Kutula Dikebi na Muntu ya Nge Kesolula ti Yandi

NTANGU beto kezabisa bakyeleka ya Biblia na bantu yankaka, beto fwete suka ve kaka na kupesa bo bansangu. Beto fwete simba ntima na bo. Mutindu mosi ya kusala yo kele kutula dikebi ya masonga na bawi na beto. Beto lenda monisa dikebi ya mutindu yai na mitindu mingi ya kuswaswana.

Tadila Bangindu ya Bawi na Nge. Ntumwa Polo vandaka kutadila kisina mpi mabanza ya bawi na yandi. Yandi tendulaka nde: “Ntangu mono ke sala ti Bayuda mono ke vandaka bonso Muyuda sambu na kubenda bo; ata mono kele na nsi ya kiyeka ya Bansiku ya Moize ve, mono ke zingaka bonso nde mono kele na nsi ya kiyeka ya Bansiku yina ntangu mono ke sala na kati ya bantu kele na nsi ya kiyeka yango. Mono ke salaka mpidina sambu na kubenda bo. Mutindu mosi, ntangu mono ke sala ti bantu yina kuzaba Bansiku ya Moize ve, mono ke zingaka bonso bo; mono mpi ke landaka Bansiku yina ve, kaka sambu na kubenda bo na kulanda Mfumu Yesu. Mpidina ke songa ve nde mono ke landaka ve Bansiku ya Nzambi, sambu mono kele na nsi ya kiyeka ya bansiku ya Kristo. Na bantu yina ke na lukwikilu ya ngolo ve, mono mpi ke vandaka bonso muntu yina ke na lukwikilu ya ngolo ve, sambu na kubenda bo. Ebuna konso bantu yina ya mono ke vandaka ti bo, [mono kekumaka bima yonso sambu na bantu ya mitindu yonso, NW], na mpila nde mono kugulusa bantu ya nkaka na kati na bo na banzila ya mutindu na mutindu. Mono ke salaka mambu yai yonso sambu na Nsangu ya Mbote na mpila nde mono mpi kubaka ndambu ya mambote na yo.” (1 Kor. 9:20-23) Inki mutindu beto lenda ‘kuma bima yonso sambu na bantu ya mitindu yonso’ bubu yai?

Kana nge baka mwa ntangu fyoti sambu na kutala bantu ya nge kesolula na bo, na ntwala ya kuyantika kutubila bo, nge lenda mona bidimbu yina kesonga mambu ya kesepedisa bo mpi mutindu ya luzingu na bo. Keti nge lenda tuba kisalu ya bo kesalaka? Keti nge kemona mambu ya kesonga dibundu na bo? Keti kele ti kidimbu ya kemonisa mutindu ya luzingu ya dibuta na bo? Na nsadisa ya mambu ya nge kemona, keti nge lenda soba mutindu nge tasala disolo na nge na mpila nde yo simba mpenza ntima ya bawi na nge?

Sambu disolo na nge kusimba mpenza ntima ya bawi, yo kelomba nde nge yindula dezia na ntwala mutindu nge tayantika kusolula ti bantu ya teritware na beno. Na bisika mingi, yo ketadilaka mpi bantu yina mekatukaka na bansi ya nzenza. Kana bantu ya mutindu yai kezingaka na teritware na beno, keti nge mezwaka mutindu ya mbote ya kutela bo kimbangi? Sambu luzolo ya Nzambi kele nde “bantu ya mitindu yonso kuguluka mpi kubaka nzayilu ya sikisiki ya kyeleka,” baka lukanu ya kuzabisa nsangu ya Kimfumu na mutindu mosi ya kesimba ntima ya bantu yonso ya nge kekutana na bo.​—1 Tim. 2:4, NW.

Widikila na Dikebi Yonso. Ata Yehowa lenda zaba mambu yonso, yandi kewidikilaka bantu yankaka. Na mbonameso mosi, profete Mika kumonaka Yehowa kesyamisa bawanzyo na kupesa bangindu na bo sambu na kuyidika dyambu mosi. Ebuna Nzambi kupesaka wanzyo mosi nzila ya kusadila ngindu yina yandi basisaka. (1 Bant. 22:19-22) Ntangu Abrahami kumonisaka susi na yandi sambu na nkanu yina Yehowa zolaka kuzengila Sodome, Yehowa kubikisaka yandi nde yandi monisa bangindu na yandi. (Kuy. 18:23-33) Na kisalu na beto ya kusamuna, inki mutindu beto lenda landa mbandu ya Yehowa na mutindu yandi kewidikilaka bantu yankaka?

Syamisa bankaka na kumonisa mabanza na bo. Yula ngyufula mosi ya kufwana, mpi pema mwa ntangu ya kufwana sambu na kubikila bo ntangu ya kupesa mvutu. Widikila na dikebi mpenza. Kuwidikila na nge ya dikebi tapesa bo kikesa ya kutuba kukonda boma. Kana mvutu na bo kemonisa mambu ya bo kesepilaka na yo, sosa kuzaba yo mbote-mbote na mayele yonso. Kuyula ve bangyufula mingi ya kekota na luzingu na bo, kansi sosa kuzaba bo mbote-mbote. Pesa bo matondo na masonga yonso sambu na mabanza ya bo mebasisa. Ata nge kendima ve mabanza na bo, monisa na luzitu yonso nde nge mebakisa yo.​—Kol. 4:6.

Kansi, beto fwete keba na mpila nde dikebi ya beto ketula na bantu kuluta ve ndilu. Kudibanza-banza sambu na bantu yankaka kepesa beto ve nzila ya kukota na mambu ya metala luzingu na bo. (1 Pie. 4:15) Beto fwete keba na mpila nde nkento to bakala ya beto kesolula ti yandi kubakila beto ve bangindu ya mbi sambu na dikebi ya beto ketudila yandi. Sambu kiteso ya dikebi ya beto ketudila bantu yankaka keswaswanaka na konso kisika, to nkutu na muntu, yo kelomba kusadila mayele.—Luka 6:31.

Sambu na kuvanda muwi ya mbote, yo kelombaka kudibongisa. Kana nsangu ya beto kezabisa ke pwelele na mabanza na beto, yo tasadisa beto na kuvanda na kyese ya kuzabisa yo mpi na kutula dikebi ya kufwana na bantu ya beto kesolula ti bo. Yo kesadisaka bo na kulanda beto kukonda boma mpi yo kepusaka bo na kusolula ti beto.

Beto kemonisaka luzitu na bantu yankaka ntangu beto kewidikilaka bo. (Roma 12:10) Yo kemonisaka pwelele nde beto kebaka na valere bangindu mpi mawi na bo. Yo lenda pusa bo nkutu na kutula dikebi mingi na mambu ya beto kezola kusonga bo. Yo yina, Ndinga ya Nzambi kelongisila beto na “kuvanda nswalu na kuwidikila, malembe na kutuba.”​—Yak. 1:19, NW.

Sadisa Bankaka na Kuyela. Kudibanza-banza sambu na bantu yankaka tapusa beto na kulanda na kuyindula bantu yina kesepila na nsangu na beto mpi na kuvutukila bo sambu na kuzabisa bo bakyeleka ya Biblia yina mefwana na bampusa na bo. Ntangu nge kekudibongisa sambu na kuvutukila bo, tadila mambu yina nge monaka ya metala bo ntangu nge kutanaka ti bo na mbala ya ntete. Yidika malongi yina ketubila dyambu mosi ya keyangisa bo. Monisa bo mutindu bo lenda sadila malongi yango, mpi sadisa bo na kuzaba mutindu bo lenda baka mambote ya mambu yina bo kelonguka.​—Yez. 48:17.

Kana muwi na nge kubasisa dikambu mosi yina kepesa yandi mpasi na ntima, sadila yo bonso dibaku mosi ya mbote sambu na kuzabisa yandi nsangu ya mbote. Landa mbandu ya Yezu, yina vandaka ntangu yonso ya kuyilama na kupesa kikesa na bantu yina vandaka na mpasi. (Mar. 6:31-34) Kunwanina ve na kupesa mvutu to kupesa bandongisila ya zulu-zulu. Yo lenda nata muwi na nge na kuyindula nde nge ketula ve dikebi ya masonga na dikambu na yandi. Na kisika ya kusala mutindu yina, monisa nde nge kekuditula na kisika na yandi. (1 Pie. 3:8) Na nima, sala bansosa na mikanda yina ketendulaka Biblia, mpi zabisa yandi bansangu yina nge mezwa sambu na kusadisa yandi na kumanisa dikambu yina kepesa yandi mpasi. Ya kyeleka, kudibanza-banza na zola yonso sambu na muwi na nge takangisa nge na kuzabisa mambu yina yandi zabisaka nge na bantu yankaka, katula kaka kana kikuma ya mbote ya kusala yo kele.—Bing. 25:9.

Beto fwete tula dikebi mingimingi na bantu yina beto kelongukaka ti bo Biblia. Yindula bampusa ya konso longoki ya Biblia, samba sambu na yo mpi kuvila yo ve ntangu nge kekudibongisa sambu na kukwenda kulonguka ti yandi. Kudiyula mutindu yai: ‘Inki yandi fwete sala na nima sambu na kulanda na kuyela na kimpeve?’ Sadisa longoki na zola yonso na kubaka na valere mambu yina Biblia ti mikanda yina “mpika ya kwikama mpi ya mayele” ketuba sambu na dikambu yango. (Mat. 24:45, NW) Na bantangu yankaka, kupesa ntendula ya nkufi lenda fwana ve. Yo lenda lomba nde nge zabisa longoki mutindu ya kusadila munsiku mosi ya Biblia, beno lenda sala kima mosi kumosi yina kemonisa mutindu ya kusadila yo.​—Yoa. 13:1-15.

Yo kelombaka kuvanda na bukatikati mpi mayele na ntangu beto kesadisa bantu yankaka na kuwakanisa luzingu na bo ti minsiku ya Yehowa. Bantu yonso mekatukaka na bisika ya kuswaswana mpi bo kele na ngangu ya kuswaswana, mpi mayele na bo kele ve kiteso mosi. Kulomba bo ve na kusala mambu yina meluta ngolo na bo. (Filp. 4:5) Kupusa bo ve na kusoba luzingu na bo. Bika Ndinga ya Nzambi mpi mpeve na yandi kupusa bo na kusala yo. Yehowa kezolaka nde bantu kusadila yandi na luzolo na bo mosi, kansi na kingolo-ngolo ve. (Nk. 110:3) Buya na kupesa bangindu na nge mosi sambu na badesizio yina bo fwete baka bo mosi, mpi ata bantu yankaka melomba nge na kusala yo, keba na mpila nde nge baka ve badesizio na kisika na bo.​—Gal. 6:5.

Pesa Bo Lusadisu Yina Bo Lenda Sadila. Ata Yezu vandaka kudibanza-banza ntetentete sambu na mambote ya kimpeve ya bawi na yandi, yandi vandaka kuyindula mpi bampusa na bo yankaka. (Mat. 15:32) Ata beto kele ve na bima mingi, beto lenda sadisa bo na mitindu mingi ya mbote.

Dikebi ya beto ketula na bantu yankaka tapusa beto na kuyindula na ntwala mambu ya beto tasala. Mu mbandu, ntangu nge mekwenda kulonguka ti muntu mosi nge memona nde yandi kekuka ve kutula mabanza kisika mosi sambu na mwini, mvula, to mupepe ya ngolo, beno kwenda na kisika ya kuluta mbote, to beno wakana na kulonguka na ntangu yankaka. Kana nge mekwisa kutala yandi na ntangu mosi ya mefwana ve, songa yandi nde nge tavutuka na ntangu yankaka. Kana muntu mosi ya beno kezingaka na yandi penepene to muntu yankaka yina kusepilaka na nsangu kebela to kele na lupitalu, tindila yandi mwa mukanda ya kemonisa nde nge keyindula yandi to kwenda kutala yandi. Kana mpila kele, nge lenda natila yandi mpi mwa madya to kusadila yandi dyambu yankaka ya kemonisa ntima na nge ya mbote.

Mutindu balongoki ya Biblia keyela, bo lenda yantika kuwa na ntima bonso nde bo mevidisa kima mosi sambu bo kelutisa dyaka ve ntangu mingi ti banduku na bo ya ntama. Sala kinduku ti bo. Lutisaka ntangu ti bo na nima ya kulonguka Biblia mpi na bantangu yankaka. Syamisa bo na kupona banduku ya mbote. (Bing. 13:20) Sadisa bo na kukwenda na balukutakanu ya Bukristu. Vanda ti bo kisika mosi na balukutakanu, mpi sadisa bo ti bana na bo na mpila nde bo yonso kubaka mambote ya malongi yina bo ke na kulonga.

Monisa Dikebi ya Masonga. Kutudila bantu dikebi kele ve kikalulu mosi ya beto kelongukaka, kansi yo kele kikalulu mosi ya kekatukaka na ntima. Kiteso ya dikebi ya beto ketula na bantu yankaka kemonanaka na mitindu mingi. Yo kemonanaka na mutindu beto kewidikila mpi na mambu ya beto ketuba. Yo kemonanaka mpi na mambu ya mbote ya beto kesalaka mpi na mutindu beto kebakilaka bantu yankaka. Ata ntangu beto metuba ve to kusala kima ata kima mosi, dikebi yango kemonanaka na nkadilu na beto mpi na luse na beto. Kana beto kekudibanza-banza mpenza sambu na bantu yankaka, ntembe kele ve nde bo tamona yo.

Kikuma ya kuluta mfunu ya kepusaka beto na kutula dikebi ya masonga na bantu yankaka kele nde na ntangu beto kesala yo, beto kelandaka mbandu ya zola mpi ya mawa ya Tata na beto ya zulu. Yo kesadisaka na kubenda bawi na beto na Yehowa mpi na nsangu yina yandi mepesaka beto na kuzabisa. Yo yina, na ntangu nge kezabisa nsangu ya mbote, sala kikesa na kutula disu na ‘mambote ya bantu ya nkaka kansi na mambote na nge mosi mpamba ve.’​—Filp. 2:4.