KETI NGE ZABAKA YO?

Inki mutindu bo vandaka kusadila bima ya kunikila bambuma na maboko na ntangu ya ntama?

Bo vandaka kusadila bima ya kunikila bambuma sambu na kunika fufu ya kusala mampa. Konso kilumbu, bankento to mabuta yonso vandaka kusadila bima ya kunikila bambuma na maboko. Bantu ya ntangu ya ntama vandaka kuwa konso kilumbu makelele ya bima ya bo ke nikilaka bambuma.​—Kubasika 11:5; Yeremia 25:10.

Bifwanisu mpi biteki ya bo vandaka kusala na Ezipte ya ntama ke monisa mutindu bantu vandaka kunika bambuma. Bo vandaka kutula bambuma na zulu ya ditadi mosi ya kipala-pala ya vandaka bonso na mwa dibulu. Bo vandaka kubinga ditadi yango nde ditadi ya kunikila bambuma na maboko. Muntu ya vandaka kunika bambuma vandaka kufukama mpi kusimba na maboko yonso zole ditadi ya fioti ya kunikila. Yandi vandaka kunata yo na ntwala mpi kuvutula yo na nima na zulu ya ditadi ya kipala-pala sambu na kunika bambuma. Mukanda mosi ke tuba nde ditadi ya fioti ya kunikila bambuma vandaka na bakilo 2 to 4. Kana bo sadila yo bonso kinwaninu, ditadi yai lenda fwa muntu.​—Bazuzi 9:50-54.

Kunika bambuma vandaka mfunu mingi sambu na dibuta. Yo yina, nsiku mosi ya Biblia buyisaka kukanga matadi yina muntu ke nikilaka bambuma sambu na mfuka. Biblia ke tuba nde: “Kana nge defa muntu kima, nge lenda baka matadi na yandi ve yina ya yandi ke tutilaka ble ti orze sambu na kusonga nde yandi me defa kima; kana nge sala mpidina, nge me pesa yandi mpasi na luzingu.”​—Kulonga 24:6.

Bangogo “na ntulu ya” ke tadilaka nki?

Biblia ke tuba nde Yezu kele “na ntulu ya Tata.” (Yoane 1:18, NW) Bangogo yai ke tadila bangwisana ya ngolo yina Yezu ke vandaka na yo ti Nzambi mpi kisika ya mfunu mingi yina Nzambi me pesaka yandi. Diaka, bangogo yai ke wakana ti kikalulu yina Bayuda vandaka ti yo na ntangu ya kudia.

Na bilumbu ya Yezu, Bayuda vandaka kuyekama na bakiti ya bo me yidika na lweka ya mesa sambu na kudia. Konso muntu vandaka kutula ntu na yandi na lweka ya mesa mpi makulu na yandi ntama ti mesa. Diaka, konso muntu vandaka kuyekama na kinkoso ya diboko na yandi ya kimama yina yandi vandaka kutulula na zulu ya kuse. Kuvanda mutindu yai vandaka kusala nde diboko ya kitata kubikala ya mpamba. Sambu bantu yonso ya vandaka kudia na mesa vandaka kuyekama na diboko na bo ya kimama konso muntu na lweka ya muntu ya nkaka, mukanda mosi ke tuba nde: “Ntu ya konso muntu vandaka pene-pene ya ntulu ya muntu yina vandaka na nima na yandi; yo yina bo vandaka kutuba nde konso muntu vandaka ‘kuyekama na ntulu ya’ muntu ya nkaka.”

Kuyekama na ntulu ya mfumu ya dibuta to ya muntu yina me yamba bantu na nzo na yandi sambu na feti vandaka lukumu to dibaku ya nene. Yo yina, na Paki ya nsuka yina Yezu salaka ti balongoki na yandi, ntumwa Yoane, ‘longoki yina Yezu zolaka mingi’ vandaka ya kuyekama na ntulu na yandi. Yoane “yekamaka na ntulu ya Yezu” sambu na kuyula yandi ngiufula.​—Yoane 13:23-25; 21:20.