KAPU 18
“Fula Kulanda Mono”
1-3. (a) Inki mutindu Yezu bikisaka bantumwa na yandi, mpi sambu na nki yo lombaka ve nde bo vanda na mawa? (b) Sambu na nki beto fwete zaba mambu ya luzingu ya Yezu banda yandi me vutukaka na zulu?
BANTUMWA kumi na mosi me telama na zulu ya ngumba mosi. Bo ke tala muntu yina bo ke zolaka mpi bo ke zitisaka mingi. Yandi kele ti nitu bonso yai ya beto bantu. Muntu yango kele Yezu. Yandi futumukaka mpi yandi kele diaka wanzio ya kuluta ngolo ya Nzambi. Yezu me kutana ti bantumwa na yandi awa na Ngumba ya Banti ya Olive sambu na mbala ya nsuka.
2 Ngumba ya Banti ya Olive kele pene-pene ya Yeruzalemi. Muwanda ya Kidroni ke kabisa ngumba yai ti mbanza Yeruzalemi. Awa ya Yezu kele na ngumba yai, yo fwete vanda nde yandi ke yibuka mambu mingi ya me salamaka pana. Mu mbandu, mbanza Betania kisika Yezu futumunaka Lazare kele na lweka ya ngumba yango. Bwala Betfaze kele mpi na zulu ya Ngumba yina ya Banti ya Olive. Yo kele bwala yina Yezu mataka na zulu ya mwana-mpunda mpi kotaka na Yeruzalemi mbanza yina bantu yambaka yandi. Mbala ya nkaka kilanga ya Getsemane vandaka mpi na zulu ya Ngumba ya Banti ya Olive. Yo kele kisika Yezu lutisaka mwa bangunga ya nsuka ya kuluta mpasi na ntwala nde bo kanga yandi. Yo kele mpi kaka na zulu ya ngumba yai ya Yezu ke yilama na kubikisa balongoki na yandi yina kele mpi banduku na yandi ya ngolo. Yandi me songa balongoki na yandi mambu ya nsuka. Na nima, yandi me yantika kutombuka. Bantumwa me telama. Bo ke nikana ve mpi bo ke tala mutindu Mfumu na bo yina bo vandaka kuzola ke tombuka na zulu. Nsuka-nsuka dituti mosi me fika yandi mpi bo ke mona yandi diaka ve.—Bisalu 1:6-12.
3 Yo lenda monana bonso ntangu mosi ya mawa sambu yai kele mbala ya nsuka yina yandi kele ti bantumwa na yandi. Kansi bawanzio zole ke pesa bantumwa kikesa. (Bisalu 1:10, 11) Bantumwa kele ti bikuma ya mbote ya kuvanda na kiese mutindu Yezu ke kwenda na zulu. Biblia ke tubila kisalu yina Yezu ke salaka na zulu banda yandi me katukaka awa na ntoto. Yo kele mfunu nde beto zaba kisalu yango yina. Sambu na nki? Yibuka mambu yai ya Yezu songaka Piere: “Fula kulanda mono.” (Yoane 21:19, 22) Beto yonso, beto fwete zitisa nsiku yai, sambu na mwa-ntangu kaka ve, kansi beto fwete sala yo luzingu na beto ya mvimba. Sambu na kusala mpidina, beto fwete bakisa mambu yina Mfumu na beto ke sala bubu yai mpi mikumba yina Nzambi me pesaka yandi na zulu.
Luzingu ya Yezu Banda Yandi Me Vutukaka na Zulu
4. Inki mutindu Biblia monisaka dezia mambu yina salamaka na zulu ntangu Yezu vutukaka kuna?
4 Biblia ke tubilaka ve mambu yina salamaka ntangu Yezu kumaka na zulu mpi kiese yina Tata na yandi mpi bawanzio waka. Kansi, Biblia tubilaka na ntwala mambu yina ta salama na zulu ntangu fioti na nima ya kuvutuka ya Yezu kuna. Biblia ke sadisaka beto na kuzaba nde, Bayuda vandaka kusala nkinsi mosi ya mfunu banda bamvula kuluta 1 500. Kilumbu mosi konso mvula, nganga-nzambi ya nene vandaka kukota na Kisika ya Kuluta Santu ya tempelo sambu na kupanza menga ya bimenga ya Kilumbu ya Kufika Masumu na ntwala ya sanduku ya kuwakana. Na kilumbu yina, nganga-nzambi ya nene vandaka kumonisa mambu yina Mesia ta sala na bilumbu ke kwisa. Bo vandaka kusala mpidina sambu na kubaka ndolula ya masumu. Kansi Yezu salaka mpidina mbala mosi mpamba ntangu yandi vutukaka na zulu. Yandi kotaka na kisika ya kuluta santu na zulu mpi na ntoto. Yandi kwendaka na ntwala ya Yehowa yandi mosi. Ebuna yandi pesaka Tata na yandi kimenga ya luzingu yina yandi pesaka. (Baebreo 9:11, 12, 24) Keti Yehowa ndimaka yo?
5, 6. (a) Inki mutindu beto me zaba nde Yehowa ndimaka kimenga yina Kristu pesaka? (b) Banani ke baka mambote ya kimenga yina, mpi nki mutindu?
5 Ee, yandi ndimaka yo. Beto me zaba nde yandi ndimaka yo sambu na mambu yina salamaka ntangu fioti na nima ya ntangu yina Yezu tombukaka na zulu. Kiteso ya balongoki 120 vukanaka na Yeruzalemi na suku mosi ya nzo ya etaze. Na mbala mosi, bo waka makele ya ngolo bonso makelele ya mupepe mosi ya ngolo mpi yo fulukaka na nzo yina. Bo vandaka kumona baludimi bonso ya tiya na zulu ya ba-ntu na bo. Ebuna bo fulukaka ti mpeve santu mpi bo yantikaka kutuba na bandinga mingi. (Bisalu 2:1-4) Diambu yai monisaka nde Yehowa me pona kimvuka mosi ya mpa ya bantu, Izraele ya Nzambi, sambu yo vanda “dikanda yina bo me solaka” mpi “banganga-nzambi yina ta vanda bantotila.” Bo ta vanda ti mukumba ya kusala luzolo ya Nzambi na ntoto. (1 Piere 2:9) Yo vandaka kibeni pwelele nde, Yehowa Nzambi ndimaka kimenga yina Kristu pesaka sambu na kukatula bantu na masumu. Nzambi tulaka balongoki ya Kristu mafuta ti mpeve santu. Yo kele diambu mosi na kati ya mambu ya ntete ya kuyituka yina salamaka kaka sambu na kimenga yina Yezu pesaka.
6 Banda na ntangu yina, balongoki yonso ya Kristu ke bakaka mambote yina kimenga ya Yezu me nataka, yo vanda “kimvuka ya fioti” yina ta yala ti Kristu na zulu to “mameme ya nkaka” yina ta zinga na nsi ya luyalu ya Kristu. (Luka 12:32; Yoane 10:16) Kimenga yina Yezu pesaka lenda sadisa beto na kuzinga mvula na mvula mpi yo ke pesaka Nzambi nzila ya kulolula masumu na beto. Kana beto ke landa ‘kumonisa lukwikilu’ na kimenga yina, mpi beto ke landa Yezu konso kilumbu, beto lenda vanda ti kansansa ya bunkete mpi kuvingila bilumbu ya ke kwisa sambu beto zinga mvula na mvula.—Yoane 3:16.
7. Inki kiyeka Yezu bakaka ntangu yandi vutukaka na zulu, mpi nki mutindu nge lenda pesa yandi maboko?
7 Inki Yezu me salaka na zulu banda yandi me vutukaka kuna? Na nima ya lufutumuku na yandi, Yehowa me pesaka yandi kiyeka mosi ya nene kibeni. (Matayo 28:18) Ya kieleka, Yehowa me ponaka yandi sambu na kutwadisa dibundu ya Bukristu, mpi Yezu ke vandaka ntwadisi mosi ya mbote mpi ya zola. (Bakolosai 1:13) Mutindu bo tubilaka yo na ntwala, Yezu me ponaka mpi babakala ya kuyela na kimpeve. Ebuna yandi me pesaka bo mukumba ya kulungisa bampusa ya balongoki na yandi. (Baefezo 4:8) Mu mbandu, Yezu ponaka Polo na kuvanda “ntumwa ya makanda.” Yandi tindaka yandi sambu na kulonga nsangu na bantu yina vandaka kuzinga ntama. (Baroma 11:13; 1 Timoteo 2:7) Pene-pene ya mvu 96 ya ntangu na beto, Yezu sadilaka ntumwa Yoane sambu na kusonikila mabundu nsambwadi ya provense ya Roma yina vandaka na Azia mikanda. Na mikanda yango, yandi vandaka kusikisa bo mpi kuvutula mabundu yina na nzila. (Kusonga, bakapu 2-3) Keti nge ke ndimaka nde Yezu kele mfumu ya dibundu ya Bukristu? (Baefezo 5:23) Sambu na kufula kulanda yandi, nge fwete kuma bulemfu mpi kulanda lutwadisu ya bampangi yina ke twadisaka dibundu na beno.
8, 9. Inki kiyeka Yezu bakaka na 1914, mpi yo fwete pusa beto na kusala inki?
8 Na 1914, Yehowa pesaka Yezu kiyeka ya mingi diaka. Na mvula yina, Yehowa tulaka yandi Ntotila ya Kimfumu ya Mesia ya Yehowa. Ntangu Yezu yantikaka kuyala, “bitumba basikaka na zulu.” Inki salamaka na nima? Bo losaka Satana ti bademo na yandi na ntoto. Yo vandaka luyantiku ya ntangu mosi ya mpasi awa na ntoto. Mambu yai kumaka kusalama mingi: Bitumba, mubulu, kiterorizme, maladi, kunikana ya ntoto mpi nzala. Mambu yango ke yibusa beto nde, Yezu ke yala dezia na zulu. Satana kele kaka “mfumu ya nsi-ntoto yai” sambu na “ntangu fioti.” (Kusonga 12:7-12; Yoane 12:31; Matayo 24:3-7; Luka 21:11) Kansi, Yezu ke pesa konso muntu na ntoto dibaku ya kundima luyalu na yandi.
9 Yo kele mfunu mingi nde beto pona na kupesa Ntotila ya Kimfumu ya Nzambi maboko. Konso kilumbu, beto fwete bakaka balukanu yina ke sepedisa yandi. Beto fwete landa ve bangindu ya nsi-ntoto. Yezu, “Ntotila ya bantotila mpi Mfumu ya bamfumu” ke zolaka mambu ya mbote. Ntangu yandi ke talaka na ntoto, yandi ke monaka mambu yina ke pesaka yandi makasi mpi mambu yina ke pesaka yandi kiese. (Kusonga 19:16) Sambu na nki?
Makasi mpi Kiese ya Ntotila Yina Kele Mesia
10. Yezu kele muntu ya nki mutindu, kansi inki ke pesaka yandi makasi?
10 Yezu ke vandaka muntu ya kiese kaka bonso Yehowa. (1 Timoteo 1:11) Ntangu yandi vandaka muntu awa na ntoto, yandi vandaka ve muntu ya makambu ngolo to ya ke sosa-sosaka bifu ya bantu. Ata mpidina, yo kele ti mambu mingi ya ke salama na ntoto bubu yai yina fwete pesa yandi makasi ya ngolo. Mu mbandu, yo fwete vanda nde yandi ke waka makasi ntangu yandi ke monaka mabundu mingi ya luvunu yina ke tubaka nde bantu na yo kele Bakristu. Yandi tubaka na ntwala nde: “Bantu yonso ve yina ke tubilaka mono nde, ‘Mfumu, Mfumu,’ ta kota na Kimfumu ya zulu, kansi muntu yina ke salaka luzolo ya Tata na mono yina kele na zulu, yandi mpamba muntu ta kota. Bantu mingi ta songa mono na kilumbu yina nde: ‘Mfumu, Mfumu, keti beto . . . salaka ve bidimbu mingi ya nkumbwa na zina na nge?’ Kansi mono ta songa bo nde: ‘Mono me zaba beno ve ata fioti! Beno katuka na ntwala na mono, beno bantu ya ke fwaka bansiku!’”—Matayo 7:21-23.
11-13. Sambu na nki bantu ya nkaka lenda yituka na mambu yina Yezu tubaka sambu na bantu yina ke salaka “bidimbu mingi” ya kuyituka na zina na yandi, kansi sambu na nki yandi kele na makasi? Pesa mbandu.
11 Bantu mingi ya ke kudibingaka Bakristu bubu lenda wa mpasi sambu na mambu yina Yezu tubaka. Mbala ya nkaka bo lenda bakisa ve sambu na nki Yezu ta buya bantu yina ke tuba nde bo vandaka kusala ‘bidimbu mingi ya kuyituka’ sambu na yandi. Mu mbandu, bantu mingi ya mabundu ke sadisaka bansukami, bo ke tungaka balupitalu mpi ba-ekole, mpi bo ke sadisaka na mitindu mingi bantu yina kele ti mfunu ya lusadisu. Sambu na kubakisa sambu na nki Yezu ta buya bo, bika beto tadila mbandu mosi.
12 Tata mosi ti nkento na yandi ke zola kusala nzietelo. Mpila ya kukwenda ti bana na bo kele ve. Yo yina bo me baka nkento mosi na kisalu sambu na kubikala kutadila bo bana. Bo me songa nkento yina mambu yai ya pete nde: “Tanina bana na beto. Pesaka bo bima ya kudia, sala yonso sambu bo vanda bunkete, mpi tanina bo na bigonsa.” Kansi ntangu bibuti yina me kwisa kuvutuka, bo me wa mpasi na ntima sambu bo me kuta bana na bo ke fwa na nzala, bo kele mvindu, bo ke bela-bela, mpi bo ke dila-dila. Bana yina ke dila sambu bo kele ti mfunu ya lusadisu ya nkento yina ya kisalu. Kansi yandi ke kipe bo ve. Sambu na nki? Yandi me mata na zulu ya kazune mpi yandi ke yobisa bafenetre ya nzo. Bibuti me wa makasi ya ngolo mpi bo me lomba yandi na kusonga bo sambu na nki yandi me kipe ve bana. Nkento yina me songa bo nde: “Mono vandaka kusala mambu mingi ya nkaka. Mono me yobisa bafenetre. Mono me yidika mpi nzo. Mono me sala mambu yina yonso sambu na beno.” Keti bibuti yina ta vanda na kiese? Ata fioti ve. Bo lombaka yandi ve na kusala bisalu yina; bo zolaka kaka nde yandi tanina bana na bo. Bibuti yina ta wa makasi sambu nkento yina me zitisa ve mambu ya bo songaka yandi.
13 Mabundu ya Kikristu me salaka mambu bonso nkento yina bo bikilaka bana na kutanina. Ntangu Yezu vandaka na ntoto, yandi songaka balongoki na yandi na kulonga bantu kieleka ya kele na Ndinga ya Nzambi mpi na kusadisa bo na kusambila Yehowa na mutindu ya mbote. (Yoane 21:15-17) Kansi, bantwadisi ya mabundu ya Kikristu me lemfukaka ve na nsiku ya Yezu ata fioti. Bo ke longaka ve bantu kieleka yina kele na Ndinga ya Nzambi mpi mutindu bo lenda sambila Nzambi na mutindu ya mbote. Na kisika ya kusala mpidina, bo ke longaka bantu mambu ya luvunu. (Yezaya 65:13; Amosi 8:11) Nkutu, ata bo me salaka mwa mambu sambu na kutomisa nsi-ntoto yai, Yezu kele ti makasi na bo sambu bo me lemfukilaka yandi ve. Ya kieleka, nsi-ntoto yai kele bonso nzo yina bo ke zola kubuka. Biblia ke monisa nde ntama mingi ve, Nzambi ta fwa nsi-ntoto ya Satana.—1 Yoane 2:15-17.
14. Inki kisalu ke pesaka Yezu kiese bubu yai, mpi sambu na nki?
14 Na ndambu ya nkaka, Yezu fwete vanda na kiese mingi ntangu yandi ke talaka na ntoto, katuka na zulu, mpi yandi ke monaka bamilio ya bantu yina ke zitisa nsiku yina yandi pesaka ya kukumisa bantu balongoki. (Matayo 28:19, 20) Yo ke pesaka beto kibeni kiese na kuzaba nde beto ke pesa Ntotila na beto kiese. Bika beto vanda ti lukanu ya kuyambula ve kusadisa “mpika ya kwikama mpi ya mayele.” (Matayo 24:45) Kimvuka yai ya fioti ya bampangi-babakala yina bo me tulaka mafuta kele ve ata fioti bonso bantwadisi ya mabundu ya Kikristu. Mpika ya kwikama ke lemfukaka na nsiku yina Yezu pesaka ya kulonga bantu nsangu ya mbote mpi yandi ke pesaka balongoki ya Kristu lutwadisu yina kele na Ndinga ya Nzambi.
15, 16. (a) Ntangu bantu ke monisaka ve zola, Yezu ke kudiwaka inki mutindu, mpi inki mutindu beto me zaba nde yandi ke kudiwaka mpidina? (b) Sambu na nki Yezu ke vandaka na makasi ya bamfumu ya mabundu ya Kikristu?
15 Bubu yai, bantu mingi ke monisaka ve nde bo ke zolaka bantu ya nkaka. Beto lenda ndima nde diambu yai ke pesaka Yezu makasi ya ngolo. Na bilumbu ya Yezu, Bafarize vandaka kutuba mbi sambu na yandi, sambu yandi belulaka muntu na Kisabatu. Bafarize vandaka ve kuzola bantu ata fioti. Bo vandaka lulendo, mpi bo vandaka kaka kuzitisa bansiku yina bo mosi tulaka. Bo vandaka kibeni ve kubakisa bansiku ya Yehowa. Ntangu Yezu vandaka kusala mambu ya kuyituka, yandi vandaka kusadisa bantu mingi. Ata mpidina, Bafarize sobaka ve bikalulu na bo ata mambu ya kuyituka yina Yezu vandaka kusala vandaka kupesa bantu kiese, kukatula bampasi na bo mpi kukumisa lukwikilu na bo na Nzambi ngolo. Yezu kudiwaka inki mutindu sambu na bantwadisi yina ya mabundu? Kilumbu mosi, yandi ‘talaka bo ndambu na ndambu ti makasi, sambu yandi waka ntantu mingi kibeni sambu na ntima-ngolo na bo.’—Marko 3:5.
16 Bubu yai, Yezu ke monaka mambu mingi yina ke pesaka yandi mawa mingi kibeni. Bantwadisi ya mabundu ya Kikristu ke landaka bansiku ya mabundu na bo mpi malongi na bo, ata malongi yango ke vandaka ve na Ndinga ya Nzambi. Bo ke zolaka mpi ve nde Bambangi ya Yehowa kulonga bantu nsangu ya mbote ya Kimfumu ya Nzambi. Na bisika mingi na ntoto, bamfumu ya mabundu ke siamisaka bantu na kuniokula konso muntu yina ke sala yonso sambu na kulonga nsangu yina Yezu longaka. (Yoane 16:2; Kusonga 18:4, 24) Diaka, bantwadisi yai ya mabundu ke siamisaka mpi bandimi na bo na kukwenda na bitumba mpi na kufwa bantu ya nkaka. Yo kele kima mosi ya Yezu lenda sepela ve ata fioti ti yo.
17. Inki mutindu balongoki ya kieleka ya Yezu ke pesaka ntima na yandi kiese?
17 Kansi balongoki ya kieleka ya Yezu ke monisaka nde bo ke zolaka bantu ya nkaka. Bo ke landaka kulonga “bantu ya mitindu yonso” nsangu ya mbote kaka mutindu Yezu salaka, ata bantu ya nkaka ke niokula bo. (1 Timoteo 2:4) Bo ke monisaka mpi zola ya ngolo na kati na bo. Ya kieleka, bantu ke zabaka bo sambu na zola yina bo ke vandaka ti yo bo na bo. (Yoane 13:34, 35) Mutindu bo ke sadilaka bampangi na bo mambu ti zola, luzitu, mpi mawete, bo ke monisaka nde bo kele balongoki ya kieleka ya Yezu mpi bo ke pesaka yandi kiese.
18. Inki kima ke pesaka Mfumu na beto mpasi na ntima, kansi inki mutindu beto lenda pesa yandi kiese?
18 Beto vila mpi ve nde, Mfumu na beto ke waka mpasi na ntima kana balongoki na yandi ke kanga ve ntima, bo ke bika nde zola na bo sambu na Yehowa kubwa madidi, mpi bo ke yambula kusadila yandi. (Kusonga 2:4, 5) Kansi, Yezu ke vandaka na kiese sambu na bayina ke kangaka ntima tii na nsuka. (Matayo 24:13) Yo yina, bika konso muntu na kati na beto kubaka lukanu ya kulemfuka na nsiku yai ya Yezu: “Fula kulanda mono.” (Yoane 21:19) Kana beto kanga ntima tii na nsuka, Yezu tubaka nde yandi ta sakumuna beto. Beto sosa kuzaba inki mutindu.
Ntotila na Beto Ke Sakumuna Bansadi ya Me Kangamaka na Yandi
19, 20. (a) Inki mutindu Yezu ke sakumunaka balongoki na yandi bubu? (b) Inki mutindu beto ta monisa nde beto ke ndima nde Yezu kuvanda ‘Tata na beto ya Kukonda Nsuka’?
19 Beto lenda vanda ti luzingu ya mbote bubu, kana beto ke lemfukila Mfumu na beto Yezu Kristu mpi beto ke landa mbandu na yandi. Beto ta baka kima yina bantu mingi bubu na ntoto ke sala ngolo na kubaka kansi bo ke kuka ve. Mu mbandu, beto ta vanda ti kisalu ya mbote yina ke pesa beto kiese, beto ta vanda ti luzingu ya mbote, dibuta ya bampangi-babakala mpi bankento yina ke zolaka beto kibeni, kinduku ya mbote ti Yehowa, mpi beto ta kudiwa na ngemba. Na bunkufi, beto ta vanda ti luzingu mosi ya mbote mpi ya kiese kibeni. Beto ta baka nkutu mambote mingi.
20 Yehowa me ponaka Yezu sambu yandi vanda “Tata ya Kukonda Nsuka” sambu na bantu yina kele ti kivuvu ya kuzinga kimakulu na ntoto. Adami salaka disumu. Yezu bakaka kisika ya Adami yina vandaka tata ya bantu yonso. Adami me bikilaka bana na yandi yonso disumu mpi lufwa. (Yezaya 9:6, 7) Kana beto me baka lukanu ya kukwikila na Yezu mpi ya kulemfukila yandi, beto ta monisa nde beto ke ndima nde yandi vanda ‘Tata na beto ya Kukonda Nsuka.’ Pana, beto lenda vingila kuzinga mvula na mvula. Diaka, beto ta kuma pene-pene ya Yehowa Nzambi. Mutindu beto me katuka kulonguka yo, kana beto ke sala yonso ya beto lenda sala sambu na kulanda mbandu ya Yezu konso kilumbu, beto ta lemfuka na nsiku yai ya Nzambi: “Beno landa mbandu ya Nzambi, sambu beno kele bana yina yandi ke zolaka mingi.”—Baefezo 5:1.
21. Inki mutindu balongoki ya Kristu ke sadisaka bantu ya nsi-ntoto yai ya mbi na kuvanda ti kivuvu?
21 Kana beto ke landa mbandu ya Yezu mpi ya tata na yandi Yehowa, beto ta kuka kusala kima mosi ya kuluta mbote. Beto ke vandaka bonso kima mosi ya kitoko na nsi-ntoto yai ya mbi. Bubu yai Satana ke kusa bantu mingi na nsi-ntoto mpi bo ke landa bikalulu na yandi. Kansi ntangu beto ke landaka Kristu mpi beto ke landaka bikalulu na yandi ya mbote, beto ke kukaka kulonga bantu bakieleka ya mfunu ya kele na Biblia mpi beto ke monisaka bo nde bantu lenda vanda na kiese na luzingu, bo lenda vanda na ngemba mpi bo lenda zolana. Ntangu beto ke landaka Kristu, beto ke kwendaka pene-pene ya Yehowa, mpi yo kele kima ya kuluta mbote mpi ya kuluta mfunu yina konso muntu lenda sala.
22, 23. (a) Inki balusakumunu bantu yina ke fula kulanda Yezu na kwikama yonso ta baka na bilumbu ke kwisa? (b) Lukanu na beto fwete vanda inki?
22 Yindula mpi mambu yina Yehowa ke zola kusala sambu na nge na bilumbu ke kwisa na nzila ya Ntotila na yandi yina kele Mesia. Kubika fioti Yezu ta nwana ti Satana mpi nsi-ntoto na yandi ya mbi. Ntembe kele ve ata fioti nde Yezu muntu ta nunga. (Kusonga 19:11-15) Na nima, Yezu ta yantika Luyalu na yandi ya Bamvula Funda na ntoto. Yandi ti bantu yina ta yala ti yandi na zulu ta sadisa bantu yonso ya me kangamaka na Nzambi na kukuma bantu ya kukuka, mpi na kubaka balusakumunu yonso yina bo fwete baka sambu na kimenga yina Yezu pesaka. Meka kumona fioti na mabanza mutindu yo ta vanda ntangu minunu ta kuma batoko, ntangu bantu ta kuma ti sante ya mbote, bo ta kuma ngolo, mpi bo ta sala mambu mbote kibeni ti bantu ya nkaka sambu na kukumisa ntoto paladisu. Ebuna na nsuka ya luyalu yina ya Bamvula Funda, Yezu ta vutula Kimfumu na Tata na yandi. (1 Bakorinto 15:24) Kana nge fula kulanda Kristu na kwikama yonso, Yehowa ta pesa nge lusakamunu ya kuluta nene. Nge ta baka “kimpwanza ya nkembo ya bana ya Nzambi.” (Baroma 8:21) Ee, beto ta baka balusakumunu yonso yina Adami ti Eva vandaka ti yo kansi ya bo vidisaka. Beto ta vanda bana ya Yehowa mpi beto ta vanda diaka ve bampika ya disumu ya Adami. Ya kieleka, “lufwa ta vandaka diaka ve.”—Kusonga 21:4.
23 Yibuka leke yina ya mvwama ya beto tubilaka na Kapu 1. Yandi buyaka emvitasio yai ya Yezu: “Kwisa kulanda mono.” (Marko 10:17-22) Kusala ve ata fioti kifu ya mutindu yina. Kansi ndima na kiese yonso emvitasio ya kulanda Yezu. Baka lukanu ya kukanga ntima, ya kufula kulanda Ngungudi ya Mbote konso kilumbu, konso mvula. Ebuna nge ta mona mutindu Yehowa ta lungisa mambu yonso ya yandi me tubaka.