‘Tambula na Lukwikilu, Kansi Ve na Mambu Yina Ke Monanaka’

Ntangu fioti na ntwala nde bo ziunga Yeruzalemi mpi bo fwa yo, ntumwa Polo sonikilaka Bakristu nde, sambu bo kele basoda ya mbote ya Kristu, bo fwete kutana ti bampasi mpi bo fwete sosa ve biese ti luzingu ya mbote. (2 Tim. 2:3, 4) Sambu mpasi ke zola kubwila nsi-ntoto yai ya mbi, beto fwete vanda ti lukwikilu ya ngolo sambu beto tula dikebi kaka na mambu ya kimpeve. (2 Bak. 4:18; 5:7) Tala video ‘Tambula na Lukwikilu, Kansi Ve na Mambu Yina Ke Monanaka.’ (Kwenda na jw.org, mpi tala na nsi ya PUBLICATIONS mpi bweta na VIDEOS.) Tala mutindu kudipesa na bima ya kinsuni kumaka mutambu sambu na Nahami ti Abitale mpi nataka bo na lufwa. Na nima, tadila bangiufula yai:

(1) Inki vandaka ‘kima ya nzanzi yina telamaka na kisika ya santu’ na mvu-nkama ya ntete, mpi yo lombaka nde Bakristu yina vandaka kuzinga na Yeruzalemi kusala nki? (Mat. 24:15, 16) (2) Sambu na nki lukwikilu vandaka mfunu na kukatuka na mbanza? (3) Yo lombaka kusala nki bibansa sambu na kukatuka? (4) Sambu na nki Nahami ti Abitale sukininaka? (Mat. 24:17, 18) (5) Inki tulaka diaka lukwikilu ya Rashele na kumekama ntangu bo vandaka kukatuka na Yeruzalemi? (Mat. 10:34-37; Mar. 10:29, 30) (6) Inki mutindu Etani pesaka mbandu ya mbote ya lukwikilu mpi ya kutula ntima na Yehowa? (7) Inki bampasi Bakristu kutanaka ti yo na Pella? (8) Inki mutindu lukwikilu ya Nahami ti Abitale lembaka malembe-malembe? (9) Inki mutindu Yehowa vandaka kulungisa bampusa ya Bakristu yina kwendaka na Pella? (Mat. 6:33; 1 Tim. 6:6-8) (10) Inki mutindu beto lenda landa mbandu ya Abrahami ti Sara ntangu beto ke vingila nsuka ya ngidika yai ya bima? (Baeb. 11:8-10) (11) Inki mutindu Nahami ti Abitale ndimisaka ntima na bo na kuvutuka na Yeruzalemi mpi sambu na nki dibanza na bo vandaka mbi? (Luka 21:21) (12) Luzingu vandaka nki mutindu na Yeruzalemi ntangu Nahami ti Abitale vutukaka? (13) Sambu na nki bubu yai beto fwete kumisa lukwikilu na beto ngolo na ntwala nde nsuka ya ngidika yai ya bima kukwisa?​—Luka 17:31, 32; 21:34-36.

Kutambula na lukwikilu ke tendula (1) kutula ntima na lutwadisu ya Yehowa, (2) kundima lutwadisu na yandi na luzingu na beto mpi (3) kumonisa nde beto ke zolaka mambu ya kimpeve kuluta mambu ya kinsuni. Yo yina, lukanu na beto fwete vanda ya kutambula na lukwikilu mpi kundima nde “nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.”​—1 Yoa. 2:17.