3. Inki salamaka na ntangu ya ntama yina Piere ketuba nde yau tasalama dyaka?

³ Na nima ya kusyamisa bampangi na yandi na kutula dikebi na mbikudulu, yandi ketuba nde: “Baprofete ya luvunu kwisaka kubasika ntama [na Izraele] na kati ya bantu; kiteso mosi mpi, balongi ya luvunu ta kwisa kubasika na kati na beno.” (2 Piere 1:14–2:⁠1) Na ntangu ya ntama bantu ya Nzambi zwaka nsangu ya baprofete ya kyeleka, kansi bau vandaka nwana mpi ti malongi ya mbi ya baprofete ya luvunu. (Yeremia 6:​13, 14; 28:​1-3, 15) Yeremia sonikaka nde: “Baprofete ya Israele me luta . . . mpenza na kusala mbi: bo ke sala pite, bo ke tuba luvunu.”​—⁠Yeremia 23:⁠14.

4. Sambu na inki balongi ya luvunu fwete fwa?

⁴ Sambu na kutendula mambu ya balongi ya luvunu tasala na kati ya dibundu ya Bukristu, Piere ketuba nde: “Bantu yina tanata na kinsweki yonso basekti ya kebebisaka mpi bau tabuya nkutu munkwa na bau [Yezu Kristu] yina sumbaka bau, na kunataka lufwa ya nswalu na zulu na bau mosi.” (2 Piere 2:​1, NW; Yude 4) Mbutu ya nsuka ya basekti yina ya mvu-nkama ya ntete kele Kikristu mutindu beto kezaba yau bubu yai. Piere kemonisa kikuma balongi ya luvunu mefwana mbotembote na kufwa: “Bantu ya nkaka mingi ta landa [“ndyatilu na bau ya mbi,” NW], ebuna sambu na mambu ya mbi yina ya bo ke salaka, bantu ya nkaka ta tuba mambu ya mbi sambu na nzila ya kieleka.”​—⁠2 Piere 2:⁠2.

Kukotisama ya Malongi ya Luvunu

6. Inki kepusaka balongi ya luvunu, ye inki mutindu bau kesosaka kuzwa yina ya bau kezolaka?

⁶ Na mayele yonso, beto kesimba mutindu balongi ya luvunu kekotisaka mabanza na bau ya mbi. Piere ketuba nde bau kesalaka yau na kinsweki, na nsi-nsi, to na mayele. Yandi keyika nde: “Sambu na nzala na bo ya kubaka mbongo, balongi yina ya luvunu ta longa beno [bangogo] ya luvunu sambu na kukusa-kusa beno.” Kima kepusaka balongi ya luvunu kele bwimi. La Bible de Jérusalem kebalula yau mutindu yai: “Bau tasala ngolo sambu na kusumba beno sambu na bau mosi ti bangogo ya luvunu.” Mutindu mosi, Luwawanu Yampa ketuba nde: “Mu zola ya bima, bau tabaka ndandu (luta) sambu na beno mu ndinga ya mayele.” (2 Piere 2:​1, 3) Kutuba ya balongi ya luvunu lenda monika bonso kyeleka na muntu yina ketomatala ve na kimpeve, kansi bangogo na bau kele ya kuyidika mbotembote sambu na “kusumba” bantu, na kukusaka bau sambu bau lungisila bau balukanu na bau ya bwimi.