Ntangu bankento me mona nde maziamu me bikala ya mpamba, bo me wa mpasi kibeni na ntima. Maria Magdala me baka ntinu mpi me kwenda “na Simoni Piere mpi na longoki yina ya nkaka, yina Yezu vandaka kuzola,” disongidila ntumwa Yoane. (Yoane 20:2) Kansi, bankento ya nkaka yina me bikala na maziamu me mona wanzio mosi. Wanzio ya nkaka kele na kati ya maziamu, yandi “me lwata mvwela ya mpembe.”—Marko 16:5.

Wanzio mosi me songa bo nde: “Beno wa boma ve, sambu mono me zaba nde beno ke sosa Yezu yina bo fwaka na zulu ya nti. Yandi kele awa ve, sambu yandi me futumuka, kaka mutindu yandi tubaka. Beno kwisa kutala kisika yina yandi vandaka ya kulala. Ebuna beno kwenda nswalu mpi beno songa balongoki na yandi nde yandi me telama na bafwa, mpi yandi ke kwenda na ntwala na beno na Galilea.” (Matayo 28:5-7) Sambu ‘matekita mpi boma ya ngolo me simba bo,’ bankento yai me kwenda ntinu kuzabisa balongoki.—Marko 16:8.

Ntangu yai, Maria me mona Piere ti Yoane. Yandi ke pema ntinu mpi me songa bo nde: “Bo me katula Mfumu na maziamu, mpi beto me zaba ve kisika bo me tula yandi.” (Yoane 20:2) Na mbala mosi, Piere ti Yoane me kwenda ntinu. Yoane kele ntinu mingi mpi me kuma muntu ya ntete na maziamu. Yandi me longula na kati mpi me mona bilele, kansi yandi me telama na nganda.

Ntangu Piere me kuma, yandi me kota mbala mosi na kati. Yandi me mona bilele ya lino mpi bilele yina bo ziungaka Yezu na ntu. Ntangu yai Yoane me kota mpi me ndima mambu yina Maria songaka bo. Na kutadila mambu yina Yezu songaka bo na ntwala, ata muntu mosi ve ke bakisa nde yandi me futumuka. (Matayo 16:21) Mambu yina bo me mona me yitukisa bo ngolo mpi bo me vutuka na nzo. Kansi, Maria me kwisa diaka na maziamu mpi me bikala pana.

Na ntangu yina, bankento yina ya nkaka ke vutuka sambu na kuzabisa balongoki nde Yezu me futumuka. Ntangu bo ke kwenda ntinu, Yezu me kutana ti bo mpi me songa bo nde: “Mbote na beno!” Bo me bwa na makulu na yandi, mpi ‘bo me fukimina yandi.’ Ebuna Yezu me songa bo nde: “Beno wa boma ve! Beno kwenda kupesa nsangu yai na bampangi na mono sambu bo kwenda na Galilea, mpi bo ta mona mono kuna.”—Matayo 28:9, 10.

Ntangu ntoto nikanaka mpi bawanzio basikaka, basoda yina vandaka na maziamu ‘tekitaka mpi kumaka bonso bantu ya kufwa.’ Ntangu bo telamaka, bo kwendaka na mbanza mpi “zabisaka bamfumu ya banganga-nzambi mambu yonso yina salamaka.” Ebuna, banganga-nzambi solulaka ti bankuluntu ya Bayuda. Bo bakaka lukanu ya kufuta basoda mbongo sambu bo bumba diambu yina mpi bo tuba nde: “Balongoki na yandi kwisaka na mpimpa mpi bo yibaka yandi ntangu beto vandaka kulala.”—Matayo 28:4, 11, 13.

Kana soda ya Roma me lala na kisika ya kisalu, bo lenda fwa yandi; yo yina banganga-nzambi me pesa basoda yina lusilu yai: “Kana guvernere kuwa mambu yai [mutindu bo me kusa nde bo lalaka], beto ta tendudila yandi yo mpi beno ta vanda ve ti mfunu ya kudiyangisa.” (Matayo 28:14) Basoda me baka mbongo yina mpi me sala mutindu banganga-nzambi me zabisa bo. Yo yina, disolo yai ya luvunu ya ke tuba nde bo yibaka nitu ya Yezu mwanganaka na kati ya Bayuda.

Maria Magdala ke landa kudila na maziamu. Yandi me yambula mwa fioti kudila sambu na kutala na kati ya maziamu mpi me mona bawanzio zole me lwata bilele ya mpembe. Bo me vanda kisika bo tulaka mvumbi ya Yezu, wanzio mosi me vanda kisika ntu vandaka mpi ya nkaka kisika makulu vandaka. Bo me yula Maria nde: “Nkento, sambu na nki nge ke dila?” Yandi me songa bo nde: “Bo me katula Mfumu na mono, mpi mono me zaba ve kisika bo me tula yandi.” Ntangu Maria me baluka, yandi me mona muntu ya nkaka. Muntu yango me yula Maria mutindu bawanzio yulaka yandi, na nima yandi me yula diaka nde: “Nge ke sosa nani?” Maria me yindula nde yandi kele muntu ya ke salaka bilanga, yo yina yandi me tuba nde: “Mfumu, kana nge muntu me katula yandi, songa mono kisika nge me tula yandi, ebuna mono ta baka yandi.”—Yoane 20:13-15.

Yo kele pwelele nde Maria ke solula ti Yezu yina me futumuka, kansi Maria ke zaba yandi diaka ve. Ntangu yandi me tuba nde: “Maria!” yandi me zaba nde yo kele Yezu, sambu yandi me yibuka mutindu Yezu vandaka kusolula ti yandi. Maria me tuba na kiese yonso nde: “Rabuni!” (yina ke tendula “Longi!”) Kansi, sambu Maria me wa boma nde Yezu ta mata na zulu, yandi me kanga Yezu ngolo. Ebuna, Yezu me longisila yandi nde: “Bika kukangama na mono, sambu mono me tombuka ntete ve na Tata. Kansi kwenda na bampangi na mono mpi tubila bo nde, ‘Mono ke tombuka na Tata na mono mpi Tata na beno mpi na Nzambi na mono mpi Nzambi na beno.’”—Yoane 20:16, 17.

Maria me kwenda ntinu kisika yina bantumwa mpi balongoki ya nkaka me vukana. Yandi me zabisa bo nde: “Mono me mona Mfumu!” mpi yandi me tubila mambu yina bankento ya nkaka mpi songaka bo. (Yoane 20:18) Ata mpidina, bo me mona mambu yina yandi me songa bo “bonso mambu ya mpamba.”—Luka 24:11.

Beto kele na Lumingu Nisani 16, mpi balongoki kele na mawa. Bo ke bakisa ve sambu na nki maziamu me bikala ya mpamba. (Matayo 28:9, 10; Luka 24:11) Na nima ya midi ya kilumbu yina, Kleopasi ti longoki ya nkaka me katuka na Yeruzalemi mpi ke kwenda na Emausi; yo kele na kiteso ya bakilometre 11 katuka na Yeruzalemi.

Ntangu bo ke tambula, bo ke tubila mambu yina me katuka kusalama. Na nima, munzenza mosi me kutana ti bo. Yandi me yula bo nde: “Inki mambu yai beno ke solula na ntangu beno ke tambula?” Kleopasi me yula yandi nde: “Keti nge kele munzenza mpi nge ke zingaka nge mosi na Yeruzalemi, yo yina nge me zaba ve mambu yina me katuka kubwa kuna na bilumbu yai?” Yandi me yula bo nde: “Inki mambu?”—Luka 24:17-19.

Bo me tuba nde: “Mambu ya Yezu muntu ya Nazareti. . . . Beto vandaka kutula kivuvu nde muntu yai vandaka muntu yina ta gulusa Izraele.”—Luka 24:19-21.

Kleopasi ti nduku na yandi me yantika kutela muntu yango mambu yina me salama kilumbu yina. Bo me tuba nde bankento ya nkaka kwendaka na maziamu yina bo zikaka Yezu kansi bo monaka yo ya mpamba, mpi bankento yango monaka na meso na bo mosi diambu mosi ya kuyituka, bawanzio basikilaka bo mpi songaka bo nde Yezu kele na luzingu. Kleopasi ti nduku na yandi me tuba diaka nde, bantu ya nkaka mpi kwendaka na maziamu mpi “monaka yo mutindu bankento yina tubaka.”—Luka 24:24.

Yo kele pwelele nde, balongoki yai zole ke bakisa ve ntendula ya mambu yina me salama. Munzenza yina me sungika ngindu ya mbi yina vandaka kupesa bo mpasi na ntima; yandi me tuba ti kiyeka yonso nde: “O bantu ya kukonda mayele mpi yina ntima na bo ke kwikilaka ve nswalu mambu yonso yina bambikudi tubaka! Keti yo vandaka ve mfunu nde Kristu kukutana ti mambu yai mpi kukota na nkembo na yandi?” (Luka 24:25, 26) Ebuna, yandi me tendudila bo baverse mingi ya Masonuku ya vandaka kutubila Kristu.

Nsuka-nsuka, bo tatu me kuma pene-pene ya Emausi. Balongoki yina zole ke zola kuzaba mambu mingi, yo yina bo me bondila munzenza yina nde: “Bikala ti beto, sambu nkokila me bwa mpi mpimpa ke zola kubwa.” Yandi me ndima kubikala mpi bo me yidika kima ya kudia. Ntangu munzenza yina me sala kisambu, me zenga dimpa, mpi me pesa bo yo, bo me zaba nde yo kele Yezu; kansi na mbala mosi yandi me vila. (Luka 24:29-31) Ntangu yai, bo me ndima kibeni nde Yezu kele na luzingu.

Balongoki yai zole me wa kiese mingi sambu na mambu yina bo me kutana ti yo mpi me tuba nde: “Keti bantima na beto vandaka kupela ve ntangu yandi vandaka kusolula ti beto na nzila, ntangu yandi vandaka kutendudila beto Masonuku mbote-mbote?” (Luka 24:32) Bo me vutuka nswalu na Yeruzalemi mpi me kuta bantumwa ti balongoki ya nkaka kuna. Na ntwala nde Kleopasi ti nduku na yandi kutubila mambu yina bo me kutana ti yo, bo me wa bankaka ke tuba nde: “Ya kieleka Mfumu futumukaka, mpi yandi monanaka na Simoni!” (Luka 24:34) Na nima, balongoki yai zole me tuba mutindu Yezu me monana na bo. Ya kieleka, bo mpi me mona kibeni Yezu.

Yezu me basikila bo na nzo yina bo kele ebuna bo yonso me yituka. Yo kele diambu ya kuyituka sambu bo kangaka bakielo sambu bo vandaka kuwa boma ya Bayuda. Ata mpidina, Yezu me telama na kati-kati na bo. Yandi me tubila bo na mawete yonso nde: “Ngemba kuvanda na beno.” Kansi bo me wa boma. Kaka mutindu yo salamaka na mbala me luta, bo ke ‘yindula nde bo me mona mpeve.’—Luka 24:36, 37; Matayo 14:25-27.

Sambu na kumonisa nde yandi kele ve mpeve mosi buna to kima mosi ya bo ke yindula, kansi yandi kele kibeni ti nitu ya kinsuni, Yezu me songa bo maboko ti makulu na yandi mpi me tuba nde: “Sambu na nki beno me kuma kisaka-saka, mpi sambu na nki beno kele na keti-keti na bantima na beno? Beno tala maboko na mono ti makulu na mono, yo kele mono kibeni; beno simba mono mpi beno tala, sambu mpeve ke vandaka ve ti nsuni mpi mikwa mutindu beno ke mona mono kele na yo.” (Luka 24:36-39) Bo me wa kiese mingi mpi me yituka, kansi bo kele ti mwa baketi-keti sambu na kundima.

Sambu na kusadisa bantumwa na kubakisa nde yo kele kibeni yandi, Yezu me yula bo nde: “Keti beno kele ti kima ya kudia awa?” Bo me pesa yandi kitini ya mbisi ya masa ya kuyoka, ebuna yandi me baka yo mpi me dia. Na nima, yandi me tuba nde: “Yai mambu ya mono songaka beno ntangu mono vandaka ntete ti beno [na ntwala nde mono fwa], nde mambu yonso yina bo me sonikaka sambu na mono na Nsiku ya Moize, na Bambikudi, mpi na Bankunga fwete lungana.”—Luka 24:41-44.

Yezu sadisaka Kleopasi ti nduku na yandi na kubakisa Masonuku mpi ntangu yai yandi me sadisa balongoki yonso yina me vukana awa; yandi me tuba nde: “Bo me sonikaka nde: Kristu ta mona mpasi mpi ta telama na kati ya bafwa na kilumbu ya tatu, mpi na zina na yandi, bo ta samuna na makanda yonso—yantika na Yeruzalemi nde bantu fwete balula ntima sambu bo lolula masumu na bo. Beno fwete vanda bambangi ya mambu yai.”—Luka 24:46-48.

Sambu na kikuma mosi buna, ntumwa Toma kele ve pana. Na bilumbu yina me landa, balongoki ya nkaka me zabisa yandi na kiese yonso nde: “Beto me mona Mfumu!” Kansi, Toma me tuba nde: “Kana mono mona ve kidimbu ya minsonso na maboko na yandi mpi kana mono tula ve musapi na mono na kidimbu ya minsonso mpi mono tula ve diboko na mono na mpanzi na yandi, mono ta kwikila ve ata fioti.”—Yoane 20:25.

Bilumbu nana na nima, balongoki me vukana diaka na nzo mosi mpi bakielo kele ya kukanga kansi ntangu yai Toma kele ti bo. Yezu me basika na nitu ya kinsuni mpi me telama na kati-kati na bo, ebuna yandi me pesa bo mbote nde: “Ngemba kuvanda na beno.” Yandi me tala Toma mpi me tuba nde: “Tula musapi na nge awa, mpi tala maboko na mono, baka diboko na nge, tula yo na mpanzi na mono, mpi bika kutula ntembe kansi kwikila.” Toma me yituka mpi me tuba nde: “Mfumu na mono mpi Nzambi na mono!” (Yoane 20:26-28) Ya kieleka ntangu yai, Toma me ndima kibeni nde Yezu kele na luzingu, yandi kele kigangwa ya kimpeve mpi mumonisi ya Yehowa Nzambi.

Yezu me songa Toma nde: “Keti nge me kwikila sambu nge me mona mono? Kiese na bantu yina ke mona ve kansi ke kwikila.”—Yoane 20:29.