (Fwanisa ti 2 Korinto 8:8.) Inki Biblia kelonga beto na kusala na bamvwandilu ya mutindu yai? Kima mosi kele kusala ngolo na kumonisa zola na bumvimba na yau. (1 Piere 4:8) Na kisika ya kusosa luta na beto mosi, kudasuka sambu na tubifu ya fyoti, to kubumba dikambu ya mambi na ntima, beto fwete sala na kubikisa zola kufika mbidi ya masumu. (1 Korinto 13:5) Beto kezaba nde yai kele luzolo ya Nzambi, sambu yau kele kima ya Ndinga na yandi kelonga.
16. (a) Na inki mutindu ya bitumba Bakristu melongama na kukota? (b) Inki mutindu beto mebongisama?
16 Ntangu bankaka kezolaka ve kuvukisa zola ti bitumba, yai kele kima yankaka ya beto kelongama, kansi mutindu yankaka ya bitumba. Davidi ndimaka kutula ntima na yandi na Yehowa sambu na kulonga yandi mutindu ya kunwana bitumba, ata na ntangu na yandi yau vandaka kutendula mpi bitumba ya kyeleka kontre bambeni ya Izraele. (1 Samuele 17:45-51; 19:8; 1 Bantotila 5:3; Nkunga 144:1) Inki beto lenda tuba sambu na bitumba na beto bubu yai? Minduki na beto kele ya kinsuni ve. (2 Korinto 10:4) Mvita na beto kele ya kimpeve, sambu na yau beto kele na mfunu ya kuyilama ti binwaninu ya kimpeve. (Efezo 6:10-13) Na nzila ya Ndinga na yandi ti ya kimvuka ya bantu na yandi, Yehowa kelonga beto na kunwana mpi kununga mvita ya kimpeve.
17. (a) Inki bansadilu Dyabulu kesadilaka na kunata beto na nganda? (b) Inki beto fwete tina na mayele yonso?
17 Na nzila ya mpukumuna, ya mayele ya mbi, Dyabulu kelutaka kusadila bampukumuna ya inza, ba aposta, ti batelemini yankaka ya kyeleka na kusalaka ngolo sambu na kunata beto na mambu ya mpambampamba. (1 Timoteo 6:3-5, 11; Tito 3:9-11) Yau kele bonso yandi kemonaka nde yandi takuka kibeni ve na kununga beto na ndwanisa ya mbala mosi, kimuntukimuntu, yau yina yandi kemekaka na kubwisa beto na kunataka beto na kubokutabokuta ti kuyula bangyufula ya buzoba, yina kele ve ti mbalu ya kimpeve. Bonso binwani ya ndungalala, beto fwete tomatala bigonsa ya mutindu yina bonso bantu yina kele na katikati ya bitumba.—1 Timoteo 1:3, 4.
18. Inki kuzinga dyaka ve sambu na beto mosi kelomba mpenza?
18 Beto keyedisaka ve bampusa ya bantu to luzolo ya makanda. Yehowa melongaka beto na nzila ya mbandu ya Yezu nde beto fwete zinga dyaka ve sambu na beto mosi; kansi, beto fwete vanda ti nkadilu mosi ya mabanza yina vandaka ti Kristu Yezu mpi kuzinga sambu na luzolo ya Nzambi. (2 Korinto 5:14, 15) Ntete, mbala yankaka beto vandaka kuzinga luzingu ya kukonda kibeni bukatikati, ya buzoba, na kuyonikaka ntangu ya mbalu. Bafeti, kulutisa kunwa, mansoni kele bikalulu ya inza yai ya mbi. Ntangu yai ya beto kele na kulongama sambu na kusala luzolo ya Nzambi, keti beto kepesa ve matondo na kuvanda ya kukabwana ti inza yai ya kubeba? Ebuna, bika beto nwana mvita ya kimpeve ya ngolo na kukondaka kukota na bisalu ya nsumukunu ya inza.—1 Piere 4:1-3.
Yandi Kelonga Beto Sambu na Mambote na Beto
19. Kulongama luzolo ya Yehowa mpi na nima kusala yau tanata na inki mambote?
19 Mpila ya kubuya kele ve nde kulongama na kusala luzolo ya Yehowa tanatila beto mambote mingi. Ya kyeleka, beto fwete sala dikabu na beto na kutulaka dikebi mingi sambu na kulonguka, na nima, kulanda bantuma yina kekwisila beto na nzila ya Mwana na yandi, yika mpi na nzila ya Ndinga na yandi ti kimvuka ya bantu na yandi. (Yezaya 48:17, 18; Baebreo 2:1) Na kusalaka mutindu yina, beto tapesama ngolo ya kubikala ngwi na bantangu yai ya mpasi mpi kubikala ya kutelama na mupepe ya ngolo ya kekwisa. (Matayo 7:24-27) Ata ntangu yai, beto tayangidikaka Nzambi na kusalaka luzolo na yandi mpi tatulaka ntima nde bisambu na beto kendimama. (Yoane 9:31; 1 Yoane 3:22) Ye beto tazwa kyese ya kyeleka.—Yoane 13:17.
20. Na inki yau tavanda mbote na kuyindulula ntangu nge kefimpa mukapu ya mvu na nsungi yonso ya 1997?
20 Na mvu 1997, beto tavanda mbala na mbala ti dibaku ya kutanga mpi kutadila mukapu ya mvula, Nkunga 143:10: “Longa mono na kusala luzolo na nge.” Mutindu beto kesala yau, bika beto sadila bamvwandilu yankaka na kulanda bangidika ya Nzambi mesala sambu na kulonga beto, mutindu yau memonisama awa na zulu. Ye bika beto sadila kuyindulula na bangogo yina bonso kima ya kepusa na kusala konso ntangu na kuwakana ti dodukilu yina, na kuzabaka nde “muntu yina ke salaka mambu yina ya Nzambi ke zolaka, yandi ke zingaka mvula na mvula.”—1 Yoane 2:17.
Inki Mutindu Nge Tavutula?
◻ Banani kele na kulongama bubu yai na kusala luzolo ya Yehowa?
◻ Inki mutindu Nkunga 143:10 fwete pusa beto na nsungi yonso ya mvu 1997?
◻ Inki mutindu beto kele na kulongama na kusala luzolo ya Yehowa?
◻ Inki melombama na bibuti Bakristu na ntangu bau kelonga bana na bau?