Loti vandaka kuzinga ti Abrahami, ngwasi na yandi, na insi ya Kanana. Nsuka-nsuka, Abrahami ti Loti kumaka ti bambisi mingi yo yina kisika vandaka ve sambu na bo yonso. Abrahami tubilaka Loti nde: ‘Beto lenda zinga diaka ve kisika mosi. Pardo pona ndambu yina nge ke zola kukwenda, ebuna mono ta kwenda na ndambu yina ya nkaka.’ Abrahami monisaka kikalulu ya kukonda bwimi, mpidina ve?

Loti monaka kitini mosi ya ntoto ya kitoko, pene-pene ya mbanza mosi, zina na yo Sodome. Masa ti matiti ya mubisu vandaka mingi. Yo yina, yandi solaka kisika yina mpi kwendaka kuna ti dibuta na yandi.

Bantu ya Sodome ti ya Gomore, mbanza yina vandaka pene-pene, vandaka bantu ya mbi mingi. Na kutuba ya mbote, bo vandaka mbi mingi yo yina Yehowa bakaka lukanu ya kufwa bambanza yina. Kansi Nzambi vandaka kuzola kugulusa Loti ti dibuta na yandi, yo yina yandi tindaka bawanzio zole sambu na kukebisa bo: ‘Beno sala nswalu! Beno basika na mbanza yai! Yehowa ke fwa yo.’

Loti basikaka ve nswalu. Yandi vandaka kusukinina. Yo yina, bawanzio simbaka Loti, nkento na yandi, ti bana na yandi zole ya bankento na maboko mpi basisaka bo na mbanza yina; bo tubaka nde: ‘Beno baka ntinu! Beno tina sambu na luzingu na beno, mpi beno tala ve na nima. Kana beno tala na nima, beno ta fwa!’

Ntangu bo kumaka na mbanza Soare, Yehowa nokisaka tiya ti sufre na zulu ya Sodome ti Gomore. Bambanza zole yina fwaka ya mvimba. Ntangu nkento ya Loti kolamaka na Yehowa mpi talaka na nima, yandi kumaka dikunzi ya mungwa! Kansi Loti ti bana na yandi ya bankento vandaka na lutaninu sambu bo lemfukaka na Yehowa. Yo fwete vanda nde bo waka mawa mingi mutindu nkento ya Loti kolamaka. Kansi bo sepelaka sambu bo landaka bantuma ya Yehowa.

Abrahami longaka mwana na yandi Izaki na kuzola Yehowa mpi na kutula ntima na balusilu ya Yehowa. Kansi ntangu Izaki kumaka ti bamvula kiteso ya 25, Yehowa lombaka Abrahami na kusala kima mosi yina vandaka mpasi mingi. Inki kima yango?

Nzambi songaka Abrahami nde: ‘Pardo, baka mwana na nge mosi kaka mpi pesa yandi bonso kimenga na ngumba mosi na nsi ya Moria.’ Abrahami zabaka ve ata fioti sambu na nki Yehowa lombaka yandi na kutambika Izaki. Ata mpidina, yandi lemfukaka na Yehowa.

Na suka-suka ya kilumbu yina landaka, Abrahami bakaka Izaki ti bansadi zole mpi bo kwendaka na ndambu ya Moria. Na nima ya bilumbu tatu, bo kumaka kumona bangumba yina na ntama. Abrahami songaka bansadi na yandi na kuvingila, ebuna yandi ti Izaki kwendaka kupesa kimenga. Abrahami pesaka Izaki bankuni ya kutudila tiya sambu yandi nata yo, ebuna Abrahami bakaka mbele. Izaki yulaka tata na yandi nde: ‘Mbisi ya beto ta pesa kimenga kele na wapi?’ Abrahami vutulaka nde: ‘Mwana na mono, Yehowa ta pesa yo.’

Nsuka-nsuka, ntangu bo kumaka na ngumba yina, bo tungaka mesa-kimenga. Ebuna, Abrahami kangaka Izaki bansinga na maboko ti makulu mpi tulaka yandi na zulu ya mesa-kimenga.

Abrahami bakaka mbele. Na ntangu yina, wanzio ya Yehowa bingaka katuka na zulu: ‘Abrahami! Kusala mwana mbi ve! Ntangu yai mono me zaba nde nge kele ti lukwikilu na Nzambi sambu nge zolaka kupesa mwana na nge kimenga.’ Ebuna Abrahami monaka dimeme ya bakala yina bibongo na yo me kangama na kamwa-nti. Yandi kangulaka Izaki bansinga nswalu mpi pesaka dimeme yina kimenga.

Katuka kilumbu yina, Yehowa kumaka kubinga Abrahami nduku na yandi. Keti nge ke zaba sambu na nki? Abrahami salaka mambu yonso yina Yehowa lombaka yandi na kusala, ata ntangu yandi vandaka kubakisa ve sambu na nki Yehowa lombaka yandi na kusala yo.

Yehowa vutukilaka lusilu yina yandi pesaka Abrahami: ‘Mono ta sakumuna nge, mpi mono ta kumisa bana na nge mingi.’ Yo ke tendula nde Yehowa zolaka kusakumuna bantu yonso ya mbote na nzila ya dibuta ya Abrahami.