Na nima, Yezu me pesa balongoki na yandi bambandu tatu ya nkaka. Ya ntete, yandi me tuba nde: “Kimfumu ya zulu kele bonso kima ya ntalu yina bo me bumbaka na kilanga, yina muntu mosi me mona mpi me bumba; ebuna sambu na kiese yina yandi kele na yo, yandi me kwenda mpi me teka bima yonso yina yandi kele na yo mpi me sumba kilanga yina.”—Matayo 13:44.

Na bambandu yonso zole, Yezu me tubila luzolo yina muntu kele ti yo ya kusala bibansa sambu na kima mosi ya mfunu mingi. Muntu yina ya mumbongo me teka na mbala mosi “bima yonso yina yandi kele na yo” sambu na kusumba diyaka mosi ya ntalu mingi. Balongoki ya Yezu lenda bakisa mbandu ya diyaka ya ntalu mingi. Muntu yina me mona kima ya ntalu yina bo bumbaka na kilanga “me teka bima yonso yina yandi kele na yo” sambu na kusumba yo. Bambandu yonso zole ke tubila kima mosi ya mfunu mingi, yina muntu me mona mpi na nima yandi me wa kiese. Beto lenda fwanisa yo ti bibansa yina muntu ke sala sambu na kulungisa nzala na yandi ya mambu ya kimpeve. (Matayo 5:3) Bantu ya nkaka yina ke widikila Yezu ntangu yandi ke pesa bambandu yai, me monisaka dezia luzolo ya kusala bikesa sambu na kulungisa nzala na bo ya mambu ya kimpeve mpi sambu na kukuma balongoki na yandi ya kieleka.—Matayo 4:19, 20; 19:27.