“Landa Mono”​—Yezu Zolaka Kutuba Inki?

1, 2. Inki kele emvitasio ya kuluta mbote ya bo me pesaka nge, mpi nki ngiufula beto lenda kudiyula?

INKI kele emvitasio ya kuluta mbote ya bo me pesaka nge? Yo lenda vanda yina bo pesaka nge sambu na feti mosi ya mfunu, mbala ya nkaka makwela ya bantu zole yina nge ke zolaka mingi. To yina bo bingaka nge sambu nge yantika kisalu mosi ya mfunu. Kana bo me pesaka nge ba-emvitasio ya mutindu yai, ntembe kele ve nde nge vandaka na kiese ya mingi, nkutu nge monaka nde mutindu bo pesaka nge yo, bo bakaka nge na valere. Konso muntu na kati na beto me bakaka emvitasio mosi ya kuluta mfunu. Ebuna kundima emvitasio yina to kubuya yo, ta vanda ti bupusi ya ngolo na luzingu na beto. Ya masonga, yo kele lukanu ya kuluta mfunu yina beto fwete baka na luzingu na beto.

² Inki kele emvitasio yango? Emvitasio yango me katuka na Yezu Kristu, Mwana mosi kaka ya kubutuka ya Yehowa, Nzambi Nkwa-Ngolo Yonso. Emvitasio yango kele na Biblia. Na Marko 10:21, beto ke tanga mambu yai ya Yezu tubaka: “Kwisa kulanda mono.” Yai kele emvitasio yina Yezu ke pesa konso muntu na kati na beto. Yo kele mfunu nde beto kudiyula nde, ‘Keti mono ta ndima to ta buya yo?’ Nge lenda tuba nde, ‘Mono lenda buya ve ata fioti emvitasio ya Yezu.’ Nani lenda buya emvitasio ya kitoko ya mutindu yai? Kansi kima ya kuyituka kele nde, bantu mingi ke buyaka yo. Sambu na inki?

3, 4. (a) Inki bima bantu mingi ke zolaka yina leke yina ya bakala ya kwendaka kuyula Yezu mambu ya me tala luzingu ya mvula na mvula vandaka ti yo? (b) Ziku nki bikalulu ya mbote Yezu monaka na leke yina ya bakala ya vandaka mvwama mpi mfumu?

³ Beto tadila mbandu ya muntu mosi yina bakaka emvitasio yai bamvula 2 000 me luta. Yandi vandaka muntu mosi ya bantu vandaka kuzitisa mingi. Yandi vandaka ti bima tatu yina bantu mingi ke zolaka. Yandi vandaka leke, yandi vandaka ti kimvwama, mpi ti kiyeka. Biblia ke tuba nde yandi vandaka “leke . . . ya bakala,” yandi vandaka “na kimvwama mingi,” mpi yandi vandaka “mfumu.” (Matayo 19:20; Luka 18:18, 23) Kansi, leke yai ya bakala vandaka ti kima mosi ya kuluta mfunu. Yandi waka mambu yina bantu vandaka kutuba sambu na Yezu, Longi ya Nene, mpi yandi sepelaka ti mambu yango.

⁴ Bamfumu mingi ya bilumbu yina vandaka kupesa ve Yezu luzitu yina yo lombaka nde yandi baka. (Yoane 7:48; 12:42) Kansi, mfumu yai salaka mambu mutindu ya nkaka. Biblia ke tuba nde: “Ntangu [Yezu] vandaka kukwenda na nzila, bakala mosi kwisaka ntinu, fukamaka na ntwala na yandi mpi yulaka yandi nde: ‘Longi ya Mbote, inki mono fwete sala sambu na kubaka luzingu ya mvula na mvula?’” (Marko 10:17) Leke yai vandaka kibeni ti mpusa ya ngolo ya kusolula ti Yezu: yandi landaka Yezu ntinu na meso ya bantu yonso, kaka mpila nsukami mpi muntu ya kukonda mfunu lendaka kusala. Na nima, yandi fukamaka na luzitu yonso na ntwala ya Kristu. Yo ke monisa nde yandi vandaka muntu ya kudikulumusa na kiteso mosi buna mpi yandi vandaka ti nzala ya mambu ya kimpeve. Yezu ke sepelaka ti bikalulu ya mbote ya mutindu yai. (Matayo 5:3; 18:4) Yo yina, yo ke yitukisa ve na kumona nde Yezu “talaka yandi mpi zolaka yandi.” (Marko 10:21) Inki mvutu Yezu pesaka na ngiufula ya leke yina ya bakala?

Emvitasio Mosi ya Mfunu Mingi

5. Inki mvutu Yezu pesaka leke yina ya bakala ya mvwama, mpi nki mutindu beto me zaba nde ‘kima yango yina mosi’ ya yandi kondaka vandaka ve kinsukami? (Tala mpi noti na nsi ya lutiti.)

⁵ Yezu monisaka nde Tata na yandi me pesaka dezia mvutu na ngiufula yina ya mfunu ya me tala kubaka luzingu ya mvula na mvula. Yandi vutukilaka mambu yina vandaka na Nsiku yina Yehowa pesaka Moize, mpi leke yina ya bakala ndimaka nde yandi vandaka kuzitisa mbote-mbote Nsiku ya Moize. Kansi Yezu vandaka ti makuki ya kuzaba mambu yina kele na ntima ya bantu. (Yoane 2:25) Yandi zabaka nde mfumu yai vandaka ti diambu mosi ya nene yina ta sala nde yandi kuka ve kusepedisa Nzambi. Yo yina, Yezu songaka yandi nde: “Kima mosi ke konda nge.” Inki vandaka ‘kima yango yina mosi’? Yezu tubaka nde: “Kwenda, teka bima na nge mpi pesa mbongo na bansukami.” (Marko 10:21) Keti Yezu zolaka kutuba nde muntu fwete vanda nsukami sambu na kusadila Nzambi? Ve.a Kristu vandaka kulonga muntu yai dilongi mosi ya mfunu mingi.

6. Inki emvitasio Yezu pesaka, mpi kima leke yina ya bakala ya vandaka mvwama mpi mfumu salaka monisaka inki na yina me tala ntima na yandi?

⁶ Sambu na kumonisa leke yina kima ya vandaka kukonda yandi, Yezu pesaka yandi emvitasio yai ya mfunu mingi: “Kwisa kulanda mono.” Yindula fioti​—Mwana ya Nzambi ya Kuluta Nene yandi mosi muntu me binga leke yai na kulanda yandi! Yezu songaka yandi mpi nde yandi ta baka lusakumunu mosi yina yandi me bikaka ve kuyindula ata fioti. Yandi songaka yandi nde: “Nge ta vanda ti kimvwama na zulu.” Keti leke yina ya bakala ya vandaka mvwama mpi mfumu ndimaka mbala mosi emvitasio yina ya kuluta mbote? Biblia ke tuba nde yandi waka ntantu mpi yandi kwendaka ti mawa, sambu yandi vandaka ti bima mingi. (Marko 10:21, 22) Yo yina, mambu yina yandi kanaka ve kuwa yina Yezu songaka yandi, monisaka ngindu yina vandaka na ntima na yandi. Yandi vandaka kuzola bima mingi yina yandi vandaka ti yo. Diaka, yandi vandaka kuzola luzitu mpi lukumu yina bantu vandaka kupesa yandi sambu yandi vandaka mvwama mpi yandi vandaka ti kiyeka. Yo kele mawa na kumona nde, yandi zolaka bima yina mingi kuluta zola na yandi sambu na Kristu. Yo yina, “kima mosi” ya yandi kondaka vandaka nde yandi vandaka ve kuzola Yezu mpi Yehowa na ntima na yandi ya mvimba. Mutindu yandi kondaka zola yina, yandi ndimaka ve emvitasio yina ya kuluta mfunu. Kansi, inki mutindu yo ke tadila nge?

7. Sambu na nki beto lenda ndima nde emvitasio ya Yezu ke tadila beto mpi bubu yai?

⁷ Yezu pesaka ve emvitasio yina kaka na muntu yina. Yandi pesaka yo mpi ve kaka na bantu fioti mpamba. Yandi tubaka nde: “Kana muntu ke zola kulanda mono, bika yandi . . . fula kulanda mono.” (Luka 9:23) Simba nde konso “muntu” lenda vanda longoki ya Kristu kana yandi me “zola” mpenza. Nzambi ke bendaka bantu yina ke zola kibeni kuzaba yandi na lweka ya Mwana na yandi. (Yoane 6:44) Mambu yai ya Yezu tubaka nde “kwisa kulanda mono,” ke tadila kaka ve bamvwama, to bansukami. Yo ke tadila mpi kaka ve bantu ya mpusu mosi buna ya nitu to ya insi mosi buna, to kaka bantu yina zingaka na ntangu yina. Kansi yo ke tadila bantu yonso. Disongidila nde yo ke tadila nge mpi. Sambu na nki nge fwete zola kulanda Kristu? Ebuna, inki beto fwete sala sambu na kulanda yandi?

Sambu na Nki Kulanda Kristu?

8. Bantu yonso kele na mfunu ya nki, mpi sambu na nki?

⁸ Kima mosi kele ya kieleka sambu na beto yonso: Beto yonso, beto ke vandaka kibeni ti mfunu ya luyalu mosi ya mbote sambu na kutwadisa beto. Bantu mingi ke yindulaka nde bantu lenda twadisa bantu ya nkaka mbote. Kansi yo kele pwelele nde beto yonso kele ti mfunu ya lutwadisu mosi ya mbote. Yehowa pesaka profete na yandi Yeremia mpeve santu sambu na kusonika kieleka yai ya ke sobaka ve: “O Yehowa, mono me zaba mbote nde nzila ya muntu kele ve ya yandi. Muntu yina ke tambula kele ve ti kiyeka ya kutwadisa kitambi na yandi mosi.” (Yeremia 10:23) Bantu ke vandaka ve ti makuki mpi nswa ya kuditwadisa. Ya kieleka, kana beto tala mambu yina bamfumu me salaka, beto ke bakisa nde bo ke kuka ve kutwadisa bantu. (Longi 8:9) Na bilumbu ya Yezu, bantwadisi vandaka kuniokula bantu, kumonisa bo mpasi, mpi kukusa bo. Yezu monaka mutindu bo vandaka kusadila bantu mambu mpi yandi tubaka nde bo vandaka bonso “mameme yina me konda ngungudi.” (Marko 6:34) Bubu yai mpi bantu ke niokwama sambu bo ke twadisa bo ve mbote. Beto yonso na kimvuka mpi konso muntu, beto kele na mfunu ya ntwadisi yina beto lenda tudila ntima mpi kuzitisa. Keti Yezu kele ntwadisi ya mutindu yina? Beto tubila bikuma mingi ya ke ndimisa nde yandi me fwana.

9. Sambu na nki Yezu kele ve bonso bantwadisi yonso ya nkaka?

⁹ Ya ntete, Yehowa Nzambi muntu ponaka Yezu. Bantu ya nkaka ya kukonda kukuka bantu ke ponaka bantwadisi mingi. Mbala mingi bantwadisi yango ke sadilaka ve bantu yina ponaka bo mambu mbote mpi bantu ke zabaka ve nani bo fwete tudila kibeni ntima. Kansi Yezu, bantu ve bantu ponaka yandi. Kima ya ke monisa yo kele titre ya yandi kele ti yo. Ngogo “Kristu” mpi ngogo “Mesia,” ke tendula “Muntu Yina Bo Me Tulaka Mafuta.” Ee, Nzambi Mfumu ya Kuluta Nene yina salaka bima yonso na zulu mpi na ntoto muntu tulaka Yezu mafuta, disongidila yandi ponaka yandi sambu na kisalu na yandi ya santu. Yehowa Nzambi tubaka sambu na Mwana na yandi nde: “Tala! Nsadi na mono yina mono me solaka, yina mono ke zolaka mingi, mpi yina mono me ndima! Mono ta tula mpeve na mono na zulu na yandi.” (Matayo 12:18) Katula Muntu Yina Salaka beto, ata muntu mosi ve me zaba mbote kibeni ntwadisi yina beto kele ti mfunu na yandi. Mayele ya Yehowa kele ve ti nsuka. Yo yina beto lenda ndima nde yandi ponaka muntu mosi ya kuluta mbote sambu na kuvanda ntwadisi na beto, Yezu.​—Bingana 3:5, 6.

10. Sambu na nki mbandu ya Yezu kele mbandu ya mbote kibeni yina bantu fwete landa?

¹⁰ Ya zole, Yezu me bikilaka beto mbandu ya kukuka mpi ya me fwana na kulanda. Ntwadisi ya kuluta mbote ke vandaka ti bikalulu yina bantu na yandi lenda sepela ti yo mpi kulanda. Yandi ke pesaka mbandu na mutindu na yandi ya kutwadisa, mpi yandi ke pesaka bankaka mpusa ya kukuma bantu ya mbote kuluta. Inki bikalulu nge ta sepela mingi kumona na ntwadisi mosi? Kikesa? Mayele? Kuwila bantu mawa? Inki nge ke yindula na yina me tala kukanga ntima na bampasi? Ntangu nge ke longuka mambu Yezu tubaka mpi salaka awa na ntoto, nge ta mona nde yandi vandaka ti bikalulu yina yonso mpi ya nkaka. Yezu landaka na mutindu ya kukuka konso kikalulu ya mbote ya Tata na yandi. Yandi vandaka kibeni muntu ya kukuka. Konso kima ya yandi tubaka mpi salaka, mpi mutindu yandi vandaka kudiwa, ke pesa beto mbandu ya mbote ya kulanda. Yandi vandaka mpenza mutindu muntu ya kukuka fwete vanda. Biblia ke tuba nde yandi “bikilaka beno mbandu sambu beno landa bitambi na yandi mbote-mbote.”​—1 Piere 2:21.

11. Inki mutindu Yezu monisaka nde yandi vandaka “ngungudi ya mbote”?

¹¹ Ya tatu, Kristu vandaka kibeni “ngungudi ya mbote.” (Yoane 10:14) Na bilumbu ya Yezu, bantu yikamaka ti bangungudi. Bangundudi vandaka kusala ngolo sambu na kutanina mameme na bo. “Ngungudi ya mbote” vandaka kutula lutaninu ya mameme mpi mambote na bo na ntwala ya lutaninu mpi ya mambote na yandi mosi. Mu mbandu, Davidi nkaka ya Yezu, vandaka ngungudi na kileke na yandi, mpi mbala mingi, yandi vandaka kutula luzingu na yandi na kigonsa sambu na kugulusa mameme na yandi na ntwala ya bambisi ya makasi. (1 Samuele 17:34-36) Yezu tulaka mpi luzingu na yandi na kigonsa sambu na kutanina balongoki na yandi. Kansi yandi sukaka ve pana. Yandi fwaka mpi sambu na bo. (Yoane 10:15) Bantwadisi ikwa lenda tula bampusa ya bantu ya nkaka na kisika ya ntete?

12, 13. (a) Na nki mutindu ngungudi ke zabaka mameme na yandi, mpi na nki mutindu mameme na yandi ke zabaka yandi? (b) Sambu na nki nge ke zola nde Yezu kuvanda ntwadisi na nge?

¹² Yezu vandaka “ngungudi ya mbote” na mutindu ya nkaka. Yandi tubaka nde: “Mono me zaba mameme na mono mpi mameme na mono me zaba mono.” (Yoane 10:14) Yindulula mambu yina Yezu zolaka kutuba. Ntangu bantu mingi ke talaka kibuka ya mameme, bo ke monaka kaka bambisi mingi ya me fuluka ti mika. Kansi ngungudi yandi, yandi ke zabaka konso dimeme. Yandi ke zabaka inki mameme ta vanda ti mfunu ya lusadisu na yandi ntama mingi ve ntangu bo ta buta, inki bana-mameme kele ti mfunu ya lusadisu na yandi sambu yandi nata bo sambu bo kele ntete fioti mpi bo kele ntete ve ngolo sambu bo tambula bo mosi, mpi inki mameme me katuka kubela to kulwala. Mameme ke zabaka mpi ngungudi na bo. Bo ke zabaka ndinga na yandi mpi ke swaswanisaka yo ti ndinga ya ngungudi ya nkaka. Ntangu bo ke bakisaka nde yandi ke binga bo nswalu-nswalu, bo ke kwisaka kukonda kuvingila. Bo ke landaka yandi kisika yandi ke nata bo. Yandi ke zabaka mpi mbote kisika ya kunata bo. Yandi ke zabaka kisika matiti ya mbote mpi ya mubisu kele, kisika masa kele ya bunkete, mpi bisika ya bo lenda dia kukonda kigonsa. Ntangu yandi ke kengilaka bo, mameme ke kudiwaka na lutaninu.​—Nkunga 23.

¹³ Keti nge ta zola ve kuvanda ti ntwadisi ya mutindu yai? Yezu Ngungudi ya Mbote ke sadilaka ntangu yonso balongoki na yandi mambu mutindu yina. Yandi ke tuba nde yandi ta sadisa nge na kuvanda na kiese bubu mpi yandi ta nata nge na luzingu ya mvula na mvula na bilumbu ke kwisa. (Yoane 10:10, 11; Kusonga 7:16, 17) Yo yina, beto fwete zaba inki mutindu beto lenda landa Kristu.

Kulanda Kristu Ke Tendula Inki?

14, 15. Sambu na kulanda Kristu, sambu na nki yo me fwana ve na kutuba kaka nde nge kele Mukristu to nde nge ke zolaka Yezu mingi?

¹⁴ Bubu yai bankama ya bamilio ya bantu na ntoto ke yindulaka nde bo me ndimaka emvitasio ya Kristu. Nkutu, bo ke kudibingaka Bakristu. Mbala ya nkaka bo ke kwendaka na dibundu yina bo pesaka bo mbotika ntangu bo vandaka babebe to bana ya fioti. To bo ke tubaka nde bo ke zolaka Yezu sambu bo ke yindulaka nde yandi me gulusaka bo dezia. Keti mambu yina ke salaka nde bo kuma balongoki ya Kristu? Keti yo kele mambu yina Yezu vandaka kuyindula ntangu yandi bingaka beto na kulanda yandi? Kuvanda longoki ya Yezu ke lombaka mambu mingi.

¹⁵ Bamingi ke zingaka na bansi yina bantu mingi ke tubaka nde bo kele Bakristu to balongoki ya Kristu. Keti bantu ya ke zingaka na bansi yina ke zitisaka mambu yina Yezu longaka mpi bo ke salaka mambu mpila yandi salaka? Keti beto ke monaka mpi kumenga, kuniokula bantu, nku, mpi kukonda lunungu na bansi yina bantu mingi ke vandaka ve Bakristu?

16, 17. Mbala mingi bantu yina ke kudibingaka Bakristu ke kondaka inki, mpi nki ke salaka nde balongoki ya kieleka ya Kristu kuvanda ve bonso bo?

¹⁶ Yezu tubaka nde bantu ta zaba balongoki na yandi ya kieleka ntete-ntete na mambu yina bo ke sala kansi ve kaka na mambu ya bo ke tubaka to na zina yina bo ke kudibingaka. Mu mbandu, yandi tubaka nde: “Bantu yonso ve yina ke tubilaka mono nde, ‘Mfumu, Mfumu’, ta kota na Kimfumu ya zulu, kansi muntu yina ke salaka luzolo ya Tata na mono yina kele na zulu, yandi mpamba muntu ta kota.” (Matayo 7:21) Sambu na nki bantu mingi yina ke tubaka nde Yezu kele Mfumu na bo ke salaka ve luzolo ya Tata na yandi? Yibuka leke yina ya bakala ya vandaka mvwama mpi mfumu. Mbala mingi, bantu mingi yina ke tubaka nde bo kele Bakristu ke kondaka mpi “kima mosi.” Na masonga yonso, bo ke zolaka ve Yezu mpi Muntu yina tindaka yandi.

¹⁷ Inki mutindu? Keti bamilio ya bantu yina ke kudibingaka Bakristu ke tubaka mpi ve nde bo ke zolaka Kristu? Ee, bo ke tubaka mpidina. Kansi balongoki ya kieleka ya Kristu ke monisaka nde bo ke zolaka Yezu mpi Yehowa, kaka ve na mambu ya bo ke tubaka. Yezu tubaka nde: “Kana muntu ke zolaka mono, yandi ta zitisa ndinga na mono.” (Yoane 14:23) Bonso ngungudi, yandi tubaka diaka nde: “Mameme na mono ke waka ndinga na mono, mpi mono me zaba bo, mpi bo ke landaka mono.” (Yoane 10:27) Yo yina, beto ke monisaka nde beto ke zolaka kibeni Kristu kaka ve na mambu ya beto ke tubaka to na mutindu beto ke kudiwaka, kansi na mambu ya beto ke salaka.

18, 19. (a) Inki bupusi kulonguka mambu ya me tala Yezu fwete vanda na yo na luzingu na beto? (b) Inki kele lukanu ya mukanda yai, mpi nki mutindu yo ta sadisa bantu ya ke landaka Kristu banda ntama?

¹⁸ Kansi, mambu ya beto ke salaka ke monisaka kibeni kimuntu na beto ya kati. Yo yina, beto fwete vanda ti nzala ya kusoba kimuntu na beto ya kati. Yezu tubaka nde: “Luzingu ya mvula na mvula ke tendula nde, bo zaba nge Nzambi mosi kaka ya kieleka, mpi muntu yina nge tindaka, Yezu Kristu.” (Yoane 17:3) Kana beto ke tanga mambu ya me tala Yezu na Biblia mpi beto ke yindula yo na mudindu, yo ta soba mutindu beto ke kudiwaka sambu na Yezu. Ebuna, beto ta kuma kuzola yandi mingi mpenza, mpi beto ta yedisa mpusa ya kulanda yandi konso kilumbu.

¹⁹ Lukanu ya mukanda yai, yo yina. Lukanu na yo kele ve ya kutubila kima mosi mosi yina Yezu salaka awa na ntoto, kansi ya kusadisa beto na kumona na pwelele mutindu beto fwete landa yandi.b Mukanda yai ke sadisa beto na kutala na kati ya Biblia, yina kele bonso tala-tala, mpi na kudiyula nde: ‘Keti mono ke landaka mpenza Yezu?’ (Yakobo 1:23-25) Mbala ya nkaka nge ke landaka Yezu banda bamvula mingi. Ata mpidina, keti nge ke ndima ve nde beto yonso beto lenda mona mambu ya nkaka ya beto fwete yidika? Biblia ke siamisa beto nde: “Beno landa kudimeka sambu na kuzaba kana beno kele na lukwikilu; beno landa kuditala kana beno kele nki mutindu.” (2 Bakorinto 13:5) Beto ta baka mambote kana beto ke sala bikesa sambu na kulanda mbote-mbote Yezu, Ngungudi na beto ya Mbote mpi ya zola, yina Yehowa me ponaka sambu na kutwadisa beto.

20. Inki beto ta tadila na kapu ya ke landa?

²⁰ Bika nde kulonguka ya mukanda yai kusadisa nge na kukumisa zola na nge sambu na Yezu mpi sambu na Yehowa ngolo. Ntangu zola ya mutindu yai ke pusa nge na kulanda mbote-mbote Yezu, nge ta zwa ngemba mpi nge ta vanda nkutu na kiese bubu yai. Yo ta pusa nge mpi na kukumisa Yehowa mvula na mvula sambu yandi me pesaka beto Ngungudi ya Mbote. Ya kieleka, sambu na kuzaba Yezu mbote, beto fwete bakisa ntete kana yandi kele nani. Yo yina na Kapu 2, beto ta tadila mukumba ya Yezu na lukanu ya Yehowa.