Keti yo fwanaka sambu Davidi kuvingila nde Nzambi kutudila yandi dikebi? Keti Nzambi ke kudibanzaka sambu na nge? Bantu mingi ke ndimaka ve nde Nzambi nkwa-ngolo yonso ke tudilaka bo dikebi. Sambu na nki?

Sambu Nzambi me luta mpenza bantu na nene. Yandi kele ti kiyeka ya kuluta nene mpi bantu yonso “kele bonso ditonzi mosi ya masa, bonso mbuma mosi ya zelo me bwa na kilo.” (Yezaya 40:15) Nsoniki mosi ya ke tulaka ntembe ya bilumbu na beto tubaka na lulendo yonso nde “yo kele diambu mosi ya mpamba na kukwikila nde Nzambi ke tudilaka nge ti mambu ya nge ke salaka dikebi.”

Bantu ya nkaka ke yindulaka nde bikalulu na bo ke pesaka ve Nzambi nzila ya kutudila bo dikebi. Mu mbandu, Jim bakala mosi ya bamvula na kati ya 50 ti 60 ke tuba nde: “Mono ke sambaka konso ntangu sambu mono vanda na ngemba mpi kudiyala kansi mono ke waka diaka makasi na nima. Nsuka-nsuka, mono me monaka nde mono kele muntu ya mbi kibeni mpi Nzambi lenda sadisa mono ve.”

Keti Nzambi ke tudilaka ve bantu dikebi sambu yandi kele ntama kibeni ti bo? Inki mutindu yandi ke monaka mpenza bigangwa na yandi ya kukonda kukuka? Kana Nzambi me songa ve bantu ngindu na yandi, ata muntu mosi ve lenda tuba mambu ya Nzambi mpi kupesa mvutu na bangiufula yai. Kansi Biblia, nsangu ya kupemama yina Nzambi me pesaka bantu ke ndimisa beto nde Nzambi kele ve ntama ti bantu sambu na kutudila bo dikebi. Biblia ke tuba nde: “Ya kieleka, yandi kele ntama ve ti konso muntu na kati na beto.” (Bisalu 17:27) Na masolo iya yina ke landa, beto ta tadila mambu yina Nzambi ke zabisa beto sambu na dikebi yina yandi ke tudilaka bantu mpi mutindu yandi me tudilaka dezia bantu yina vandaka bonso nge dikebi.

KIKUMA YINA BANTU YA NKAKA KE VANDAKA TI KETI-KETI: Nsosa mosi ya bo me sala ntama mingi ve ke monisa nde galaksi na beto mpamba kele na ba planete kiteso ya bamiliare 100. Ntangu bantu mingi ke monaka bunene ya luyalanganu, bo ke kudiyulaka nde: ‘Sambu na nki Ngangi, nkwa-ngolo yonso fwete tula dikebi na mambu yina bantu ke salaka na ntoto?’

MAMBU YINA NDINGA YA NZAMBI KE LONGAKA: Nzambi me pesaka beto Biblia mpi ke tudilaka beto dikebi. Yandi ke zabisa beto nde: “Mono ta longa nge mambu yonso, mono ta talaka nge.”​—Nkunga 32:8.

Beto baka mbandu ya Agare, nkento mosi ya Ezipte ya mvu-nkama ya 20 N.T.B. Agare vandaka kuzitisa ve mfumu na yandi, yo yina Sarai yantikaka kuniokula yandi mpi yandi tinaka na ntoto ya zelo na zelo. Keti Nzambi tudilaka diaka ve Agare dikebi ata yandi salaka kifu? Biblia ke tuba nde: ‘Wanzio ya Yehowa kwisaka kukuta Agare.’ Wanzio yango siamisaka yandi nde: “Mfumu Nzambi me wa kudila na nge.” Na nima, Agare zabisaka Yehowa nde: “Nge kele Nzambi yina ke monaka.”​—Kuyantika 16:4-13.

“Nzambi yina ke monaka” ke talaka nge mpi. Mu mbandu, mama ya zola ke kebaka mwana na yandi. Ntangu mwana kele ntete ya fioti, yandi ke vandaka ti mfunu ya dikebi ya bibuti na yandi. Mutindu mosi, Nzambi ke kebaka beto mingi-mingi ntangu beto me lemba to me konda ngolo. Yehowa ke tuba nde: ‘Kisika ya mono ke zingaka kele ntama mpi ya santu. Ata mono ke vandaka kuna na zulu kansi mono ke vandaka mpi ti bantu yina ke monaka mawa na ntima, ke kudikulumusaka, sambu na kupesa bo diaka kikesa ti ngolo.’​—Yezaya 57:15.

Kansi nge lenda kudiyula nde: ‘Inki mutindu Nzambi ke talaka mono? Keti yandi ke talaka kimuntu na mono ya nganda to ke sosaka kuzaba mambu yina me pusa mono na kusala diambu mosi mpi kubakisa mono?’

KIKUMA YINA BANTU YA NKAKA KE VANDAKA TI KETI-KETI: Bantu mingi ke yindulaka nde Nzambi ke monaka bantu kaka bansumuki, bantu ya yandi me fwana ve na kutudila dikebi. Kendra niokwamaka na mabanza mpi vandaka kumona bonso nde yandi me nata makambu sambu yandi vandaka kuzitisa ve mbote-mbote bansiku ya Nzambi. Yo yina, yandi tubaka nde: “Mono ke sambaka diaka ve.”

MAMBU YINA NDINGA YA NZAMBI KE LONGAKA: Yehowa ke talaka mambu mingi kuluta bifu na nge mpi ke bakisaka mpenza mutindu nge kele. Biblia ke tuba nde: “Yandi zaba na nki yandi salaka beto, yandi zaba mbote nde beto kele kaka putulu.” Kima ya kuluta mfunu kele nde yandi ke sadilaka beto ve mambu “mutindu kele masumu na beto,” kansi yandi ke lolulaka beto na mawa yonso kana beto me balula ntima.​—Nkunga 103:10, 14.

Beto tadila mbandu ya Davidi, ntotila ya Izraele ya beto me tubila na disolo ya ntete. Yandi zabisaka Nzambi na kisambu nde: ‘Nge monaka mono ntangu mono me butuka ntete ve. Yo vandaka ya kusonika na mukanda na nge. Tala mono mbote-mbote mpi zaba ngindu na mono.’ (Nkunga 139:16, 23) Ya kieleka, Davidi ndimaka nde ata yandi salaka masumu ya nene na bantangu ya nkaka, Yehowa monaka mutindu yandi balulaka ntima.

Yehowa ke bakisaka nge mbote kuluta konso muntu yina. Biblia ke tuba nde: “Muntu ke talaka yina ke monika na meso, kansi Mfumu Nzambi ke talaka ntima.” (1 Samuele 16:7) Nzambi ke zabaka mambu yina ke pusaka nge na kusala diambu mosi buna​—mambu yina nge me bakaka na ba-nkaka, mutindu nge yelaka, kisika nge ke zingaka, mpi kimuntu na nge. Mambu yai yonso ke vandaka ti bupusi na zulu na nge. Yandi ke monaka mpi ke bakaka na mbalu mutindu ya muntu yina nge ke zolaka kuvanda ata nge ke sala bifu.

Kansi, nki mutindu Nzambi ke sadilaka mpenza mayele na yandi ya mingi sambu na kulembika ‘nge?’

KIKUMA YINA BANTU YA NKAKA KE VANDAKA TI KETI-KETI: Ata bantu ke vandaka ti mfunu ya ndembikilu na bantangu ya mpasi, bantu ya nkaka ke monaka nde yo kele mfunu ve na kulomba lusadisu na Nzambi sambu yandi manisa bampasi na bo. Nkento mosi na zina ya Raquel ke tuba nde: “Kana mono tala bantu mingi yina kele na ntoto mpi bampasi yina bo ke kutana ti yo, mono ke monaka bampasi na mono mpamba mpi ke vandaka ti badute na kulomba lusadisu na Nzambi.”

MAMBU YINA NDINGA YA NZAMBI KE LONGAKA: Nzambi me sadisaka dezia bantu na mutindu ya kuyituka mpi me lembikaka bo. Konso muntu na ntoto ke butukaka ti disumu mpi yo ke salaka nde bantu kuzitisa ve bansiku ya Nzambi na mutindu ya kukuka. Kansi, Nzambi “me zolaka beto mpi yandi tindaka Mwana na yandi [Yezu Kristu] bonso kimenga sambu na masumu na beto sambu na kuwakanisa beto ti Nzambi.” (1 Yoane 4:10) Na nsadisa ya lufwa ya kimenga ya Yezu, Nzambi ke lolulaka masumu na beto, beto ke vandaka ti kansansa ya bunkete, mpi kivuvu ya kuzinga na ngemba kimakulu na ntoto ya mpa.a Keti kimenga yai ke tadilaka bantu yonso na kimvuka to yo ke monisa dikebi yina Nzambi ke tudilaka nge?

Beto tadila mbandu ya ntumwa Polo. Kimenga ya Yezu pusaka yandi na kusonika nde: ‘Mono ke zinga na kuwakana ti lukwikilu na mono na Mwana ya Nzambi, yina zolaka mono mpi fwaka sambu na mono.’ (Bagalatia 2:20) Nkutu, Yezu fwaka na ntwala nde Polo kukuma Mukristu. Kansi, Polo bakaka kimenga yango bonso dikabu yina Nzambi pesaka yandi.

Lufwa ya kimenga ya Yezu kele dikabu yina Nzambi ke pesa nge. Dikabu yai ke monisa nde nge kele mbalu mingi na meso ya Nzambi. Yo lenda pesa nge “ndembikilu ya mvula na mvula mpi kivuvu ya mbote” mpi ‘ngolo na mpila nde nge sala mpi nge tuba ntangu yonso mambu ya mbote.’​—2 Batesalonika 2:16, 17.

Diaka, kiteso ya bamvula 2 000 me luta, Yezu tambikaka luzingu na yandi bonso kimenga. Inki banzikisa ke monisa nde Nzambi ke zola kusala bangwisana ti nge bubu yai?

KIKUMA YINA BANTU YA NKAKA KE VANDAKA TI KETI-KETI: Bantu mingi ya ke kwikilaka na Nzambi ke kudiwaka ntama ti yandi. Christina, nkento mosi ya Irlande ya ke kwendaka na nzo-nzambi konso mposo ke tuba nde: “Mono ke monaka Nzambi kaka bonso Ngangi ya bima yonso. Kansi, mono ke zabaka yandi ve. Ata mbala mosi ve mono me kudiwaka pene-pene na yandi.”

MAMBU YINA NDINGA YA NZAMBI KE LONGAKA: Ntangu beto ke kudiwaka beto mosi, Yehowa ke yambulaka beto ve. Mbandu yai ya Yezu pesaka ke monisa mutindu Nzambi ke kudibanzaka sambu na beto: “Kana muntu mosi kele ti mameme nkama mpi mosi na kati na bo me vila, keti yandi ta bikisa ve mameme makumi uvwa na uvwa na zulu ya bangumba sambu na kwenda kusosa dimeme yina me vila?” Verse yai ke longa beto nki? Biblia ke tuba nde: “Mutindu mosi, sambu na Tata na mono yina kele na zulu, yo kele ve diambu mosi ya mbote nde ata mosi na kati ya bantu yai ya kukonda mfunu kuvila.”—Matayo 18:12-14.

Konso muntu “na kati ya bantu yai ya kukonda mfunu” kele mbalu mingi na meso ya Nzambi. Inki mutindu Nzambi ‘ke sosaka dimeme yina me vila?’ Verse yina kele na luyantiku ya disolo yai ke monisa nde Yehowa ke bendaka bantu.

Beto tadila mutindu Nzambi salaka kitambi ya ntete sambu na kubenda bantu ya masonga. Na mvu-nkama ya ntete ya T.B., Nzambi tindaka Filipo sambu na kukutana ti mfumu mosi ya Etiopia mpi kutendudila yandi mbikudulu ya Biblia yina yandi vandaka kutanga. (Bisalu 8:26-39) Na nima, Nzambi twadisaka ntumwa Piere na kukwenda na nzo ya Korneye, mfumu mosi ya basoda ya Roma yina vandaka kusamba mpi kusala ngolo sambu na kusambila Nzambi. (Bisalu 10:1-48) Nzambi twadisaka mpi ntumwa Polo ti banduku na yandi na nganda ya kielo ya mbanza ya Filipi, na lweka ya nzadi. Kuna, bo kutanaka ti Lidia, nkento mosi yina vandaka ‘kusambila Nzambi,’ mpi “Yehowa kangulaka ntima na yandi sambu yandi tula dikebi.”—Bisalu 16:9-15.

Na mabaku yai yonso, Yehowa zolaka nde bantu yina vandaka kusosa yandi kubaka dibaku ya kuzaba yandi. Bubu yai, banani ke kwendaka kutala bantu na banzo mpi na bisika ya bantu mingi sambu na kulonga bo nsangu ya Nzambi? Bantu mingi ta tuba nde kele “Bambangi ya Yehowa.” Kudiyula nde, ‘keti yo lenda vanda nde Nzambi ke sadila bo sambu na kusadisa mono?’ Beto ke siamisa nge na kusamba Nzambi sambu yandi sadisa nge na kundima bikesa yina yandi ke sala sambu na kubenda nge na yandi.a