Balusilu ya Kimfumu—Kusala Bima Yonso ya Mpa

YINDULA nde nge me buka mbuma mosi ya pome. Nge me nuka yo sambu na kuwa nsudi na yo ya kitoko mpi nge me tula yo na kitunga yina me fuluka ti bambuma ya nkaka. Nge me sala dezia bangunga mingi, kansi nge ke lemba ve; nge ke mona nde nge lenda sala diaka mwa mingi. Mama na nge kele na nti ya nkaka ntama mingi ve; yandi ke katula bambuma na kiese yonso ti bampangi na nge ya nkaka mpi banduku na beno. Mama me kuma bonso toko kibeni—mutindu nge vandaka kumona yandi ntangu nge vandaka mwana ya fioti. Nge ke ndima ve nde nge monaka yandi mutindu yandi nunaka na nsi-ntoto ya ntama. Nge ke yibuka mutindu yandi belaka ngolo, mpi mutindu nge simbaka diboko na yandi ntangu yandi fwaka, mpi mutindu nge dilaka mingi na maziamu na yandi. Kansi ntangu yai, yandi yina na luzingu ti mavimpi ya mbote, kaka bonso bantu mingi ya nkaka!

Beto me zaba nde mambu ya mutindu yai ta salama. Beto me zaba yo sambu balusilu yonso ya Nzambi ke lunganaka kaka. Na kitini yai, beto ta tadila mutindu balusilu ya nkaka ya Kimfumu ta lungana ntama mingi ve, mpi ta nata beto tii na bitumba ya Armagedoni. Beto ta tadila mpi balusilu ya nkaka ya kitoko ya Kimfumu, yina ta lungana na nima ya Armagedoni. Yo ta vanda kiese kibeni ntangu beto ta mona Kimfumu ya Nzambi ke yala ntoto yai ya mvimba, mpi ke sala mambu yonso ya mpa!