• Mambote Yina Balukutakanu ya Bambangi ya Yehowa Lenda Natila Nge
    Zinga Mvula na Mvula!—Kulonguka ya Biblia Yina Ta Natila Nge Mambote
    • Dilongi 10. Bakala mosi ke tala verse na Biblia yina Mbangi ya Yehowa mosi ke songa yandi na lukutakanu ya Bambangi ya Yehowa.

      DILONGI 10

      Mambote Yina Balukutakanu ya Bambangi ya Yehowa Lenda Natila Nge

      Keti nge me kwendaka dezia na balukutakanu ya Bambangi ya Yehowa? Kana nge me kwendaka ntete ve, nge lenda wa mwa boma kana nge ke zola kukwenda sambu na mbala ya ntete. Nge lenda kudiyula nde: ‘Inki ke salamaka na balukutakanu yango? Sambu na nki yo kele mfunu? Sambu na nki mono fwete kwenda kulanda yo?’ Dilongi yai ta sadisa nge na kubakisa mutindu balukutakanu lenda sadisa nge na kukuma nduku ya Nzambi mpi mambote yina yo lenda natila nge.

      1. Inki kikuma ya kuluta mfunu ke pusaka beto na kukwenda na balukutakanu?

      Muntu mosi ya sonikaka mpi Biblia tubilaka kikuma ya kuluta mfunu yina vandaka kupusa yandi na kukwenda na balukutakanu. Yandi tubaka nde: “Mono ta kumisa Yehowa na dibundu ya nene.” (Nkunga 26:12) Bubu yai mpi, Bambangi ya Yehowa ke sepelaka kukwenda na balukutakanu. Na ntoto ya mvimba, bo ke vukanaka konso mposo sambu na kusambila Nzambi, kuyimbila yandi mpi kusamba yandi. Bantangu ya nkaka bo ke vukanaka bantu mingi mpenza sambu na kusambila Nzambi.

      2. Inki nge ta longuka na balukutakanu na beto?

      Na balukutakanu, beto ke longukaka Ndinga ya Nzambi, ke ‘tendulaka yo pwelele mpi ke pesaka ngindu na yo.’ (Tanga Nehemia 8:8.) Kana nge kwenda na balukutakanu, nge ta longuka mambu mingi ya Yehowa mpi bikalulu na yandi ya mbote. Ntangu nge ta zaba mbote nde yandi ke zolaka nge, nge ta kuma nduku na yandi ya ngolo. Nge ta longuka mpi mutindu yandi lenda sadisa nge na kuvanda ti luzingu ya mbote.​—Yezaya 48:17, 18.

      3. Inki mambote nge lenda baka kana nge vukana ti bantu ya nkaka na balukutakanu?

      Yehowa ke songaka beto na ‘kutudila bankaka dikebi sambu na kupusa bo na kumonisa zola, na kusala bisalu ya mbote mpi na kuyambula ve kuvukana kumosi.’ (Baebreo 10:24, 25) Na balukutakanu na beto, nge ta kutana ti bantu yina ke zolanaka mpenza mpi ya ke zolaka kulonguka mambu mingi ya Nzambi bonso nge. Nge ta wa mutindu bo ke tubila bangindu ya Biblia ya ke pesa kikesa. (Tanga Baroma 1:11, 12.) Nge ta zabana mpi ti bantu yina ke landa kuvanda na kiese ata bo ke kutana ti bampasi. Yai kele mwa bikuma ya ke salaka nde Yehowa kulomba beto na kukwendaka na balukutakanu!

      LONGUKA MAMBU MINGI

      Beto tala mambu ya ke salamaka na balukutakanu ya Bambangi ya Yehowa mpi sambu na nki yo kele mfunu na kusala bikesa sambu na kukwenda na balukutakanu yango.

      4. Balukutakanu ya Bambangi ya Yehowa

      Bakristu ya ntete vandaka kuvukana mbala na mbala sambu na kusambila Yehowa. (Baroma 16:3-5) Beno tanga Bakolosai 3:16 mpi na nima beno pesa mvutu na ngiufula yai:

      • Inki mutindu Bakristu ya ntete vandaka kusambila Yehowa?

      Bubu yai, Bambangi ya Yehowa ke vukanaka mpi mbala na mbala na Banzo ya Kimfumu. Sambu na kumona mambu ya ke salamaka na balukutakanu na bo, beno tala VIDEO. Na nima, beno tala kifwanisu ya ke monisa mutindu lukutakanu mosi ke salama mpi beno pesa mvutu na bangiufula ya ke landa.

      VIDEO: Inki Ke Salamaka na Nzo ya Kimfumu? (2:12)

      • Inki mambu ya nge me mona yina ke salamaka na Nzo ya Kimfumu ya kele mpi na Bakolosai 3:16?

      • Keti nge me mona kima ya nkaka ya ke salamaka na balukutakanu na beto ya me sepedisa nge na video to na kifwanisu?

      Beno tanga 2 Bakorinto 9:7 mpi na nima beno pesa mvutu na ngiufula yai:

      • Sambu na nki bo ke lombaka ve mbongo na balukutakanu ya Bambangi ya Yehowa?

      Beno tadila ti mpangi yina ke longa nge Biblia mambu yina lukutakanu mosi ya mposo yai ta tubila.

      • Inki kitini ya lukutakanu nge ke mona nde yo ta sepedisa nge to ta sadisa nge mingi?

      Keti nge zabaka yo?

      Na jw.org, nge ta mona kisika mpi ntangu yina balukutakanu ke salamaka na ntoto ya mvimba.

      Bifwanisu: Mutindu mambu ke salamaka na Nzo ya Kimfumu, na ntwala ya lukutakanu, ntangu lukutakanu ke salama mpi na nima ya lukutakanu. Beto me sadila bisono banda na A tii na D sambu na kumonisa mambu ya ke salama. A. Mbangi ya Yehowa mosi ya bakala ke sala diskure ya Biblia na ntwala, ntangu lukutakanu ke salama. B. Mbangi ya Yehowa mosi ya nkento ke pesa mvutu na kitini mosi ya lukutakanu yina kele ti bangiufula mpi bamvutu. C. Mbangi ya Yehowa mosi ya bakala ke solula ti dibuta mosi na nima ya lukutakanu. D. Mbangi ya Yehowa mosi ya bakala me kangula porte sambu na mununu mosi ya bakala yina me kwisa na lukutakanu.

      1. Na balukutakanu na beto, beto ke salaka badiskure, ke talaka bavideo mpi beto ke bakaka formasio ya kulonga. Beto ke bandaka mpi ke sukisaka balukutakanu ti nkunga mpi kisambu

      2. Na bitini ya nkaka ya lukutakanu, bampangi ke pesaka bamvutu

      3. Beto ke bingisaka bantu yonso: Babakala, bankento, bambuta mpi baleke

      4. Bambangi ya Yehowa ke lombaka ve mbongo na balukutakanu na bo mpi bo ke lutisaka ve kima mosi sambu na kubaka mbongo

      5. Yo ke lombaka bikesa sambu na kukwenda na balukutakanu

      Beto tadila mbandu ya Yezu mpi dibuta na bo. Konso mvula, yo vandaka kulomba nde bo katuka na Nazareti mpi bo tambula bilumbu kiteso ya tatu na nzila ya bangumba sambu na kukwenda na Yeruzalemi. Beno tanga Luka 2:39-42 mpi na nima beno pesa mvutu na bangiufula yai:

      • Keti nge ke yindula nde yo vandaka kulomba bikesa sambu bo kwenda na Yeruzalemi?

      • Sambu na nki nge fwete sala bikesa sambu na kukwenda na balukutakanu?

      • Keti nge ke yindula nde yo kele mfunu na kusala bikesa yango ata yo kele mpasi? Sambu na nki?

      Bifwanisu: Yozefi, Maria, Yezu mpi mpangi na yandi mosi ke yilama sambu na nzietelo. 1. Yozefi ke kanga bima na zulu ya mpunda mpi Maria ke yidika bima ya kudia. 2. Karti ya ke monisa nzila ya Nazareti sambu na kukwenda na Yeruzalemi.

      Biblia ke tubaka nde kuvukana sambu na kusambila Yehowa kele mfunu mingi. Beno tanga Baebreo 10:24, 25 mpi na nima beno pesa mvutu na ngiufula yai:

      • Sambu na nki beto fwete kwenda na balukutakanu mbala na mbala?

      BANTU YA NKAKA KE TUBAKA NDE: “Yo kele ve mfunu na kuvukana ti bantu ya nkaka sambu na kusambila Nzambi. Kulonguka Biblia na nzo me kuka.”

      • Inki verse to mbandu ya kele na Biblia ke monisa mambu yina Yehowa ke zolaka?

      NA BUNKUFI

      Kukwenda na balukutakanu ta sadisa nge na kulonguka mambu mingi ya Yehowa, na kukumisa ngolo kinduku na nge ti yandi mpi na kusambila yandi ti bantu ya nkaka.

      Inki Nge Me Simba?

      • Sambu na nki Yehowa ke lombaka beto na kukwenda na balukutakanu?

      • Inki mambu nge ta longuka na balukutakanu ya Bambangi ya Yehowa?

      • Kukwenda na balukutakanu lenda natila nge diaka nki mambote?

      Mambu ya Kusala

      TALA MPI

      Inki nge fwete sala kana nge ke wa boma ya kukwenda na balukutakanu? Tala mutindu muntu mosi ya vandaka kudiwa mutindu yai kumaka kuzola balukutakanu.

      Beto Ta Vilaka Ve Mbote Yina (4:16)

      Tala mutindu leke mosi ya bakala sepelaka ti balukutakanu mpi mambu yina yandi salaka sambu na kulanda kukwenda na balukutakanu.

      Mono Sepelaka ti Balukutakanu Mingi! (4:33)

      Tala mambu yina bantu ya nkaka ke tubaka sambu na balukutakanu.

      “Sambu na Nki Nge Fwete Kwenda na Balukutakanu na Nzo ya Kimfumu?” (Disolo ya kele na jw.org)

      Tala mutindu luzingu ya muntu mosi yina vandaka na kati ya bantu ya mubulu sobaka na nima ya kukwenda na balukutakanu ya Bambangi ya Yehowa.

      “Mono Vandaka Kutambula ti Munduki na Mono Konso Kisika” (Nzozulu ya Nkengi, Yuli 1, 2014)

  • Kimfumu ya Nzambi Ke Yala Bubu Yai!
    Zinga Mvula na Mvula!—Kulonguka ya Biblia Yina Ta Natila Nge Mambote

    • 5. Mambu ya nsi-ntoto me sobaka banda na 1914

      Beno tala VIDEO.

      VIDEO: Mambu ya Nsi-Ntoto Me Sobaka Banda na 1914 (1:10)

      Yezu tubilaka mambu yina ta salama na ntoto ntangu yandi ta kuma Ntotila. Beno tanga Luka 21:9-11 mpi na nima beno pesa mvutu na ngiufula yai:

      • Inki mambu na kati ya mambu yai nge ke monaka to ke waka?

      Ntumwa Polo tubilaka bikalulu ya mbi yina bantu ta kuma ti yo na bilumbu ya nsuka ya bimfumu ya bantu. Beno tanga 2 Timoteo 3:1-5 mpi na nima beno pesa mvutu na ngiufula yai:

      • Inki bikalulu na kati ya bikalulu yai ya mbi nge ke monaka na bantu bubu yai?

      Biwanisu: Yo ke monisa mambu ya ke salama na nsi-ntoto mpi bikalulu yina bantu me kumaka ti yo na bilumbu ya nsuka. 1. Mfumu mosi ya basoda me telama, yandi me nangula maboko mpi ke tuba na ndinga ya ngolo. 2. Banzo ya kubwa na nima ya kunikana ya ntoto. 3. Baavio ya bitumba. 4. Bantu me lwata bamaske mpi ke tambula na bala-bala. 5. Bantu ya mubulu me panza banzo zole ya etage ya nda mingi mpi yo ke pela tiya. 6. Bakala mosi ke kuditobula bima ya ke lawusaka. 7. Bakala mosi me kanga dikofi mpi yandi ke nganina nkento na yandi. 8. Bima ya ke lawusaka mpi malafu ya mutindu na mutindu. 9. Bankento zole me lwata bilele yina bantu mingi ke lwata, bo me lwata mayaka ti bima ya makutu mpi bo ke kanga foto. 10. Muntu mosi ke budisa miziki na konsere. 11. Muntu mosi ya kimvuka ya bantu ya mubulu ke zola kuta kima mosi.

      6. Inki beto fwete sala mutindu beto me zaba nde Kimfumu ya Nzambi ke yala?

      Beno tanga Matayo 24:3, 14 mpi na nima beno pesa mvutu na bangiufula yai:

      • Inki kisalu ya mfunu ke monisa nde Kimfumu ya Nzambi ke yala bubu yai?

      • Inki mutindu nge lenda pesa maboko na kisalu yango?

      Kimfumu ya Nzambi ke yala bubu yai mpi kubika fioti yo ta yala ntoto ya mvimba. Beno tanga Baebreo 10:24, 25 mpi na nima beno pesa mvutu na ngiufula yai:

      • Inki konso muntu na kati na beto fwete sala mutindu beto “ke mona kilumbu ke finama”?

      Bifwanisu: 1. Longoki mosi ya Biblia me kwenda na lukutakanu ya Bambangi ya Yehowa. 2. Longoki yango ke longa muntu mosi ya yandi me zabanaka ti yandi nsangu ya mbote.

      Inki nge ta sala kana nge me longuka kima mosi ya lenda sadisa mpi kugulusa bantu ya nkaka?