Inki Mutindu Yehowa Ke Monaka Mono?
1. Inki mutindu Biblia me fwanana ti tala-tala?
1 Mbala ikwa nge ke talaka na tala-tala? Konso kilumbu, bantu mingi ke talaka yo sambu yo ke sadisaka bo na kumona kimuntu na bo ya nganda yina ke lombaka kutudila dikebi. Biblia me fwanana ti tala-tala. Kutanga Ndinga ya Nzambi ke sadisaka beto na kumona kimuntu na beto ya kati yina Yehowa ke talaka. (1 Sam. 16:7; Yak. 1:22-24) Ndinga ya Nzambi lenda “sala luswaswanu na kati ya mabanza mpi bangindu ya ntima.” (Baeb. 4:12) Inki mutindu kutanga mpi kuyindulula Biblia konso kilumbu lenda sadisa beto na kumona bisika yina beto fwete tomisa sambu na kuvanda bansamuni ya mbote?—Nk. 1:1-3.
2. Inki mutindu Biblia lenda sadisa beto na kuditadila?
2 Sadila Biblia Bonso Tala-Tala: Masolo ya Biblia ya bansadi ya kwikama ya Yehowa ke longaka beto bikalulu ya kitoko yina ke sepedisaka yandi. Mu mbandu, Davidi monisaka kikesa sambu na zina ya Nzambi. (1 Sam. 17:45, 46) Yezaya ndimaka na luzolo yonso na kusamuna na teritware mosi ya mpasi. (Yez. 6:8, 9) Zola ya ngolo ya Yezu sambu na Tata na yandi ya zulu pusaka yandi na kumona kisalu ya kusamuna diambu mosi ya kiese kansi ve ya kizitu. (Yoa. 4:34) Bakristu ya mvu-nkama ya ntete samunaka na kikesa, tudilaka Yehowa ntima mpi bakaka lukanu ya kuyambula ve kulonga. (Bis. 5:41, 42; 2 Bak. 4:1; 2 Tim. 4:17) Kuyindulula bambandu na bo ta sadisa beto na kuditadila mbote-mbote sambu na kutomisa kisalu na beto ya santu.
3. Sambu na nki beto fwete vutula ve mambu na nima sambu na kusala bansoba ya mfunu?
3 Sala Ngolo Sambu na Kusungika Bifu: Ya kieleka, beto ke waka mbote ve kana beto me tala na tala-tala mpi me katula ve kifu yina beto me mona. Beto lenda lomba Yehowa lusadisu na kuditadila mbote-mbote mpi kusadisa beto na kusala bansoba yina kele mfunu. (Nk. 139:23, 24; Luka 11:13) Sambu ntangu ya me bikala kele nkufi mpi luzingu ya bantu kele na kigonsa, beto fwete vutula ve mambu na nima sambu na kusala bansoba ya mfunu.—1 Bak. 7:29; 1 Tim. 4:16.
4. Inki ke salamaka kana muntu ke tula meso na Ndinga ya Nzambi mpi ke sala na kuwakana ti mambu yina yandi ke sengumuna?
4 Kimuntu ya kati yina Yehowa ke talaka kele mfunu mingi kuluta kimuntu ya nganda. (1 Pie. 3:3, 4) Inki ke salamaka kana muntu ke tula meso na Ndinga ya Nzambi mpi ke sala na kuwakana ti mambu yina yandi ke sengumuna? Yandi ‘ke kumaka ve muwi ya ke vilaka, kansi yandi ke kumaka muntu yina ke sala kisalu, mpi yandi ta vanda na kiese na kusala yo.’ (Yak. 1:25) Ee, beto ta vanda bansamuni ya kiese mpi ya mbote sambu beto “kele bonso batala-tala yina ke tentisa nkembo ya Yehowa.”—2 Bak. 3:18.