Izaki vandaka ti bamvula 40 ntangu yandi kwelaka Rebeka. Yandi zolaka Rebeka mingi kibeni. Na nima, bo butaka bana zole ya babakala—mapasa.

Zina ya mbuta Ezau, mpi zina ya leke, Yakobi. Ezau vandaka kuzola kusala na nganda, mpi yandi zabaka kuzomba bambisi mbote. Kansi Yakobi vandaka kuzola kubikala na nzo.

Na bilumbu yina, bo vandaka kupesa mwana ya ntete ntoto ti mbongo mingi kana tata na yandi me fwa. Bo vandaka kubinga yo dikabu to difwa. Na dibuta ya Izaki, dikabu vandaka kutendula mpi kuvanda na kati ya balusilu yina Yehowa pesaka Abrahami. Ezau vandaka kudiyangisa ve sambu na balusilu yina, kansi Yakobi zabaka nde yo vandaka mfunu mingi.

Kilumbu mosi, Ezau vandaka ya kulemba mingi ntangu yandi vutukaka na nzo na nima ya kuzomba. Yandi waka nsudi ya madia ya kitoko yina Yakobi vandaka kulamba mpi tubaka nde: ‘Mu ke na nzala ya ngolo! Pesa mono ndambu ya supu yina ya mbwaki!’ Yakobi tubaka nde: ‘Mono ta pesa nge, kansi sila mono ntete nde mono ta baka dikabu na nge.’ Ezau tubaka nde: ‘Mono ke kudiyangisaka ve sambu na dikabu na mono! Nge lenda baka yo. Mono kele kaka na mfunu ya kudia.’ Keti nge ke yindula nde diambu yina Ezau salaka vandaka diambu ya mayele? Ve. Ezau tekaka kima mosi ya mfunu mingi kaka sambu na supu ya mbwaki.

Ntangu Izaki kumaka mununu, ntangu lungaka sambu yandi pesa mwana na yandi ya ntete lusakumunu. Kansi Rebeka sadisaka Yakobi, yina vandaka leke, na kubaka lusakumunu yina. Ntangu Ezau zabaka diambu yina, yandi waka makasi mingi mpi yandi kanaka kufwa mpangi na yandi. Izaki ti Rebeka vandaka kusosa kutanina Yakobi, yo yina bo songaka yandi nde: ‘Kwenda mpi bikala ti Labani, mpangi ya mama na nge, tii kuna makasi ya Ezau ta mana.’ Yakobi waka ndongisila ya bibuti na yandi mpi yandi tinaka sambu na kugulusa luzingu na yandi.

Yehowa silaka Yakobi nde yandi ta tanina yandi mutindu yandi taninaka Abrahami ti Izaki. Yakobi kumaka kuzinga na kisika ya bo ke bingaka Arani, kisika yandi kwelaka, kumaka ti dibuta ya nene, mpi kumaka ti bimvwama mingi kibeni.

Nsuka-nsuka, Yehowa songaka Yakobi nde: ‘Vutuka na insi na nge.’ Yo yina Yakobi ti dibuta na yandi yantikaka nzietelo ya nda ya kuvutuka na insi na yandi. Na nzila, bantu kwisaka kusonga Yakobi nde: ‘Mpangi na nge Ezau ke kwisa, mpi yandi kele ti bantu 400!’ Yakobi waka boma nde Ezau ke sosa kusala yandi ti dibuta na yandi mbi. Yandi sambaka Yehowa nde: ‘Pardo gulusa mono na maboko ya mpangi na mono.’ Kilumbu yina landaka, Yakobi tindilaka Ezau dikabu ya mameme, bankombo, bangombe, bashamo, ti bampunda mingi.

Na mpimpa yina, ntangu Yakobi vandaka yandi mosi, yandi monaka wanzio mosi! Wanzio yantikaka kunwana ti yandi. Bo nwanaka tii na suka. Ata Yakobi vandaka na mpasi, yandi yambulaka ve. Wanzio tubaka nde: ‘Bika mono, mono kwenda.’ Kansi Yakobi tubaka nde: ‘Ve, mono ta bika nge ve tii kuna nge ta sakumuna mono.’

Nsuka-nsuka wanzio sakumunaka Yakobi. Ntangu yai Yakobi zabaka nde Yehowa ta bika ve nde Ezau kusala yandi mbi.

Na suka yina, Yakobi talaka na ntama mpi yandi monaka Ezau ti bantu 400. Yakobi kwendaka na ntwala ya dibuta na yandi mpi fukamaka mbala nsambwadi na ntwala ya mpangi na yandi. Ezau bakaka ntinu mpi yambaka mpangi na yandi. Bo dilaka bo zole mpi bo wakanaka. Nge ke yindula nde Yehowa waka nki mutindu ntangu yandi monaka mutindu Yakobi yidikaka diambu yina?

Na nima, Ezau vutukaka na nzo na yandi, mpi Yakobi kwendaka na nzo na yandi. Yakobi vandaka ti bana-babakala 12. Bazina na bo yo yai: Rubeni, Simeoni, Levi, Yuda, Dani, Naftali, Gadi, Asere, Isakare, Zebuloni, Yozefi, mpi Benyamini. Mwana mosi na kati bo—Yozefi—Yehowa sadilaka yandi sambu na kugulusa bantu na yandi. Keti nge me zaba nki mutindu? Bika beto tala.