Sosa Banduku Na Kati Ya Bantu Yina Kele Ve Mpila Mosi Ti Nge

Kikuma Yina Ke Salaka nde Bantu Kukuma Ve Banduku ya Bantu Yina Kele Ve Mpila Mosi ti Bo

Kana beto ke kangama ve ti bantu yina beto ke sepelaka ve ti bo, beto ta kuma ti bangindu mingi ya mbi sambu na bo. Kana banduku na beto kele kaka bantu yina beto ke zolaka, beto lenda kuma kuyindula nde kaka mambu ya beto ke yindulaka, ke salaka mpi mutindu beto ke kudiwaka kele mbote kuluta.

Mambu Yina Biblia Ke Tubaka

“Beno kangula kibeni ntima na beno.”—2 BAKORINTO 6:13.

Verse yai ke tendula nki? “Ntima” na beto ke tendula mutindu beto ke kudiwaka. Kana beto ke zola kaka bantu yina kele mpila mosi ti beto, bantima na beto ta kanguka ve. Sambu beto bwa ve na mutambu yai, beto fwete ta kinduku ti bantu yina kele ve mutindu mosi ti beto.

Sambu na Nki Kusosa Banduku na Kati ya Bantu Yina Kele Ve Mpila Mosi ti Beto Kele Mfunu?

Kana beto ke sosa kuzaba bantu ya nkaka mbote-mbote, beto ta bakisa sambu na nki bo ke salaka mambu mpila mosi ve ti beto. Mpi ntangu beto ta kuma banduku na bo, beto ta kuma kumona bo mpila mosi ti beto. Beto ta kuma kubaka bo na valere mingi mpi beto ta kuma kuditula mpenza na kisika na bo.

Beto tadila mbandu ya nkento mosi. Zina na yandi Nazaré. Ntete, yandi vandaka ti bangindu ya mbi sambu na bantu yina vandaka kukwisa kuzinga na insi na bo. Yandi ke monisa mambu yina sadisaka yandi na kukatula bangindu yina ya mbi. Yandi ke tuba nde: “Mono vandaka kulutisa ntangu ti bo mpi vandaka kusala ti bo. Bo vandaka ve ti bikalulu yina bantu ya nkaka vandaka kutuba nde bo kele ti yo. Kana nge kuma nduku ya bantu yina ke zingaka mutindu mosi ve ti nge, nge ta mona nde bo yonso kele ve mutindu mosi. Nge ta kuma kuzola bo mpi kubaka bo na valere.”

Mambu Yina Nge Lenda Sala

Sosa mutindu ya kusolula ti bantu yina me katuka na bisika ya nkaka, bayina kele ve dikanda mosi ti nge to ke tubaka ve ndinga mosi ti nge. Nge lenda:

Yula bo na kutela nge mwa masolo ya me tala bo.
Bingisa bo na kudia ti nge.
Widikila na dikebi yonso masolo na bo mpi sosa kubakisa mambu yina kele mfunu sambu na bo.

Kana nge sala yonso sambu na kubakisa mutindu mambu yina bo me kutanaka ti yo me salaka nde bo kuma mutindu bo kele bubu, yo lenda sadisa nge na kukuma kutadila kimvuka na bo na mutindu ya mbote.

MBANDU: Kandasamy mpi Sookammah (Canada)

“Beto yelaka na Afrique du Sud na ntangu mindele vandaka kuwakana ve ti bantu ndombe (apartheid). Bo tulaka bansiku nde bantu ya kele ti mpusu ya nitu ya mutindu mosi ve fwete zinga ve kisika mosi. Yo salaka nde beto kuma ti bangindu ya mbi sambu na bantu ya nkaka. Beto vandaka kuzola ve mindele sambu bo vandaka kumona nde bo me luta beto. Na ntangu yina, beto vandaka kumona ve nde beto vandaka mpi ti bangindu ya mbi sambu na bo. Kansi beto vandaka kuyindula nde bo bantu vandaka ti bangindu ya mbi sambu na beto.

“Sambu na kuyambula bangindu yina, beto sosaka mutindu ya kukanguka, disongidila beto sosaka kukuma banduku ya mindele. Ntangu beto kumaka banduku na bo, beto bakisaka nde beto ke salaka mambu mingi mutindu mosi. Beto yonso ke kutanaka ti mambu ya mutindu mosi mpi bampasi ya mutindu mosi na luzingu.

“Nkutu beto yambaka bakala mosi ti nkento na yandi ya mindele sambu na ntangu ya nda. Beto kumaka kuzaba bo mbote-mbote. Na nima ya ntangu fioti, beto kumaka banduku mpi beto kumaka kumona nde beto kele mpila mosi. Yo salaka nde beto vanda diaka ve ti bangindu ya mbi sambu na mindele.”