Batangi na Beto Ke Yula

Keti Nzambi Ke Ndimaka nde Bakala Mosi Kukwela Bankento Mingi?

Ve. Ntangu Nzambi gangaka bakala ya ntete na Edeni, yandi pesaka yandi nkento mosi. Na nima, Yezu Kristu vutukilaka nsiku yai ntangu yandi vandaka ti balongoki na yandi.—Kuyantika 2:18-24; Matayo 19:4-6.

Bansadi ya Nzambi ya ntangu ya ntama, mu mbandu, Abrahami, Yakobi, Davidi, mpi Salomo vandaka ti bankento mingi. Kansi, inki mutindu Biblia ke tubilaka diambu yai? Yo ke tubilaka kukonda kuwakana yina basikaka na dibuta ya Abrahami mpi ya Yakobi sambu bo vandaka ti bankento mingi. (Kuyantika 16:1-4; 29:18–30:24) Na nima, Nsiku ya Nzambi vandaka kuzabisa konso ntotila nde: “Yandi fwete baka . . . ve bankento mingi, sambu ntima na yandi kuvila ve nzila.” (Kulonga 17:15, 17) Salomo zitisaka ve nsiku yai sambu yandi vandaka ti bankento kuluta 700! Diambu ya mawa kele nde ntima ya Salomo vilaka nzila ya Yehowa sambu na bupusi ya mbi ya bankento mingi yina yandi vandaka ti bo. (1 Bantotila 11:1-4) Yo ke pwelele nde Biblia ke tubilaka kukwela bankento mingi na mutindu ya mbi.

Kansi, bantu ya nkaka lenda kudiyula nde sambu na nki Nzambi ndimaka nde bansadi na yandi kuvanda ti bankento mingi? Beto baka mbandu: Keti nge me yambulaka ntete ve na nzo mesa to kima ya nkaka ya me beba sambu na mwa ntangu ata yo ke lomba nde nge soba yo, sambu mbala ya nkaka nge ke yindula nde kukatula yo ntangu yai ta vanda mbote ve mpi ta nata mavwanga? Ya kieleka, banzila ya Nzambi mpi bangindu na yandi me luta ya beto. (Yezaya 55:8, 9) Kansi, beto lenda bakisa bikuma ya nkaka ya mfunu yina salaka nde Nzambi kundima sambu na mwa ntangu nde bakala mosi kuvanda ti bankento mingi.

Kuvila ve nde na kilanga ya Edeni, Yehowa silaka nde nsuka-nsuka “mwana” mosi ta fwa Satana. Na nima, Nzambi zabisaka Abrahami nde yandi ta vanda tata ya dikanda mosi ya nene mpi nde Mwana yina bo tubilaka na ntwala ta butuka na ndonga ya dibuta na yandi. (Kuyantika 3:15; 22:18) Yo yina, Satana bakaka lukanu ya kukanga Mwana yai nzila sambu yandi butuka ve. Yandi salaka yonso sambu na kufwa dikanda ya Izraele yai ya ntama. Mbala mingi, yandi vandaka kupusa bantu ya Izraele na kusala masumu sambu Nzambi kundima diaka ve dikanda yai mpi kutanina yo diaka ve.

Sambu na kusadisa bantu ya Izraele na kubwa ve na mutambu ya Satana, Yehowa vandaka kutinda bambikudi na yandi mbala na mbala sambu na kukebisa bansadi na yandi ntangu bo vandaka kuyantika kufwa bansiku na yandi. Yandi zabaka na ntwala nde mbala mingi bansadi na yandi ta lemfuka ve ata na bansiku ya kuluta mfunu, mu mbandu, kusambila biteki. (Kubasika 32:9) Kana bo vandaka kumona mpasi na kulemfuka na nsiku yai ya kuluta mfunu, inki mutindu bo zolaka kulemfukila nsiku yai ya kuvanda ve ti bankento mingi? Sambu Yehowa ke zabaka mbote-mbote bikalulu ya bantu, yandi bakisaka nde yo vandaka ntete ve ntangu sambu na kubuyisa bo kikalulu yai ya kumaka ngolo na ntangu yina. Kana yandi buyisaka bo kikalulu yai na ntangu yina, Satana zolaka kumona yo dibaku ya mbote ya kupusa bantu ya Izraele na kusala masumu.

Mutindu Nzambi ndimaka sambu na mwa ntangu nde bantu kuvanda ti bankento mingi vandaka ti mambote ya nkaka. Yo sadisaka dikanda na kuyela nswalu mpi yo salaka nde bantu yai ya mingi kukuma tii na ntangu ya Mesia. Yo lenda vanda mpi nde kikalulu yai taninaka bankento ya nkaka na mutindu mosi buna. Yo vandaka kupesa bo kisika ya kubumbana mpi nzo na bantangu ya mpasi.

Kuvila ve nde Yehowa ve muntu zolaka nde bantu kuvanda ti bankento mingi. Yandi bikaka kikalulu yai sambu na ntangu fioti, kansi yandi tulaka bansiku sambu mambu ya mbi kusalama ve. (Kubasika 21:10, 11; Kulonga 21:15-17) Ntangu Yehowa bakaka lukanu ya kusukisa kikalulu yai na bansadi na yandi, yandi sadilaka Mwana na yandi sambu na kuvutukila nsiku yina Nzambi tulaka na Edeni. Yo yina, Yezu buyisaka balongoki na yandi na kuvanda ti bankento mingi. (Marko 10:8) Na nima, kieleka yai monanaka diaka pwelele: Nsiku ya Moize vandaka mbote na ntangu na yo, kansi “nsiku ya Kristu” kele mbote kuluta.—Bagalatia 6:2.