Banda Yezu ti balongoki na yandi katukaka na Yeriko, bo me lutisa bampimpa tatu na Betania. Beto kele na suka ya Kintete Nisani 10 mpi bo ke kwenda na Yeruzalemi. Yezu me wa nzala. Yo yina ntangu yandi me mona nti ya bafige, yandi me pusana pene-pene na yo. Keti nti yango kele ti bambuma?

Beto kele ntangu yai na nsuka ya ngonda ya Marsi, kansi nti ya bafige ta buta bambuma kaka na ngonda ya Yuni. Ata mpidina, matiti me fuluka na nti mpi yo me basika nswalu. Yo yina, Yezu me yindula nde yo me yantika kubuta bafige. Kansi, yandi me mona nde nti yango kele ve ata ti mbuma mosi. Matiti monisaka bonso nde nti yai kele ti bambuma. Yo yina, Yezu me tuba nde: “Muntu mosi ve ta dia diaka mbuma na nge.” (Marko 11:14) Na mbala mosi, nti yango me yantika kuyuma. Yezu ta pesa ntendula na yo na suka ya kilumbu yina ke landa.

Ntama mingi ve, Yezu ti balongoki na yandi me kuma na Yeruzalemi. Yandi me kwenda na tempelo yina yandi talaka mazono na nima ya midi. Kansi bubu yai, Yezu me suka ve na kutala; yandi me sala diambu yina yandi salaka bamvula tatu me luta na Paki ya mvu 30 ya ntangu na beto. (Yoane 2:14-16) Yandi me kula “bantu yina vandaka kuteka mpi kusumba bima na tempelo.” Diaka, yandi me balusa “bamesa ya bantu yina vandaka kushanze mbongo mpi bakiti ya bantu yina vandaka kuteka bapizio.” (Marko 11:15) Yandi me bika ve nde muntu kuluta ti konso kima yina na kibansala ya tempelo sambu na kukwenda na simu ya nkaka ya mbanza.

Sambu na nki Yezu me baka lukanu ya ngolo mutindu yai sambu na bantu yina vandaka kushanze mbongo mpi kuteka bambisi na tempelo? Yandi me tuba nde: “Keti bo me sonikaka ve nde, ‘Bo ta binga nzo na mono nzo ya bisambu sambu na makanda yonso’? Kansi beno me kumisa yo nzo ya miyibi.” (Marko 11:17) Yo me fwana kibeni nde yandi binga bo miyibi sambu bo ke lomba mbongo mingi kuluta na bantu yina ke kwisa kusumba bambisi ya bo fwete pesa bimenga. Yezu me mona nde mambu yina bo ke sala kele bonso kubotula bantu bima to kuyiba bo.

Bamfumu ya banganga-nzambi, bansekudi, ti bantu ya nene na kati ya bantu me wa mambu yina Yezu me sala mpi bo me sosa diaka kufwa yandi. Kansi, diambu mosi ke kanga bo nzila. Bo ke mona ve mutindu ya kufwa Yezu sambu bantu mingi ke landa yandi sambu na kuwidikila yandi.

Katula Bayuda, bantu ya makanda ya nkaka yina me kumaka bantu ya dibundu ya Bayuda me kwisa mpi na Paki. Na kati na bo, beto lenda tanga Bagreki yina me kwisa kusambila na nkinsi yina. Bo me kwenda na Filipo ziku sambu yandi kele ti zina ya Bagreki, mpi bo me songa yandi nde bo ke zola kumona Yezu. Filipo me kwenda kusonga Andre, mbala ya nkaka sambu yandi ke kudiyula kana yo kele mbote nde bantu yai kukutana ti Yezu. Bo zole me kwenda kusonga Yezu diambu yango, ziku yandi kele kaka na tempelo.

Yezu me zaba nde bilumbu fioti me bikala sambu bo fwa yandi, yo yina yo kele ve ntangu ya kusosa kusepedisa bantu to ya kusosa nde bantu mingi kuzola yandi. Sambu na kupesa bantumwa yai zole mvutu, yandi me pesa mbandu yai: “Ntangu me lunga sambu Mwana ya muntu kubaka nkembo. Ya kieleka kibeni, mono ke tubila beno nde, kana mbuma ya ble kubwa ve na ntoto mpi kufwa ve, yo ke bikalaka kaka mbuma mosi; kansi kana yo fwa, yo ke butaka bambuma mingi.”—Yoane 12:23, 24.

Mbuma mosi ya ble lenda monana bonso nde yo kele ve mfunu. Kansi kana bo tula yo na ntoto mpi nkeni yango me “fwa,” yo lenda basika mpi na nima yo lenda kuma nti yina lenda buta bambuma mingi. Mutindu mosi, Yezu mpamba kele muntu ya kukuka. Kansi, kana yandi bikala ya kwikama na Nzambi tii na lufwa, yandi ta kuma nzila yina bantu mingi ya ke monisaka mpeve ya kuditambika bonso yandi ta baka luzingu ya mvula na mvula. Yo yina, Yezu me tuba nde: “Muntu yina ke zolaka luzingu na yandi ke fwa yo, kansi muntu yina ke menga luzingu na yandi na nsi-ntoto yai ta tanina yo sambu na luzingu ya mvula na mvula.”—Yoane 12:25.

Mambu yina Yezu me tuba ke tadila yandi kaka ve, sambu yandi me tuba nde: “Kana muntu ke zola kusadila mono, yandi fwete landa mono, mpi kisika mono kele nsadi na mono mpi ta vanda pana. Kana muntu ke zola kusadila mono, Tata ta pesa yandi lukumu.” (Yoane 12:26) Yo kele kibeni lusakumunu. Bantu yina tata na yandi ta pesa lukumu ta yala ti yandi na Kimfumu ya zulu.

Yezu me yindula bampasi ya mingi mpi lufwa ya mpasi yina ke vingila yandi; yandi me tuba nde: “Ntangu yai mono me kuma kisaka-saka, mpi mono ta tuba inki? Tata, gulusa mono na ntangu yai.” Yo ke tendula ve nde Yezu ke buya kusala luzolo ya Nzambi. Yandi me tuba nde: “Ata mpidina, yo yina kikuma ya mono me kwisa na ntangu yai.” (Yoane 12:27) Yezu ke ndima mambu yonso yina Nzambi me kanaka, tanga mpi lufwa na yandi ya kimenga.

Beto kele na Kintete Nisani 10 mpi Yezu kele na tempelo; yandi ke tubila lufwa na yandi ya me kuma pene-pene. Yandi ke kudiyangisa sambu lukumu ya Nzambi ta beba, yo yina yandi me tuba nde: “Tata, pesa zina na nge nkembo.” Ebuna, ndinga mosi me katuka na zulu mpi me tuba nde: “Mono me pesaka yo nkembo mpi mono ta pesa yo diaka nkembo.”—Yoane 12:27, 28.

Bantu yina kele pene-pene ya Yezu me kuma kisaka-saka. Bankaka ke yindula nde bo me wa makelele ya nzasi. Bankaka diaka me tuba nde: “Wanzio mosi me tubila yandi.” (Yoane 12:29) Kansi, ndinga yina bo me wa kele ya Yehowa. Yai kele ve mbala ya ntete yina bantu me wa Nzambi ke tuba sambu na Yezu.

Ntangu Yezu bakaka mbotika bamvula tatu ti ndambu me luta, Yoane Mbotiki waka Nzambi ke tuba sambu na Yezu nde: “Yai Mwana na mono, ya mono ke zolaka mingi, yina mono me ndima.” Diaka, na nima ya Paki ya mvu 32 ya ntangu na beto, Yezu kitukaka na ntwala ya Yakobo, ya Yoane mpi ya Piere. Babakala yai tatu waka Nzambi ke tuba nde: “Yai Mwana na mono, ya mono ke zolaka mingi, yina mono me ndima. Beno wila yandi.” (Matayo 3:17; 17:5) Kansi ntangu yai na mbala yai ya tatu, Yehowa me tuba na mutindu yina bantu mingi lenda wa.

Yezu me tuba nde: “Ndinga yai me wakana ve sambu na mono, kansi sambu na beno.” (Yoane 12:30) Yo me ndimisa nde Yezu kele kibeni mwana ya Nzambi, Mesia yina Masonuku bikulaka.

Diaka, luzingu ya kwikama ya Yezu me monisa mutindu bantu fwete zinga mpi me ndimisa nde Satana Diabulu, mfumu ya nsi-ntoto yai, fwete fwa. Yezu me tuba nde: “Ntangu yai bo ke sambisa nsi-ntoto yai; ntangu yai bo ta losa mfumu ya nsi-ntoto yai na nganda.” Lufwa ya Yezu ta monisa nde yandi me nunga kansi ve nde yandi me bela. Inki mutindu? Yandi me tuba nde: “Kansi mono, ntangu bo ta tombula mono, mono ta benda bantu ya mitindu yonso na mono.” (Yoane 12:31, 32) Ntangu Yezu ta fwa na zulu ya nti, yandi ta benda bantu ya nkaka na lweka na yandi, disongidila yandi ta kangudila bo nzila ya luzingu ya mvula na mvula.

Sambu na diambu yina Yezu me tubila ya me tala ‘kutombuka’ na yandi, kimvuka ya bantu me tuba nde: “Beto longukaka na Nsiku nde Kristu ta bikala kimakulu. Inki mutindu nge ke tuba nde bo fwete tombula Mwana ya muntu? Mwana yai ya muntu kele nani?” (Yoane 12:34) Bantu yai me mona mambu mingi ya me tala Yezu mpi bo me wa ndinga ya Nzambi kansi bantu mingi na kati na bo ke ndima ve nde yandi kele kibeni mwana ya muntu mpi Mesia ya lusilu.

Kaka mutindu yandi tubaka mbala ya me luta, Yezu me tuba nde yandi kele “nsemo.” (Yoane 8:12; 9:5) Yandi me longisila kimvuka ya bantu nde: “Nsemo ta vanda na kati na beno sambu na ntangu fioti diaka. Beno tambula ntangu beno kele ti nsemo, sambu mpimpa kununga beno ve . . . Ntangu beno kele ti nsemo, beno kwikila na nsemo, sambu beno kuma bana ya nsemo.” (Yoane 12:35, 36) Na nima, Yezu me kwenda kubumbana, sambu Nisani 10 kele ve kilumbu yina yandi fwete fwa. Na Paki ya Nisani 14, bo ta “tombula” yandi disongidila bo ta bula yandi minsonso na zulu ya nti.—Bagalatia 3:13.

Kana beto tala kisalu ya Yezu, yo kele pwelele nde mbikudulu yina me lungana ntangu Bayuda me kwikila ve na yandi. Yezaya tubaka nde meso ya bantu ta fwa mpi ntima na bo ta vanda ngolo yo yina bo ta balula ve ntima sambu na kuguluka. (Yezaya 6:10; Yoane 12:40) Ya kieleka, Bayuda mingi vandaka ntu-ngolo mpi buyaka mambu yina monisaka nde Yezu kele Ngulusi na bo yina Nzambi silaka, disongidila nzila ya ke nata na luzingu.

Nikodemo, Yozefi ya bwala Arimatea, ti bamfumu mingi ya nkaka “kwikilaka kibeni” na Yezu. Kansi, keti bo ta monisa lukwikilu, to bo ta vutuka nima, sambu bo ke wa boma nde bo ta kula bo na sinagoga to sambu bo ke ‘zolaka nkembo ya bantu’?—Yoane 12:42, 43.

Yezu yandi mosi me tendula kana kukwikila na yandi ke tendula nki, yandi me tuba nde: “Muntu yina ke kwikila na mono, yandi ke kwikila na mono kaka ve, kansi yandi ke kwikila mpi na muntu yina tindaka mono; mpi muntu yina ke mona mono ke mona mpi Muntu yina tindaka mono.” Kieleka yina Nzambi tindaka Yezu na kulonga mpi yina yandi ke landa kulonga kele mfunu mingi, yo yina yandi me tuba nde: “Muntu yina ke vweza mono mpi ke ndima ve mambu ya mono ke tuba, kele ti muntu yina ta sambisa yandi. Mambu yina mono me tuba, yo yina ta sambisa yandi na kilumbu ya nsuka.”—Yoane 12:44, 45, 48.

Na nsuka, Yezu me tuba nde: “Mono me tuba ve mambu yina me katuka na mono mosi, kansi Tata yina tindaka mono pesaka mono nsiku mosi sambu na mambu yina mono fwete tuba mpi mambu yina mono fwete longa. Mpi mono me zaba nde nsiku na yandi ke tendula luzingu ya mvula na mvula.” (Yoane 12:49, 50) Yezu me zaba nde kubika fioti, yandi ta tiamuna menga na yandi bonso kimenga sambu na bantu yina ke monisa lukwikilu na yandi.—Baroma 5:8, 9.