3. (a) Inki mutindu Yezu vandaka kumona mambu ya politiki ya ntangu na yandi? (b) Sambu na nki beto lenda tuba nde balongoki ya Kristu ya kupakulama ketubaka na zina ya Kristu? (Tala mpi noti na nsi ya lutiti.)

³ Na kisika ya kudikotisa na mambu ya politiki ya ntangu na yandi, Yezu kudipesaka ya mvimba na kusamuna Kimfumu ya Nzambi, luyalu ya zulu ya bilumbu kekwisa yina yandi tavanda Ntotila. (Daniele 7:13, 14; Luka 4:43; 17:20, 21) Yo yina, ntangu yandi vandaka na ntwala ya Guvernere ya Roma, Ponse Pilate, Yezu kutubaka nde: “Kimfumu na mono kele ya nsi-ntoto yai ve.” (Yoane 18:36) Balongoki na yandi ya kwikama kelandaka mbandu na yandi na kupesaka kwikama na bo na Kristu mpi na Kimfumu na yandi mpi na kusamunaka Kimfumu yina na nsi-ntoto. (Matayo 24:14) Ntumwa Polo kusonikaka nde: “Yo yina beto ke tubila beno mambu yai na zina ya Kristo. . . . Na zina ya Kristo beto ke bondila beno, bambeni ya Nzambi, beno pesa Nzambi nzila nde yandi katula kimbeni kele na kati na beno ti yandi, yandi kumisa beno banduku na yandi.”a—2 Korinto 5:20.

4. Inki mutindu Bakristu yonso ya kyeleka kemonisaka kwikama na Kimfumu ya Nzambi? (Tala lupangu “Bakristu ya Ntete Vandaka Kukota Ve na Mambu ya Politiki.”)

⁴ Sambu ba ambasadere kemonisaka luyalu to insi ya nzenza, bo kekotaka ve na makambu ya bansi yina bo tindaka bo na kusala. Kansi, ba ambasadere kenwaninaka luyalu ya insi yina bo kemonisa. Yo kele mpi mutindu mosi sambu na balongoki ya kupakulama ya Kristu, yina kele “basitwaye ya zulu.” (Filipi 3:20) Na kutuba ya kyeleka, na nzila ya kisalu ya kusamuna Kimfumu ya bo kesalaka ti kikesa yonso, bo mesadisaka bamilio ya “mameme ya nkaka” ya Kristu na kukuma “banduku” ya Nzambi. (Yoane 10:16; Matayo 25:31-40) Mameme yankaka kesalaka bonso bantu yina Kristu metindaka, sambu na kupesa maboko na bampangi ya kupakulama ya Yezu. Bonso kimvuka mosi ya kepesa maboko na Kimfumu ya Mesia, bimvuka yai yonso zole kekotaka ve ata fyoti na mambu ya politiki ya nsi-ntoto.—Tanga Yezaya 2:2-4.