Yozefi vandaka na kati ya bana ya Yakobi ya leke. Bayaya na yandi ya babakala bakisaka nde tata na bo vandaka kuzola Yozefi mingi. Nge ke yindula nde bo vandaka kutadila yandi nki mutindu? Bo vandaka kuwila yandi kimpala mpi kumenga yandi. Ntangu Yozefi lalaka bandosi ya kuyituka, yandi songaka yo na bampangi na yandi. Bo yindulaka nde bandosi yina ke tendula nde kilumbu kele bo ta fukama na ntwala na yandi. Ebuna bo kumaka kumenga yandi mingi kuluta!

Kilumbu mosi, bampangi ya Yozefi vandaka kukeba mameme pene-pene ya mbanza Shekemi. Yakobi tindaka Yozefi na kwenda kutala kana bo kele mbote. Bo monaka Yozefi na kintama mpi bo tubaka bo na bo nde: ‘Muntu yina ke lalaka bandosi ke kwisa. Beto fwa yandi!’ Bo simbaka yandi mpi bo losaka yandi na dibulu ya mudindu. Kansi Yuda, mpangi mosi ya Yozefi, tubaka nde: ‘Beno fwa yandi ve! Kansi beto teka yandi bonso mpika.’ Yo yina, bo tekaka Yozefi na mbongo 20 ya bibende na bantu ya Madiani yina vandaka kukwenda na Ezipte.

Na nima, bampangi ya Yozefi dindisaka mvwela na yandi na menga ya nkombo, bo tindilaka tata na bo mvwela yina, mpi bo tubaka nde: ‘Keti yai mvwela ya mwana na nge ve?’ Yo yina Yakobi yindulaka nde mbisi mosi ya mfinda fwaka Yozefi. Ntima na yandi pasukaka. Muntu ya kukatula yandi mawa vandaka ve.

Na Ezipte, bo tekaka Yozefi mpi yandi kumaka mpika ya mfumu mosi ya basoda, zina na yandi Potifare. Kansi Yehowa vandaka ti Yozefi. Potifare monaka nde Yozefi vandaka kusala kisalu mbote mpi nde yandi lendaka kutudila yandi ntima. Kukonda kusukinina, Yozefi kumaka kutala bima ya Potifare yonso.

Nkento ya Potifare monaka nde Yozefi vandaka kitoko mpi ngolo. Konso kilumbu yandi vandaka kulomba Yozefi na kulala ti yandi. Yozefi salaka nki? Yandi buyaka mpi tubaka nde: ‘Ve! Yo kele mbi. Mfumu na mono ke tudilaka mono ntima, mpi nge kele nkento na yandi. Kana mono lala ti nge, mono ta sala disumu na meso ya Nzambi!’

Kilumbu mosi, nkento ya Potifare mekaka na ngolo na kupusa Yozefi na kulala ti yandi. Yandi simbaka Yozefi na bilele, kansi Yozefi tinaka. Ntangu Potifare vutukaka na nzo, nkento na yandi tubaka nde Yozefi sosaka kulala ti yandi. Nkento yina tubaka ve masonga. Potifare waka makasi mingi, ebuna yandi tulaka Yozefi na boloko. Kansi Yehowa vilaka ve Yozefi.

Ntangu Yozefi vandaka na boloko, Farao, ntotila ya Ezipte, lalaka bandosi mpi muntu mosi ve kukaka kutendula yo. Nsadi na yandi mosi songaka yandi nde Yozefi lenda pesa ntendula ya bandosi na yandi. Farao tindaka bantu nswalu na kubinga Yozefi.

Farao yulaka yandi nde: ‘Keti nge lenda tendula bandosi na mono?’ Yozefi songaka Farao nde: ‘Ezipte ta vanda ti madia mingi na nsungi ya bamvula nsambwadi, na nima yo ta vanda ti bamvula nsambwadi ya nzala. Pona muntu mosi ya mayele sambu na kubumba madia sambu bantu na nge kufwa ve na nzala.’ Farao vutulaka nde: ‘Mono me pona nge! Nge ta vanda muntu ya zole ya kuluta mfunu na Ezipte!’ Inki mutindu Yozefi zabaka ntendula ya bandosi ya Farao? Yehowa muntu sadisaka yandi.

Na bamvula nsambwadi yina landaka, Yozefi bumbaka madia. Na nima nzala kotaka na ntoto ya mvimba, kaka mutindu Yozefi tubaka. Bantu vandaka kukatuka na bisika yonso sambu na kwisa kusumba madia na Yozefi. Tata na yandi Yakobi waka nde madia vandaka na Ezipte, yo yina yandi tindaka bana na yandi kumi kuna sambu na kusumba bima.

Bana ya Yakobi kwendaka na Yozefi mpi Yozefi zabaka bo mbala mosi. Kansi bampangi na yandi zabaka ve nde yandi Yozefi. Bo fukamaka na ntwala na yandi kaka mutindu yandi lalaka ndosi ntangu yandi vandaka leke. Yozefi sosaka kuzaba kana bampangi na yandi vandaka kaka ti kimbeni. Yo yina yandi songaka bo nde: ‘Beno me kwisa kutala insi na mayele. Beno ke sosa kuzaba bisika ya insi na beto yina kele ve ya kutanina mbote.’ Bo tubaka nde: ‘Ve! Beto kele bampangi 12 na Kanana. Mpangi na beto mosi me fwaka, mpi mwana-nsuka kele ti tata na beto.’ Ebuna Yozefi tubaka nde: ‘Beno natila mono leke na beno, ebuna mono ta ndima beno.’ Bo vutukaka kisika ya tata na bo.

Ntangu madia ya dibuta na yandi manaka diaka, Yakobi tindaka diaka bana na yandi na Ezipte. Ntangu yai bo kwendaka ti Benyamini, leke na bo. Sambu na kumeka bampangi na yandi, Yozefi bumbaka dikopa na yandi ya arza na saki ya bambuma ya Benyamini mpi na nima yandi tubaka nde bampangi na yandi me yiba yo. Ntangu bansadi ya Yozefi monaka dikopa yina na saki ya Benyamini, bampangi na yandi waka mpasi na ntima. Bo bondilaka Yozefi na kupesa bo ndola na kisika ya Benyamini.

Yozefi zabaka nde bampangi na yandi me sobaka. Yozefi lendaka diaka ve kubumbila bo mawi na yandi. Yandi dilaka mpi tubaka nde: ‘Mono kele mpangi na beno, Yozefi. Keti tata na mono kele kaka na luzingu?’ Bampangi na yandi yitukaka mingi. Yandi songaka bo nde: ‘Beno kudiwa ve mbi sambu na mambu yina beno salaka mono. Nzambi tindaka mono awa sambu na kugulusa luzingu ya bantu. Ntangu yai, beno kwenda nswalu mpi beno nata tata na mono awa.’

Bo kwendaka na kisika ya tata na bo ti nsangu yina ya mbote mpi bo nataka yandi na Ezipte. Nsuka-nsuka, na nima ya bamvula mingi, Yozefi ti tata na yandi vandaka diaka kisika mosi.