Beto Ke na Mfunu ya Luguluku!

PENEPENE ya mbanza Pittsburgh, na Pennsylvania, na États-Unis, kompani mosi ya ketimunaka matadi ya ntalu yina kevandaka bonso makala kufulukaka na masa. Bantu uvwa ya ketimunaka matadi kukangamaka na kamwa kisika mosi na kitamina ya bametre 73 na nsi ya ntoto. Na nima ya bilumbu tatu, bantu yango kubasikaka, mpi ata kima mosi ve kukuminaka bo. Inki mutindu bo gulusaka bo?

Bantu yina kugulusaka bo kusadilaka lutangu ya kusonga nzila ya kompani yina mpi apareyi ya kesadisaka sambu na kusosa muntu to kima mosi ya kubumbana. Bo timunaka dibulu mosi na bunene ya basantimetre 65 mpi bo kitisaka kima mosi tii na kisika yina bantu yango kuvandaka, ebuna, bo basisaka bo mosi-mosi. Bo gulusaka bo na kisika yina bo zolaka kufwa. Bo yonso kuvandaka na kyese mpi kumonisaka ntonda na mutindu bo gulukaka.

Bantu mingi na kati na beto takangama ve na nsi ya ntoto bonso bantu uvwa ya kompani yina ya ketimunaka matadi ya ntalu, to takutana ti mpasi mosi ya ngolo yina tatula luzingu na beto na kigonsa. Ata mpidina, beto yonso ke na mfunu nde bo gulusa beto, sambu beto lenda tina ve maladi, kimununu, mpi nkutu lufwa. Tata ya mabuta Yobi, yina kuvandaka ya kwikama, kutubaka nde: “Muntu yonso me butuka na ntoto yai ke na luzingu mosi ya nkufi ti ya mpasi. Yandi ke yelaka ti kununa nswalu bonso kintuntu; yandi ke vilaka bonso madidi ya nti ke vilaka.” (Yobi 14:1, 2) Bubu yai, kiteso ya bamvula 3 500 na nima, kyeleka ya bangogo yai kelanda na kumonana, sambu nani na kati na beto lenda tina nsuka yina kekuminaka bantu yonso, disongidila lufwa? Ata konso kisika yina beto kezinga to konso kima yina beto kesala sambu na kuvanda na mavimpi ya mbote, beto ke na mfunu nde bo gulusa beto na bampasi, kimununu, mpi na lufwa.

Bantu ya siansi mpi bantu yankaka kesala ngolo sambu na kukumisa luzingu nda, kuluta bamvula yina bantu kezinga ntangu yai. Kimvuka mosi ketuba nde mukumba na bo kele ya “kununga lufwa” mpi “kusadisa bantu ya kimvuka yango na kusala yonso sambu na kukuma ti nitu yina lenda fwa ve.” Kansi, tii bubu yai, mpusa ya ngolo ya bantu ya siansi mpi bikesa yina bo kesala menunga ve na kusadisa bantu na kuzinga bamvula kuluta 70 to 80, yina Moize kutubilaka bamvula 3 500 meluta.​—Nkunga 90:10.

Yo vanda nge kendima to ve dibanza ya Yobi na yina metala luzingu mpi lufwa, nge lenda buya ve nde mutindu bamvula keluta, nge mpi ‘tavila bonso madidi ya nti,’ disongidila nge tafwa, mpi nge tabikisa banduku na nge, dibuta na nge, nzo na nge, mpi mambu yonso ya nge mesalaka. Salomo, Ntotila ya mayele ya Izraele ya ntama, kusonikaka nde: “Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve. Bo ta zwa kima ve na ntwala, bo ke vila bo kimakulu.”​—Longi 9:5.

Mutindu Biblia ketendula yo, dyambu ya mpasi kele nde lufwa keyalaka bantu bonso ntotila mosi ya nku. Ee, bantu ke na mfunu nde bo gulusa bo na lufwa, yina kele mbeni ya nsuka. (Roma 5:14; 1 Korinto 15:26) Bantu yina kesalaka kisalu ya kugulusa bantu, ata bo baka formasio ya kuluta mbote, bo lenda kuka ve kugulusa beto kimakulu. Kansi, Yehowa Nzambi, yina kugangaka bantu, mebakaka bangidika sambu na kugulusa beto kimakulu.

[Bangogo ya kemonisa kisina ya foto ya kele na lutiti 3]

Photo by Gene J. Puskar-Pool/Getty Images