Yezu me tuba nde: “Kuvandaka ti mvwama mosi yina vandaka kulwata bilele ya mbwaki-ble mpi ya lino, yandi vandaka kuyangalala konso kilumbu ti bima ya kitoko kuluta. Kansi kuvandaka mpi ti muntu mosi ya ke lombaka bima, zina na yandi Lazare, bo vandaka kutula yandi mbala na mbala na kielo ya mvwama yina. Nitu na yandi vandaka ya kufuluka ti bamputa mpi yandi vandaka kuzola kudia bima yina vandaka kubwa na mesa ya mvwama yina. Ee, ata bambwa vandaka kukwisa kulekita bamputa na yandi.”—Luka 16:19-21.

Inki mutindu bamfumu yai ya bamvwama mpi ya lulendo ke tadilaka bansukami to bantu ya kukonda mfunu? Ti kuvweza yonso, bo ke bingaka bo ba ‛am ha·’aʹrets, to bantu ya insi (ntoto), yina me zaba ve Nsiku mpi yo me fwana ve nde bo longa bo yo. (Yoane 7:49) Bo me fwanana ti ‘muntu yina ke lombaka bima, zina na yandi Lazare’ yina “vandaka kuzola kudia bima yina vandaka kubwa na mesa ya mvwama yina.” Kaka mutindu nitu ya Lazare vandaka ya kufuluka ti bamputa, bamfumu yai ke vwezaka bantu ya kukonda mfunu mpi ke monaka bo bonso bantu yina ke sepedisaka ve Nzambi.