Sadila Biblia Sambu na Kupesa Mvutu

NTANGU bantu keyulaka beto bangyufula yina metala malongi na beto, luzingu na beto, bangindu na beto sambu na mambu ya keluta na ntoto, kivuvu na beto sambu na luzingu ya kekwisa, beto kesalaka ngolo na kusadila Biblia sambu na kupesa mvutu. Sambu na inki? Sambu yo kele Ndinga ya Nzambi. Malongi na beto kekatukaka na Biblia. Luzingu na beto mesimbamaka na Biblia. Yo kesadisaka beto na kubakisa mbote mambu ya keluta na ntoto. Balusilu ya kupemama yina kele na Biblia kele misisa ya ngolo ya kesimbaka kivuvu na beto sambu na luzingu ya kekwisa.​—2 Tim. 3:16, 17.

Beto kezabaka mpenza mukumba yina zina na beto menatilaka beto. Beto kele Bambangi ya Yehowa. (Yez. 43:12) Yo yina beto kepesaka ve mvutu na bangyufula na mayele ya bantu, kansi na mambu yina Yehowa ketuba na Ndinga na yandi ya kupemama. Ya kyeleka, sambu beto kele bantu, beto kevandaka ti bangindu ya kuswaswana na mambu mingi, ata mpidina beto kebikaka nde Ndinga ya Nzambi kuyidika bangindu na beto sambu beto kendimaka mpenza nde yo kele kyeleka. Ya kyeleka, Biblia kepesaka beto kimpwanza ya kupona beto mosi na mambu mingi. Na kifulu ya kundimisa bantu yankaka na ngolo mambu ya beto mosi kezolaka, beto kele na mpusa ya kulonga minsiku yina kele na Masonuku, mpidina beto kepesaka bawi na beto nzila ya kusadila kimpwanza ya kupona ya beto mosi kele na yo. Bonso ntumwa Polo, beto kesosaka ‘kulemfuka na lukwikilu.’​—Roma 16:26.

Kusonga 3:14 kebinga Yezu Kristu nde: “Temwe [ya kwikama mpi, NW] ya kieleka.” Inki mutindu yandi vandaka kupesa mvutu na bangyufula mpi kuyidika makambu yina bo vandaka kunatila yandi? Ntangu yankaka yandi vandaka kusadila bingana yina vandaka kunata bantu na kuyindula. Bantangu yankaka dyaka yandi vandaka kuyula muntu yina kuyulaka yandi dikambu yango na kutuba yandi mosi nki mutindu yandi kebakisa verse mosi. Mbala mingi yandi vandaka kuvutukila mambu yina bo ketuba na baverse, kutubila yo na bunkufi, to kutubila yo na kati ya disolo na yandi. (Mat. 4:3-10; 12:1-8; Luka 10:25-28; 17:32) Na mvu-nkama ya ntete, bo vandaka kubumba barulo ya Masonuku na basinagoga. Ata kima mosi ve kendimisa beto nde Yezu kuvandaka ti kimvuka ya barulo yango sambu na yandi mosi, kansi yandi zabaka Masonuku mbote mpi yandi vandaka kutubila yo mbala mingi ntangu yandi vandaka kulonga bantu yankaka. (Luka 24:27, 44-47) Yandi tubaka na masonga yonso nde mambu yina yandi vandaka kulonga vandaka kukatuka ve na yandi mosi. Yandi vandaka kutuba mambu yina yandi waka na Tata na yandi.​—Yoa. 8:26.

Mpusa na beto kele ya kulanda mbandu ya Yezu. Beto mewaka ve Nzambi ketuba mutindu Yezu kuwaka yandi. Kansi Biblia kele Ndinga ya Nzambi. Ntangu beto kesadila yo na kupesa bamvutu, yo ketendula nde beto kebuya kubenda dikebi ya bantu na kimuntu na beto mosi. Beto kemonisaka nde na kifulu ya kutuba mambu yina mekatuka na mabanza ya muntu mosi ya kukonda kukuka, beto mebakaka lukanu ya kubika Nzambi kutuba mambu yina kele ya kyeleka.​—Yoa. 7:18; Roma 3:4.

Ya kyeleka, mpusa na beto kele ve kaka ya kusadila Biblia, kansi ya kusala na mpila nde muntu yina kewa beto kubakila yo mpenza mambote mingi. Beto kezola nde yandi kuwa ti mabanza ya kesadisa yandi na kundima mambu ya yandi kewa. Mutindu nge kemonina mabanza ya muntu yango, nge lenda kotisa bangindu ya Biblia na bangogo yai: “Keti nge kendima ve nde kima kele mpenza mfunu kele mambu yina Nzambi ketuba?” To nge lenda tuba nde: “Keti nge kezaba nde Biblia ketubilaka mpenza dyambu yai?” Kana nge kesolula ti muntu kendimaka ve kiyeka ya Biblia, yo talomba nde nge sadila bangogo ya kuswaswana ya kukotila na masolo. Nge lenda tuba nde: “Wa mambu mbikudulu yai ya ntama ketuba.” To nge lenda tuba mpi nde: “Mukanda ya bo mebasisaka kuluta mikanda yonso na luzingu ya bantu ketuba nde. . . ”

Bantangu yankaka, nge lenda pona kutubila verse mosi kaka na bunkufi. Kansi, kana mpila kele, yo kele mbote na kukangula Biblia yo mosi mpi kutanga mambu ya yo ketuba. Songa muntu yina verse yango na Biblia na yandi mosi konso ntangu ya nge kemona nde yo kele mbote na kusala yo. Mutindu yai ya kusadila mbala mosi Biblia kebutaka mbala mingi bambuma ya mbote na bantu.​—Baeb. 4:12.

Bakristu yina kele bankuluntu kele ti mukumba ya nene ya kusadila Biblia na ntangu bo kepesa mvutu na bangyufula. Mosi na kati ya mambu ya muntu fwete lungisa sambu na kusala bonso nkuluntu kele nde mpangi ya bakala yina fwete “kangama ngolo na ndinga ya kwikama sambu na yina metala mayele na yandi ya kulonga.” (Tito 1:9, NW) Mpangi mosi ya dibundu lenda baka desizio mosi ya nene na luzingu na yandi na nima ya kubaka ndongisila na nkuluntu mosi. Yo yina, yo kele mpenza mfunu nde ndongisila yango kukatuka na Masonuku! Mbandu ya nkuluntu kepesa na kusala mutindu yai lenda vanda na bupusi mingi na mutindu ya kulonga ya bantu mingi yankaka.