Bingana Yina Kekatuka na Mambu Yina Bantu Mezaba Mbote

YA KYELEKA, yo kele mfunu nde bingana yonso ya nge kesadila kuwakana ti malongi ya nge ketubila. Kansi, sambu yo lungisa lukanu na yo, yo fwete vanda ya mbote sambu na bawi na nge.

Inki mutindu nge fwete tadila bawi yina nge ketubila sambu na kupona bingana yina nge tasadila? Yezu Kristu kusalaka inki? Yo vanda ntangu yandi vandaka kutubila kimvuka ya bantu to balongoki na yandi, Yezu kubakaka ve bambandu na yandi na mambu ya luzingu ya bantu ya bansi yankaka, kansi kaka na mambu yina vandaka kusalama na Izraele. Bawi na yandi zolaka kubakisa ve bambandu ya mutindu yai. Mu mbandu, Yezu kutubilaka ve luzingu na tribinale ya Ezipte to mambu yina vandaka kusalama na mabundu ya India. Kansi, bingana na yandi vandaka kutubila bisalu yina bantu ya bansi yonso kesalaka. Yandi tubilaka kutunga bilele, kusala mumbongo, kuvidisa kima mosi ya mfunu, mpi kukwenda na nkinsi ya makwela. Yandi bakisaka mutindu bantu kesalaka na ntwala ya mambu ya mutindu na mutindu ya bo kekutanaka na yo, mpi yandi sadilaka nzayilu yai. (Mar. 2:21; Luka 14:7-11; 15:8, 9; 19:15-23) Sambu kisalu na yandi ya kusamuna na ntwala ya bantu vandaka ntetentete sambu na bantu ya Izraele, bingana ya Yezu vandaka kutubila mingimingi mambu to bisalu yina bo vandaka kusala konso kilumbu. Yo yina, yandi tubilaka bisalu ya bilanga, mutindu mameme kelemfukilaka bangungudi na bo, mpi kusadila bampusu ya bambisi sambu na kubumba malafu. (Mar. 2:22; 4:2-9; Yoa. 10:1-5) Yandi tubilaka mpi bambandu ya mambu yina melutaka yina bantu kuzabaka mbote, mu mbandu, mutindu Nzambi salaka bankwelani ya ntete, Mvula ya Ngolo ya bilumbu ya Noa, lufwa ya Sodome ti Gomore, lufwa ya nkento ya Loti. (Mat. 10:15; 19:4-6; 24:37-39; Luka 17:32) Keti nge mpi ketadilaka na dikebi yonso bisalu yina bawi na nge kesalaka mingi mpi luzingu na bo ntangu nge keponaka bingana na nge?

Inki nge tasala kana nge ketuba ve na ntwala ya kimvuka mosi ya nene ya bantu, kansi muntu mosi to mbala yankaka bantu fyoti mpamba? Sala ngolo na kupona kingana yina mefwana mpenza na bawi yina. Ntangu Yezu kutaka kimbangi na nkento mosi ya Musamaria na dibulu mosi ya masa penepene ya Sikare, yandi tubilaka “masa ya moyo,” ‘kuvanda diaka ve na nzala ya masa,’ mpi ‘nto ya masa yina kepesaka moyo ya mvula na mvula.’ Kutuba yai yonso ya kifwani vandaka kuwakana mpenza ti kisalu ya nkento yango. (Yoa. 4:7-15) Mpi ntangu yandi tubilaka babakala yina vandaka kuyobisa babukondi na bo, kutuba ya kifwani yina yandi ponaka vandaka kutadila kisalu ya kuloba. (Luka 5:2-11) Na baokazio yai yonso zole, yandi lendaka kutubila bilanga, sambu bo vandaka kuzinga kisika yina bantu vandaka kusala bilanga mingi, kansi yandi monaka mbote mingi na kutubila bisalu yina bo vandaka kusala sambu bo mona yo na mabanza na bo! Keti nge kesalaka ngolo na kusala mutindu yina?

Ata Yezu kutulaka dikebi na yandi yonso na ‘mameme yina mevilaka ya bantu ya Israele,’ Nzambi tindaka ve ntumwa Polo na Izraele kaka, kansi na bansi ya bantu ya Makanda mpi. (Mat. 15:24; Bis. 9:15) Keti dyambu yai kusobaka mutindu ya kutuba ya Polo? Ee. Ntangu yandi sonikilaka Bakristu na Korinto, yandi tubilaka bima yina bantu ya Makanda kuzabaka mbote, bonso, nsaka ya kubaka ntinu, bikalulu ya kukwenda kudya madya na batempelo ya banzambi ya luvunu, mpi bantu yina kesepila sambu bo menunga.​—1 Kor. 8:1-10; 9:24, 25; 2 Kor. 2:14-16.

Keti nge ketulaka dikebi bonso Yezu ti Polo ntangu nge keponaka bingana ti bambandu ya nge tasadila na kulonga na nge? Keti nge ketadilaka luzingu mpi bisalu ya konso kilumbu ya bawi na nge? Ya kyeleka, mambu mesobaka mingi na inza tuka mvu-nkama ya ntete. Bantu mingi kelandaka bansangu ya inza na televizio. Mbala mingi, bo mezabaka mambu yina kelutaka na bansi yankaka. Kana yo kele mutindu yina na kisika ya beno kezingaka, yo kele mbi ve na kubaka bingana na bansangu yina. Kansi, mambu yina kesimbaka ntima ya bantu kevandaka mbala mingi yina ketubilaka luzingu na bo, mu mbandu nzo na bo, dibuta na bo, kisalu na bo, bima ya bo kedyaka, mpi bansungi ya bwala na bo.

Kana kingana na nge kelomba bantendula mingi, yo lenda vanda sambu nge ketubila kima mosi yina bawi na nge mezaba ve mbote. Kingana ya mutindu yina lenda basisa ve pwelele ngindu ya mfunu ya nge kezola kulonga. Na nsuka, bawi lenda yibuka kingana na nge olie ya kuyibuka kyeleka ya Masonuku yina nge vandaka kusosa kulonga bo.

Na kisika ya kufwanisa mambu ya mpasi-mpasi, Yezu kusadilaka mambu ya bantu yonso kuzabaka, yina vandaka kusalama konso kilumbu. Yandi sadilaka bima ya fyoti sambu na kutendula bima ya nene mpi mambu ya kukonda mpasi sambu na kutendula mambu ya mpasi. Ntangu yandi vandaka kuwakanisa mambu ya kesalamaka konso kilumbu ti bakyeleka ya kimpeve, Yezu kusadisaka bantu na kubakisa kukonda mpasi bakyeleka ya kimpeve yina yandi vandaka kulonga mpi na kusimba yo. Yai kele mbandu ya mbote mpenza ya kulanda!