Yezu Ke Yela na Nazareti

Yezu ke yela na Nazareti, mbanza mosi ya fioti mpi ya kukonda mfunu. Yo kele na nordi ya Yudea, na muwanda ya Galilea, na sudi ya dizanga ya Nzadi-mungwa ya Galilea.

Ntangu Yozefi ti Maria katukaka ti Yezu na Ezipte, ziku Yezu vandaka ti bamvula zole. Yo ke monana nde bo vandaka ti mwana mosi mpamba. Kansi na nima, bo butaka bana ya nkaka ya babakala: Yakobo, Yozefi, Simoni, ti Yudasi. Yozefi ti Maria butaka mpi bana ya bankento. Yezu vandaka na baleke ya babakala mpi ya bankento kiteso ya sambanu.

Ya kieleka, Yezu vandaka ti bampangi ya nkaka. Beto me longuka mambu ya me tala Elizabeti mpi mwana na yandi Yoane, bo ke zingaka na Yudea na bakilometre mingi na sudi. Salome ke zingaka pene-pene ya Galilea, mpi ziku yandi kele mpangi ya Maria disongidila mama leki ya Yezu. Zina ya bakala na yandi Zebedeo. Bo kele ti bana zole: Yakobo ti Yoane, ziku bo vandaka bisoni ya ntete ya Yezu. Beto ke zaba ve kana ntangu bo vandaka kuyela Yezu lutisaka ntangu mingi to ve ti bana yai, kansi na nima bo kumaka banduku na yandi ya ngolo mpi bantumwa na yandi.

Yo ke lomba nde Yozefi kusala kisalu ya ngolo sambu na kudisa dibuta na yandi ya me kuma nene. Yandi ke salaka kisalu ya mabaya. Yozefi sansaka Yezu bonso mwana na yandi mosi, yo yina Biblia ke binga Yezu “mwana ya sharpantie.” (Matayo 13:55) Yozefi longaka mpi Yezu kisalu ya mabaya, mpi Yezu zabaka yo mbote-mbote. Yo yina, bantu tubaka sambu na Yezu nde: “Yandi . . . kele sharpantie.”—Marko 6:3.

Dibuta ya Yozefi vandaka kutula lusambu ya Yehowa na kisika ya ntete. Sambu Yozefi ti Maria vandaka kuzitisa Nsiku ya Nzambi, bo longaka bana na bo mambu ya kimpeve ‘ntangu bo vandaka na nzo, ntangu bo vandaka kutambula na nzila, ntangu bo vandaka kulala mpi ntangu bo vandaka kutelama na mpongi.’ (Kulonga 6:6-9) Kuvandaka ti Sinagoga mosi na Nazareti. Ntembe kele ve nde Yozefi vandaka kukwenda kuna mbala na mbala ti dibuta na yandi sambu na kusambila Nzambi. Na nima, Biblia ke tuba nde “mutindu vandaka kikalulu na yandi na kilumbu ya Kisabatu,” Yezu kwendaka na sinagoga. (Luka 4:16) Diaka, dibuta yai vandaka na kiese ya mingi mutindu bo vandaka kukwenda mbala na mbala na tempelo ya Yehowa na Yeruzalemi.