Ntama ve ti Babele kuvandaka ti bwala mosi, zina na yo Ure, kisika bantu vandaka kusambila banzambi mingi kansi Yehowa ve. Kansi, kuvandaka ti muntu mosi na Ure yina vandaka kusambila kaka Yehowa. Zina na yandi Abrahami.

Yehowa tubilaka Abrahami nde: ‘Bikisa nzo na nge ti bampangi na nge, mpi kwenda na insi yina mono ta songa nge.’ Ebuna Nzambi silaka yandi nde: ‘Nge ta kuma dikanda ya nene, mpi mono ta sadila bantu mingi ya ntoto ya mvimba mambu ya mbote sambu na nge.’

Abrahami zabaka ve kisika Yehowa vandaka kutinda yandi, kansi yandi tulaka ntima na Yehowa. Yo yina, Abrahami, nkento na yandi Sara, tata na yandi Tera, ti mwana-mpangi na yandi Loti, kangaka bima mpi na bulemfu yonso bo yantikaka nzietelo na bo ya nda.

Abrahami vandaka ti bamvula 75 ntangu nsuka-nsuka, yandi ti dibuta na yandi, kumaka na insi yina Yehowa zolaka nde bo mona. Yo vandaka insi ya Kanana. Kuna Nzambi solulaka ti Abrahami mpi salaka lusilu yai: ‘Insi yai yonso ya nge ke mona na nziunga na nge, mono ta pesa yo na bana na nge.’ Kansi Abrahami ti Sara vandaka minunu mpi bo vandaka ve ti mwana. Yo yina, inki mutindu Yehowa zolaka kulungisa lusilu yina?

Abrahami ti Sara kwelanaka banda bamvula mingi. Bo bikaka luzingu na bo ya mbote na Ure mpi bo vandaka kuzinga na tenta. Kansi Sara bokutaka ve, sambu yandi vandaka kutula ntima na Yehowa.

Sara vandaka kuzola kubuta mingi yo yina yandi songaka Abrahami nde: ‘Kana nsadi na mono Agare buta mwana, yo ta vanda bonso mwana na mono mosi.’ Na nima, Agare butaka mwana-bakala. Zina na yandi Ismaele.

Bamvula mingi na nima, ntangu Abrahami kumaka ti bamvula 99 mpi Sara bamvula 89, bantu tatu kwisaka kutala bo. Abrahami vandisaka bo na nsi ya nti mpi bo diaka kumosi. Keti nge me zaba kana banzenza yina vandaka banani? Bo vandaka bawanzio! Bo songaka Abrahami nde: ‘Mvula ke kwisa na ntangu yai, nge ti nkento na nge, beno ta vanda ti mwana-bakala.’ Sara vandaka kuwa katuka na tenta. Yandi sekaka mpi yindulaka nde: ‘Keti mono lenda buta kibeni mwana, ata mono kele mununu?’

Na mvula yina landaka, Sara butaka mwana-bakala, mutindu wanzio ya Yehowa silaka. Abrahami pesaka yandi zina Izaki, yina ke tendula “Maseka.”

Ntangu Izaki zolaka kulungisa bamvula tanu, Sara monaka Ismaele ke seka yandi. Sara sosaka kutanina mwana na yandi, yo yina yandi songaka Abrahami na kukula Agare ti Ismaele. Na luyantiku, Abrahami vandaka kuzola ve kusala yo. Kansi Yehowa tubilaka Abrahami nde: ‘Wa Sara. Mono ta keba Ismaele. Kansi, balusilu na mono ta lungana na nzila ya Izaki.’