Bareferanse ya Mukanda ya Lukutakanu Luzingu mpi Kisalu
© 2022 Christian Congregation of Jehovah’s Witnesses
2-8 JANVIER
BIMVWAMA YA NDINGA YA NZAMBI | 2 BANTOTILA 22-23
“Sambu na Nki Beto Fwete Vanda Bantu ya Kudikulumusa?”
w00-F 15/9 29-30
Yoziasi Vandaka Muntu ya Kudikulumusa mpi Yehowa Ndimaka Yandi
Na suka-suka yonso, bantu yina ke salaka bisalu na tempelo me yantika dezia kisalu na bo. Ntembe kele ve nde, Yoziasi monisaka ntonda na Yehowa mutindu bantu yina ke salaka bisalu na Tempelo vandaka kukatula bima yina bankaka na yandi ya nkaka tulaka na nzo ya Nzambi sambu bima yango bebisaka lusambu ya Yehowa. Na ntangu bisalu vandaka kusalama, Shafani kwendaka kupesa Yoziasi rapore. Yandi vandaka ti mukanda mosi na maboko. Yo vandaka nki mukanda? Sekretere tubaka nde mukanda yina nganga-nzambi ya nene Hilkia monaka vandaka “mukanda ya Nsiku ya Yehowa yina yandi pesaka na nzila ya Moize.” (2 Bansangu 34:12-18) Bo monaka kima mosi ya mfunu mingi: ntembe kele ve nde yo vandaka Nsiku yina Moize yandi mosi sonikaka.
Yoziasi kele ti nzala ya ngolo ya kuwa mambu ya kele na mukanda yina. Ntangu Shafani vandaka kutanga yo, ntotila vandaka kusala yonso sambu na kubakisa mutindu konso nsiku vandaka kutadila yandi mpi bantu na yandi. Yandi yitukaka mingi-mingi na kuwa mutindu mukanda yina vandaka kutubila lusambu ya bunkete mpi vandaka kutuba nde kana bantu kulanda kusala lusambu ya luvunu, Nzambi ta singa bo mpi bo ta kwenda na kimpika. Ntangu Yoziasi bakisaka nde bankaka na yandi zitisaka ve bansiku yonso ya Nzambi, yandi pasulaka bilele na yandi mpi yandi songaka Hilkia, Shafani mpi bantu ya nkaka nde: ‘Beno kwenda, beno yula sambu na bantu, sambu Yehowa me wila beto makasi ya ngolo, sambu ba-nkaka na beto zitisaka ve mambu ya kele na mukanda yai.’—2 Bantotila 22:11-13; 2 Bansangu 34:19-21.
w00-F 15/9 30 § 2
Yoziasi Vandaka Muntu ya Kudikulumusa mpi Yehowa Ndimaka Yandi
Binati nsangu ya Yoziasi kwendaka kuyula profete Hulda yina vandaka na Yeruzalemi mpi bo vutukaka sambu na kupesa rapore. Hulda songaka bo mambu yina Yehowa tubaka. Yandi songaka bo nde mambu ya mpasi yina bo sonikaka na mukanda yina bo katukaka kumona ta kumina insi yai ya me pesa Yehowa mukongo. Kansi mutindu Yoziasi me kudikulumusa na ntwala ya Yehowa Nzambi, yandi ta mona ve bampasi yina. Yandi ta vukana ti bankaka na yandi mpi bo ta kwenda kuzika yandi na ngemba.—2 Bantotila 22:14-20; 2 Bansangu 34:22-28.
Bimvwama ya Kimpeve
w01-F 15/4 26 § 3-4
Nge Lenda Nunga yo Vanda Nge Me Yelaka Inki Mutindu
Ata Yoziasi vandaka na kisika yina vandaka ti bupusi ya mbi banda kileke, yandi kumaka kusala mambu yina vandaka mbote na meso ya Yehowa. Yandi salaka mambu ya mbote na luyalu na yandi. Yo yina Biblia ke tuba nde: “Kuvandaka ve ata ti ntotila mosi bonso yandi na ntwala na yandi, yina vutukaka na Yehowa na ntima na yandi ya mvimba mpi na moyo na yandi ya mvimba mpi na ngolo na yandi yonso, na kuwakana ti Nsiku yonso ya Moize; muntu mosi ve bonso yandi basikaka mpi na nima na yandi.”—2 Bantotila 23:19-25.
Yoziasi kele kibeni mbandu mosi ya mbote sambu na konso muntu yina niokwamaka na kileke na yandi. Inki dilongi beto lenda baka? Inki sadisaka Yoziasi na kupona nzila ya mbote mpi na kulanda kutambula na nzila yina?
9-15 JANVIER
BIMVWAMA YA NDINGA YA NZAMBI | 2 BANTOTILA 24-25
“Landa Kusala Mambu Kukonda Kusukinina”
Kilumbu Yehowa Ta Sambisa Bantu Me Kuma Pene-Pene!
2 Ntembe kele ve nde mambu yina Sofonia vandaka kuzabisa kusadisaka Yoziasi na kubakisa nde yo lombaka kukatula lusambu ya mvindu na Yuda. Kansi mambu yina ntotila salaka sambu na kukatula lusambu ya luvunu manisaka ve mambi yonso na kati ya bantu to kulolula masumu ya nkaka na yandi, Ntotila Manase, yina “fwaka . . . bantu mingi na Yeruzalemi bayina salaka mbi ve.” (2 Bantotila 24:3, 4; 2 Bansangu 34:3) Yo yina, ntembe kele ve nde yo lombaka kaka nde kilumbu ya Yehowa kukwisa.
Bangindu ya Mfunu ya Mukanda ya Yeremia
Yo vandaka na mvu 607 N.T.B. ntangu Sedekiasi kulungisaka bamvula 11 na luyalu na yandi. Ntotila Nebukodonozore ya Babilonia kuzyungaka Yeruzalemi na bangonda 18 na ntwala. Na kilumbu ya nsambwadi ya ngonda ya tanu, na mvula ya 19 ya luyalu ya Nabukodonozore, Nebuzaradani, konseye ya ntotila mpi mfumu ya basoda, “kwisaka” kukota to kumaka na Yeruzalemi. (2 Bantotila 25:8) Ziku Nebuzaradani vandaka kukengidila dyambu yango katuka na kan na yandi na nganda ya bibaka ya mbanza, mpi yandi bakaka lukanu ya kubotula yo. Bilumbu tatu na nima, na kilumbu ya kumi ya ngonda, yandi “kwisaka kukota” na Yeruzalemi. Mpi yandi tulaka mbanza yango tiya.—Yeremia 52:12, 3.
Bimvwama ya Kimpeve
Bangindu ya Mfunu ya Mukanda ya Zole ya Bantotila
24:3, 4. Sambu Manase fwaka bantu mingi, Yehowa ‘zolaka ve kuwila Yuda mawa.’ Nzambi ke bakaka na valere menga ya bantu yina me sala kwabo ve kima. Beto lenda tula ntima nde Yehowa ta vutula mbela sambu na menga ya bantu yina ntangu yandi ta fwa bantu yina fwaka bo.—Nkunga 37:9-11; 145:20.
16-22 JANVIER
BIMVWAMA YA NDINGA YA NZAMBI | 1 BANSANGU 1-3
“Biblia Kele Mukanda Yina Ke Tubaka Kieleka Kansi Yo Kele Ve Mukanda ya Mwanda-Mwanda”
w09-F 1/9 14 § 2
Keti Adami ti Eva Zingaka Kibeni?
Mu mbandu, beto tadila balisiti ya bandonga ya mabuta ya Bayuda yina kele na mukanda ya 1 Bansangu kapu 1 tii na kapu 9, mpi na evanzile ya Luka kapu 3. Bandonga ya mabuta yai ya bo me tendula mbote-mbote ke tadila bandonga ya mabuta banda na 48 tii na 75. Luka ke tubila ndonga ya dibuta yina Yezu Kristu butukaka mpi mukanda ya Bansangu ke tubila bazina ya bantu yina vandaka na dibuta ya bantotila mpi ya banganga-nzambi na dikanda ya Izraele. Konso lisiti kele ti bazina ya bantu yina me zabanaka mingi mu mbandu, Salomo, Davidi, Yakobi, Izaki, Abrahami, Noa mpi na nsuka Adami. Bazina yina kele na balisiti yonso zole kele bazina ya bantu yina zingaka kibeni, mpi Adami vandaka muntu ya ntete yina zina na yandi kele na konso lisiti. Yandi zingaka kibeni.
Disolo ya Noa ti ya Mvula ya Ngolo Kele Kieleka, Kansi Disapu Ve
Masolo zole ya Biblia ya ke tubilaka ndonga ya mabuta ke monisa nde Noa vandaka muntu ya kieleka. (1 Bansangu 1:4; Luka 3:36) Esdrasi ti Luka, yina tubilaka bandonga yai, salaka bansosa na dikebi yonso mpenza. Luka tubilaka ndonga ya Yezu Kristu banda na Noa.
w09-F 1/9 14-15
Keti Adami ti Eva Zingaka Kibeni?
Mu mbandu, beto tadila dilongi mosi ya Biblia yina bantu mingi ya ke sambilaka ke zolaka mingi. Dilongi yango kele nkudulu. Na kutadila dilongi yai, Yezu Kristu pesaka luzingu na yandi ya kimuntu ya kukuka bonso nkudulu sambu na kugulusa bantu na masumu na bo. (Matayo 20:28; Yoane 3:16) Mutindu beto me zaba yo, nkudulu kele ntalu ya bo ke futaka sambu na kusumba diaka kima mosi buna to sambu na kufuta kima yina me vila to ya bo botulaka. Ntalu yango fwete vanda na valere ya kima yina. Yo yina Biblia ke bingaka Yezu “nkudulu ya me fwanana.” (1 Timoteo 2:6) Beto lenda kudiyula nde: Ya me fwanana na nki? Biblia ke pesa mvutu nde “kaka mutindu na Adami bantu yonso ke fwaka, mutindu mosi mpi na Kristu bantu yonso ta baka luzingu.” (1 Bakorinto 15:22) Luzingu ya kukuka yina Yezu pesaka sambu na kusumba diaka bantu ya bulemfu me fwanana kibeni ti luzingu yina Adami vidisaka sambu yandi sumukaka na kilanga ya Edeni. (Baroma 5:12) Yo kele pwelele nde kana Adami zingaka ve, kimenga ya nkudulu ya Yezu zolaka ve kuvanda ata fioti mfunu.
Bimvwama ya Kimpeve
it-1-F 977 § 2-3
Masolo ya Mabuta
Bazina ya Bankento. Na mikanda yina bo vandaka kusonika bazina ya mabuta, bo vandaka ve kusonika bazina ya bankento mpamba-mpamba. Bo vandaka kusonika bazina na bo kaka sambu na kumonisa ndonga mosi buna. Na Kuyantika 11:29, 30, Biblia ke tanga zina ya Sarai (Sara). Ntembe kele ve nde, yo ke tanga zina na yandi sambu Nzambi silaka nde Nkuna ya lusilu ta katuka na Sarai, kansi ve na nkento ya nkaka ya Abrahami. Biblia ke tanga mpi zina ya Milka kaka na verse yango yina. Yo lenda vanda sambu yandi vandaka nkaka ya Rebeka, nkento ya Izaki. Yo vandaka mutindu ya kumonisa nde dibuta yina Rebeka katukaka vandaka bampangi ya Abrahami sambu yo vandaka ve kulomba nde Izaki kukwela nkento ya dikanda ya nkaka. (Kuy 22:20-23; 24:2-4) Kuyantika 25:1 ke tanga zina ya Ketura, nkento yina Abrahami kwelaka na nima. Diambu yai ke monisa nde, Abrahami kwelaka diaka na nima ya lufwa ya Sara mpi nde yandi vandaka kaka ti makuki ya kubuta bamvula 40 na nima ya ntangu yina Yehowa salaka kima mosi ya kuyituka sambu yandi zwa makuki ya kubuta. (Bar 4:19; Kuy 24:67; 25:20) Diaka, bantendula yai ya fioti-fioti ke monisa nde Madiani mpi makanda ya nkaka ya baarabi yina vandaka na Izraele vandaka bampangi.
Biblia ke tanga zina ya Lea, Rashele mpi ya bamakangu ya Yakobi ti ya bana ya babakala yina bo butaka. (Kuy 35:21-26) Yo ke sadisa beto na kubakisa mutindu Nzambi ta sadila bana yai mambu na nima. Na mikanda yina bo vandaka kusonika bazina ya bandonga ya mabuta, bo sonikaka mpi bazina ya bankento ya nkaka sambu na bikuma ya mutindu mosi. Bo vandaka kusonika bazina na bo kana bo ke zola kupesa dikabu na nzila na bo. (Kut 26:33) Kansi Tamare, Rahabi mpi Ruti, bo tangaka bazina na bo sambu na bikuma ya nkaka. Sambu na bo, bo tubilaka kima mosi ya sipesiali sambu na kumonisa mutindu bo mpi bo kotaka na ndonga ya bankaka ya Yezu Kristu yina vandaka Mesia. (Kuy 38; Rut 1:3-5; 4:13-15; Mat 1:1-5) Biblia ke tangaka mpi bazina ya bankento ya nkaka na balisiti ya bandonga ya mabuta, mu mbandu na 1 Bansangu 2:35, 48, 49; 3:1-3, 5.
23-29 JANVIER
BIMVWAMA YA NDINGA YA NZAMBI | 1 BANSANGU 4-6
“Bisambu na Mono Ke Monisaka nde Mono Kele Muntu ya nki Mutindu?”
w10-F 1/10 23 § 3-7
“Muntu ya Ke Waka Bisambu”
Yabesi vandaka muntu ya bisambu. Na luyantiku ya kisambu na yandi, yandi lombaka Nzambi na kusakumuna yandi. Na nima, yandi lombaka Nzambi bima tatu. Bima yina yandi lombaka monisaka nde yandi vandaka ti lukwikilu ya ngolo.
Ya ntete, Yabesi songaka Nzambi nde: “Kumisa teritware na mono nene.” (Verse 10) Muntu yai ya lukumu vandaka ve muntu yina ke zolaka nde ntoto ya bantu yina yandi ke zingaka ti bo kukuma ya yandi. Mbala ya nkaka mambu yina yandi vandaka kulomba vandaka kutadila bantu kansi ntoto ve. Mbala ya nkaka yandi vandaka kulomba nde teritware na yandi kukuma nene na ngemba yonso sambu bantu mingi ya ke sambilaka Yehowa kuvanda na kati.
Ya zole, Yabesi bondilaka Nzambi sambu “diboko” ya Nzambi kuvanda ti yandi. Diboko ya kifwani ya Nzambi kele ngolo na yandi, disongidila ngolo yina yandi ke sadilaka sambu na kusadisa bansadi na yandi. (1 Bansangu 29:12) Sambu Yabesi kuzwa bima yina yandi kele ti mfunu na yo, yandi tulaka ntima na Nzambi sambu diboko ya Nzambi ke vandaka ve nkufi na lweka ya bantu yina ke kwikilaka na yandi.—Yezaya 59:1.
Ya tatu, Yabesi sambaka nde: “Tanina mono na bampasi, sambu yo natila mono ve mpasi.” Bangogo “sambu yo natila mono ve mpasi” lenda monisa nde Yabesi sambaka sambu yandi mona ve mpasi to sambu yandi niokwama ve na malanda ya mbi.
Kisambu yina Yabesi salaka ke monisa nde yandi vandaka kudiyangisa sambu na lusambu ya bunkete mpi nde yandi vandaka kukwikila mpi kutudila Muntu Yina Ke Waka Bisambu ntima. Inki mutindu Yehowa pesaka yandi mvutu? Disolo yai ya nkufi ke mana ti bangogo yai: “Mpi Nzambi lungisaka mambu yina yandi lombaka.”
Bimvwama ya Kimpeve
Bangindu ya Mfunu ya Mukanda ya Ntete ya Bansangu
5:10, 18-22. Na bilumbu ya Ntotila Saule, bantu ya makanda yina vandaka na esti ya Yordani bedisaka bantu ya Agare na bitumba ata bo vandaka mingi kuluta mbala 2 bantu ya makanda yango. Yo salamaka mutindu yina sambu babakala ya kikesa ya makanda yina tulaka ntima na Yehowa mpi sosaka lusadisu na yandi. Bika beto tula ntima ya mvimba na Yehowa ntangu beto ke nwana bitumba ya kimpeve ti bambeni yina kele mingi kuluta beto.—Efezo 6:10-17.
30 JANVIER–5 FÉVRIER
BIMVWAMA YA NDINGA YA NZAMBI | 1 BANSNGU 7-9
“Yehowa Lenda Sadisa Nge na Kulungisa Mikumba ya Mpasi”
Bangindu ya Mfunu ya Mukanda ya Ntete ya Bansangu
9:26, 27. Balevi yina vandaka kukengila bakielo vandaka ti mukumba mosi ya nene yina vandaka kulomba bantu ya me fwana na kutudila ntima. Bo pesaka bo bansabi ya bakielo ya bisika ya santu ya tempelo. Bo vandaka bantu ya kutudila ntima yina vandaka kukangula bakielo konso kilumbu. Yehowa me pesaka beto mukumba ya kusosa bantu ya teritware na beto mpi ya kusadisa bo na kusambila yandi. Keti beto fwete vanda ve bantu ya kwikama mpi ya kutudila ntima kaka mutindu Balevi yina vandaka kukengila bakielo vandaka?
w11-F 15/9 32 § 7
Keti Nge Lenda Landa Mbandu ya Fineasi Ntangu Nge Ke Kutana ti Bampasi?
Fineasi vandaka ti mikumba ya nene na Izraele; ata mpidina kikesa na yandi, mayele na yandi mpi ntima yina yandi vandaka kutudila Nzambi sadisaka yandi na kununga bampasi. Kudipesa yina yandi kudipesaka salaka nde Yehowa kundima yandi. Kiteso ya bamvula 1000 na nima, Esdrasi sonikaka na nzila ya mpeve santu nde: “Fineasi mwana ya Eleazare muntu vandaka ntete ntwadisi na bo; Yehowa vandaka ti yandi.” (1 Bans. 9:20) Bika nde Yehowa kuvanda ti bampangi yonso yina kele ti mikumba na dibundu ya Bukristu mpi ti bansadi na yandi yonso ya kwikama.
Bimvwama ya Kimpeve
Beto Yimbila Yehowa
6 Ee, na nzila ya baprofete na yandi, Yehowa songaka bansambidi na yandi na kukumisa yandi ti bankunga. Yandi lombaka nkutu nde bayimbi ya dikanda ya banganga-Nzambi kusala ve bisalu yankaka yina Balevi yankaka vandaka kusala, sambu bo pesa ntangu ya me fwana na kusonika bankunga, mpi kukonda ntembe, na kusala barepetisio.—1 Bans. 9:33.
6-12 FÉVRIER
BIMVWAMA YA NDINGA YA NZAMBI | 1 BANSANGU 10-12
“Kumisa Ngolo Mpusa na Nge ya Kusala Luzolo ya Nzambi”
“Longa Mono na Kusala Luzolo na Nge”
12 Kele ti diambu ya nkaka yina beto lenda longuka na mutindu Davidi salaka mambu. Yandi bakisaka mutindu ya kusadila minsiku mpi zolaka kuzinga na kuwakana ti yo. Mu mbandu, kilumbu mosi Davidi tubaka nde yandi vandaka na nzala ya ‘kunwa masa na dibulu ya masa ya Betelemi.’ Kansi Betelemi vandaka na maboko ya Bafilistia. Bantu na yandi tatu tulaka luzingu na bo na kigonsa na mutindu bo kwendaka na mbanza yina sambu na kubaka masa. Kansi, Davidi “nwaka yo ve; yandi losaka yo na ntoto sambu na kupesa makabu na Mfumu Nzambi.” Sambu na nki? Davidi tendulaka nde: “Nzambi! Mono lenda nwa masa yai ve. Yo kele bonso menga ya bantu kwendaka kupesa na lufwa yai!”—1 Bans. 11:15-19.
13 Davidi zabaka nde Nsiku vandaka kutuba nde bo fwete tiamuna menga na ntoto sambu na Yehowa mpi bo fwete dia yo ve. Yandi bakisaka mpi kikuma yina diambu yai vandaka na kati ya Nsiku. Davidi zabaka nde: “Moyo ya konso kima ke vandaka na menga.” Kansi, yo vandaka masa kansi menga ve. Sambu na nki Davidi buyaka kunwa yo? Yandi bakisaka munsiku yina katukaka na Nsiku na yina metala menga. Yandi bakisaka nde Yehowa ke bakaka menga na mbalu mingi. Sambu bantu yai tatu lendaka kufwa ntangu bo kwendaka kubaka masa, Davidi monaka nde kunwa masa yina vandaka kukonda kuzitisa menga na bo yina vandaka na mbalu mingi. Na kisika ya kunwa yo, yandi bakaka lukanu ya kutiamuna yo na ntoto.—Levi 17:11; Kul. 12:23, 24.
Bika Bansiku mpi Minsiku ya Nzambi Kulonga Kansansa na Nge
5 Katula kutanga mpi kuzaba bansiku ya Nzambi, beto fwete sala mambu ya nkaka sambu bansiku yango kusadisa beto. Beto fwete zola yo mpi kuzitisa yo. Biblia ke tuba nde: “Beno menga mambu ya mbi, mpi beno zola mambu ya mbote.” (Amosi 5:15) Kansi nki mutindu beto lenda sala yo? Beto fwete sala ngolo na kukuma kutadila mambu bonso Yehowa. Yindula nde nge ke lala ve mpongi mbote mpi munganga me pesa nge bandongisila na kudia madia ya mbote, na kusala bangalasisi mingi mpi na kusala bansoba ya nkaka na luzingu. Nge me zitisa bandongisila na yandi mpi nge me kuma kulala mpongi mbote! Nge ta sepela mingi na bandongisila ya munganga yina!
6 Mutindu mosi, Ngangi me pesaka beto bansiku sambu na kutanina beto na bampasi yina masumu ke nataka mpi sambu na kutomisa luzingu na beto. Mu mbandu, Biblia ke longaka nde beto fwete kusa ve, kuyiba ve, kusala ve pite, kusala ve mubulu to mambu yina kele ti kuwakana ti bademo. (Tanga Bingana 6:16-19; Kusonga 21:8) Ntangu beto ke monaka mambote yina kulemfukila Yehowa ke nataka, zola na beto sambu na yandi mpi bansiku na yandi ke kumaka ngolo.
Bimvwama ya Kimpeve
it-1-F 492 § 2-3
Ntima
Kusadila Nzambi na “Ntima ya Mvimba.” Sambu ntima yina beto ke vandaka ti yo kusala mbote, yo fwete vanda ya mvimba, kansi ntima na beto ya kifwani lenda vanda ya kukabwana. Davidi sambaka nde: “Pesa mono ntima ya kukonda kukabwana sambu mono wa zina na nge boma.” Mambu yai ya yandi tubaka ke monisa nde muntu lenda vanda ti ntima ya kukabwana na yina me tala mawi ya yandi kele ti yo mpi boma ya yandi kele ti yo. (Nkunga 86:11) Muntu ya mutindu yai lenda vanda ti ‘ntima ya kukabwana,’ disongidila nde yandi lenda sambila Nzambi kukonda kikesa. (Nkunga 119:113; Kusonga 3:16) Muntu lenda vanda mpi ti “bantima zole” (na kisina, ntima mpi ntima). Yandi lenda sadila bamfumu zole to kukusa kima mosi kansi kwaku, yandi ke yindula kima ya nkaka. (1 Bansangu 12:33; Nkunga 12:2, noti na nsi ya lutiti) Yezu monisaka na kikesa yonso nde bantu yina kele ti bantima zole kele bantu ya luvunu.—Mat 15:7, 8.
Konso muntu yina ke zola kupesa Nzambi kiese fwete vanda ve ti ntima ya kitini, yandi fwete vanda mpi ve ti bantima zole. Kansi yandi fwete sadila yandi ti ntima ya mvimba. (1Bs 28:9) Yo ke lombaka bikesa mingi sambu ntima kele kibeni luvunu mpi yo ke zolaka kaka kusala mambu ya mbi. (Yer 17:9, 10; Kuy 8:21) Sambu na kulanda kuvanda ti ntima ya mvimba, yo kele mfunu na kusamba na masonga yonso (Nk 119:145; Bid 3:41), kulonguka Ndinga ya Nzambi mbala na mbala (Esd 7:10; Bin 15:28), kuvanda kikesa na kisalu ya kulonga nsangu ya mbote (tala Yer 20:9), mpi kuvanda banduku ya bantu yina ntima na bo ke vandaka ya mvimba na Yehowa.—Tala 2Bn 10:15, 16.
13-19 FÉVRIER
BIMVWAMA YA NDINGA YA NZAMBI | 1 BANSANGU 13-16
“Kulanda Lutwadisu ya Yehowa Ke Nataka Mambote”
Keti Nge Ke Yulaka nde “Yehowa Kele Wapi?”
12 Na nima ya kuvutula Sanduku ya kuwakana na Izraele mpi ya kutanina yo bamvula mingi na Kiriati-Yearimi, Ntotila Davidi kuzolaka nde bo nata yo na Yeruzalemi. Yandi solulaka ti bambuta-bantu mpi yandi tubaka nde bo takatula Sanduku na bwala yina ‘kana bo me zola mpi kana Mfumu Nzambi mpi me ndima.’ Kansi yandi salaka kifu na kukonda kuzikisa mbotembote luzolo ya Yehowa sambu na dyambu yango. Kana yandi salaka yo, bo zolaka kunata ve ata fioti Sanduku yango na zulu ya pusupusu. Balevi ya kikanda ya Kehati bantu zolaka kunata yo na mapeka na bo, mutindu Nzambi kupesaka nsiku. Ata Davidi vandaka ti kikalulu ya kusosa lutwadisu ya Yehowa, na mbala yai yandi salaka yo ve. Yo yina mpasi bwilaka bo. Na nima Davidi ndimaka nde “Nzambi na beto, pesaka beto ndola ya lufwa sambu beto landaka ve bansiku na yandi.”—1 Bansangu 13:1-3; 15:11-13; Kutanga 4:4-6, 15; 7:1-9.
Keti Nge Ke Yulaka nde “Yehowa Kele Wapi?”
13 Nsukansuka, ntangu bantu ya Levi nataka Sanduku yina katuka na nzo ya Obedi-Edomi tii na Yeruzalemi, bo yimbaka nkunga mosi ya Davidi kusonikaka. Na kati ya nkunga yango yandi kotisaka ngibusa yai ya masonga: “[Beno sosa Yehowa ti ngolo na yandi, beno sosa luse na yandi ntangu yonso, NW]. Beno yindula mambu ya nene ti ya kuyituka ya yandi salaka, beno yindula mpi mutindu yandi vandaka kusambisa bantu.”—1 Bansangu 16:11, 12.
Bimvwama ya Kimpeve
Sambila Yehowa, Ntotila ya Kukonda Nsuka
14 Davidi nataka sanduku ya kuwakana ya santu na Yeruzalemi. Na dibaku yai ya kiese, Balevi yimbaka nkunga mosi ya kukumisa yina vandaka ti bangogo yai ya mfunu mingi ya kele na 1 Bansangu 16:31: “Beno songa bantu yonso nde: ‘Yehowa me kuma ntotila!’” Nge lenda kudiyula nde: ‘Kana Yehowa kele Ntotila ya kukonda nsuka, inki mutindu yandi kumaka Ntotila na ntangu yina?’ Yehowa kumaka Ntotila ntangu yandi monisaka Kimfumu na yandi to tulaka ngidika mosi sambu na kuvanda mumonisi na yandi na nsungi mosi buna to sambu na kutadila diambu mosi ya sikisiki. Mutindu yai ya kuyala ya Yehowa kele na ntendula mosi ya mfunu kibeni. Na ntwala nde Davidi kufwa, Yehowa silaka nde kimfumu na yandi ta vanda kimakulu; yandi tubaka nde: ‘Mono ta tula mwana na nge mosi kibeni na kisika na nge, mono ta kumisa kimfumu na yandi ngolo.’ (2 Sam. 7:12, 13) Nsuka-nsuka, “mwana” yai ya Davidi monanaka kiteso ya bamvula kuluta 1000 na nima. Yo vandaka nani, mpi inki ntangu yandi zolaka kukuma Ntotila?
20-26 FÉVRIER
BIMVWAMA YA NDINGA YA NZAMBI | 1 BANSANGU 17-19
“Landa Kuvanda na Kiese ata Mambu Me Salama Ve Mutindu Nge Vandaka Kuzola”
Yindula Mambote ya Beto Ke Bakaka na Organizasio ya Yehowa
DAVIDI, muntu ya Izraele ya ntama, kele na kati ya bantu ya kuluta nene yina Masonuku ya Kiebreo ketubilaka. Yandi vandaka ngungudi, muyimbi-bankunga, profete, mpi ntotila, mpi yandi vandaka kutula ntima na yandi yonso na Yehowa Nzambi. Kinduku ya ngolo yina Davidi kuvandaka na yo ti Yehowa kupesaka yandi mpusa ya kutungila Nzambi nzo. Nzo, to tempelo, yango zolaka kukuma kisika ya nene ya lusambu ya kieleka na Izraele. Davidi kuzabaka nde tempelo ti kisalu yina vandaka kusalama zolaka kunatila bantu ya Nzambi kiese mpi balusakumunu mingi. Yo yina, yandi yimbaka nde: “Bantu yina ya nge me sola, bayina ya nge ke baka na kuvanda na nzo na nge, bo bakwetu ke na kiese! Beto ta mona kaka kiese na mambote yina kele na nzo na nge Nzambi!”—Nkunga 65:5.
Sepela ti Mambu Yina Nge Lenda Sala Sambu na Yehowa
11 Mutindu mosi, beto lenda kuma ti kiese mingi kana beto ke sala bikesa sambu na kusala mbote konso kisalu yina bo ke pesa beto na kisalu ya Yehowa. “Kudipesa ya mvimba” na kisalu ya kulonga nsangu ya mbote mpi na kusala bisalu ya dibundu. (Bis. 18:5; Baeb. 10:24, 25) Yidika mbote balukutakanu sambu nge pesa bamvutu mpi bakomantere ya ke pesa kikesa. Kubaka ve na nsaka konso disolo yina bo ke pesa nge na lukutakanu ya kati-kati ya mposo. Kana bo me lomba nge na kulungisa mukumba mosi na dibundu, sala yo na ntangu ya mbote mpi monisa nde nge kele muntu yina bo lenda tudila ntima. Kuyindula ve nde kisalu yina bo me pesa nge na dibundu kele ve mfunu mpi nde nge kele ve ti mfunu ya kulutisa ntangu na nge na kusala yo. Sala ngolo sambu nge kuma kusala kisalu na nge mbote. (Bing. 22:29) Kana nge ke kudipesa ya mvimba na mambu ya kimpeve mpi na mikumba na nge, nge ta yela nswalu mpi nge ta kuma ti kiese mingi. (Bag. 6:4) Yo ta vandila nge ve mpasi na kusepela ti bampangi yina ke baka mukumba yina nge ke zolaka.—Bar. 12:15; Bag. 5:26.
Bimvwama ya Kimpeve
w20.02 12, lupangu
Beto Ke Zolaka Mingi Yehowa, Tata na Beto
Keti Yehowa Ke Tudila Mono Dikebi?
Keti nge me kudiyulaka dezia ngiufula yai: ‘Mutindu bantu kele mingi awa na ntoto, keti Yehowa lenda tudila mono dikebi?’ Kana mpidina, nge kele ve nge mosi. Ntotila Davidi sonikaka nde: “O Yehowa, muntu kele nani sambu nge mona yandi, mwana ya muntu kele nani sambu nge tudila yandi dikebi?” (Nk. 144:3) Davidi ndimaka nde Yehowa zabaka yandi mbote. (1 Bans. 17:16-18) Diaka, na nzila ya Ndinga na yandi mpi ya dibundu na yandi, Yehowa ke ndimisa nge nde yandi ke monaka zola yina nge ke monisilaka yandi. Beto tadila baverse yina lenda sadisa nge na kundima kieleka yai:
• Yehowa monaka nge na ntwala nkutu nde nge butuka.—Nk. 139:16.
• Yehowa ke zabaka mambu yina kele na ntima na nge mpi bangindu na nge.—1 Bans. 28:9.
• Yehowa ke waka bisambu na nge yonso.—Nk. 65:2.
• Mambu yina nge ke salaka lenda sepedisa Yehowa to kupesa yandi mpasi.—Bing. 27:11.
• Yehowa me bendaka nge na yandi.—Yoa. 6:44.
• Yehowa ke zaba nge mbote, kana nge me fwa, yandi ta futumuna nge ti nitu ya mpa bonso yina nge vandaka na yo ti mabanza na nge, mambu yina nge zabaka mpi kimuntu na nge.—Yoa. 11:21-26, 39-44; Bis. 24:15.
27 FÉVRIER–5 MARS
BIMVWAMA YA NDINGA YA NZAMBI | 1 BANSANGU 20-22
“Sadisa Batoko na Kusala Mambu Mbote”
“Mambu Yai Pesa Yo na Bantu ya Kwikama”
8 Tanga 1 Bansangu 22:5. Mbala ya nkaka, Davidi monaka nde Salomo me kuka ntete ve na kutwadisa kisalu yina ya nene. Tempelo yina bo ta tunga “fwete vanda kitoko mingi kibeni.” Salomo vandaka ‘leke mpi yandi zabaka mambu mingi ve.’ Kansi Davidi zabaka nde Yehowa ta sadisa Salomo na kusala kisalu yai ya mfunu. Yo yina, Davidi salaka yonso sambu na kusadisa yandi na kusala kisalu yai.
“Mambu Yai Pesa Yo na Bantu ya Kwikama”
7 Sambu Davidi vandaka kibeni na mfunu ya kutungila Yehowa tempelo, ziku yo pesaka yandi mpasi mingi. Ata mpidina, yandi sadisaka kibeni mwana na yandi Salomo na kisalu ya tempelo yina yandi ta tunga. Davidi yidikaka dezia bantu yina ta sala kisalu mpi bibende, kwivre, arza, wolo mpi mabaya. Yandi kudiyangisaka ve nde muntu ya nkaka ta baka lukumu yina yandi zolaka kubaka kana yandi tungaka tempelo. Salomo bakaka lukumu yina sambu bo bingaka yo tempelo ya Salomo. Nkutu, yandi siamisaka Salomo na bangogo yai: “Ntangu yai, mwana na mono, bika Yehowa kuvanda ti nge, mpi bika nge nunga mpi nge tunga nzo ya Yehowa Nzambi na nge, kaka mutindu yandi tubaka sambu na nge.”—1 Bansangu 22:11, 14-16.
Bibuti, Beto Sadisa Mwana na Kuyela mpi Kubaka Mbotika
14 Bankuluntu lenda pesa mpi bibuti maboko kana bo ke siamisa mingi bana na kuditudila balukanu ya kimpeve. Mpangi-nkento mosi ke yibukaka nde ntangu yandi vandaka ti bamvula sambanu mpangi Russell solulaka ti yandi. Yandi ke tuba nde, “Yandi solulaka ti mono minuta 15 na yina me tala balukanu na mono ya kimpeve.” Inki mutindu masolo yina sadisaka mpangi-nkento? Na nima, yandi kumaka mupasudi-nzila mpi yandi salaka kisalu yai bamvula kuluta 70. Yo kele pwelele nde bangogo ya mbote ya ke siamisa lenda sadisa muntu luzingu na yandi ya mvimba. (Bingana 25:11) Bankuluntu lenda lomba bibuti ti bana na kupesa maboko na bisalu yina ke salama na Nzo ya Kimfumu. Bo lenda lomba bana na kusala bisalu yina ke wakana ti bamvula mpi ngolo na bo.
15 Inki lusadisu bampangi ya nkaka lenda pesa? Bo lenda sadisa baleke kana bo ke tudila bo dikebi ya mingi. Mu mbandu, nge lenda sikisa baleke na mambu yina bo ke sala sambu na kukwenda pene-pene na Yehowa. Keti mwana mosi pesaka mvutu ya mbote to me sala disolo na lukutakanu? Keti yandi longaka muntu mosi na nzo-nkanda to yandi salaka mambu ya mbote ntangu bo pusaka yandi na kusala mambu ya mbi? Kana mpidina, sikisa yandi nde yandi me sala mambu ya mbote kibeni! Beto fwete solulaka ti baleke na ntwala mpi na nima ya balukutakanu. Mpidina, baleke ta bakisa nde bo kele na kati ya “dibundu ya nene.”—Nkunga 35:18.
Bimvwama ya Kimpeve
Bangindu ya Mfunu ya Mukanda ya Ntete ya Bansangu
21:13-15. Yehowa songaka wanzio na kubikisa kupesa bantu mpasi sambu Yandi ke waka ntima mpasi kana bantu na Yandi ke mona mpasi. Ya kieleka, “yandi kele mawa mingi.”