Nzambi ke zola nde beto zinga kimakulu na ngemba mpi na kiese na paladisu na ntoto!

Kansi, nge lenda kudiyula nde, ‘Inki mutindu diambu yai lenda salama?’ Biblia ke tuba nde Kimfumu ya Nzambi ta sala yo, mpi luzolo ya Nzambi kele nde bantu yonso kulonguka mambu ya me tala Kimfumu yango mpi lukanu na yandi sambu na beto.—Nkunga 37:11, 29; Yezaya 9:7.

Nzambi ke zola nde beto baka mambote.

Kaka mutindu tata ya mbote ke zolaka nde bana na yandi kuzinga mbote, Tata na beto ya zulu ke zolaka nde beto vanda na kiese kimakulu. (Yezaya 48:17, 18) Yandi me silaka nde “muntu yina ke salaka luzolo ya Nzambi ke bikalaka kimakulu.”—1 Yoane 2:17.

Nzambi ke zola nde beto tambula na banzila na yandi.

Biblia ke tuba nde Ngangi na beto ke zola ‘kulonga beto banzila na yandi’ sambu beto “tambula na banzila na yandi.” (Yezaya 2:2, 3) Yandi me yidikaka “bantu . . . sambu na kunata zina na yandi” mpi kuzabisa luzolo na yandi na ntoto ya mvimba.—Bisalu 15:14.

Nzambi ke zola nde beto sambila yandi na bumosi.

Na kisika ya kukabula bantu, lusambu ya Yehowa ya bunkete ke vukisaka bo na zola ya masonga. (Yoane 13:35) Bubu yai, banani ke longaka babakala ti bankento mutindu ya kusadila Nzambi na bumosi? Beto ke lomba nge na kuzaba yo na nsadisa ya kamukanda yai.

Nge me zaba Bambangi ya Yehowa ikwa? Bankaka na kati na beto lenda vanda bamfinangani na nge, banduku na nge ya kisalu, to bana ya nzo-nkanda na beno. To ziku nge me solulaka dezia ti bo mambu ya Biblia. Beto kele mpenza banani, mpi sambu na nki beto ke zabisaka bantu balukwikilu na beto?

Beto kele bonso bantu yonso. Beto me katukaka na bisika ya kuswaswana mpi luzingu na beto kele ya mutindu mosi ve. Bankaka na kati na beto vandaka ntete na mabundu ya nkaka, mpi bankaka diaka vandaka ve kukwikila na Nzambi. Kansi na ntwala ya kukuma Bambangi ya Yehowa, beto yonso bakaka ntangu ya kutadila mbote-mbote malongi ya Biblia. (Bisalu 17:11) Beto ndimaka mambu yina beto longukaka, mpi na nima konso muntu ponaka na kusambila Yehowa Nzambi.

Kulonguka Biblia ke natilaka beto mambote. Bonso bantu yonso, beto ke nwanaka ti bampasi mpi bifu na beto mosi. Kansi, sambu beto ke salaka bikesa sambu na kusadila minsiku ya Biblia konso kilumbu, yo me tomisaka luzingu na beto. (Nkunga 128:1, 2) Yai kikuma mosi ya ke pusaka beto na kuzabisa bankaka mambu ya mbote yina beto me longukaka na Biblia.

Beto ke zitisaka minsiku ya Nzambi. Minsiku yai ya Biblia ke longaka, ke sadisaka beto na kuzinga mbote, na kuzitisa bantu ya nkaka mpi na kuyedisa bikalulu bonso masonga mpi ntima-mbote. Yo ke sadisaka bantu na kuvanda bantu ya ke salaka mingi mpi ya bukatikati, mpi yo ke sadisaka mabuta na kuzinga na bumosi mpi na kuvanda ti bikalulu ya mbote. Sambu beto ke ndimaka nde “Nzambi ke pona-ponaka ve,” beto kele na kati ya dibuta ya kimpeve ya bampangi ya nsi-ntoto ya mvimba, yina mambu ya mpusu ya nitu mpi ya politiki ke kabulaka bo ve. Ata beto kele bonso bantu yonso, beto me swaswana kibeni ti bantu ya nkaka.—Bisalu 4:13; 10:34, 35.

• Na nki mambu Bambangi ya Yehowa me fwanana ti bantu ya nkaka?

• Inki minsiku Bambangi ya Yehowa me longukaka na Biblia?

Bantu mingi ke yindulaka nde Bambangi ya Yehowa kele zina ya dibundu mosi ya mpa. Kansi bamvula 2 700 me luta, Nzambi mosi kaka ya kieleka bingaka bansadi na yandi nde, “bambangi” na yandi. (Yezaya 43:10-12) Tii na mvu 1931, bo vandaka kubinga beto Balongoki ya Biblia. Sambu na nki beto bakaka zina ya Bambangi ya Yehowa?

Yo ke monisaka Nzambi na beto. Na kutadila bamaniskri ya ntama, zina ya Nzambi, Yehowa, kele bambala mingi na Biblia. Bambalula mingi me yingisaka zina yina na batitre bonso Mfumu to Nzambi. Kansi, Nzambi ya kieleka yandi mosi zabisaka Moize zina na yandi, Yehowa, ntangu yandi tubaka nde: “Yai kele zina na mono kimakulu.” (Kubasika 3:15) Mpidina, yandi monisaka nde yandi me swaswana ti banzambi yonso ya luvunu. Beto ke vandaka na kiese ya kunata zina ya santu ya Nzambi.

Yo ke tendulaka kisalu na beto. Na ntangu ya ntama, bantu mingi, yantika na Abele muntu ya lunungu, taka kimbangi sambu na lukwikilu na bo na Yehowa. Na bamvu-nkama yina landaka, Noa, Abrahami, Sara, Moize, Davidi mpi bantu ya nkaka kotaka na kati ya ‘dituti ya nene ya bambangi.’ (Baebreo 11:4–12:1) Kaka mutindu muntu lenda ta kimbangi na tribinale sambu na kukotila muntu mosi yina me sala kima ve, lukanu na beto ke vandaka ya kuzabisa bantu kieleka ya me tala Nzambi.

Beto ke landaka mbandu ya Yezu. Biblia ke bingaka yandi “mbangi ya kwikama mpi ya ke tubaka kieleka.” (Kusonga 3:14) Yezu yandi mosi tubaka nde yandi ‘zabisaka zina ya Nzambi’ mpi landaka ‘kuta kimbangi sambu na kieleka” ya me tala Nzambi. (Yoane 17:26; 18:37) Yo yina, balongoki ya kieleka ya Kristu fwete nata zina ya Yehowa mpi kuzabisa yo. Yo yina kima Bambangi ya Yehowa ke salaka ngolo na kusala.

• Sambu na nki Balongoki ya Biblia bakaka zina ya Bambangi ya Yehowa?

• Banda nki ntangu Yehowa ke vandaka ti bambangi na ntoto?

• Nani kele Mbangi ya Yehowa ya kuluta nene?