NTENDULA YA BAVERSE YA BIBLIA
Baroma 10:13—‘Kubinga Zina ya Mfumu’
“Konso muntu yina ke binga zina ya Yehowa ta guluka.”—Baroma 10:13, Mbalula ya Nsi-Ntoto ya Mpa.
“Konso muntu yina ta binga zina ya Mfumu ta guluka.”—Baroma 10:13, Mbalula ya King James.
Ntendula ya Baroma 10:13
Nzambi ke pona-ponaka ve, mpi yandi ke pesa bantu yonso dibaku ya kuguluka mpi ya kubaka luzingu ya mvula na mvula, kukonda kutadila insi na bo, mpusu na bo ya nitu, ata kana bo kele bamvwama to bansukami. Kansi, sambu na kubaka mambote yina, beto fwete binga zina ya Yehowa. Mpi Yehowa kele zina ya Nzambi Nkwa-Ngolo Yonso.a—Nkunga 83:18.
Na Biblia, bangogo ‘kubinga na zina ya Yehowa’ ke tendula ve kaka kuzaba zina ya Nzambi mpi kusadila yo na mambu ya lusambu. (Nkunga 116:12-14) Yo ke tendula mpi kutudila Nzambi ntima mpi kusosa lusadisu na yandi.—Nkunga 20:7; 99:6.
Zina ya Nzambi vandaka mfumu mingi sambu na Yezu Kristu. Mambu ya ntete ya yandi tubaka na kisambu ya mbandu yo yai: “Tata na beto yina kele na zulu, zina na nge kuvanda ya santu.” (Matayo 6:9) Yezu tubaka mpi nde beto fwete zaba, kulemfuka, mpi kuzola Munkwa ya zina yina kana beto ke zola kubaka luzingu ya mvula na mvula.—Yoane 17:3, 6, 26.
Sambu na nki beto ke tuba nde Yehowa kele “Mfumu” yina bo ke tubila na Baroma 10:13 na Mbalula ya King James? Sambu verse yai me vutukila mambu yina kele na Yoele 2:32; mpi na masonama ya kisina ya Kiebreo, na kisika yina beto ke kuta zina ya Nzambi, kansi ve titre “Mfumu.”b
Mambu ya Bo Ke Tubila na Baverse Yina Kele na Ntwala mpi na Nima ya Baroma 10:13
Na Baroma kapu 10, Biblia ke monisa nde sambu muntu kuvanda ti kinduku ya mbote ti Nzambi, yandi fwete kwikila na Yezu Kristu. (Baroma 10:9) Mambu mingi ya me katuka na Kuwakana ya Ntama ke ndimisa dibanza yai. Muntu ke monisaka lukwikilu ntangu yandi ‘ke tubaka na meso ya bantu yonso.’ Mpi kuzabisa nsangu ya mbote ya luguluku na bantu yina ke kwikilaka ve kele na kati ya kutuba yina. Na mutindu yina, bantu ya nkaka ke bakaka dibaku ya kukuma ti lukwikilu yina ke sadisaka na kubaka luzingu.—Baroma 10:10, 14, 15, 17.
Tanga Baroma kapu 10 ti banoti na nsi ya lutiti yina ke tendula mambu mpi bareferanse yina kele na kati-kati.
a Zina ya Nzambi kele mbala kiteso ya 7 000 na bamaniskri ya ntama ya Biblia. Na Kiebreo, bo ke sonikaka zina ya Nzambi na bisono iya, yina bo ke bingaka Tétragramme. Mbala mingi bo ke balulaka zina yina na Kikongo nde “Yehowa”; kansi bantu ya nkaka ya mayele ke sepelaka kubalula yo nde “Yahwe.”
b Yo ke pwelele nde Bakristu yina sonikaka Biblia vandaka kusadila zina ya Nzambi ntangu bo vandaka kuvutukila baverse ya “Kuwakana ya Ntama” yina vandaka ti zina ya Nzambi. Mukanda mosi (The Anchor Bible Dictionary) ke tuba mambu yai: “Kele ti mwa mambu ya ke ndimisa nde Tétragramme, disongidila zina ya Nzambi, Yahwe, vandaka na baverse yonso to na ndambu ya baverse ya Kuwakana ya Ntama yina bo vutukilaka na Kuwakana ya Mpa ntangu bo sonikaka Kuwakana ya Mpa na mbala ya ntete.” (Volume 6, lutiti 392) Sambu na kuzaba mambu mingi, tala Bangindu ya Ngika A5 “Zina ya Nzambi na Masonuku ya Kigreki ya Bukristu” ya Biblia—Mbalula ya Nsi-Ntoto ya Mpa ya kulonguka. Bangindu ya Ngika C2 kele ti liste ya bambalula ya Biblia yina ke sadilaka zina ya Nzambi na Baroma 10:13.