“Ntangu Yonso Beno Fweti Tuba Mambu ya Mbote”

1. ‘Kutuba mambu ya mbote’ ketendula inki?

¹ “Ntangu yonso beno fweti tuba mambu ya mbote ti ya mfunu; beno fweti zaba kupesa bamvutu ya mbote na konso muntu.” (Kol. 4:⁠6) Kutuba mambu ya mbote ketendula kupona bangogo ya kyeleka, mpi kutuba yo na mutindu yina tasepedisa muntu yina kewa yo. Kusala mutindu yina kele mfunu mingi sambu na kisalu ya kusamuna.

2. Inki mutindu Yezu kunungaka na kuta kimbangi na nkento mosi ya Musamaria?

² Mbandu ya Yezu: Ntangu Yezu vandaka kupema penepene na dibulu mosi ya masa, yandi yantikaka kusolula ti nkento mosi ya Musamaria yina kwisaka kubaka masa. Ntangu bo vandaka kusolula, nkento yina kutubilaka mbala mingi kimbeni ya ntama yina kuvandaka na kati ya Bayuda ti bantu ya Samaria. Yandi tubaka mpi nde bantu ya Samaria kuvandaka bana ya Yakobi, ata Bayuda vandaka kukwikila nde bo vandaka banzenza. Na kisika ya kutula ntembe na mambu nkento yina vandaka kutuba, Yezu vandaka kaka kutuba mambu na mutindu yina kusadisaka bo na kulanda masolo na bo. Yo yina, Yezu kunungaka na kuta kimbangi yina kunatilaka nkento yina mambote ti bantu ya bwala na yandi.​—⁠Yoa. 4:​7-15, 39.

3. Inki mutindu beto lenda landa mbandu ya Yezu na ntangu beto kele na kisalu ya kusamuna?

³ Ntangu beto kesamunaka, beto fwete vila ve nde lukanu na beto kele ya kuzabisa bantu “nsangu ya mbote.” (Roma 10:15) Beto fwete pesa ve muwi ngindu nde beto kevweza malongi yina yandi kekwikilaka. Kansi, beto fwete zabisa yandi mabanza ya Biblia yina kesepedisaka mpi kepesaka kikesa. Kana yandi basisa dibanza mosi ya mbi, beto fwete basisa ve kifu na yandi mbala mosi mpi na pwelele. Kana yandi metuba dyambu mosi yina beto lenda ndima to yina beto lenda sadila sambu na kusikisa yandi, ziku beto lenda tuba mambu ya mutindu yai sambu na kutanga verse mosi, “Keti nge metadilaka dezia ngindu yai yankaka?”

4. Inki beto fwete sala kana muwi kufinga beto?

⁴ Inki beto lenda sala kana muwi kufinga beto to yo kemonana bonso nde yandi kezola kaka kutula ntembe? Beto fwete landa na kumonisa ntima ya mbote ti mawete na bisalu mpi na kutuba na beto. (2 Tim. 2:​24, 25) Kana muntu mesepela ve na nsangu ya Kimfumu, yo kele mbote na kubikisa yandi na mayele yonso.​—⁠Mat. 7:6; 10:​11-14.

5. Inki mutindu mpangi-nkento mosi kubakaka bambuma ya mbote na kupesa muntu mvutu na luzitu yonso?

⁵ Bambuma ya Mbote: Ntangu mpangi-nkento mosi kusosaka kuta kimbangi na nkento mosi yina kuvandaka mfinangani na yandi, nkento yango kuwaka makasi mpi kusingaka yandi. Mpangi na beto kutubaka na malembe yonso nde: “Yo mesala munu mpasi na mpila yo mepesa nge makasi. Lolula munu, mpi bikala mbote.” Bamposo zole na nima, nkento yango kukokulaka na kyelo ya mpangi-nkento, kulombaka ndolula sambu na mambu ya yandi salaka, mpi kumonisaka mpusa ya kuwa mambu yina mpangi-nkento zolaka kutuba kilumbu yina. Ee, mbala mingi, kupesa muntu mvutu na luzitu yonso kebutaka bambuma ya mbote mpenza!​—⁠Bing. 15:1; 25:⁠15.

6. Sambu na nki yo kele mfunu na kutuba mambu ya mbote na kisalu ya kusamuna?

⁶ Sala kikesa na kutuba mambu ya mbote na ntangu nge kezabisa bantu nsangu ya mbote. Ata kana muwi kezola ve kuwidikila nge, yandi lenda ndima kilumbu yankaka yina Bambangi ya Yehowa taluta na nzo na yandi.